Хошбәхтлик аилә гурмагдан асылыдыр?

Мүгәддәс Китаб һәјатдан там мәмнунлуг дујмаг вә хошбәхт олмаг үчүн аилә гурмағын шәрт олдуғуну өјрәдирми? Илк бахышдан елә ҝөрүнә биләр ки, Аллаһын Кәламы бу фикри дәстәкләјир. Белә бир фикрин јаранмасына нә сәбәб ола биләр?

«Јарадылыш» китабына әсасән, Аллаһ илк инсан олан Адәмин тәк олмасынын јахшы олмадығыны ҝөрүб она «мүнасиб олан бир көмәкчи», Һәвваны јаратды (Јарадылыш 2:18). «Мүнасиб олан» ифадәси тамамлајан мәнасыны дашыјыр. Бу ајәни охујан бәзиләри белә бир гәнаәтә ҝәлә биләрләр ки, әҝәр киши вә ја гадын аилә һәјаты гурмајыбса, демәли, о натамамдыр. Үстәлик, Мүгәддәс Китабын диҝәр јерләриндә никаһ севинҹ вә хошбәхтлик мәнбәји кими тәсвир олунур. Рут һагдакы һекајә буна бир нүмунәдир.

Бәс бу о демәкдирми ки, Аллаһын буҝүнкү хидмәтчиләри аилә һәјаты гуруб оғул-ушаг саһиби олмасалар, һәјатдан мәмнунлуг дуја, хошбәхт вә там ола билмәзләр? Хејр, бу һеч дә белә дејил! Мәсәлән, өмрүнүн сонуна гәдәр субај галан Иса пејғәмбәр өзүнү натамам вә ја бәдбәхт һисс етмирди. Јер үзүндә јашајанлар арасында ән мүдрик инсан олан Иса пејғәмбәр «хошбәхт Аллаһ» Јеһованын шәхсијјәтини мүкәммәл шәкилдә әкс етдирирди (1 Тимотејә 1:11; Јәһја 14:9). Иса бу дүнјада хошбәхтлик үчүн ҝәрәкли олан шејләри садалајанда аилә гурмағы ора дахил етмәмишди (Матта 5:1—12).

Онда елә чыхыр ки, Мүгәддәс Китаб өз-өзүнә зидд ҝедир? Әсла! Бунун үчүн биз никаһ гурулушунун Јеһованын нијјәтиндә ојнадығы ролу билмәлијик. Аллаһын тәсис етдији никаһ севинҹ, мәһрәм мүнасибәтләр вә динҹлик бәхш едән гурулушдур, бәзән бу гурулуш Онун нијјәтинин мүәјјән ҹәһәтләринин јеринә јетмәсиндә ваҹиб рол ојнајырды. Мәсәлән, Аллаһын Адәм вә Һәвва илә бағлы нијјәти о иди ки, онлар төрәјиб чохалсынлар вә јер үзүнү бүрүсүнләр (Јарадылыш 1:28). Нә Адәм, нә дә Һәвва ајрылыгда Аллаһын бу нијјәтини һәјата кечирә билмәздиләр. Онлар бир-бирләринә лазым идиләр вә хүсуси тәрздә бир-бириләрини тамамлајырдылар.

Јеһованын гәдим Исраил халгы илә дә бағлы нијјәти варды вә бу нијјәтин һәјата кечмәсиндә никаһ вә аилә һәјаты хүсуси рол ојнајырды. Аллаһ истәјирди ки, Онун халгынын сајы чох олсун вә дүшмәнләр онлара ҝүҹ ҝәлмәсин. Һәмчинин Јеһованын нијјәтинә садиг инсанлары ҝүнаһ вә өлүмүн әсарәтиндән азад етмәк үчүн Јәһуда гәбиләсиндән Мәсиһин ҝәлмәси дә дахил иди (Јарадылыш 49:10). Буна ҝөрә һәмин дөврдәки садиг гадынлар аилә гуруб өвлад саһиби олмағы өзләринә хүсуси шәрәф билирдиләр, әкс һалда, бу, онлар үчүн бөјүк дәрд вә рүсвајчылыг оларды.

Бәс индики дөвр барәдә нә демәк олар? Башланғыҹда Аллаһын вердији «јер үзүнү бүрүјүн» әмри инсанларла долан бу планетдә јашајан мүасир хидмәтчиләринин үзәринә аилә гуруб өвлад саһиби олмаг өһдәчилији гојурму? Хејр! (Матта 19:10—12). Үстәлик, бәшәријјәти өлүм вә ҝүнаһдан азад едән Мәсиһлә бағлы пејғәмбәрликләр артыг јеринә јетдији үчүн Аллаһын онун нәсил шәҹәрәсини вә бу Хиласкарын доғулаҹағы халгы горумағына даһа еһтијаҹ јохдур. Белә исә Аллаһын хидмәтчиләринин никаһа вә субајлыға даир нөгтеји-нәзәри неҹә олмалыдыр?

Доғрудан да, һәм субајлыг, һәм дә никаһ Аллаһдан олан әнамдыр. Мәлумдур ки, биринә ујғун ҝәлән әнам диҝәринә ујғун ҝәлмәјә биләр. Никаһ мүгәддәс гурулушдур; о, мәһәббәт, достлуг вә аилә үчүн мөһкәм тәмәл ола биләр. Ејни заманда, Мүгәддәс Китабда ачыг-ашкар дејилир ки, гејри-камил дүнјада евләнәнләрин проблемләри олаҹаг, јәни беләләри «јени чәтинликләрлә үзләшәҹәкләр». Субајлыға ҝәлдикдә исә, Јараданымыз Јеһованын ҝөзүндә бу, рүсвајчылыг вә ја дәрд едиләси мәсәлә дејил. Әксинә, Онун Кәламында дејилир ки, никаһла мүгајисәдә субајлығын мүәјјән үстүн ҹәһәтләри вар (1 Коринфлиләрә 7:28, 32—35).

Ҝөрдүјүмүз кими, Мүгәддәс Китабын никаһа вә субајлыға даир нөгтеји-нәзәри таразлыдыр. Никаһын вә аиләнин Баниси олан Јеһова субај вә ја евли олмасындан асылы олмајараг, бүтүн хидмәтчиләринин хошбәхт олмасыны вә һәјатдан мәмнунлуг дујмасыны истәјир.