Өзүнү Аллаһын мәһәббәтиндә сахла!
«Севимлиләр, өзүнүзү... әбәди һәјата ҝәтирәҹәк... Аллаһын мәһәббәтиндә сахлајын» (ЈӘҺУДА 20, 21).
1, 2. Өзүмүзү Аллаһын мәһәббәтиндә неҹә сахлаја биләрик?
ЈЕҺОВА бәшәријјәти елә севди ки, ваһид Оғлуна иман едәнләрин һамысынын әбәди һәјаты олсун дејә, ону гурбан верди (Јәһја 3:16). Белә бир мәһәббәти өз үзәримиздә һисс етмәк неҹә дә ҝөзәлдир! Әҝәр сән Јеһоваја хидмәт едирсәнсә, әлбәттә ки, Онун мәһәббәтини әбәдијјән дујмаг истәјирсән.
2 Шаҝирд Јәһуда өзүмүзү Аллаһын мәһәббәтиндә неҹә сахлаја биләҹәјимизи изаһ едир: «Өзүнүзү сон дәрәҹә мүгәддәс олан иманынызын тәмәли үзәриндә инкишаф етдирин вә Мүгәддәс Руһла дуа един. Сизи әбәди һәјата ҝәтирәҹәк олан Рәббимиз Иса Мәсиһин мәрһәмәтини ҝөзләјәрәк, өзүнүзү Аллаһын мәһәббәтиндә сахлајын» (Јәһуда 20, 21). Аллаһын Кәламыны өјрәнмәјин вә хош хәбәрин тәблиғиндә иштирак етмәјин сајәсиндә, биз өзүмүзү «мүгәддәс олан иманынызын», јә’ни мәсиһчи тә’лимләринин тәмәли үзәриндә инкишаф етдиририк. Аллаһын мәһәббәтиндә галмаг үчүн «Мүгәддәс Руһла», јә’ни онун тә’сири алтында дуа етмәлијик. Әбәди һәјат мүкафатыны алмаг үчүн, Иса Мәсиһин фидијә гурбанлығына да иман етмәлијик (1 Јәһја 4:10).
3. Нәјә ҝөрә бә’зиләри артыг Јеһованын Шаһиди дејилләр?
3 Имана малик оланлардан бә’зиләри өзләрини Аллаһын мәһәббәтиндә сахламамышлар. Чүнки онлар ҝүнаһлы һәјат тәрзини сечмиш вә артыг Јеһованын Шаһиди дејилләр. Бундан гачмаг неҹә мүмкүндүр? Нөвбәти фикирләрин үзәриндә дүшүнмәк ҝүнаһдан гачмаға вә өзүмүзү Аллаһын мәһәббәтиндә сахламаға көмәк едәҹәк.
Аллаһа мәһәббәтини тәзаһүр етдир
4. Аллаһа итаәткарлыг нә дәрәҹәдә ваҹибдир?
4 Аллаһа мәһәббәтини Она итаәткар олмағынла ҝөстәр (Матта 22:37). Һәвари Јәһја јазырды: «Аллаһы севмәк, Аллаһын әмрләринә риајәт етмәк демәкдир. Онун әмрләри исә ағыр дејилдир» (1 Јәһја 5:3). Аллаһа итаәткар олмағы вәрдиш етсән, бу сәнә сынаглара гаршы дурмаға ҝүҹ верәҹәк вә севинҹини горумаға көмәк едәҹәк. Мәзмурчу јазырды: ‘Писләрин мәсләһәти илә ҝетмәјән, анҹаг Рәббин ганунундан зөвг алан нә бәхтијардыр’ (Мәзмур 1:1, 2).
5. Јеһоваја мәһәббәт бизи нәдән чәкиндирәҹәк?
5 Јеһоваја мәһәббәт сәни Онун адына ләкә ҝәтирә билән ҹидди ҝүнаһлардан чәкиндирәҹәк. Агур дуа едирди: «Мәни нә јохсул, нә дә зәнҝин ет, анҹаг мәнә ҝүндәлик чөрәјими вер. Варлансам, “Рәбб кимдир?” дејә Сәнә күфр едәрәм, јохсул олсам, оғурларам вә Аллаһымын адыны ләкәләрәм» (Сүлејманын мәсәлләри 30:1, 8, 9). ‘Аллаһын адына ләкә’ ҝәтирмәмәјә гәти гәрарлы ол! Бүтүн һәрәкәтләринлә Јеһованы иззәтләндирмәјә чалыш (Мәзмур 86:12).
6. Инсанын биләрәкдән ҝүнаһ ишләтмәсинин нәтиҹәси нә ола биләр?
6 Севән сәмави Атамызын ҝүнаһ ишләтмәк мејлинә гаршы дура билмәкдә сәнә гүввә вермәси үчүн мүнтәзәм дуа ет (Матта 6:13; Ромалылара 12:12). Аллаһын рәһбәрлијинә риајәт ет ки, дуаларына манечилик төрәдилмәсин (1 Петер 3:7). Биләрәкдән ҝүнаһ ишләтсәк, аҹы нәтиҹәләр әлдә едәрик. Чүнки Јеһова үсјанкарлыг руһу ҝөстәрәнләрин дуаларынын гаршысыны санки булудларла кәсир (Мәрсијәләр 3:42-44). Буна ҝөрә дә, тәвазөкарлыг ҝөстәр вә Јеһовадан хаһиш ет ки, әмәлләриндән һеч бири дуаларына әнҝәл төрәтмәсин (2 Коринфлиләрә 13:7).
Аллаһын Оғлуна мәһәббәт тәзаһүр етдир
7, 8. Исанын мәсләһәтинә риајәт етмәк ҝүнаһлы һәјат јолуну рәдд етмәјә неҹә көмәк едәҹәк?
7 Иса Мәсиһә мәһәббәтини онун әмрләринә риајәт етмәклә ҝөстәр. Бу сәнә ҝүнаһлы һәјат јолуну рәдд етмәјә көмәк едәҹәк. Иса демишдир: «Мән Атамын әмрләрини јеринә јетириб Онун мәһәббәтиндә галырам. Әҝәр сиз дә Мәним әмрләрими јеринә јетирсәниз, Мәним мәһәббәтимдә галаҹагсыныз» (Јәһја 15:10). Исанын сөзләринә мүвафиг јашамаг Аллаһын мәһәббәтиндә галмағымыза неҹә көмәк едә биләр?
8 Исанын мәсләһәтинә ҹидди јанашмаг әхлаги тәмизлији горумағына көмәк едәҹәк. Аллаһын Исраил халгына вердији Ганунда дејилирди: «Зина етмә» (Чыхыш 20:14). Иса исә бу ганунун тәмәлини тәшкил едән принсипи ачыглады: «Бир гадына шәһвәтлә бахан һәр адам, артыг үрәјиндә онунла зина етмиш олур» (Матта 5:27, 28). Һәвари Петерин сөзләринә ҝөрә, онун дөврүндә јығынҹагда бә’зиләринин «ҝөзләриндә јалныз зинакар гадынлар варды» вә онлар ‘сәбатсыз ҹанлары јолдан чыхарырдылар’ (2 Петер 2:14). Лакин әҝәр сән Аллаһы вә Иса Мәсиһи севир, онлара итаәт едир вә онларла достлуғуну гијмәтләндирирсәнсә, ҹинси әхлагсызлыға јол вермәјәҹәксән.
Гој Јеһованын руһу сәни идарә етсин
9. Ҝүнаһдан әл чәкмәмәк нәјә ҝәтириб чыхара биләр?
9 Аллаһдан мүгәддәс руһ дилә вә онун сәнә истигамәт вермәсинә јол вер (Лука 11:13; Галатијалылара 5:19-25). Јеһова ҝүнаһындан әл чәкмәјәнләри Өз руһундан мәһрум едир. Бат-Шева илә ҝүнаһ ишләтдикдән сонра Давуд Аллаһа јалварырды: «Мәни Өз һүзурундан атма, Мүгәддәс Руһуну мәндән ҝөтүрмә» (Мәзмур 51:11). Шаул падшаһ ҝүнаһларындан төвбә етмәдији үчүн Аллаһын руһундан мәһрум олду. О, јандырма гурбаны тәгдим етди, мал-гараја һејфи ҝәлиб ону тамамилә мәһв етмәди вә амалеглиләрин падшаһыны өлдүрмәди. Бу андан Јеһова Өз мүгәддәс руһуну ондан алды (1 Шамуел 13:1-14; 15:1-35; 16:14-23).
10. Нәјә ҝөрә ҝүнаһ ишләтмәк фикри һеч ағлымыздан белә кечмәмәлидир?
10 Ҝүнаһ ишләтмәк фикри һеч ағлымыздан белә кечмәмәлидир. Һәвари Павел јазырды: «Һәгигәти дәрк едиб мәнимсәдикдән сонра гәсдән ҝүнаһ ишләсәк, ҝүнаһлар үчүн артыг гурбан галмаз» (Ибраниләрә 10:26-31). Бизләрдән киминсә гәсдән ҝүнаһ ишләтмәјә башламасы неҹә дә кәдәрли оларды!
Башгаларына әсл мәһәббәт ҝөстәр
11, 12. Мәһәббәт вә һөрмәт ҹинси әхлагсызлыгдан неҹә чәкиндирир?
11 Инсанлара мәһәббәт сәни ҹинси әхлагсызлыгдан чәкиндирәҹәк (Матта 22:39). Белә мәһәббәт, евли бир адамда өзүнә гаршы севҝи ојатмаг арзусундан үрәјимизи горумаға тәшвиг едәҹәк. Чүнки бу, ҹидди ҝүнаһа — зинаја ҝәтириб чыхара биләр (Сүлејманын мәсәлләри 4:23; Јеремја 4:14; 17:9, 10). Салеһ Әјјубдан нүмунә ҝөтүр. О өз арвадына садиг иди вә башга гадынлара бахмырды (Әјјуб 31:1).
12 Бундан әлавә, никаһын мүгәддәслијинә һөрмәт ҹидди ҝүнаһдан гачмаға көмәк едир. Аллаһ гануни никаһы вә ҹинси әлагәни дүнјаја һәјат ҝәтирмәк үчүн нәзәрдә тутуб (Јарадылыш 1:26-28). Јадда сахла ки, мүгәддәс олан һәјат ҹинсијјәт органлары васитәсилә өтүрүлүр. Әхлагсызлар вә зинакарлар Аллаһын ганунуну позур, ҹинси әлагәнин ролуну алчалдыр, никаһын мүгәддәслијинә һөрмәтсизлик ҝөстәрир вә өз бәдәнләринә гаршы ҝүнаһ ишләдирләр (1 Коринфлиләрә 6:18). Анҹаг инсанлара вә Аллаһа мәһәббәт, һәмчинин Она итаәткарлыг мәсиһчи јығынҹағындан кәнар едилмәјә ҝәтириб чыхаран әмәлләрдән сахлајаҹаг.
13. Һансы мә’нада әхлагсыз адамын ‘вар-јоху әлиндән ҝедир’?
13 Ҝүнаһлы фикирләри өзүмүздән говмалыјыг ки, сонра доғмаларымыза аҹы чәкдирмәјәк. Сүлејманын мәсәлләри 29:3 ајәсиндә дејилир: «Фаһишәләрә ашна оланын әлиндән вар-јоху ҝедәр». Һәјат јолдашына хәјанәт едән вә төвбә етмәјән адамын ‘вар-јоху әлиндән ҝедир’, јә’ни о, Аллаһла достлуг вә аилә телләри кими дәјәрли мүнасибәтләри итирир. Һәмин адамын арвадынын бошанмаг үчүн әсасы вардыр (Матта 19:9). Белә бир ҝүнаһы әрин вә ја арвадын ишләтмәсиндән асылы олмајараг, бошанма ҝүнаһсыз тәрәфә, ушаглара вә башгаларына чохлу әзаблар ҝәтирир. Әхлагсыз һәрәкәтин аҹы нәтиҹәләри һамыја мә’лумдур. Мәҝәр бу бизи әхлаги тәмизлијимизи горумаға тәшвиг етмәмәлидирми?
14. Ҝүнаһлы һәрәкәтләрә даир Сүлејманын мәсәлләри 6:30-35 ајәләриндән һансы дәрси ҝөтүрә биләрик?
14 Едилән хәјанәтин әвәзинә һеч нә вермәк мүмкүн дејил вә бу бизи вар ҝүҹүмүзлә белә бир ијрәнҹ вә худбин һәрәкәтдән гачмаға тәшвиг етмәлидир. Сүлејманын мәсәлләри 6:30-35 ајәләри ҝөстәрир ки, «гарныны дојдурмаг үчүн аҹ оғру оғурларса, кимсә ону гынамаз». Анҹаг зина ишләдән адама нифрәт едәрләр, чүнки онун нијјәти пис иди. Зинакар ‘өзүнү [јә’ни һәјатыны] мәһв едәр’. Әҝәр бу инсан Мусанын ганунуну алтында јашасајды, ону өлдүрәрдиләр (Левилиләр 20:10). Белә адам өз еһтирасыны тә’мин етмәк үчүн, башгаларына әзаб верир. Әҝәр о, төвбә етмәсә, Аллаһын мәһәббәтиндә галмајаҹаг вә мәсиһчи јығынҹағынын тәмизлијинин горунмасы үчүн, ондан кәнар едиләҹәкдир.
Виҹданыны тәмиз сахла
15. ‘Санки дағ басылмыш’ виҹданла нә баш верир?
15 Аллаһын мәһәббәтиндә галмаг истәјириксә, виҹданымызын ҝүнаһа е’тинасыз галмасына јол вермәмәлијик. Сөзсүз ки, биз бу дүнјанын корланмыш әхлаг нормаларыны мәнимсәмәмәлијик. Буна ҝөрә дә, өзүмүзә үнсијјәт даирәси, охумаг үчүн материал вә ја әјләнҹә сечәркән еһтијатлы олмалыјыг. Һәвари Павел хәбәрдарлыг едир: «Ахыр заманларда бә’зиләри имандан дөнәҹәк, јолдан чыхаран руһлара вә ҹинләрин тә’лимләринә гулаг асаҹаглар. Бу тә’лимләр јаланчыларын ријакарлығы илә јајылыр. Онларын виҹданларына санки дағ басылмышдыр» (1 Тимотејә 4:1, 2). ‘Санки дағ басылмыш’ виҹдан, дамға басылдыгда һәссаслығыны итирмиш дәри кимидир. Белә виҹдан инсаны дөнүкләрдән вә һәгигәтдән узаглашдыра биләҹәк вәзијјәтләрдән чәкиндирмәјәҹәк.
16. Виҹданымызы тәмиз сахламаг нә үчүн бу гәдәр ваҹибдир?
16 Хилас олмағымыз виҹданымызын тәмиз олуб-олмамасындан асылыдыр (1 Петер 3:21). Мәсиһин төкүлмүш ганына иман сајәсиндә виҹданымыз өлүм ҝәтирән ишләрдән тәмизләнмишдир ки, ‘јашајан Аллаһа ибадәт едә биләк’ (Ибраниләрә 9:13, 14). Биләрәкдән ҝүнаһ ишләдәндә, виҹданымызы ләкәләјир, Аллаһын ҝөзүндә натәмиз олур вә артыг Она хидмәт етмәјә јарарсыз олуруг (Титуса 1:15). Анҹаг Јеһованын көмәјилә биз виҹданымызы тәмиз сахлаја биләрик.
Јанлыш һәрәкәт тәрзиндән гачмаг даһа неҹә мүмкүндүр?
17. Тамамилә Јеһованын ардынҹа ҝетмәк һансы фајданы ҝәтирир?
17 Гәдимдә јашамыш Калев кими сән дә ‘тамамилә Рәббин ардынҹа ҝет’ (Ганунун тәкрары 1:34-36). Аллаһын тәләбләрини јеринә јетир вә һеч вахт ‘ҹинләрин сүфрәсинә ортаг олма’ (1 Коринфлиләрә 10:21). Дөнүклүјү рәдд ет. Руһани гиданы миннәтдарлыгла јалныз Јеһованын сүфрәсиндән гәбул ет. Онда јаланчы мүәллимләр вә пис руһи гүввәләр сәни аздыра билмәјәҹәкләр (Ефеслиләрә 6:12; Јәһуда 3, 4). Бүтүн диггәтини руһани ишләрә — Мүгәддәс Китабы өјрәнмәјә, мәсиһчи ҝөрүшләринә вә тәблиғ хидмәтинә јөнәлт. Тамамилә Јеһованын ардынҹа ҝетмәклә вә Рәббин ишиндә тәрәгги етмәклә, сән әсл хошбәхтлик газанаҹагсан (1 Коринфлиләрә 15:58).
18. Аллаһ горхусу бизим давранышымыза неҹә тә’сир едәҹәк?
18 ‘Аллаһа мәгбул еһтирам вә ихласкарлыгла хидмәт ет’ (Ибраниләрә 12:28). Аллаһ горхусу сәни һәр бир јанлыш јолдан чәкиндирәҹәк. Һәмчинин Петерин мәсһ едилмиш мәсиһчиләрә вердији мәсләһәтинә риајәт етмәјә көмәк едәҹәк: «Әҝәр ајры-сечкилик етмәјәрәк, һәр кәси өз әмәлинә ҝөрә мүһакимә едән Аллаһы “Ата” дејә чағырырсынызса, гүрбәти андыран бу дүнјадакы вахтынызы Аллаһ горхусунда кечирин» (1 Петер 1:17).
19. Аллаһын Кәламындан өјрәндикләрини даим һәјата кечирмәк нә үчүн лазымдыр?
19 Аллаһын Кәламындан өјрәндикләрини һәмишә өз һәјатында тәтбиг ет. Бу сәнә ҹидди ҝүнаһлардан гачмаға көмәк едәҹәк вә сән ‘һиссләри алышдырылараг, хејирлә шәри ајырд етмәк үчүн тәрбијә едиләнләрин’ арасында олаҹагсан (Ибраниләрә 5:14). Дүшүнҹәсиз сөз вә һәрәкәтләрә јол вермә, ајыг ол вә бу пис ҝүнләрдә ‘һәр фүрсәтдән истифадә едәрәк’ һикмәтлә давран. ‘Рәббин ирадәси нәдирсә’, даим ‘ону гавра’ (Ефеслиләрә 5:15-17; 2 Петер 3:17).
20. Нәјә ҝөрә тамаһкар олмамалыјыг?
20 Башгасына мәхсус олан шејләри аҹҝөзлүклә арзулама. Он әмрдән бириндә дејилир: «Һеч кимин евинә тамаһ салма. Һеч кимин арвадына, гулуна, гаравашына, өкүзүнә, ешшәјинә — һеч бир шејинә тамаһ салма» (Чыхыш 20:17). Бу ганун инсана мәхсус олан һәр шеји — онун евини, арвадыны, нөкәрләрини вә һејванларыны горујурду. Анҹаг ән ваҹиби исә одур ки, Исанын сөзләринә ҝөрә, тамаһ инсаны мурдар едир (Марк 7:20-23).
21, 22. Мәсиһчи ҝүнаһа батмасын дејә һансы тәдбирләри ҝөрә биләр?
21 Еһтијат тәдбири ҝөр ки, һеч бир арзун ҝүнаһа ҝәтириб чыхармасын. Шаҝирд Јагуб јазмышды: «Һәр кәс өз еһтирасы илә апарылараг вә алданараг имтаһан олунур. Еһтирас исә бојлу галыб ҝүнаһ доғурур. Јетишән ҝүнаһ да өлүм төрәдир» (Јагуб 1:14, 15). Мәсәлән, әввәлләр спиртли ичкиләрдән суи-истифадә едән адам гәрара ҝәлә биләр ки, евиндә спиртли ички олмасын. Вә ја әкс ҹинсдән олан адамла ҝүнаһ ишләтмәмәк үчүн инсан башга шө’бәјә кечмәк, јахуд да иш јерини дәјишмәк гәрарына ҝәлә биләр (Сүлејманын мәсәлләри 6:23-28).
22 Ҝүнаһа тәрәф бирҹә аддым белә атма. Ешгбазлыг вә шәһвани хәјаллар зинаја вә ја әхлагсызлыға ҝәтириб чыхара биләр. Бир балаҹа јалан бөјүк јалана, сонра да јалан данышмаг вәрдишинә чеврилә биләр. Инсан хырда оғурлуглара јол верә-верә, өз виҹданыны елә күтләшдирәр ки, нәтиҹәдә даһа бөјүк оғурлуға әл ата биләр. Һәтта кичик бир шејдә белә, дөнүкләрин фикирләринә ҝөз јуман адам әввәл-ахыр өзү дә гаты дөнүк ола биләр (Сүлејманын мәсәлләри 11:9; Вәһј 21:8).
Ҝүнаһ ишләтдијин һалда
23, 24. 2 Салнамәләр 6:29, 30 вә Сүлејманын мәсәлләри 28:13 ајәләриндә һансы тәсәлливериҹи сөзләр вар?
23 Инсанларын һамысы гејри-камилдир (Ваиз 7:20). Анҹаг әҝәр сән ҹидди ҝүнаһа јол вермисәнсә, Сүлејман падшаһын мә’бәдин тәнтәнәли ачылыш мәрасиминдә етдији дуадан тәсәлли тапа биләрсән: «Кимсә тәрәфиндән јахуд да бүтүн халгын Исраил тәрәфиндән бир дуа вә јалварыш оларса, һәр кәс өз бәласыны вә дәрдини билиб бу мә’бәдә тәрәф әлләрини ачса, о вахт Сән ҝөјдән Өз мәскәниндән ешит вә бағышла. Үрәјини билдијин һәр адама бүтүн әмәлләринә ҝөрә әвәз вер, чүнки инсан үрәкләрини јалныз Сән билирсән» (2 Салнамәләр 6:29, 30).
24 Бәли, Аллаһ инсанын үрәјиндәкиләри билир вә бағышламаға һазырдыр. Сүлејманын мәсәлләри 28:13 ајәсиндә дејилир: «Ҝүнаһларыны өрт-басдыр едән уғур газанмаз, ону е’тираф едәрәк тәрк едән мәрһәмәт тапар». Аллаһын лүтфүнү газанмаг үчүн инсан төвбә етмәли, ҝүнаһыны бојнуна алмалы вә әмәлиндән дөнмәлидир. Бәс әҝәр сән руһән зәифләмисәнсә, Аллаһын мәһәббәтиндә галмагда сәнә даһа нә көмәк едәҹәк?
Сиз неҹә ҹаваб верәрдиниз?
• Өзүмүзү Аллаһын мәһәббәтиндә неҹә сахлаја биләрик?
• Аллаһа вә Мәсиһә мәһәббәт ҝүнаһа батмамаға неҹә көмәк едир?
• Башгаларына сәмими мәһәббәт нәјә ҝөрә ҹинси әхлагсызлыгдан чәкиндирир?
• Јанлыш һәрәкәт тәрзиндән неҹә гача биләрик?
[11-ҹи сәһифәдәки шәкил]
Шаҝирд Јәһуда Аллаһын мәһәббәтиндә неҹә гала биләҹәјимизи изаһ едир.
[13-ҹү сәһифәдәки шәкил]
Бошанма тәгсирсиз тәрәфә вә ушаглара бөјүк зәрбә вура биләр.