Сарсылмыш етибары неҹә бәрпа етмәли?

Рафаелa: «Һеч вахт ағлыма ҝәлмәзди ки, нә вахтса Елвира мәнә хәјанәт едәр. Буну биләндә она олан бүтүн етибарым өлдү. Ону бағышламаг елә чәтин иди ки...»

Елвира: «Мән баша дүшүрдүм ки, гәбаһәтим бөјүкдүр. Анҹаг Рафаели пешман олдуғума инандырынҹа илләр кечди».

ХӘЈАНӘТ аилә үчүн сөзүн әсил мәнасында фаҹиәдир. Бәзиләри хәјанәтлә үзләшәркән никаһларыны позмағы, диҝәрләри исә һәр шејә синә ҝәриб аиләләрини горумағы гәт едирләр. Мүгәддәс Китаб бу мәсәләдә гәрар вермәји хәјанәтлә үзләшән кәсин өз өһдәсинә бурахырb (Матта 19:9). Јухарыда сөзләри ҝәтирилән Рафаел һәјат јолдашындан бошанмамаг гәрарына ҝәлди. О да, Елвира да аиләләрини горумаг истәјирди. Анҹаг тезликлә ајдын олду ки, бир дам алтында јашамаг һәлә аиләни горумаг демәк дејил. Онларын сөзләриндән дә ҝөрүндүјү кими, Елвиранын хәјанәти онларын бир-биринә олан етибарыны тамамилә алт-үст етмишди. Бу етибары бәрпа етмәк үчүн онлар чох чалышмалы идиләр. Ахы гаршылыглы инам, етибар олмајан јердә һансы аилә сәадәтиндән данышмаг олар?!

Әҝәр сиз дә хәјанәтин гурбаны олмусунузса, бунунла белә, јолдашынызла аиләнизи горумағы гәт етмисинизсә, ајдын мәсәләдир ки, бу асан олмајаҹаг, хүсусилә дә хәјанәт һаггында өјрәндикдән сонракы бир нечә ај әрзиндә. Амма руһдан дүшмәјин. Әзмли олсаныз, бу чәтинликләрә үстүн ҝәләҹәксиниз. Аранызда итмиш етибары да бәрпа едә биләҹәксиниз. Бу мәсәләдә Аллаһын Кәламы сизә көмәк олаҹаг. Ҝәлин Аллаһын Кәламындан дөрд мәсләһәтә диггәт јетирәк.

1 Бир-биринизә гаршы дүрүст олун. Һәвари Павел јазырды: «Артыг јаланы кәнара гојдуғунуз үчүн гој һәр кәс јахынына һәгигәти сөјләсин» (Ефеслиләрә 4:25). Јаланла, јарымһәгигәтлә, јахуд сусмагла проблем һәлл олунмаз. Одур ки, етибары бәрпа етмәк үчүн бир-биринизлә ачыг данышын, сөзүн дүзүнү дејин.

Јәгин илк вахтлар хәјанәт барәдә данышмаг һәр икинизә чәтин олаҹаг. Амма әввәл-ахыр бу барәдә ачыг данышмалы олаҹагсыныз. Һәр шеји хырдалығынадәк данышмаг истәмәсәниз дә, бу сөһбәтдән үмумијјәтлә гачмағыныз дүз олмазды. Јухарыда ады чәкилән Елвира дејир: «Илк вахтлар бу барәдә данышмаға хәҹаләт чәкирдим, мәнә чох чәтин иди. Һәрәкәтимә ҝөрә чох пешман идим. Истәјирдим һәр шеји јаддан чыхарым, вәссалам». Анҹаг сөһбәтдән гачмаг Рафаеллә онун арасында ҝәрҝинлик јарадырды. «Нә гәдәр ки, Елвира сөһбәтдән гачырды, үрәјимдән шүбһәләр чәкилмирди ки чәкилмирди». О ҝүнләри хатырлајараг Елвира дејир: «Бу барәдә јолдашымла данышмадыгҹа вәзијјәт дүзәлмирди».

Доғрудан да, хәјанәт барәдә данышмаг ағырдыр. Мәсәлән, Дилбәрин әри Полад өз катибәси илә она хәјанәт етмишди. Дилбәр дејир: «Бејнимдә о гәдәр суал фырланырды ки! Ахы неҹә олду? Нијә белә еләди? Ҝөрәсән нә барәдә данышырдылар? Бүтүн ҝүнү елә һеј бу һагда фикирләширдим, һәфтәләр кечдикҹә мәндә башга-башга суаллар јаранырды. Һәјатдан күсмүшдүм». Полад исә белә дејир: «Һәрдән сөһбәт вахты өзүмүздән чыхырдыг. Амма һәр дәфә бир-биримиздән үзр истәјирдик. Белә ачыг сөһбәтләр бизи бир-биримизә јахынлашдырды».

Әсас мәгсәдинизи јаддан чыхармасаныз, белә сөһбәтләр заманы јаранан ҝәрҝинлији азалда биләрсиниз. Унутмајын ки, мәгсәдиниз гаршы тәрәфи ҹәзаландырмаг јох, баш верән фаҹиәдән өзүнүзә дәрс ҝөтүрмәк, никаһынызы горумагдыр. Ҝөтүрәк Ҹаһанҝирлә Мирварини. Ҹаһанҝир арвадына хәјанәт едәндә һәр икиси проблемин сәбәбини ахтармаға башладылар. «Мән анладым ки, башым анҹаг өз ишләримә гарышыб, — дејә Ҹаһанҝир етираф едир. — Мән јалныз ону-буну разы салмаға, онун-бунун истәдијини етмәјә чалышырдым. Арвадыма ҝәләндә исә вахтым олмурду». Проблемин көкүнү тапандан сонра Ҹаһанҝирлә Мирвари лазыми аддымлары атмаға башладылар вә араларындакы учурум јаваш-јаваш арадан галхды.

МӘСЛӘҺӘТ. Әҝәр хәјанәтә јол верән тәрәф сизсинизсә, өзүнүзә һагг газандырмаға чалышмајын. Буна ҝөрә һәјат јолдашынызы да ҝүнаһландырмајын. Һәрәкәтинизин мәсулијјәтини бојнунуздан атмајын, баша дүшүн ки, һәјат јолдашынызын көнлүнү сындырмысыныз. Јох әҝәр сиз хәјанәтин гурбаны олмусунузса, онда һәјат јолдашынызы тәһгир етмәјин, сәсинизи галдырмајын. Белә шејләрдән гачынсаныз, һәјат јолдашыныз сизинлә ачыг данышаҹаг (Ефеслиләрә 4:32).

2 Ҝүҹ бирликдәдир. «Ики адам бир адамдан јахшыдыр. Чүнки зәһмәтләри үчүн јахшы музд алаҹаглар. Әҝәр бири јыхылса, о бири јолдашыны галдырар» (Ваиз 4:9, 10). Сарсылмыш етибарын бәрпа олунмасына чалышдығыныз вахт бу ајәдәки принсипә әмәл етмәк хүсусилә ваҹибдир.

Һәјат јолдашынызла әл-әлә вериб мүнасибәтинизә хәләл јетирән инамсызлығы арадан галдыра биләрсиниз. Амма ҝәрәк һәр икиниз аиләнизи горујасыныз, неҹә дејәрләр, тәк әлдән сәс чыхмаз. Јалныз бир тәрәф чалышса, проблемләр азалмајаҹаг, артаҹаг. Буна ҝөрә бир-биринизә дәстәк олун.

Рафаеллә Елвира бу төвсијәјә әмәл етди. Елвира дејир: «Ҹәһдләримиз дәрһал нәтиҹә вермәсә дә, руһдан дүшмүрдүк, әл-әлә вериб чалышырдыг ки, аиләмизи горујаг. Мән өзүмә сөз вердим ки, бир дә Рафаелин үрәјинә бу ҹүр јара вурмајаҹағам. Рафаел дә гәлб ағрысына дөзүб, аиләмизи горумаг үчүн әлиндән ҝәләни едирди. Мән һәр ҝүн фүрсәт ахтарырдым ки, она сәдагәтими ҝөстәрим, о исә һәмишә мәнә мәһәббәтини билдирирди. Буна ҝөрә өмрүм боју она миннәтдар олаҹағам».

МӘСЛӘҺӘТ. Араныздакы етибары бәрпа етмәк үчүн әл-әлә вериб чалышын.

3 Көһнә вәрдишләриниздән әл чәкин. Иса пејғәмбәр хәјанәтдән данышаркән демишди: «Сағ ҝөзүн сәни ҝүнаһа сүрүкләјирсә, ону чыхарыб ат» (Матта 5:27—29). Әҝәр сиз һәјат јолдашыныза хәјанәт етмисинизсә, фикирләшин: никаһынызын рифаһы наминә һансы һәрәкәтләрдән вә мејилләрдән әл чәкмәлисиниз.

Ајдын мәсәләдир ки, зина етдијиниз адамла бүтүн әлагәләри кәсмәк лазымдырc (Сүлејманын мәсәлләри 6:32; 1 Коринфлиләрә 15:33). Јухарыда һаггында данышдығымыз Полад һәмин гадындан узаглашмаг үчүн иш графикини вә ҹиб телефонунун нөмрәсини дәјишди. Анҹаг бу, бир нәтиҹә вермәди. Полад һәјат јолдашынын етибарыны газанмаг фикриндә гәти иди, одур ки, иш јерини дәјишди вә арвадынын телефонуну ишләтмәјә башлады. Бүтүн бу ҹәһдләр бәһрәсиз галмады. Дилбәр дејир: «Артыг о һадисәнин үстүндән алты ил кечиб, амма һәлә дә нараһат олурам ки, бирдән һәмин гадын јенә онунла әлагә сахламаг истәјәр. Лакин Поладдан архајынам, билирәм ки, бир дә белә иш тутмаз».

Бундан әлавә, өзүнүзү јохлајын. Ола билсин, сиз ешгбазлыг етмәјә мејиллисиниз, јахуд давранышыныз бу ҹүр тәәссүрат јарадыр, һабелә, башгалары илә романтик мүнасибәт гурмаг барәдә хәјаллара гапылырсыныз. Әҝәр беләдирсә, онда «көһнә шәхсијјәти вә онун әмәлләрини әјниниздән чыхарын». Көһнә вәрдишләринизи атын. Һәјат јолдашынызын етибарыны газанмаг үчүн јени вәрдишләрә јијәләнин (Колослулара 3:9, 10). Бәлкә, сиз елә тәрбијә алмысыныз ки, севҝинизи билдирмәк сизә чәтиндир. Илк вахтлар асан олмаса да, һәјат јолдашыныза нәвазиш ҝөстәрин вә ону севҝинизә әмин един. Рафаел дејир: «Елвира тез-тез мәнә нәвазиш ҝөстәрир вә мәни севдијини сөјләјирди».

Бир мүддәт јахшы оларды ки, ҝүн боју нә етмисинизсә, һәр шеји һәјат јолдашыныза данышасыныз. Мирвари дејир: «Ҹаһанҝир ҝүн әрзиндә баш верән һәр шеји, һәтта ән хырда шејләри дә мәнә данышырды. Бунунла ҝөстәрирди ки, мәндән һеч нә ҝизләтмир».

МӘСЛӘҺӘТ. Бир-бириниздән сорушун ки, араныздакы етибары бәрпа етмәк үчүн нә едә биләрсиниз. Ҹаваблары гејд един, сонра да һәјата кечирин. Һәмчинин бирликдә вахт кечирмәк үчүн нә исә тәшкил един.

4 Ирәли бахын. Тез-тәләсик гәнаәтә ҝәлмәјин ки, артыг һәр шеј өз јолуна дүшүб. Сүлејманын мәсәлләри 21:5 ајәсиндә дејилир: «Тәләсән еһтијаҹ ичинә дүшәр». Јадда сахлајын ки, етибар бәрпа олана гәдәр, бәлкә дә, ајлар, илләр кечәҹәк.

Әҝәр сиз хәјанәтин гурбаны олмусунузса, һәјат јолдашынызы бағышламаг үчүн сизә вахт лазым ҝәлә биләр. Мирвари дејир: «Мән һәмишә фикирләширдим ки, нәјә ҝөрә гадынлар әрләринин хәјанәтини бағышлаја билмир. Нијә узун мүддәт онларын һирси сојумур? Анҹаг өзүм бу вәзијјәтә дүшәндә баша дүшдүм ки, бағышламаг чох чәтин имиш». Бағышламағы вә јенидән етибар етмәји өјрәнмәк үчүн вахт лазымдыр.

Ваиз 3:1—3 ајәләриндә дејилир ки, «сағалтмағын өз вахты» вар. Әввәлҹә сизә елә ҝәлә биләр ки, ән јахшысы һиссләринизи һәјат јолдашыныза билдирмәмәкдир. Анҹаг бу ҹүр давам етсә, она јенидән етибар едә билмәјәҹәксиниз. Араныздан учуруму ҝөтүрмәк үчүн һәјат јолдашынызы бағышлајын вә мәрһәм һиссләринизи, фикирләринизи бөлүшәрәк ону әфв етдијинизи ҝөстәрин. Һәмчинин чалышын ки, һәјат јолдашыныз да севинҹини, кәдәрини сизинлә пајлашсын.

Гојмајын ки, үрәјиниздә кин јува салсын (Ефеслиләрә 4:32). Гәдимдә Исраил халгынын Аллаһдан үз дөндәрмәси Аллаһа о гәдәр ағыр ҝетмишди ки, О, һәтта Өзүнү хәјанәт олунмуш әрлә мүгајисә етмишди (Јеремја 3:8, 9; 9:2). Анҹаг Аллаһ әбәди кин сахламады (Јеремја 3:12). Халг сидги-үрәкдән төвбә едәндә онлары бағышлады. Аллаһын рәфтарындан чох шеј өјрәнмәк олар.

Һәр икиниз лазыми аддымлары атандан сонра үрәјиниздә архајынлыг дујаҹагсыныз. Онда јалныз никаһынызы горумаға јох, бирликдә диҝәр мәгсәдләрә дә ҹан ата биләрсиниз. Амма архајынлашмајын, бундан сонра да нәјә наил олдуғунузу вахташыры јохлајын. Аранызда јаранан кичик проблемләри һәлл етмәјә, бир-биринизә сәдагәтинизи сүбут етмәјә давам един (Галатијалылара 6:9).

МӘСЛӘҺӘТ. Никаһынызы әввәлки һалына гајтармаға јох, һәјат јолдашынызла аранызда јени вә мөһкәм мүнасибәтләр гурмаға чалышын.

Бу, мүмкүндүр!

Үмидсизлијә гапылдығыныз анларда јадыныза салын: никаһын баниси Аллаһдыр (Матта 19:4—6). Одур ки, Онун көмәјилә сизин дә аиләниз хошбәхтлијә говуша биләр. Јухарыда адлары чәкилән әр-арвадлар Мүгәддәс Китабдакы һикмәтли кәламларын сајәсиндә өз никаһларыны горуја билмишләр.

Рафаел илә Елвиранын јашадығы тәлатүмлү чағларын үстүндән артыг ијирми ил өтүр. Рафаел о кешмәкешли јоллардан неҹә кечдикләрини белә тәсвир едир: «Јеһованын Шаһидләри илә Мүгәддәс Китабы өјрәнмәјә башлајандан сонра мүнасибәтләримиз хејли јахшылашды. Аллаһын Кәламынын бизә неҹә көмәк етдијини сөзлә ифадә етмәк мүмкүн дејил. Биз о чәтин дөврдән башыуҹа чыхдыг». Елвира исә өз һиссләрини белә бөлүшүр: «Аллаһын көмәјилә о ҝүнләри ҝеридә гојдуг. Нә јахшы ки, һәр икимиз Мүгәддәс Китабы өјрәнир, әлимиздән ҝәләни едирдик. Инди биз хошбәхт аиләјик».

[Һашијәләр]

ӨЗҮНҮЗДӘН СОРУШУН...

▪ Нәјә ҝөрә о вахт мән хәјанәтин үстүндән кечиб никаһымы горумаг гәрарына ҝәлдим?

▪ Һал-һазырда һәјат јолдашымда һансы ҝөзәл хүсусијјәтләр вар?

▪ Һәјат јолдашымла ҝөрүшдүјүм вахтларда она севҝими неҹә билдирирдим? Бәс инди буну неҹә едә биләрәм?