‘Илк мәһәббәтини’ гору
«Малик олдуғуна мөһкәм сарыл» (ВӘҺЈ 3:11).
1, 2. Јеһова һаггында өјрәндикләринин һәгигәт олдуғуна әмин оланда һансы һиссләри кечирмишдин?
ЈЕҺОВАНЫН итаәткар бәшәријјәтә тәклиф етдији ҝөзәл ҝәләҹәк һаггында илк дәфә өјрәндијин вахты хатырлајырсанмы? Әҝәр сән әввәлләр башга динә етигад едирдинсә, Мүгәддәс Китаб әсасында Аллаһын нијјәтләрини сәнә изаһ едәндә, јахуд чәтин баша дүшдүјүн тәлимләр сәнә ајдын оланда һансы һиссләри кечирмишдин? Ола билсин, баша дүшдүн ки, сәнә чох шејләри сәһв өјрәдибләр. Анҹаг инди һәгигәти билдијинә ҝөрә неҹә дә хошбәхтсән! Әҝәр сән мәсиһчи аиләсиндә бөјүмүсәнсә, Јеһова һаггында өјрәндикләринин һәгигәт олдуғуна әмин оланда вә билдикләринә мүвафиг јашамаға гәрар верәндә һансы һиссләри кечирдијин јадындадыр? (Ром. 12:2).
2 Руһани гардашларындан бир чоху һәмин анда үрәкләринин севинҹлә долуб-дашдығыны, өзләрини Јеһоваја јахын һисс етдикләрини вә Јеһованын онлары Өзүнә ҹәлб етдији үчүн миннәтдар олдугларыны сәнинлә бөлүшәҹәкләр (Јәһ. 6:44). Дујдуглары хошбәхтлик онлары мәсиһчи хидмәтиндә иштирак етмәјә тәшвиг етмишди. Онлар о гәдәр севинирдиләр ки, кечирдикләри һиссләри һамы илә бөлүшмәк истәјирдиләр. Сән дә ејни һиссләри кечирмисәнми?
3. Иса Ефес јығынҹағына хәбәр ҝөндәрәндә орада вәзијјәт неҹә иди?
3 Биринҹи әсрдә Ефесдәки мәсиһчи јығынҹағына мүраҹиәтиндә Иса ‘илк мәһәббәтдән’ сөз ачмышды. Ефеслиләрин чохлу ҝөзәл ҹәһәтләри вар иди, анҹаг онларын бир заманлар Јеһоваја дујдуглары мәһәббәт зәифләмишди. Буна ҝөрә дә Иса онлара деди: «Сәнин әмәлләриндән, әмәјиндән, тәһәммүлүндән вә пис адамлара таб ҝәтирә билмәдијиндән хәбәрдарам. Һәвари олмадыглары һалда, өзләрини һәвари адландыранлары сынагдан чыхартдын вә онларын јаланчы олдуғуну мүәјјән етдин. Сән әзаблара дөздүн вә тәһәммүлүн вардыр. Мәним адым уғрунда зәһмәт чәкдин вә јорулмадын. Анҹаг сәндән бир шикајәтим вардыр: сән илк мәһәббәтиндән әл чәкмисән» (Вәһј 2:2-4).
4. Нәјә ҝөрә Исанын Ефеслиләрә хәбәри бу ҝүн дә јериндәдир?
4 «Вәһј» китабында Исанын ефеслиләрә вә диҝәр јығынҹаглара вердији мәсләһәт 1914-ҹү илдә мәсһ олунмуш мәсиһчиләрин арасында бир мүддәт мөвҹуд олан вәзијјәти нәзәрә аланда лап јериндә иди (Вәһј 1:10). Бунунла белә, һәтта инди дә бәзи мәсиһчиләр Јеһоваја вә мәсиһчи һәгигәтинә олан ‘илк мәһәббәтләрини’ итирә биләрләр. Буну нәзәрә алараг, ҝәлин ҝөрәк, һәр кәсин өз һәјатындакы һадисәләри јада салараг вә үзәриндә дүшүнәрәк Аллаһа вә һәгигәтә олан илк мәһәббәтини вә сәјини горумасы, тәравәтләндирмәси вә мөһкәмләндирмәси неҹә мүмкүндүр.
Һәгигәтә сәни нә инандырды?
5, 6. а) Һәр бир мәсиһчи өзү нәјә әмин олмалыдыр? б) Јеһованын Шаһидләринин өјрәтдикләринин һәгигәт олдуғуна сәни нә инандырды? ҹ) Инсана илк мәһәббәтини тәравәтләндирмәјә нә көмәк едә биләр?
5 Өзүнү Јеһоваја һәср едән һәр кәс «Аллаһын јахшы, мәгбул вә камил ирадәсинин нә олдуғуну» әввәлҹә өзү ‘дәрк етмәлидир’ (Ром. 12:1, 2). Буну етмәјин үсулларындан бири Мүгәддәс Китаб һәгигәтләрини өјрәнмәкдир. Јеһованын Шаһидләринин өјрәтдикләринин һәгигәт олдуғуна бири бир шејә ҝөрә, диҝәри исә башга шејә ҝөрә әмин олур. Бәзиләри хатырлајырлар ки, Аллаһын адыны Мүгәддәс Китабдан охумалары, јахуд өлүләрин вәзијјәти һаггында һәгигәти билмәләри онлар үчүн дөнүш нөгтәси олмушдур (Јешаја 42:8, КМ; Ваиз 9:5, 10). Башгаларына исә, Јеһованын халгы арасындакы мәһәббәт ҝүҹлү тәсир бағышламышдыр (Јәһ. 13:34, 35). Һәлә бир чохлары исә, бу дүнјанын бир һиссәси олмамағын нә демәк олдуғу үзәриндә дүшүнүб гәнаәтә ҝәлмишләр ки, һәгиги мәсиһчиләр һеч бир халгын сијаси тоггушмаларына вә мүһарибәләринә гарыша билмәзләр (Јешаја 2:4; Јәһ. 6:15; 17:14-16).
6 Бу вә ја диҝәр амилләр бир чохларынын үрәјиндә Аллаһа илк мәһәббәти ојатмышдыр. Һәгигәтә сәни нәјин инандырдығыны јадына сал. Сәнин һәјат шәраитин вә хасијјәтин башгаларындан фәргләндији үчүн, Аллаһы севмәјинин вә Онун вәдләринә инанмағынын әсас сәбәбләри дә еһтимал ки, башгаларынынкындан фәргләнир. Чох еһтимал ки, һәмин сәбәбләр онлар һаггында илк дәфә өјрәндијин заман олдуғу кими, инди дә сәнин үчүн һәгигәтдир. Һәгигәт дәјишмәјиб. Белә ки, һәмин фикирләри вә һиссләри нәзәрдән кечирмәк һәгигәтә олан мәһәббәтини јениләшдириб тәравәтләндирә биләр. (Мәзмур 119:151, 152; 143:5 ајәләрини оху.)
Илк мәһәббәтини мөһкәмләндир
7. Нәјә ҝөрә һәгигәтә олан илк мәһәббәтимизи мөһкәмләндирмәк тәләб олунур вә буну неҹә етмәк олар?
7 Јәгин өзүнү Јеһоваја һәср едәндән бәри һәјатында чох шеј дәјишиб. Һәгигәтә илк мәһәббәтин ваҹиб олса да, иманыны сынаға чәкән јени чәтинликләрә синә ҝәрмәк үчүн сәндән мәһәббәтини ҝүҹләндирмәк тәләб олунуб. Бунунла белә, Јеһова сәни тәк гојмајыб (1 Кор. 10:13). Беләликлә, илләрин сынағындан кечмиш һәјат тәҹрүбән дә сәнин үчүн дәјәрлидир. О сәнә илк мәһәббәтини мөһкәмләндирмәјә көмәк едиб вә бу, Аллаһын јахшы, мәгбул ирадәсинин нә олдуғуну дәрк едә билмәјинин диҝәр бир үсулудур (Јешуа 23:14; Мәз. 34:8).
8. Јеһова Өзүнү Мусаја неҹә танытды вә исраиллиләр Јеһованы даһа јахындан неҹә таныдылар?
8 Нүмунә үчүн, Јеһованын исраиллиләри Мисир әсарәтиндән хилас едәҹәјини вәд едәркән исраиллиләрин дүшдүкләри вәзијјәти нәзәрдән кечирәк. Аллаһ Өзүнү Мусаја бу сөзләрлә танытды: «Мән олмаг истәдијим Кәс олаҹағам» (ЈД) (Чых. 3:7, 8, 13, 14). Әслиндә Јеһова бу сөзләрлә демәк истәјирди ки, Өз халгыны азад етмәк үчүн О, лазым олан Шәхс олаҹаг. Сонракы һадисәләр заманы, еләҹә дә шәраит тәләб етдикҹә, исраиллиләр Јеһованын Өз шәхсијјәтинин мүхтәлиф јөнләрини нүмајиш етдирдијинин шаһиди олдулар. О, Күлли-Ихтијар, Һаким, Рәһбәр, Хиласкар, Ҹәнҝавәр вә хидмәтчиләрини һәр шејлә тәмин едән Аллаһ олдуғуну ҝөстәрди (Чых. 12:12; 13:21; 14:24-31; 16:4; Неһ. 9:9-15).
9, 10. Һансы вәзијјәт Аллаһы танымаға көмәк едә биләр вә нә үчүн белә һадисәләри хатырламаг фајдалыдыр?
9 Сәнин вәзијјәтин гәдим исраиллиләрин вәзијјәтиндән фәрглидир. Бу белә олса да, јәгин ки, Аллаһын шәхсән сәнинлә марагландығына сәни әмин едән вә иманыны мөһкәмләндирән вәзијјәтлә үзләшмисән. Чох ҝүман ки, Јеһованын шәхсијјәтинин бир чох јөнләрини — сәни лазым олан шејлә тәмин етдијини, Тәсәлливериҹи, јахуд Мүәллим олдуғуну ҝөрмүсән. (Јешаја 30:20б, 21 ајәләрини оху.) Јахуд, ола биләр, дуана ајдын ҹаваб алмысан. Бәлкә дә, чәтинликлә үзләшәндә һәмиманлын сәнә көмәк едиб. Јахуд шәхси өјрәнмә заманы лазым олан ајәләр диггәтини ҹәлб едиб.
10 Әҝәр сән белә һадисәләри башгаларына данышсајдын, бәлкә дә, бу, кимләрәсә хүсуси тәсир бағышламазды. Әслиндә, бу баш верәнләр мөҹүзә олмајыб. Анҹаг сәнин ҝөзүндә онларын дәјәри бөјүкдүр. Бәли, Јеһова доғрудан да сәнин үчүн лазым олан Шәхс олуб. Һәгигәтдә кечирдијин илләрә бојлан. Јеһованын шәхсән гајғына галдығыны һисс етдијин бир нечә һадисәни јадына сала биләрсәнми? Һәмин һадисәләри вә онларын сәндә доғурдуғу һиссләри хатырламағын үрәјиндә о заман Јеһоваја дујдуғун мәһәббәти аловландыраҹаг. Һәмин һадисәләри гијмәтләндир. Онларын үзәриндә дүшүн. Онлар Јеһованын шәхсән сәнинлә марагландығына сүбутдур. Һеч ким бу әминлији әлиндән ала билмәз.
Өзүнү тәһлил ет
11, 12. Мәсиһчинин һәгигәтә мәһәббәтинин зәифләмәсинә нә сәбәб ола биләр вә Иса һансы мәсләһәти вермишди?
11 Әҝәр Аллаһа вә һәгигәтә гаршы бир заманлар һисс етдијин мәһәббәти инди һисс етмирсәнсә, бу она ҝөрә дејил ки, Аллаһда нә исә дәјишиб. Јеһова һеч вахт дәјишмир (Мал. 3:6; Јаг. 1:17). О, әввәлләр олдуғу кими, инди дә сәнинлә марагланыр. Бәс әҝәр Јеһова илә мүнасибәтиндә нә исә дәјишилибсә, онда неҹә? Ола биләрми ки, инди вәзијјәтинин даһа ҝәрҝин олдуғуну, гајғыларынын артдығыны дүшүнүрсән? Бәлкә дә, әввәлләр даһа чох дуа едир, даһа һәвәслә өјрәнир вә даһа тез-тез дүшүнүрдүн. Сән әввәлләр хидмәтдә индикиндән фәал иштирак едир вә ја јығынҹаг ҝөрүшләринә мүнтәзәм ҝедирдинми? (2 Кор. 13:5).
12 Ола биләр, бунлары өзүндә ҝөрмәјәсән, бәс онда сәндәки дәјишикликләрә нә сәбәб олуб? Аиләни јетәринҹә тәмин етмәк, сағламлығынын гајғысына галмаг, јахуд бу кими үзүрлү гајғылар Јеһованын ҝүнүнүн јахын олдуғуну нәзәрдән гачырмағына сәбәб ола биләрми? Иса һәвариләринә демишди: «Диггәтли олун ки, үрәкләриниз гарынгулулуг вә сәрхошлугла, бу һәјатын гајғылары илә ағырлашмасын вә о Ҝүн сизи гәфләтән јахаламасын. Чүнки о Ҝүн бир тор кими јер үзүндә јашајанларын һамысына раст ҝәләҹәкдир; буна ҝөрә дә бүтүн баш верәҹәк бу фәлакәтләрдән гачынмаға лајиг олмаг... үчүн, һәр ан дуа един вә ајыг олун» (Лука 21:34-36).
13. Јагуб Аллаһын Кәламыны нәјә бәнзәдирди?
13 Мүгәддәс Китабын јазычыларындан бири олан Јагуб һәмиманлыларыны өзләрини Аллаһын Кәламы әсасында дүрүстлүклә тәһлил етмәјә сәсләјирди. О јазырды: «Аллаһ кәламыны јалныз ешитмәклә кифајәтләниб, өзүнүзү алдатмајын; бу кәламын иҹрачысы да олун. Чүнки кәламы ешидиб ону иҹра етмәјән, ҝүзҝүдә өз сифәтинин ҹизҝиләрини сејр едән адама бәнзәјир: О өз-өзүнә бахыр, кәнара чәкилир вә дәрһал неҹә олдуғуну унудур. Лакин ким камил гануна, азадлыг ганунуна диггәтлә бахыб она бағлы галарса вә унутган динләјиҹи дејил, иҹраедиҹидирсә, өз әмәлиндә хошбәхт олаҹагдыр» (Јаг. 1:22-25).
14, 15. а) Мүгәддәс Китаб руһани вәзијјәтини јахшылашдырмаға неҹә көмәк едә биләр? б) Һансы суалларын үзәриндә дүшүнә биләрсән?
14 Адәтән ҝүзҝүјә бахырыг ки, ҝөрәк сәлигәли ҝөрүнүрүк, ја јох. Мәсәлән, әҝәр киши галстукунун әјри галдығыны ҝөрүрсә, ону дүзәлдә биләр. Јахуд гадын сачларынын дағыныг олдуғуну ҝөрәндә, дарајыб сәлигәјә сала биләр. Ејни тәрздә Мүгәддәс Китаб да бизә өзүмүзү јохламаға көмәк едир. Өзүмүзү Мүгәддәс Китабын дедикләри илә мүгајисә едәндә, ондан ҝүзҝү кими истифадә етмиш олуруг. Јох, әҝәр лазым олан дүзәлиши етмәјәҹәјиксә, ҝүзҝүјә бахмағын нә фајдасы вар? Аллаһын ‘камил ганунунда’ ҝөрдүкләримизә ујғун һәрәкәт едиб, онун «иҹрачысы» олуругса, мүдрик давранмыш олуруг. Беләликлә, Јеһоваја вә һәгигәтә илк мәһәббәтинин азалдығыны һисс едән һәр кәс јахшы олар ки, бу суалларын үзәриндә дүшүнсүн: «Һәјатда һансы чәтинликләрлә үзләширәм вә онлара неҹә мүнасибәт ҝөстәрирәм? Әввәлләр онлара неҹә јанашырдым? Инди нә исә дәјишибми?» Өзүнү тәһлил едәркән һансыса зәифликләр ортаја чыхырса, онлара бармагарасы бахма. Әҝәр дәјишиклијә еһтијаҹ варса, буну тәхирә салмадан ет (Ибр. 12:12, 13).
15 Белә суаллар үзәриндә дүшүнмәк һәм дә руһани инкишаф үчүн гаршына ағыллы мәгсәдләр гојмағына көмәк едә биләр. Һәвари Павел әмәкдашы Тимотејә хидмәтини тәкмилләшдирмәси үчүн Аллаһдан илһам алараг мәсләһәт вермишди. О бу ҝәнҹи тәшвиг едирди: «Бу ишләрә фикир вер вә онларла мәшғул ол ки, сәнин тәрәггин һамыја ашкар олсун». Јахшы оларды ки, биз дә Аллаһын Кәламы әсасында һансы саһәдә тәрәгги едә биләҹәјимизин үзәриндә дүшүнәк (1 Тим. 4:15).
16. Мүгәддәс Китаб әсасында өзүнү тәһлил едәркән һансы тәһлүкәјә гаршы ајыг олмалысан?
16 Инсан өзүнү виҹданла тәһлил едирсә, мүтләг мүәјјән зәифликләри ортаја чыхыр. Бу адамы мәјус едә биләр, анҹаг сән буна јол вермә. Ахы өзүнү тәһлил етмәјин мәгсәди нәдә дүзәлиш едә биләҹәјини мүәјјән етмәкдир. Әлбәттә, Шејтан чох истәјәрди ки, мәсиһчи гејри-камиллији уҹбатындан өзүнү дәјәрсиз һисс етсин. Әслиндә, белә бир иддиа ирәли сүрүлмүшдүр ки, Аллаһ Она хидмәт етмәк үчүн инсанларын ҝөстәрдикләри һеч бир сәји нәзәрә алмыр (Әјј. 15:15, 16; 22:3). Иса бу јаланы ҹәсарәтлә тәкзиб етмишди; Аллаһын ҝөзүндә һәр биримиз дәјәрлијик. (Матта 10:29-31 ајәләрини оху.) Әксинә, зәифликләриндән аҝаһ олмағын сәни тәшвиг етмәлидир ки, Јеһованын көмәјини тәвазөкарлыгла гәбул едиб, онлары дүзәлтмәјә гәти гәрарлы оласан (2 Кор. 12:7-10). Хәстәлик вә ја гоҹалыг имканларыны мәһдудлашдырырса, гаршына ҝүҹүн чатан мәгсәдләр гој, тәслим олма, нә дә мәһәббәтинин сојумасына јол вермә.
Чох шејә ҝөрә миннәтдарыг
17, 18. Илк мәһәббәтини мөһкәмләндирмәјин фајдалары һансылардыр?
17 Илк мәһәббәти мөһкәмләндирмәк чох бөјүк фајдалар ҝәтирәҹәк. Сән Аллаһ һаггында билијини, еләҹә дә онун мәһәббәтдән ирәли ҝәлән рәһбәрлијинә ҝөрә миннәтдарлығыны артыра биләрсән. (Сүлејманын мәсәлләри 2:1-9; 3:5, 6 ајәләрини оху.) Мәзмурчу демишдир ки, Јеһованын һөкмләринә «әмәл едәнин бол мүкафаты вар». «Рәббин өјүдү етибарлыдыр, наданы мүдрик едир». Үстәлик, «нә бәхтијардыр өз јолунда камил оланлар, Рәббин ганунуна ҝөрә јашајанлар» (Мәз. 19:7, 11; 119:1).
18 Әлбәттә, разылашаҹагсан ки, миннәтдар олмаг үчүн чохлу сәбәбләрин вар. Сән бу дүнјада баш верәнләрин сәбәбини анлајырсан. Аллаһын бу ҝүн руһани ҹәһәтдән Өз халгынын гајғысына галыб, она диггәт ҝөстәрмәсиндән сән дә фајдаланырсан. Шүбһәсиз ки, Јеһованын сәни өз үмумдүнја јығынҹағына ҝәтирдијинә вә сәнә Онун Шаһидләриндән бири олмаг имканыны вердијинә ҝөрә дә миннәтдарсан. Алдығын хејир-дуалары садала! Онлары бир вәрәгә јазсајдын, јәгин сијаһы чох узун оларды. Вахташыры буну етмәк шүбһәсиз ки, сәнә «малик олдуғуна мөһкәм сарыл» нәсиһәтинә әмәл етмәјә көмәк едәҹәк (Вәһј 3:11).
19. Руһани сағламлығы горумаг үчүн Аллаһла мүнасибәтләрин һаггында дүшүнмәкдән савајы даһа нә ваҹибдир?
19 Илләр әрзиндә иманынын неҹә мөһкәмләндији үзәриндә дүшүнмәк малик олдуғуна мөһкәм сарылмаға көмәк едән аддымлардан јалныз биридир. Бу журнал руһани сағламлығы горумаг үчүн ваҹиб олан диҝәр амилләри дә дөнә-дөнә диггәтинизә чатдырыр. Онлара дуа, мәсиһчи ҝөрүшләринә ҝәлмәк вә иштирак етмәк, еләҹә дә тәблиғ хидмәтиндә сәјлә чалышмаг дахилдир. Бунлар илк мәһәббәтини дирчәлтмәјә, тәравәтләндирмәјә вә мөһкәмләндирмәјә көмәк едәҹәк (Ефес. 5:10; 1 Пет. 3:15; Јәһуда 20, 21).
Неҹә ҹаваб верәрдиниз?
• Јеһованы сәнә севдирән сәбәбләр инди сәни неҹә руһландыра биләр?
• Һәјатындакы һадисәләр үзәриндә дүшүнмәк сәни нәјә әмин едә биләр?
• Аллаһа мәһәббәтини нә үчүн тәһлил етмәлисән?
[23-ҹү сәһифәдәки шәкил]
Сәни һәгигәтә ҹәлб едән вә инандыран нә олмушдур?
[25-ҹи сәһифәдәки шәкил]
Сән өзүндә дүзәлтмәли олдуғун шејләри ҝөрүрсәнми?