Аллаһын Мүгәддәс ады

Бу мәгаләдә ваҹиб суаллар галдырылыр вә Мүгәддәс Китаб ишығында мүзакирә едилир. Истәсәниз, Јеһованын Шаһидләри сизинлә бу суаллар әтрафында мәмнунијјәтлә сөһбәт едәрләр.

1. Аллаһ нә үчүн Өзүнә ад вериб?

Биз инсаныг. Инсан анлајышы бизим затымызы, јәни тәбиәтимизи ҝөстәрир. Бунунла белә, һәр бир инсанын ады вардыр. Аллаһ хәлг етдији мәләкләрә дә ад вериб. Бәс Аллаһын Өзү барәдә нә демәк олар? «Аллаһ» сөзү ән уҹа, ән бөјүк варлығын затыны әкс етдирир. Үстәлик, Аллаһа «Күлли-Ихтијар», «Јарадан», «Гадир Аллаһ» кими чохсајлы сифәтләрлә мүраҹиәт едилир (Јарадылыш 17:1; Ваиз 12:1; Вәһј 11:17). Амма Онун тәк бир ады вар. Аллаһын ады һәр дилдә бу дилин тәләбләринә ујғун тәрздә јазылыр. Инҹилин 2010-ҹу илдә дәрҹ едилмиш азәрбајҹанҹа тәрҹүмәсиндә Аллаһын ады Јеһова кими ишләнирa. (Матта 22:37 ајәсини охујун.)

Мүгәддәс Китабда Аллаһын ады тәхминән 7000 дәфә ишләнир. Бу ҝөстәрир ки, Аллаһ Онун мүгәддәс адыны билмәјимизи ваҹиб сајыр вә Ону бу адла чағырмағымызы истәјир. (Јешаја 12:4 ајәсини охујун.)

2. Аллаһын адыны билмәк нә үчүн ваҹибдир?

Гејд едәк ки, Аллаһын адыны билмәк өзүнә чох шеј дахил едир. Аллаһын адыны билмәк Ону бу адла чағырмаг, Онунла јахын мүнасибәтдә олмаг демәкдир. Јеһова адынын мәнасы «олмағына сәбәб олан»дыр. Бу, о демәкдир ки, Аллаһ мүәјјән бир вәзијјәтдә тәләб олунан хүсусијјәти тәзаһүр етдирир, јәни һәмин вәзијјәтә мүвафиг сифәтдә олур. Бу ад өзлүјүндә бир зәманәтдир ки, Аллаһ нијјәт етдији истәнилән шеји мүтләг һәјата кечирир. Демәли, Аллаһын адыны билмәк, һәм дә Онун Өз вәдләрини јеринә јетирәҹәјинә иман ҝәтирмәк демәкдир (Мәзмур 9:10). Аллаһын адыны һәгигәтән билән вә ону чағыран адам Јеһоваја етибар едир, Аллаһы һәјатда һәр шејдән үстүн тутур. Аллаһ бу ҹүр адамлары һифз едир. (Мәзмур 91:14 ајәсини охујун.)

3. Нә үчүн һамы Аллаһын адыны билмәлидир?

Аллаһын нијјәти будур ки, инсанлар Ону ады илә танысынлар, чүнки бу, онларын хејринәдир. Бу, онлара Аллаһын досту олмаг үчүн јол ачыр вә әбәди һәјата үмид верир. Буна ҝөрә дә Аллаһ истәјир ки, Онун адыны бүтүн инсанлара билдирәк. (Јәһја 17:3; Ромалылара 10:13, 14 ајәләрини охујун.)

Пејғәмбәрләр Аллаһын јолларыны, ганунларыны, вәдләрини инсанлара өјрәдәрәк Онун адыны әјан едирдиләр. Бу ҝүн Јеһованын Шаһидләри һәмин иши давам етдирир, бүтүн дүнјада Аллаһын адыны бәјан едирләр. Јеһованын Шаһидләри дүнја үзрә Аллаһын адыны дашыјан бир халгдыр. (Һәвариләрин ишләри 15:14; Јәһја 17:26 ајәләрини охујун.)

4. Аллаһ Өз адыны неҹә уҹалдаҹаг?

Инди дүнјада Аллаһын мүгәддәс адына һөрмәтсизлик едилир. Мисал үчүн, бәзиләри дејир ки, һәјатын јараданы Аллаһ дејил вә Она табе олмаға еһтијаҹ јохдур. Диҝәрләри исә Аллаһын биз инсанлары унутдуғуну, дүнјадакы зүлм-ситәмин Ондан олдуғуну дејир. Белә дејәнләр Аллаһын адына бөһтан атырлар. Лакин бу һал узун сүрмәјәҹәк. Аллаһ Онун мүгәддәс адыны ләкәләјәнләри мәһв едәҹәк. (Мәзмур 83:17, 18 b (ЈД) ајәләрини охујун.)

Аллаһын Падшаһлығы инсан һакимијјәтләрини девириб дүнјада әмин-аманлығы бәргәрар едәндә Јеһованын ады уҹалаҹаг (Даниел 2:44). Тезликлә бүтүн инсанлар етираф етмәли олаҹаглар ки, Аллаһ вар вә О, Јеһовадыр! (Језекел 36:23; Матта 6:9 ајәләрини охујун.)

Бәс биз нә етмәлијик? Аллаһа јахынлашмалыјыг. Бунун үчүн Аллаһын Кәламыны охумаг, Аллаһы севән адамларла үнсијјәт етмәк лазымдыр. Аллаһ Өз адыны уҹалданда садиг бәндәләрини унутмајаҹаг (Малаки 3:16).

[Һашијәләр]

[14–ҹү сәһифәдәки шәкил]

Гәдим ибрани әлјазмасында Аллаһын ады