Дүнјанын ахыры барәдә һәгигәт

Ҹинләр јер үзүнүн падшаһларынын јанына ҝедиб онлары ибраниҹә Һар-Маҝедон адланан јерә топладылар (ВӘҺЈ 16:14, 16).

АЛЛАҺЫН КӘЛАМЫНДА дүнјанын ахыры ифадәси әвәзинә Һар-Маҝедон сөзү ишләнир. Бу сөз рәмзи мәна дашыјыр, чүнки Мүгәддәс Китабда Һар-Маҝедон јер ады кими тәгдим олунса да, әслиндә белә бир јер мөвҹуд дејил.

Бәс онда Һар-Маҝедон нәдир вә нәјә ҝөрә ону һансыса бир һадисә илә, мәсәлән, мүһарибә илә әлагәләндирирләр? Бу мәгаләдә бу суаллар ишыгландырылаҹаг.

«Һар-Маҝедон адланан јерә топладылар»

Ибрани ифадәси олан Һар-Маҝедон һәрфән «Меҝиддо дағы» демәкдир. Әслиндә белә бир дағ јохдур, амма «Меҝиддо» адланан јер мөвҹуддур. Бу јер гәдим Исраил халгынын мәскун олдуғу әразинин шимал-гәрбиндә, ики әсас јолун кәсишдији јердә јерләшир. Гәдимдә мүһүм стратежи әһәмијјәтә малик олан бу јерин јахынлығында бир чох һәлледиҹи дөјүшләр баш тутмушду. Бу сәбәбдән, «Меҝиддо» ады мүһарибә илә бағлы ишләнмәјә башладыa.

Лакин Меҝиддонун әсас маһијјәти орада һансы дөјүшләрин баш вермәсиндән јох, онларын нә үчүн баш вермәсиндән ибарәтдир. Гејд едәк ки, Меҝиддо Јеһова Аллаһын Исраил халгына вердији торпаға дахил иди (Чыхыш 33:1; Јешуа 12:7, 21). Аллаһ исраиллиләрә вәд етмишди ки, онлары јағылардан горујаҹаг вә О, вәдинә хилаф чыхмады (Ганунун тәкрары 6:18, 19). Мисал кими бу һадисәни ҝәтирмәк олар: бир дәфә Кәнан падшаһы Јавин сәркәрдә Сисранын башчылығы алтында исраиллиләрин үстүнә гошун ҝөндәрмишди. Јеһова Аллаһ Меҝиддода исраиллиләри мөҹүзәви шәкилдә бу гошунларын ҹәнҝиндән гуртармышды (Һакимләр 4:14—16).

Буна ҝөрә Һар-Маҝедон ифадәси мүһүм рәмзи мәна дашыјыр. Бу ифадә ики ҝүҹлү тәрәфин үз-үзә ҝәлдији дөјүшү тәмсил едир.

Вәһј китабында бәһс олунур ки, јахын ҝәләҹәкдә Шејтан вә ҹинләр Аллаһын халгыны тәһдид едиб онларын фәалијјәтини дајандырмаг үчүн дөвләтләри ордуларыны сәфәрбәр етмәјә тәһрик едәҹәк. Амма бу јағы дүшмәнләр Аллаһын гаршысында дуруш ҝәтирә билмәјәҹәк, мәғлуб олаҹаглар. Бу мүһарибә милјонларла инсанын өлүмү илә нәтиҹәләнәҹәк (Вәһј 19:11—18).

Бәс Аллаһ нә үчүн бу гәдәр инсаны мәһв едәҹәк? Ахы Мүгәддәс Китабда О, рәһмли, сәбирли, мәһәббәти бол олан Аллаһ адланыр (Неһемја 9:17). Аллаһын ишини дәрк етмәк үчүн үч мәгамы арашдырмаг зәруридир: 1) Мүһарибәни ким башлајаҹаг? 2) Нәјә ҝөрә Аллаһ мүдахилә едәҹәк? 3) Мүһарибәнин нәтиҹәси нә олаҹаг?

1. МҮҺАРИБӘНИ КИМ БАШЛАЈАҸАГ?

Һар-Маҝедон мүһарибәсини Аллаһ тәрәфиндән тәҹавүзкарлыг кими гијмәтләндирмәк олмаз. Чүнки Аллаһ јахшы инсанлары залымларын әлиндән гуртараҹаг. Бу дөјүшдә тәҹавүзкар тәрәф «јер үзүнүн падшаһлары», дүнја лидерләри олаҹаг. Һүҹума башлајан онлар олаҹаг. Белә ки, Шејтан өз мәһарәтини ишә салыб сијаси вә һәрби гүввәләри Јеһова Аллаһын садиг бәндәләринә гаршы сәфәрбәр едәҹәк (Вәһј 16:13, 14; 19:17, 18).

Бәзи өлкәләрдә сөз вә дин азадлығына неҹә бөјүк өнәм верилдијини нәзәрә алсаг, дөвләтләрин һәр һансы дини ҹәрәјанын фәалијјәтинин дајандырмасы, јахуд буна ҹәһд етмәси ағлабатан ҝөрүнмәјә биләр. Лакин бу ҹүр һаллар ХХ әсрдә баш вермишдир, бу ҝүн дә баш вермәкдәдирb. Бунунла белә, бу һүҹумларла Һар-Маҝедонда баш верәҹәк һүҹум арасында ән азы ики әсас фәрг вар. Биринҹиси, ҝәләҹәкдәки һүҹум бүтүн дүнја мигјасында олаҹаг. Икинҹиси, Јеһова Аллаһын бу сәфәрки ҹавабы әввәлкиләрдән гат-гат кәскин олаҹаг (Јеремја 25:32, 33). Вәһј китабында бу дөјүш «Гадир Аллаһын бөјүк ҝүнүндә баш верәҹәк мүһарибә» кими тәгдим олунур.

2. НӘЈӘ ҜӨРӘ АЛЛАҺ МҮДАХИЛӘ ЕДӘҸӘК?

Јеһова Аллаһ садиг бәндәләринә бујурур ки, сүлһсевәр олсунлар, дүшмәнләрини севсинләр (Микеја 4:1—3; Матта 5:43, 44; 26:52). Буна ҝөрә амансыз һүҹума мәруз галанда онлар әлләринә силаһ алыб өз мүдафиәләринә галхмајаҹаглар. Одур ки, Јеһова Аллаһ мүдахилә едиб Өз халгыны гуртармалыдыр, јохса бу әлијалын халгын көкү јер үзүндән кәсиләр вә Аллаһын ады бәднам олар. Һабелә, дүшмәнләр Аллаһын халгыны мәһв етмәјә мүјәссәр олса, онда елә чыхар ки, Јеһова мәрһәмәтсиз, һагсыз вә аҹиз Аллаһдыр. Бу исә дүнјасында ола билмәз! (Мәзмур 37:28, 29).

Аллаһ һеч кимин өлүмүнү истәмир, она ҝөрә дә һамыны едәҹәји ишдән хәбәрдар едир (2 Петер 3:9). Мүгәддәс Китабда јазылмыш һадисәләри охујанда ҝөрүрүк ки, Аллаһ гәдим вахтларда халгынын үстүнә һүҹум чәкәнләрдән интигам алырды (2 Падшаһлар 19:35). Јеһова Аллаһ Мүгәддәс Китаб васитәсилә хәбәрдарлыг едир ки, Шејтанын башчылығы алтында сијаси вә һәрби гүввәләр Аллаһын халгына гаршы галханда О, јенә дә мүдахилә едиб һүҹума һүҹумла ҹаваб верәҹәк. Аллаһын Кәламында лап әввәлдән дејилмишди ки, О, бәдхаһ инсанлары мәһв едәҹәк (Сүлејманын мәсәлләри 2:21, 22; 2 Салоникилиләрә 1:6—9). Дүшмәнләрә ҝәлдикдә исә, онлар һүҹума галханда Гадир Аллаһла дөјүшдүкләрини јахшы баша дүшәҹәкләр (Језекел 38:21—23).

3. МҮҺАРИБӘНИН НӘТИҸӘСИ НӘ ОЛАҸАГ?

Һар-Маҝедон мүһарибәси сајәсиндә милјонларла инсанын һәјаты гуртулаҹаг. Бу һадисә сүлһә апаран јолун башланғыҹы олаҹаг (Вәһј 21:3, 4).

Вәһј китабында бу мүһарибәдән сағ чыхан «бөјүк бир издиһам» һаггында данышылыр (Вәһј 7:9, 14). Бу инсанлар Јеһова Аллаһын рәһбәрлији алтында Онун әзәли нијјәтини јеринә јетирәҹәкләр — бүтүн Јер күрәсини ҹәннәтә чевирәҹәкләр.

Бәс Һар-Маҝедон мүһарибәси нә вахт баш верәҹәк?

[Һашијәләр]

[6–ҹы сәһифәдәки шәкил]

Гәдимдә Јеһова Аллаһ Өз халгынын мүдафиәсинә галхмышды

[7–ҹи сәһифәдәки шәкил]

Һар-Маҝедон мүһарибәсиндә дә Јеһова Аллаһ халгыны мүдафиә едәҹәк