Мәсиһин өлүмүнүн Хатирә ҝеҹәси — Аллаһа иззәт ҝәтирән һадисә

МӘСИҺЧИЛӘРӘ Мәсиһин өлүмүнүн Хатирә Ҝеҹәсини гејд етмәк тапшырылмышдыр. Бу хатирә мәрасими һәм дә «Рәббин ахшам јемәји» адланыр (1 Коринфлиләрә 11:20, İ–93). Бу һадисә нәјә ҝөрә ваҹибдир? Ону неҹә вә нә вахт гејд етмәк лазымдыр?

Иса Мәсиһ бу бајрамы б. е. 33-ҹү илиндә, ибраниләр Пасха бајрамыны гејд етдикләри заман тә’сис етмишди. Пасха бајрамы илдә бир дәфә, ибрани тәгвиминә әсасән 14 нисанда кечирилирди. Бу тарихи мүәјјән етмәк үчүн ибраниләр, еһтимал ки, јаз ҝеҹә-ҝүндүз бәрабәрлијини ҝөзләјирдиләр. Бу заман ҝеҹә вә ҝүндүз ејни узунлугда олур, јә’ни һәр икиси 12 саат давам едир. Бу ҝүндән сонра Ајын чыхдығы илк ҝүн ибраниләрдә нисан ајынын биринҹи ҝүнү һесаб едилирди. Ајын 14-ҹү ҝүнүндә ҝүнәш батдыгдан сонра Пасха бајрамы гејд едилирди.

Иса һәвариләри илә Пасханы гејд етдикдән сонра, Јәһуда Искарјоту јоллады вә сонра Рәббин Хатирә Ҝеҹәсини тә’сис етди. Бу мәрасим ибрани Пасхасыны әвәз етдији үчүн, ону да илдә бир дәфә гејд етмәк лазымдыр.

«Маттанын Мүждәси»ндә дејилир: «Иса чөрәк ҝөтүрдү, шүкран дуасы едиб, ону парчалады вә шаҝирдләрә вериб, деди: “Алын, јејин! Бу Мәним бәдәнимдир”. Бир каса да ҝөтүрүб шүкүр етди вә онлара верәрәк деди: “Бундан һамыныз ичин! Чүнки бу, Мәним ганым, ҝүнаһларын бағышланмасы үчүн бир чохлары уғрунда төкүлән Әһди-Ҹәдидин ганыдыр”» (Матта 26:26-28).

Бә’зиләри инанырлар ки, Иса чөрәк јеринә ҹаныны, шәраб јеринә исә өз ганыны тәклиф етмишди. Анҹаг чөрәји өтүрдүкдән сонра онун бәдәнинә һеч бир зәрәр дәјмәмишди. Һәгигәтәнми Исанын һәвариләри һәгиги мә’нада онун әтини јејиб, ганыны ичә биләрдиләр? Хејр, чүнки бу, вәһшилик сајылар вә Аллаһын ганунуна зидд оларды (Јарадылыш 9:3, 4; Левилиләр 17:10). Лука 22:20 ајәсинә әсасән, Иса демишдир: «Бу каса Мәним сизин үчүн төкүлән ганымла ҝерчәкләнән Әһди-Ҹәдиддир». Һәмин каса һәгиги мә’нада ‘Әһди-Ҹәдидә’, јә’ни «јени әһдә» чеврилдими? Хејр, чүнки әһд — мадди бир шеј дејил, садәҹә бир сазишдир.

Беләликлә, чөрәк вә шәраб садәҹә бир символдур. Чөрәк Мәсиһин камил бәдәнини тәмсил едир. Һәмин ҝеҹә Иса шаҝирдләринә Пасха јемәјиндән галмыш чөрәји тәклиф етди. Бу чөрәк мајасыз биширилирди (Чыхыш 12:8). Мүгәддәс Китабда маја ҝүнаһын вә хараб олманын символудур. Мајасыз чөрәк Исанын гурбан вердији камил бәдәнинин символудур. Онун бәдәни ҝүнаһсыз иди (Матта 16:11, 12; 1 Коринфлиләрә 5:6, 7; 1 Петер 2:22; 1 Јәһја 2:1, 2).

Гырмызы шәраб Исанын ганыны тәмсил едир. Јени әһд Мәсиһин ганынын төкүлмәси сајәсиндә гүввәјә минир. Иса билдирди ки, ганы «ҝүнаһларын бағышланмасы үчүн» төкүләҹәк. Бу, инсанларын Аллаһын ҝөзүндә тәмиз олмаларына вә Онунла јени әһд бағламаларына имкан јарадыр (Ибраниләрә 9:14; 10:16, 17). Бу әһд, јә’ни сазиш 144 000 садиг мәсиһчијә ҝөјләрдә јашамаг үчүн имкан ачыр. Онлар бүтүн бәшәријјәтин рифаһына хидмәт едән падшаһ вә каһинләр олаҹаглар (Јарадылыш 22:18; Јеремја 31:31-33; 1 Петер 2:9; Вәһј 5:9, 10; 14:1-3).

Хатирә Ҝеҹәси гејд едилән заман бу символлардан кимләр гәбул едә биләр? Шүбһәсиз ки, бу символлардан јалныз јени әһдә дахил оланлар, јә’ни ҝөјдә јашамаг үмидинә малик оланлар гәбул едә биләр. Аллаһын мүгәддәс руһу бу инсанлары ҝөјдә падшаһ олмаг үчүн сечилдикләринә әмин едир (Ромалылара 8:16). Бундан башга, Иса онларла Падшаһлыг әһди бағламышдыр (Лука 22:29).

Бәс јерүзү Ҹәннәтдә әбәди јашамаға үмид едәнләр барәдә нә демәк олар? Бу инсанлар Исанын әмринә гулаг асараг, Мәсиһин өлүмүнүн Хатирә Ҝеҹәсинә ҝәлирләр. Онлар бу һадисәјә һөрмәтлә јанашырлар, анҹаг символлардан гәбул етмирләр. Јеһованын Шаһидләри Хатирә Ҝеҹәсини илдә бир дәфә, 14 нисанда, ҝүн батандан сонра гејд едирләр. Һал-һазырда дүнјада ҝөјләр үмидинә малик оланлардан јалныз бир нечә мин галмасына бахмајараг, бу хатирә мәрасимини бүтүн мәсиһчиләр гијмәтләндирир. Хатирә Ҝеҹәси заманы һәр биримиз Јеһова Аллаһын вә Иса Мәсиһин мисилсиз мәһәббәти үзәриндә дүшүнә биләрик (Јәһја 3:16).