Охуҹуларымыз сорушур...
Јеһованын Шаһидләри тибби мүалиҹә гәбул едирләрми?
▪ Иса пејғәмбәр демишди ки, «сағлам адамларын һәкимә еһтијаҹы олмур, һәкимә хәстәләр мөһтаҹдыр» (Матта 9:12). Онун сөзләриндән ајдын олур ки, Мүгәддәс Јазылар пешәкар тибби мүалиҹәни гәбул етмәји гадаған етмир. Буна ҝөрә дә Јеһованын Шаһидләри дәрман гәбул етмәјә вә тибби мүалиҹәјә нормал јанашырлар. Онлар сағламлыгларынын гајғысына галыр вә мүмкүн гәдәр чох јашамаг истәјирләр. Биринҹи әсрдә јашајан Аллаһын хидмәтчиси Лука кими, Јеһованын Шаһидләринин арасында да һәким оланы вар (Колослулара 4:14).
Анҹаг Јеһованын Шаһидләри Мүгәддәс Китаб принсипләринә зидд олан мүалиҹә үсулларыны гәбул етмирләр. Мәсәлән, онлар ганкөчүрмәдән имтина едирләр, чүнки Мүгәддәс Китаб ганын бәдәнә көчүрүлмәсини гадаған едир (Јарадылыш 9:4; Левилиләр 17:1—14; Һәвариләрин ишләри 15:28, 29). Һәмчинин Аллаһын Кәламында спиритизмлә вә ја сеһрбазлыгла бағлы олан мүалиҹә үсуллары вә ја проседуралар мүһакимә олунур (Јешаја 1:13; Галатијалылара 5:19—21).
Бир чох пешәкар тибб ишчиләри Мүгәддәс Китаба зидд ҝетмәјән мүалиҹә үсулларыны тәтбиг едирләр. Чох вахт Јеһованын Шаһидләри тәрәфиндән сечилән бу ҹүр мүалиҹә үсуллары Аллаһын тәләбләринә ујғун олмајан мүалиҹә үсулларындан даһа кејфијјәтли олур.
Әлбәттә, мүалиҹә нөвләринә даир чохлу фикирләр мөвҹуддур. Анҹаг биринә хејри дәјән мүалиҹә үсулунун диҝәринә фајдасы олмаја биләр. Буна ҝөрә дә дәгиг диагноз гојулмасыны вә ән јахшы үсулла мүалиҹә олунмағы истәјәнләр бир нечә мүтәхәссислә мәсләһәтләшмәк гәрарына ҝәлә биләрләр (Сүлејманын мәсәлләри 14:15).
Јеһованын Шаһидләринин һамысы мүалиҹә мәсәләсиндә ејни ҹүр гәрар гәбул етмир. Мүгәддәс Китабда дејилир ки, әҝәр Аллаһын гануну позулмурса, Аллаһын хидмәтчиси өз виҹданына ујғун даврана биләр (Ромалылара 14:2—4). Һәр бир садиг хидмәтчи тәгдим олунан мүалиҹә үсулуну диггәтлә ҝөтүр-гој етмәли вә әмин олмалыдыр ки, бу, онун Мүгәддәс Китаб әсасында тәрбијә олунмуш виҹданына зидд дејил (Галатијалылара 6:5; Ибраниләрә 5:14).
Јеһованын Шаһиди һәр бир гәрарын гәбул олунмасына елә јанашмалыдыр ки, санки, о, ҝедиш-ҝәлишли вә дөрд јолајрыҹына јахынлашмагда олан сүрүҹүдүр. Әҝәр о, сүрәти азалтмадан садәҹә гаршысындакы автомобилин архасынҹа ҝетсә, ҹидди гәзаја уғраја биләр. Узагҝөрән сүрүҹү исә јолу кечмәздән өнҹә, сүрәти азалдаҹаг вә әтрафына ҝөз ҝәздирәҹәк. Буна бәнзәр тәрздә, Јеһованын Шаһидләри тибби мүалиҹә методу сечәркән тәләсмир вә кор-коранә ҝениш јајылмыш мүалиҹә үсулуна әл атмырлар. Әксинә, онлар гәрар гәбул етмәздән әввәл, бүтүн вариантлары ҝөтүр-гој едир вә Мүгәддәс Китаб принсипләрини арашдырырлар.
Јеһованын Шаһидләри тибб ишчиләринин ағыр зәһмәтини вә фәдакарлығыны јүксәк гијмәтләндирирләр. Онлар һәмчинин инсанлара көмәклик ҝөстәрдикләринә вә хәстәликләри јүнҝүлләшдирмәјә чалышдыгларына ҝөрә һәкимләрә үрәкдән миннәтдардырлар.