Биз һарадан ҝәлмишик?
БУ СУАЛЫН ҸАВАБЫНЫ ТАПМАГ НӘ ҮЧҮН ВАҸИБДИР? Бир чох инсанлара јер үзүндә һәјатын тәсадүф нәтиҹәсиндә јарандығыны өјрәдибләр. Онлара дејибләр ки, бир сыра инанылмаз вә тәсадүфи һадисәләрин, јәни тәкамүлүн нәтиҹәсиндә емосионал, әгли вә руһани габилијјәтләрә малик олан инсан пејда олуб.
Анҹаг дүшүнүн: әҝәр биз доғрудан да тәкамүлүн бәһрәсијиксә вә Јарадан јохдурса, демәк олар ки, бәшәр аиләси јетимдир. Онда бәшәријјәтә мәсләһәт верәҹәк али һикмәт мәнбәји, јәни проблемләримизин һәллиндә көмәк едәҹәк бир кимсәмиз јохдур. Демәли, тәбиәтин мәһв едилмәсинин гаршысыны алмаг, сијаси мүнагишәләри һәлл етмәк вә шәхси проблемләримиздән чыхыш јолу тапмаг үчүн инсан мүдриклијинә бел бағламагдан башга чарәмиз галмыр.
Бу фикир сизә гәлб раһатлығы ҝәтирирми? Әҝәр ҝәтирмирсә, онда ҝәлин башга вариант үзәриндә дүшүнәк. Бу нәинки даһа ҹәлбедиҹидир, һәмчинин даһа мәнтигидир.
Мүгәддәс Китаб нә дејир?
Мүгәддәс Китаб өјрәдир ки, бәшәријјәти Аллаһ јарадыб. Биз мәһәббәт вә шүурла һеч бир бағлылығы олмајан тәкамүлүн бәһрәси јох, севән шүурлу Атанын өвладларыјыг. Ҝәлин буна даир Мүгәддәс Китабын вердији ајдын мәлуматлара диггәт јетирәк.
Јарадылыш 1:27. «Аллаһ инсаны Өз сурәтиндә јаратды, Аллаһын сурәтиндә јаратды, онлары киши вә гадын олараг јаратды».
Мәзмур 139:14. «Сән мәни еҹазкар, әсрарәнҝиз јолла јаратмысан, она ҝөрә шүкүр едирәм. Нә гәдәр харигәли ишләр ҝөрмүсән! Буну үрәкдән јахшы дәрк едирәм».
Матта 19:4-6. «Охумамысынызмы ки, Јарадан башланғыҹдан “онлары киши вә гадын јаратды”? Вә демишдир: “Буна ҝөрә инсан ата-анасыны бурахаҹаг вә арвадына бағланаҹагдыр. Икиси дә бир бәдән олаҹагдыр”. Белә ки, онлар артыг ики дејил, бир бәдәндирләр. Беләликлә, Аллаһын бирләшдирдијини инсан ајырмамалыдыр».
Һәвариләрин ишләри 17:24, 25. «Дүнјаны вә онун ичиндә олан бүтүн шејләри јарадан Аллаһ, ҝөј вә јерин Рәбби олдуғундан, әл илә тикилмиш мәбәдләрдә јашамаз. Мадам ки, һамыја һәјат, нәфәс вә һәр шеји верән Өзүдүр, бир шејә мөһтаҹ имиш кими, инсанларын әлләри илә Она хидмәт олуна билмәз».
Вәһј 4:11. «Ја Рәббимиз вә Аллаһымыз, иззәти, һөрмәти вә гүдрәти алмаға лајигсән. Чүнки һәр шеји Сән јаратдын вә һәр шеј Сәнин ирадәнлә мөвҹуд олду вә јаранды».
Мүгәддәс Китабын вердији ҹаваблар әсл гәлб раһатлығыны неҹә ҝәтирир?
«Јер үзүндә һәр аиләнин Ондан [Аллаһдан] ад алдығы»ны билмәјимиз инсанлара бахышымызы дәјишир (Ефеслиләрә 3:14). Бу билик өзүмүзә вә проблемләримизә неҹә мүнасибәт ҝөстәрмәјимизә дә тәсир едир. Ҝәлин ҝөрәк бу билик нөвбәти вәзијјәтләрдә дүшүнҹәмизә неҹә тәсир ҝөстәрир.
Чәтин гәрарлар гәбул етмәк лазым ҝәләндә инсанларын зиддијјәтли фикирләри бизи һәддиндән артыг нараһат етмәјәҹәк. Әксинә, биз әминликлә Мүгәддәс Китабын мәсләһәтинә ҝүвәнәҹәјик. Нә үчүн? Чүнки «һәр Мүгәддәс Јазы Аллаһдан илһам алмыш вә тәлим, тәкзиб, ислаһ, салеһлик тәрбијәси үчүн фајдалыдыр ки, Аллаһ бәндәси камил олуб, һәр ҹүр хејирли иш үчүн тәҹһиз едилсин» (2 Тимотејә 3:16, 17).
Дүздүр, Мүгәддәс Китабын мәсләһәтләрини тәтбиг етмәк үчүн сәј ҝөстәрмәк вә интизамлы олмаг тәләб олунур. Бәзән онун мәсләһәтләри фикирләримизә зидд давранмағы да тәләб едә биләр (Јарадылыш 8:21). Лакин севән сәмави Ата тәрәфиндән јарадылдығымызы гәбул едириксә, һансы јолун бизим үчүн ән јахшы олдуғуну Онун билдији гәнаәтинә ҝәлмәк мәнтигәујғундур (Јешаја 55:9). Буна ҝөрә Аллаһын Кәламы бизи әмин едир: «Бүтүн гәлбинлә Рәббә ҝүвән, өз идракына етибар етмә. Бүтүн јолларында Ону таны, О сәнин јолларыны дүзәлдәр» (Сүлејманын мәсәлләри 3:5, 6). Бу мәсләһәтә әмәл етсәк, проблемләрлә үзләшәндә вә гәрарлар гәбул едәндә бир чох нараһатчылыгдан узаг олаҹағыг.
Һаггымызда јаранмыш јанлыш фикирләрлә үзләшәндә башга иргдән вә ја мәдәнијјәтдән олан инсанлардан нәдә исә ашағы олдуғумузу дүшүнмәјәҹәјик вә дәјәрсизлик һисси үрәјимизи сыхмајаҹаг. Әксинә, биз таразлы шәкилдә өзүнәһөрмәт һиссини инкишаф етдирәҹәјик. Нә үчүн? Чүнки Атамыз Јеһова Аллаһ «инсанларын кимлијинә бахмаз. Амма һәр халгдан олуб, Ондан горхан вә һагг иш ҝөрән Она мәгбулдур» (Һәвариләрин ишләри 10:34, 35).
Буну дәрк етмәјимиз, әввәлҹәдән јаранмыш јанлыш фикрин инсанлара мүнасибәтимизә тәсир етмәсинә јол вермәјәҹәк. Биз баша дүшәҹәјик ки, өзүмүзү диҝәр иргләрдән олан инсанлардан үстүн тутмаға һеч бир әсас јохдур, чүнки Аллаһ «бүтүн халглардан олан инсанлары бир гандан јаратды ки, бүтүн јер үзүндә јашасынлар» (Һәвариләрин ишләри 17:26).
Шүбһәсиз, јарадылдығымызы вә Јараданымызын гејдимизә галдығыны билмәјимиз биздә әсл гәлб раһатлығы һасил едир. Анҹаг гәлб раһатлығыны итирмәмәк үчүн ҝәлин ҝөрәк даһа нә лазымдыр.
[4-ҹү сәһифәдәки чәрчивә]
Инсан тәкамүлүнмү бәһрәсидир?
[5-ҹи сәһифәдәки шәкил]
Јараданымызын гајғымыза галдығыны билмәк әсл гәлб раһатлығы һасил едир