Аллаһдан назил олан ики хәбәр

Мүгәддәс Китаб Аллаһдан назил олуб вә онун васитәсилә Аллаһ-Таала бизә рәһбәрлик верир. Ҝәлин тәхминән 2000 ил бундан әввәл ҝөндәрилмиш ики хүсуси хәбәрә диггәт јетирәк. Бу хәбәрләри «Аллаһын һүзурунда дуран» Ҹәбрајыл мәләк чатдырыр (Лука 1:19). Бәс мәләк бу ваҹиб хәбәрләри кимләрә чатдырыр?

Бизим ерадан әввәл 3-ҹү илдир. Аллаһ Ҹәбрајыл мәләји илк өнҹә кимин јанына ҝөндәрир? Јәһудијјәнин дағлыг бөлҝәсиндә, еһтимал ки, Јерусәлимин јахынлығында Зәкәријјә адлы бир киши јашајыр. Зәкәријјә вә арвады Илсәба аһыл јашларындадыр, анҹаг бу јаша кими онларын ушағы олмајыб. Зәкәријјә Јерусәлимдә Јеһова Аллаһа каһин кими хидмәт едир. Ҝүнләрин бир ҝүнү Аллаһын мәбәдиндә хидмәт етмәк нөвбәси Зәкәријјәјә ҝәлиб чатыр. О, мәбәддә оларкән гәфләтән Ҹәбрајыл мәләк бухур гурбанҝаһынын јанында пејда олур.

Тәбии ки, Зәкәријјә бәрк горхур. Амма Ҹәбрајыл мәләк ону сакитләшдириб дејир: «Зәкәријјә, горхма, чүнки Аллаһ сәнин јалварышыны ешитди. Арвадын Илсәба сәнә бир оғул доғаҹаг. Адыны Јәһја гојарсан». Ҹәбрајыл мәләк сонра әлавә едиб дејир ки, «о, Јеһованын ҝөзүндә бөјүк олаҹаг» вә халгы Јеһова үчүн һазырлајаҹаг (Лука 1:13—17).

Лакин Зәкәријјәнин буна инанмағы ҝәлмир. Чүнки јашлары о јаш дејил. Онда мәләк она дејир: «Бунлар баш верәнә гәдәр дилин тутулаҹаг, даныша билмәјәҹәксән, она ҝөрә ки... сөзләримә инанмадын» (Лука 1:20).

Бу вахт чөлдәки ҹамаат Зәкәријјәнин мәбәддә бу гәдәр ләнҝидијинә тәәҹҹүбләнир. Нәһајәт, о, мәбәддән чыхыр, анҹаг даныша билмир. Фикирләрини әл-гол һәрәкәтләри илә баша салыр. Ајдын олур ки, о, мәбәддә гејри-ади бир шеј ҝөрүб.

Зәкәријјә мәбәддә хидмәти баша вуруб евинә гајыдыр. Бир гәдәр сонра Илсәба һамилә галыр. Һамиләлијинин сон беш ајы о, евдән чөлә чыхмыр.

Ҹәбрајыл икинҹи дәфә пејда олур. Бәс бу сәфәр о, кимин јанына ҝәлир? Бу дәфә о, Мәрјәм адлы субај бир гызын јанына ҝәлир. Бу гыз Јерусәлимин шималында, Ҹәлилә бөлҝәсинин Насирә шәһәриндә јашајыр. Ҝөрәсән, Ҹәбрајыл Мәрјәмә һансы хәбәри ҝәтириб? О дејир: «Сән Аллаһын ҝөзүндә лүтф тапмысан. Сән һамилә галыб оғул доғаҹагсан. Онун адыны Иса гојарсан». Ҹәбрајыл сөзүнә давам едир: «О, бөјүк олаҹаг, Һагг-Тааланын Оғлу адланаҹаг... О, Јагубун еви үзәриндә әбәдијјән һөкмранлыг едәҹәк, онун Падшаһлығынын сону олмајаҹаг» (Лука 1:30—33).

Сөзсүз ки, Ҹәбрајыл бу ики хәбәри чатдырмағы өзүнә бөјүк шәрәф билир. Јәһја пејғәмбәр вә Иса Мәсиһ һаггында даһа чох өјрәндикҹә Аллаһдан ҝәлән бу ики хәбәрин нә гәдәр ваҹиб олдуғуну дәрк едәҹәјик.