«Мәсиһи һәјаты вә ибадәти. Иш дәфтәри» үчүн мәнбәләр
ФЕВРАЛ
*** w98-E 15/10 с. 21, абз. 11—13 ***
Јерусәлим. Адынын мәнасыны ҝерчәкләшдирән шәһәр
11 Халг анд ичди ки, јазылы сурәтдә үзәринә ҝөтүрдүјү өһдәчилији јеринә јетирәҹәк. Онлар Аллаһын Ганунуна табе олмаға, әтраф халгларла аилә гуруб гоһум олмамаға сөз вердиләр (Нәһәмја 10:28—30). Үстәлик, јәһудиләр Шәнбәјә риајәт етмәји, һәгиги ибадәти дәстәкләмәк үчүн һәр ил ианә етмәји, гурбанҝаһ үчүн одун ҝәтирмәји, мал-гараларынын илк баласыны гурбанлыг үчүн вермәји, торпағын мәһсулунун илк нүбарыны мәбәдин јемәк отагларына ҝәтирмәји өһдәләринә ҝөтүрдүләр. Онлар «Аллаһын еви илә бағлы хидмәтә» лагејд јанашмамаға гәтијјәтли идиләр (Нәһәмја 10:32—39).
12 Бу ҝүн Јеһованын халгы Онун бөјүк руһани мәбәдинин һәјәтләриндә Она гуллуг едир. Онлар диггәтли олмалыдырлар ки, бу шәрәфә лагејд јанашмасынлар (Вәһј 7:15). Буна ҝөрә пак ибадәтин ирәлиләмәси үчүн һәмишә үрәкдән дуа етмәлидирләр. Бу ҹүр дуалара ујғун һәрәкәт етмәк үчүн мәсиһи ҝөрүшләринә һазырлашмаг, онларда иштирак етмәк, мүждәни тәблиғ етмәк, мараглананлара тәкрарән баш чәкмәк, мүмкүн олан һалларда онларла Мүгәддәс Китаб дәрси кечмәк ҝәрәкдир. Аллаһын еви илә бағлы хидмәтә лагејд јанашмаг истәмәјәнләрин чоху тәблиғ иши үчүн вә ибадәт јерләринин јахшы вәзијјәтдә сахланылмасы үчүн ианәләр едирләр. Биз һәмчинин бөјүк еһтијаҹ дујулан ибадәт јерләринин тикилмәси, онларын тәмиз вә сәлигәли сахланылмасы үчүн өзүмүз дә әлимиздән ҝәләни едә биләрик. Аллаһын руһани мәбәдини севдијимизи ҝөстәрмәјин мүһүм јолларындан бири диндашларымызла сүлһдә олмаг, мадди вә руһани көмәјә еһтијаҹы оланлара әл тутмагдыр (Мәтта 24:14; 28:19, 20; Ибраниләрә 13:15, 16).
13 Нәһәмјанын дөврүндә мөһүрләнән өһдәчилик Аллаһын гәдим халгыны Јерусәлимин диварларынын һәср олундуғу ҝүнә һазырлады. Анҹаг һәлә бир ваҹиб мәсәлә дә һәлл олунмалы иди. Артыг Јерусәлим он ики дарвазасы олан бөјүк диварларла әһатә олунмушду. Инди оранын әһалисинин сајыны артырмаг лазым иди. «Шәһәр ҝениш вә бөјүк иди, әһалиси исә аз иди» (Нәһәмја 7:4). Бу проблеми һәлл етмәк үчүн халг пүшк атды ки, һәр он нәфәрдән бири мүгәддәс Јерусәлим шәһәриндә јашасын. Һамы бу тәдбири ҹанла-башла дәстәкләди. Буну ҝөрән халг көнүллү олараг Јерусәлимә көчәнләрә хејир-дуа верди (Нәһәмја 11:1, 2). Мүасир дөврдә јеткин мәсиһиләрин көмәјинә бөјүк еһтијаҹ олан јерләр вар. Шәраити јол верән мәсиһиләр һәмин јәһудиләрдән өрнәк алыб белә јерләрә көчә биләрләр.
*** it-2-Е с. 454, абз. 1 ***
Исраилдә дәстә һалында маһны охујанда чох вахт антифон охујурдулар, јәни ја хорун ики һиссәси нөвбәли шәкилдә паралел сәтирләри охујурду, ја да соло охујанла хор диалог шәклиндә охујурду. Мүгәддәс Китабда бу ҹүр охумаға даир чохлу нүмунәләр вар (Чых. 15:21; 1 Ишм. 18:6, 7). Нәһәмјанын ҝүнләриндә һәмд охујан ики бөјүк хорун тәсвириндән вә Јерусәлимин диварларынын һәср олунмасы заманы онларын неҹә тәшкил олунуб ифа етмәләриндән белә нәтиҹә чыхыр ки, онлар да бу тәрздә охујурдулар.