Јенијетмә гардашлар, мәгсәдләрә ҹан атырсынызмы?
1. Гардашлар 1 Тимотејә 3:1 ајәсиндәки ҝөстәришә нә вахтдан әмәл едә биләрләр?
1 Руһани мәгсәдләрә «ҹан атан адам јахшы иш ҝөрүр» (1 Тим. 3:1). Бу илһамланмыш сөзләр гардашлары јығынҹагда мәсулијјәтләр алмаг үчүн тәләбләрә мүвафиг олмаға тәшвиг едир. Бу мәсәләдә јаш рол ојнајыр? Әслиндә, мәсулијјәтләрә ушаг јашларындан ҹан атмаг даһа јахшы оларды. Белә етмәклә сән тәҹрүбә топлаја вә бөјүјәндә хидмәти көмәкчи олмаг үчүн јарарлы олдуғуну ҝөстәрә биләрсән (1 Тим. 3:10). Бәс вәфтиз олунмуш јенијетмә гардашлар руһани мәгсәдләрә неҹә ҹан ата биләрләр?
2. Фәдакарлыг руһуну неҹә инкишаф вә тәзаһүр етдирмәк олар?
2 Фәдакар ол. Унутма ки, ҹан атмалы олдуғун шеј ад-сан јох, јахшы ишләрдир. Буна ҝөрә дә үрәјиндә баҹы-гардашлара көмәк етмәк истәји јарат. Бу ишдә Исанын ҝөзәл нүмунәси үзәриндә дүшүнмәк фајдалы ола биләр (Мат. 20:28; Јәһ. 4:6, 7; 13:4, 5). Јеһовадан хаһиш ет ки, сәндә башгаларына гаршы сәмими мараг ҝөстәрмәк истәји ојатсын (1 Кор. 10:24). Јығынҹағыныздакы јашлылара вә сағламлығында проблеми оланлара көмәклик ҝөстәрә биләрсәнми? Падшаһлыг залынын һәјәтјаны саһәсинин тәмизлијиндә иштирак едә вә диҝәр груплара тәмизлик ишиндә көмәк едә биләрсәнми? Лазым ҝәлдикдә Теократик Хидмәт Мәктәбиндә ҝәлмәјәнин әвәзинә чыхыш едә биләрсәнми? Унутма ки, башгаларынын рифаһы үчүн әлиндән ҝәләни едәндә севинҹ әлдә едәҹәксән (Һәв. иш. 20:35).
3. Руһанилик нә дәрәҹәдә ваҹибдир вә буна неҹә наил олмаг олар?
3 Руһанилијә ҹан ат. Јығынҹагда хидмәт етмәк үчүн хүсуси габилијјәт вә фитри истедаддан чох, руһанилик тәләб олунур. Руһани инсан һәр шејә Јеһованын вә Исанын ҝөзү илә бахмаға чалышыр (1 Кор. 2:15, 16). О, «руһун бәһрәси»ни тәзаһүр етдирир (Галат. 5:22, 23). Белә инсан Падшаһлығын марагларыны биринҹи јерә гојур вә сәјлә тәблиғ едир (Мат. 6:33). Мүнтәзәм шәхси өјрәнмә етмәклә руһани кејфијјәтләр инкишаф етдирә биләрсән. Бура һәр ҝүн Мүгәддәс Китабы охумаг, еләҹә дә «Ҝөзәтчи гүлләси» вә «Ојанын!» журналларынын һәр бир сајыны охумаг, јығынҹаг ҝөрүшләринә һазырлашмаг вә орада иштирак етмәк дахилдир (Мәз. 1:1, 2; Ибр. 10:24, 25). Павел ҝәнҹ Тимотеји руһән тәрәгги етмәјә тәшвиг едәркән јазмышды: «Вердијин тәлимә һәмишә диггәт јетир» (1 Тим. 4:15, 16). Буна ҝөрә дә Теократик Хидмәт Мәктәбиндә алдығын тапшырыглара јахшы-јахшы һазырлаш. Хидмәтә габагҹадан һазырлаш вә тәблиғдә мүнтәзәм иштирак ет. Гаршына пионер олмаг, Бет-Елдә хидмәт етмәк вә ја Субај Гардашлар үчүн Мүгәддәс Китаб Мәктәбиндә тәлим алмаг кими руһани мәгсәдләр гој. Руһанилик сәнә «ҝәнҹлијә хас истәкләрдән гач»маға көмәк едәҹәк (2 Тим. 2:22).
4. Етибарлы вә сәдагәтли олмаг нә үчүн ваҹибдир?
4 Етибарлы вә сәдагәтли ол. Биринҹи әсрдә еһтијаҹы олан мәсиһчиләрә јемәк пајламаг үчүн тәјин олунан гардашлар јахшы ад газанмышдылар вә ҝөрүнүр, һамы онлары етибарлы вә сәдагәтли инсан кими таныјырды. Бу сәбәбдән һәвариләр ишин неҹә иҹра олунаҹағы барәдә нараһат олмурдулар. Бу, имкан верирди ки, һәвариләр диггәтләрини диҝәр ваҹиб мәсәләләрә ҹәмләјә билсинләр (Һәв. иш. 6:1—4). Буна ҝөрә дә јығынҹагда сәнә һәр һансы тапшырыг вериләндә чалыш ки, ону баҹардығын гәдәр јахшы јеринә јетирәсән. Ҝәми тикмәк тапшырығы алан вә бүтүн ҝөстәришләрә там риајәт едән Нуһдан нүмунә ҝөтүр (Јар. 6:22). Јеһова јеткинлијин әламәти олан сәдагәтлилик хүсусијјәтини чох гијмәтләндирир. (1 Кор. 4:2; «Тәҹрүбә газанмағын фајдасы» адлы чәрчивәјә бах.)
5. Јенијетмә гардашлар нәјә ҝөрә руһани мәгсәдләрә ҹан атмалыдырлар?
5 Пејғәмбәрлик едилдији кими, Јеһова јығым ишини сүрәтләндирир (Јешаја 60:22). Орта һесабла һәр ил ики јүз әлли мин инсан вәфтиз олунур. Һәр ил һәгигәтә бу гәдәр инсан ҝәлдијиндән јығынҹагдакы мәсулијјәтләри иҹра етмәк үчүн јарарлы руһани кишиләрә еһтијаҹ вар. Бу ҝүн Јеһоваја хидмәтдә ҝөрүләси ишләр һәмишәкиндән даһа чохдур (1 Кор. 15:58). Јенијетмә гардашлар, сиз руһани мәгсәдләрә ҹан атырсынызмы? Әҝәр бу, беләдирсә, онда чох јахшы иш ҝөрүрсүнүз!
[2-ҹи сәһифәдәки јазы]
Һәр ил һәгигәтә он минләрлә инсан ҝәлдијиндән јығынҹагдакы мәсулијјәтләри иҹра етмәк үчүн јарарлы руһани кишиләрә еһтијаҹ вар
[3-ҹү сәһифәдәки чәрчивә]
Тәҹрүбә газанмағын фајдасы
Ағсаггаллар јенијетмә гардашлара тапшырыглар вә тәлим верәндә онлар бундан фајдаланырлар. Бир дәфә јығынҹагдан сонра рајон нәзарәтчиси сәһнәдә отуруб бир тәблиғчини руһландырырды. О, балаҹа бир оғланын кәнарда дуруб ҝөзләдијини ҝөрдү вә сорушду ки, онунла сөһбәт етмәк үчүн ҝөзләјир. Балаҹа гардаш ҹаваб верди ки, һәр јығынҹаг ҝөрүшүндән сонра сәһнәни тозсоранла тәмизләмәк она тапшырылыб. Валидејнләри ҝетмәјә һазырлашсалар да, о, тапшырығыны јеринә јетирмәмиш ҝетмәк истәмирди. Рајон нәзарәтчиси мәмнунијјәтлә сәһнәдән дүшдү. Сонрадан о, белә сөзләр демишди: «Һәмин јығынҹағын ағсаггаллары јарарлы јенијетмә гардашлара тапшырыглар вермәклә һәмишә онлары өјрәдирдиләр. Буна ҝөрә дә мән јығынҹаға баш чәкәндә онлар ҝәнҹ гардашлары хидмәти көмәкчи кими төвсијә етмәјә чәтинлик чәкмирдиләр».