«Сезарын мәһкәмәсини тәләб едирәм!»

1, 2. а) Булусун дүшдүјү вәзијјәти тәсвир ет. б) Булусун Сезарын мәһкәмәсини тәләб етмәси илә бағлы һансы суал јараныр?

БУЛУС һәлә дә Гејсәријјәдә ҹидди мүһафизә алтында сахланылыр. О, артыг ики илдир ки, Јәһудијјәдәдир. Бура гајытдығы ҹәми бир нечә ҝүн иди ки, јәһудиләр азындан үч дәфә ону өлдүрмәјә ҹәһд ҝөстәрмишдиләр (Һәв. 21:27—36; 23:10, 12—15, 27). Планлары баш тутмаса да, Булусун дүшмәнләринин тәслим олмаг фикри јохдур. Баша дүшәндә ки, һәлә дә онларын әлинә дүшмәк еһтималы вар, Булус Рома валиси Порси Фестә билдирир: «Мән Сезарын мәһкәмәсини тәләб едирәм!» (Һәв. 25:11).

² Јеһова Булусун Рома императоруна мүраҹиәт етмәк гәрарыны дәстәкләдими? Бу суалын ҹавабыны билмәк бизим үчүн чох ваҹибдир, белә ки, биз Аллаһын Падшаһлығы һаггында әсаслы шәһадәт веририк. Буна ҝөрә дә билмәлијик ки, хош хәбәри мүдафиә едәркән вә онун гануни танынмасына чалышаркән Булус кими даврана биләрик, ја јох? (Филип. 1:7)

«Мәһкәмә күрсүсү гаршысында» (Һәвариләрин ишләри 25:1—12)

3, 4. а) Јәһудиләр һансы нијјәтлә Булусу Јерусәлимә ҝәтиздирмәк истәјирдиләр, амма һәвари өлүмдән неҹә гуртулду? б) Јеһова Өз мүасир хидмәтчиләринә неҹә дајаг олур?

³ Вәзифәјә тәјин олунандан үч ҝүн сонра Јәһудијјәнин јени валиси Фест Јерусәлимә ҝәлдиa. Орада о, Булуса гаршы ҹидди иттиһамлар ирәли сүрән бөјүк каһинләри вә диҝәр нүфузлу јәһудиләри динләди. Онлар билирдиләр ки, бу јени валидән онларла, о ҹүмләдән бүтүн јәһудиләрлә сүлһдә олмаг тәләб олунур. Буна ҝөрә дә Фестдән хаһиш етдиләр ки, Булусу Јерусәлимә ҝәтиздириб орада мүһакимә етсин. Лакин, бу хаһишин архасында мәкрли план дурурду. Дүшмәнләри Гејсәријјәдән Јерусәлимә ҝедән јолда пусгу гуруб Булусу өлдүрмәк истәјирдиләр. Фест онларын хаһишини рәдд етди: «Гој араныздакы рәһбәрләр мәнимлә ҝетсинләр вә әҝәр бу адамын бир ҝүнаһы варса, ону орада иттиһам етсинләр» (Һәв. 25:5). Беләликлә, Булус јенә дә өлүмдән гуртулду.

⁴ Үзләшдији бүтүн сынагларда Јеһова Иса Мәсиһ васитәсилә Булуса дајаг олурду. Јадындадырса, Иса ҝөрүнтүдә һәваријә ҝөрүнүб: «Ҹәсарәтли ол!» — дејә она үрәк-дирәк вермишди (Һәв. 23:11). Бу ҝүн дә Аллаһын хидмәтчиләри ҹүрбәҹүр манеәләрлә гаршылашырлар. Онлара да һәдә-горху ҝәлирләр. Дүздүр, Јеһова бизи һәр чәтинликдән мүдафиә етмир, амма јаранан чәтинлијә таб ҝәтирмәк үчүн һикмәт вә ҝүҹ верир. Һансы вәзијјәтә дүшүрүксә дүшәк, архајын ола биләрик ки, Аллаһ «инсан ҝүҹүндән үстүн олан» ҝүҹү биздән әсирҝәмәјәҹәк (2 Кор. 4:7).

5. Фест Булусла неҹә рәфтар етди?

⁵ Бир нечә ҝүн сонра Фест Гејсәријјәдә «һаким күрсүсүнә» әјләшдиb. Фестин гаршысында Булус вә онун иттиһамчылары дурурду. Әлејһдарларынын әсассыз иттиһамларына ҹаваб олараг Булус етираз етди: «Мән нә јәһудиләрин Ганунуна, нә мәбәдә, нә дә Сезара гаршы ҝүнаһ иш тутмамышам». Һәвари ҝүнаһсыз иди. Әслиндә, о, азад едилмәли иди. Бәс ҝөрәсән Фест нә гәрар чыхараҹаг? Јәһудиләрин рәғбәтини газанмаг истәјән Фест Булусдан сорушду: «Истәјирсән, Јерусәлимә ҝедәк, бу иттиһамлара ҝөрә сәнә орада һөкм чыхарсынлар?» (Һәв. 25:6—9). Һеч белә дә ҹәфәнҝијат олар? Булусу Јерусәлимә ҝөндәрсәјдиләр, «мәһкәмә күрсүсү»ндә онун иттиһамчылары отураҹагды. Белә олан һалда исә онун өлүмү гачылмаз олаҹагды. Фест ачыг-ајдын әдаләти сијасәтә гурбан верди. Вали Понти Пилат да Иса Мәсиһин ишинә баханда ејни ҹүр давранмышды (Јәһ. 19:12—16). Мүасир дөврдә дә бәзән һакимләр сијаси тәзјигләрә ујурлар. Буна ҝөрә дә ачыг-ашкар дәлилләрә бахмајараг, Аллаһын халгынын әлејһинә әдаләтсиз гәрарлар чыхарыланда биз тәәҹҹүбләнмирик.

6, 7. Нә үчүн Булус Сезарын мәһкәмәсини тәләб етди вә бунунла да мүасир һәгиги мәсиһиләр үчүн һансы нүмунәни гојду?

⁶ Фестин јәһудиләрин рәғбәтини газанмаг истәји Булусу өлүм тәһлүкәси илә үз-үзә гојурду. Буна ҝөрә дә Булус Рома вәтәндашы кими малик олдуғу һүгуглардан истифадә етмәк гәрарына ҝәлди. О, Фестә деди: «Мән Сезарын мәһкәмә күрсүсү гаршысында дајанмышам, бурада да мүһакимә едилмәлијәм. Мәним јәһудиләрә бир пислијим дәјмәјиб. Сән өзүн дә буну јахшы билирсән... Мән Сезарын мәһкәмәсини тәләб едирәм!» Белә бир тәләб ирәли сүрән адам адәтән фикрини дәјишә билмәзди. Фест буну вурғулајараг деди: «Сезарын мәһкәмәсини тәләб едирсән, Сезарын јанына да ҝедәҹәксән» (Һәв. 25:10—12). Јухары мәһкәмә инстансијасына мүраҹиәт етмәклә Булус мүасир һәгиги мәсиһиләр үчүн нүмунә гојду. Әлејһдарлар «ганун ады илә пислик» төрәтмәјә чалышанда Јеһованын Шаһидләри хош хәбәри мүдафиә етмәк үчүн һүгуги васитәләрдән истифадә едирләрc (Зәб. 94:20).

⁷ Төрәтмәдији ҹинајәтләрә ҝөрә ики илдән чох дустаг оландан сонра Булуса өзүнү Ромада мүдафиә етмәк имканы верилди. Лакин Ромаја ҝетмәздән әввәл бир нәфәр дә ону ҝөрмәк истәди.

«Итаәт етмәјә билмәздим» (Һәвариләрин ишләри 25:13—26:23)

8, 9. Агриппа падшаһ нә үчүн Гејсәријјәјә ҝәлмишди?

⁸ Булус Сезарын мәһкәмәсини тәләб едәндән бир нечә ҝүн сонра Агриппа падшаһ вә баҹысы Берники һөрмәт әламәти олараг јени вали илә ҝөрүшә ҝәлдиd. О дөврдә вәзифәјә јени ҝәлән валиләрә мәмурларын баш чәкмәси адәт иди. Фести јени тәјинаты илә тәбрик едән Агриппа, шүбһәсиз ки, ҝәләҹәкдә фајдалы ола биләҹәк әлагәләр вә достлуг мүнасибәти гурмаға чалышырды (Һәв. 25:13).

⁹ Фест Агриппаја Булус һаггында данышды вә о, Булусу ҝөрмәк истәди. Нөвбәти ҝүн онлар һаким күрсүсүндә отурдулар. Онлар нә гәдәр дәбдәбәли вә нүфузлу ҝөрүнүрләрсә ҝөрүнсүнләр, бу еһтишам гаршыларында ифадә верәҹәк дустағын сөзләринин ҝүҹү гаршысында һеч нә иди (Һәв. 25:22—27).

10, 11. Булус Агриппаја неҹә һөрмәт ҝөстәрди вә она өз кечмиши һагда нә данышды?

¹⁰ Булус һөрмәтлә Агриппаја онун гаршысында өзүнү мүдафиә етмәк имканына ҝөрә тәшәккүрүнү билдирди вә падшаһын јәһуди адәтләринә, еләҹә дә мүбаһисәләринә јахшы бәләд олдуғуну гејд етди. Сонра өз кечмишиндән данышды: «Мән динимизин ән тәләбкар мәзһәбинә мүвафиг олараг, фәриси һәјаты сүрмүшәм» (Һәв. 26:5). Бир фәриси кими, Булус Мәсиһин ҝәлишини ҝөзләјирди. Инди исә бир мәсиһи олараг, ҹәсарәтлә Иса Мәсиһин һәмин ҝөзләнилән шәхс олдуғуну сөјләјирди. Булус инди онун да, иттиһамчыларынын да инандығы бир шејә, јәни Аллаһын улу бабаларына вердији вәдин доғрулуғуна үмид етдијинә ҝөрә мәһкәмә гаршысында дурмушду. Вәзијјәтин нә јердә олдуғуну ҝөрәндә Агриппа Булусун нөвбәти сөзләрини даһа бөјүк марагла динләдиe.

¹¹ Әввәлләр мәсиһиләрлә амансыз рәфтар етдијини јада салараг Булус деди: «Доғрусу, әввәлләр мән өзүм дә елә дүшүнүрдүм ки, нәсрани Исанын адына гаршы мүбаризә апармалыјам... Бу адамларын [Мәсиһин давамчыларынын] әлиндән елә һирсли идим ки, һәтта башга шәһәрләрә дә ҝедиб онлара зүлм едирдим» (Һәв. 26:9—11). Булус һеч нәји шиширтмирди. Онун мәсиһиләрә гаршы зоракылыг төрәтмәси чохларына мәлум иди (Гал. 1:13, 23). Јәгин, Агриппа дүшүнүрдү: «Ҝөрәсән, белә бир адамы дәјишән нә олуб?»

12, 13. а) Булус мәсиһилији гәбул етдијини неҹә тәсвир етди? б) Булус һансы мәнада «чомаға гаршы тәпик» атырды?

¹² Бу суалын ҹавабыны Булусун нөвбәти сөзләриндә тапмаг олар: «Бир ҝүн бөјүк каһинләрдән алдығым сәлаһијјәт вә тапшырыгла Дәмәшгә ҝедирдим. Еј падшаһ! Јолда икән, ҝүнорта вахты ҝөјдән ҝүн ишығындан да парлаг бир ишыг ҝәлди, мәним вә јол јолдашларымын әтрафыны ишыгландырды. Биз һамымыз јерә јыхылдыг вә бу заман мән ибраниҹә данышан бир сәс ешитдим: “Шаул, Шаул, нијә мәни тәгиб едирсән? Чомаға гаршы тәпик атмагла өзүнә зәрәр вурурсан”. Онда мән сорушдум: “Аға, сән кимсән?” О, мәнә ҹаваб верди: “Мән сәнин тәгиб етдијин Исајам”»f (Һәв. 26:12—15).

¹³ Бу ҝөрүнтүјә гәдәр Булус, мәҹази дилдә десәк, «чомаға гаршы тәпик» атырды. Һејван ити уҹлу чомаға гаршы тәпик атмагла өзүнә хәтәр јетирдији кими, Булус да Аллаһын ирадәсинә гаршы чыхмагла өзүнә руһани ҹәһәтдән зәрәр вурурду. Булусун үрәји тәмиз олса да, о, дәриндән јанылырды. Дирилмиш Иса Дәмәшгә ҝедән јолда Булуса ҝөрүнүб ону дүзҝүн јола јөнәлтди (Јәһ. 16:1, 2).

14, 15. Булус һәјатында етдији дәјишикликләр һаггында нә данышды?

¹⁴ Бу һадисә Булусун һәјатыны көкүндән дәјишмишди. О, Агриппаја мүраҹиәт едәрәк деди: «Мән ҝөјдән ҝәлән бу вәһјә итаәт етмәјә билмәздим. Буна ҝөрә дә әввәлҹә Дәмәшг, сонра Јерусәлим вә бүтүн Јәһудијјә әһалисинә, һәмчинин диҝәр халглара бәјан етдим ки, төвбә етсинләр вә төвбәни ҝөстәрән ишләр ҝөрүб Аллаһа дөнсүнләр» (Һәв. 26:19, 20). Артыг нечә ил иди ки, Булус Иса Мәсиһин һәмин ҝүн она вердији тапшырығы јеринә јетирмәклә мәшғул иди. Бәс бунун бир фајдасы олмушдуму? Әлбәттә. Булусун тәблиғ етдији хош хәбәрә һај верәнләр төвбә едиб, әхлагсыз, әјри јолларындан дөнмүшдүләр. Бу инсанлар дөвләтин ганунларына һөрмәтлә јанашан, онлара риајәт едән виҹданлы вәтәндашлар олмушдулар.

¹⁵ Амма Булусу иттиһам едән јәһудиләрин ҝөзүндә бүтүн бунларын һеч бир гијмәти јох иди. Булус деди: «Бунун үстүндә јәһудиләр мәни мәбәддә тутдулар вә өлдүрмәјә ҹәһд ҝөстәрдиләр. Бунунла белә, мән Аллаһдан алдығым көмәк сајәсиндә бу ҝүнә гәдәр бөјүкдән тутмуш кичијәдәк һамыја шәһадәт верирәм» (Һәв. 26:21, 22).

16. Һакимләрлә вә дөвләт мәмурлары илә неҹә данышмагла бағлы Булус һансы нүмунәни гојуб?

¹⁶ Һәгиги мәсиһи олан бизләр иманымызы «мүдафиә етмәјә һазыр» олмалыјыг (1 Бут. 3:15). Һакимләрлә вә дөвләт мәмурлары илә етигадларымыз һаггында данышаркән Булусун нүмунәсини изләјә биләрик. Һөрмәтҹил шәкилдә Мүгәддәс Китабын һәм өз һәјатымызы, һәм дә бәјан етдијимиз хәбәрә һај верәнләрин һәјатыны јахшылыға доғру неҹә дәјишдијини данышсаг, онларын бизә мүнасибәтини дәјишә биләрик.

«Белә ҝетсә, мәни дә мәсиһи едәҹәксән» (Һәвариләрин ишләри 26:24—32)

17. Булус өзүнү мүдафиә едәндә Фестин реаксијасы неҹә олду вә бу ҝүн дә чохлары һансы мөвгеји тутурлар?

¹⁷ Булусун инандырыҹы сөзләрини Агриппа илә Фест сојугганлы гаршылаја билмәзди. Ҝөр нә баш верир: «Булус бу јерә чатанда Фест уҹадан деди: “Булус, дејәсән, ағлыны итирмисән! Чох охумагдан башын хараб олуб!”» (Һәв. 26:24). Фестин реаксијасында бу ҝүн чохларынын тутдуғу мөвгеји ҝөрмәк олар. Бу инсанларын нәзәриндә Мүгәддәс Китабда јазыланлары тәблиғ едәнләр фанатикләрдир. Чох вахт бу дүнјанын мүдрикләринә Мүгәддәс Китабын дирилмә тәлимини гәбул етмәк чәтин олур.

18. Булус Фестә неҹә ҹаваб верди вә бунун мүгабилиндә Агриппа нә деди?

¹⁸ Булус валијә ҹаваб верди: «Мөһтәрәм Фест! Мәним башым хараб олмајыб. Дедијим сөзләрдә һәгигәт вә мәнтиг вар. Падшаһ бу шејләри јахшы билир, буна ҝөрә дә мән онун гаршысында сәрбәст данышырам... Падшаһ Агриппа, Пејғәмбәрләрин китабына инанырсан? Билирәм ки, инанырсан». Агриппа Булуса деди: «Белә ҝетсә, мәни дә мәсиһи едәҹәксән» (Һәв. 26:25—28). Сәмими олса да, олмаса да бу сөзләрдән ҝөрүнүр ки, Булусун шаһидлији падшаһа дәрин тәсир бағышламышды.

19. Фест илә Агриппа Булусла бағлы һансы гәнаәтә ҝәлдиләр?

¹⁹ Сонра Агриппа илә Фест ајаға галхды. Бунунла да динләмә баша чатды. «Онлар ҝедә-ҝедә бир-биринә дејирдиләр: “Бу адам өлүмә, јахуд гандала лајиг бир иш ҝөрмүр”. Агриппа Фестә белә деди: “Сезарын мәһкәмәсини тәләб етмәсәјди, ону азад етмәк оларды”» (Һәв. 26:31, 32). Онлар билирдиләр ки, гаршыларында дуран инсан ҝүнаһсыздыр. Ола билсин, бундан сонра онлар мәсиһиләр һагда даһа мүсбәт фикирдә олаҹагдылар.

20. Булусун јүксәк вәзифәли мәмурлара шаһидлик вермәсинин һансы фајдасы олду?

²⁰ Ҝөрүнүр, бу ики нәфәрдән һеч бири Аллаһын Падшаһлығы һаггында хәбәри гәбул етмәди. Бәс онда Булус бош јерәми өзүнү онларын гаршысында мүдафиә етмишди? Әсла. Булусун Јәһудијјәдә «падшаһларын вә валиләрин өнүнә» ҝәтирилмәси сајәсиндә елә јүксәк вәзифәли мәмурлара шаһидлик верилди ки, башга һеч ҹүр онлара хәбәри чатдырмаг мүмкүн олмазды (Лука 21:12, 13). Бундан башга, Булусун үзләшдији чәтинликләр вә һәмин чәтинликләр вахты садиг галмасы баҹы-гардашлары мөһкәмләндирмишди (Филип. 1:12—14).

21. Падшаһлыг ишини әзмлә давам етдирәрәк һансы ҝөзәл бәһрәләри бичә биләрик?

²¹ Ејни шеји бизим ҝүнләр һагда да демәк олар. Сынаглара вә тәгибләрә бахмајараг, тәблиғ ишини әзмлә давам етдирсәк, бунун ҝөзәл бәһрәләрини ҝөрәҹәјик. Ола билсин, биз елә дөвләт рәсмиләринә шаһидлик едәк ки, ади үсулла онлара тәблиғ етмәк мүмкүн олмазды. Бизим сарсылмаз иманымыз баҹы-гардашларымызы руһландыра биләр, бу да өз нөвбәсиндә онлары Аллаһын Падшаһлығы һаггында даһа да ҹәсарәтлә шәһадәт вермәјә тәшвиг едәр.