Иса вә’д едилмиш Мәсиһдир

ЈЕҺОВА Аллаһ инсанларын Мәсиһи таныја билмәләри үчүн гајғы ҝөстәрмишдир. Мүгәддәс Китабда адлары чәкилән пејғәмбәрләрин бир чоху вә’д едилмиш Хиласкарын доғулмасыны, хидмәтини вә өлүмүнү әтрафлы сурәтдә тәсвир етмишдир. Бу пејғәмбәрликләрин һамысы Иса Мәсиһин үзәриндә јеринә јетди. Онлар һәртәрәфли вә там дәгиглији илә тәсвир олунмушдур. Буна әмин олмаг үчүн ҝәлин, Мәсиһин доғулмасына вә һәјатынын көрпәлик чағына даир бә’зи пејғәмбәрликләри нәзәрдән кечирәк.

Јешаја пејғәмбәр Мәсиһин Давуд падшаһын нәслиндән ҝәләҹәјини әввәлҹәдән хәбәр вермишди (Јешаја 9:7). Мә’лум олдуғу кими, Иса Давудун нәслиндән иди (Матта 1:1, 6-17).

Аллаһын башга бир пејғәмбәри олан Микеја, бу көрпәнин ‘Бет-Лехем Ефратада’ доғулаҹағыны вә сонрадан һөкмдар олаҹағыны әввәлҹәдән билдирмишди (Микеја 5:2). Иса доғулан заман Исраилдә ики Бет-Лехем вар иди. Онлардан бири өлкәнин шималында, Назаретин јахынлығында јерләширди. Диҝәри исә Јәһудејада, Јерусәлимин јахынлығында јерләширди вә әввәлләр Ефрата адланырды. Иса мәһз бу шәһәрдә анадан олду. Бунунла да Микејанын пејғәмбәрлији јеринә јетди (Матта 2:1).

Һәмчинин әввәлҹәдән дејилмишди ки, Аллаһ Өз Оғлуну ‘Мисирдән чағыраҹаг’. Валидејнләри Иса илә бирликдә Мисирә ҝетмишдиләр. Һиродун өлүмүндән сонра, онлар ҝери гајытдылар вә беләҹә пејғәмбәрлик јеринә јетди (Һушә 11:1; Матта 2:15).

200-ҹү сәһифәдәки ҹәдвәлин икинҹи сүтунунда Мәсиһ һаггындакы пејғәмбәрликләри ҝөстәрән ајәләр ҝәтирилир. Зәһмәт олмаса, бу ајәләри пејғәмбәрликләрин јеринә јетдијини ҝөстәрән үчүнҹү сүтундакы ајәләрлә мүгајисә един. Бу, иманынызы даһа да мөһкәмләндирәҹәк вә Аллаһын Кәламынын е’тибара лајиг олдуғуна сизи әмин едәҹәк.

Нәзәрә алмаг лазымдыр ки, бу пејғәмбәрликләр Исанын доғулмасындан јүз илләр әввәл јазылмышдыр. Исанын өзү бу һагда белә демишдир: «Мәним һаггымда Мусанын Ганунунда, пејғәмбәрләрин јазыларында вә Мәзмурларда јазылмыш бүтүн шејләрин јеринә јетирилмәси лазымдыр» (Лука 24:44). Мүгәддәс Китабы тәдгиг етдикҹә ҝөрәҹәксиниз ки, бүтүн бу пејғәмбәрликләр ән хырда тәфсилатларына кими јеринә јетмишдир.