Јеһованын еви үчүн гејрәт ҝөстәр!

«Сәнин евин үчүн ҝөстәрдијим гејрәт мәни јахыб-јандыраҹаг» (ЈӘҺ. 2:17).

1, 2. Ерамызын 30-ҹу илиндә Иса мәбәддә нә етди вә нә үчүн?

БЕЛӘ бир мәнзәрәни тәсәввүрүнә ҝәтир. Ерамызын 30-ҹу илинин Пасха бајрамыдыр. Алты ајдыр ки, Иса јерүзү хидмәтинә башлајыб. Инди о, Јерусәлимә јолланыр. Мәбәдин гејри-јәһудиләр үчүн ајрылан һәјәтиндә Иса ‘өкүз, гојун вә ҝөјәрчин сатанлар илә сәррафларын отурдугларыны ҝөрүр’. О, ипдән дүзәлтдији гамчыны һавада ојнадараг бүтүн һејванлары вә таҹирләри орадан говур. Иса һәм дә сәррафларын пулларыны дағыдыр вә масаларыны чевирир. О, ҝөјәрчин сатанлардан малларыны ҝөтүрүб ораны тәрк етмәләрини тәләб едир (Јәһ. 2:13-16).

² Исанын бу һәрәкәти мәбәдә етинасыз јанашмадығыны ҝөстәрир. «Атамын евини алвер евинә дөндәрмәјин»,— дејә о әмр едир. Бу һадисәнин шаһиди олан шаҝирдләр мәзмурчу Давудун әсрләр өнҹә јаздығы сөзләри хатырлајырлар: «Евинин гејрәти мәни јандырыб-јахды» (Јәһ. 2:16, 17; Мәз. 69:9).

3. а) Гејрәт сөзүнүн мәнасы нәдир? б) Өзүмүздән нә соруша биләрик?

³ Исаны бу ҹүр һәрәкәтә вадар едән Аллаһын еви үчүн гејрәт, јәни сәј ҝөстәрмәси иди. Гејрәт «фөвгәладә сәј, ҹәһд, чалышма» демәкдир. Јашадығымыз ХХЫ әсрдә једди милјондан чох мәсиһчи Аллаһын еви үчүн сәј ҝөстәрир. Лакин һәр биримиз ајры-ајрылыгда өзүндән соруша биләр: «Шәхсән мән Јеһованын еви үчүн даһа чох сәј ҝөстәрмәк үчүн нә едә биләрәм?» Бу суала ҹаваб вермәздән өнҹә ҝәлин ҝөрәк, бу ҝүн Аллаһын евини нә тәмсил едир. Сонра исә Аллаһын евинин гејрәтини чәкән дөрд садиг кишинин нүмунәсинә бахаҹағыг. Онларын нүмунәси «бизә тәлим олараг» јазылыб вә бизи даһа чох гејрәт ҝөстәрмәјә тәшвиг едә биләр (Ром. 15:4).

Аллаһын еви кечмишдә вә инди

4. Сүлејманын тикдији мәбәд һансы мәгсәдә хидмәт едирди?

⁴ Гәдим Исраилдә Аллаһын еви Јерусәлим­дәки мәбәд иди. Әлбәттә, бу о демәк дејил ки, Јеһова һәрфи мәнада орада јашајырды. О бәјан етмишди: «Ҝөјләр Мәним тахтымдыр, јер ајагларымын алтындакы кәтилдир. Мәним үчүн һарада ев тикәҹәксиниз, динҹәлдијим јер һарада олаҹаг?» (Јешаја 66:1). Бунунла белә, Сүлејманын һөкмранлығы заманы тикилән мәбәд һәгиги ибадәтин мәркәзи иди вә бурада Јеһоваја дуалар едилирди (1 Пад. 8:27-30).

5. Сүлејманын мәбәдиндә едилән ибадәт һансы гурулушу тәмсил едирди?

⁵ Бу ҝүн Јеһованын еви Јерусәлимдә, јахуд һәр һансы башга бир јердә уҹалдылан даш тикили дејил. Бу, Мәсиһин фидијә гурбанлығы әсасында Аллаһа јахынлашмағымызы мүмкүн едән бир гурулушдур. Аллаһын јер үзүндәки бүтүн садиг хидмәтчиләри бу руһани мәбәддә Она бирҝә хидмәт едирләр (Јешаја 60:4, 8, 13; Һәв. иш. 17:24; Ибр. 8:5; 9:24).

6. Јәһуданын һансы падшаһлары һәгиги ибадәт үчүн бөјүк гејрәт ҝөстәрмишди?

⁶ Б. е. ә. 997-ҹи илдә Исраил падшаһлығы ики һиссәјә бөлүндүкдән сонра ҹәнуб падшаһлығы олан Јәһудада һөкмранлыг едән 19 падшаһдан јалныз 4-ү — Аса, Јеһошафат, Хизгија вә Јошија һәгиги ибадәт үчүн бөјүк гејрәт ҝөстәрирди. Онларын нүмунәсиндән биз һансы ваҹиб ибрәт дәрсләрини ала биләрик?

Үрәкдән хидмәт етмәјин ҝәтирдији хејир-дуалар

7, 8. а) Јеһова неҹә хидмәтә хејир-дуа верир? б) Аса падшаһын нүмунәсиндән ҝөрүндүјү кими, өзүмүзү нәдән ҝөзләмәлијик?

⁷ Аса падшаһын һөкмранлығы дөврүндә Јеһова халгыны дүзҝүн јола јөнәлтмәк үчүн пејғәмбәрләр ҝөндәрирди. Мәсәлән, Мүгәддәс Китабда дејилир ки, Аса Одед оғлу Азарја пејғәмбәрә гулаг асды. (2 Салнамәләр 15:1-8 ајәләрини оху.) Асанын апардығы ислаһат ишләри Јәһуда халгыны, еләҹә дә Исраил падшаһлығындан Јерусәлимдә кечирилән бөјүк топлантыја гошулмаг үчүн ҝәлән чохсајлы инсанлары бирләшдирди. Онлар бир ағыздан Јеһоваја сәдагәтлә хидмәт етмәјә гәтијјәтли олдугларыны бәјан етдиләр. Биз охујуруг: «Борулар вә шејпурлар чалараг бағырты вә јүксәк сәслә Рәббә анд ичдиләр. Бу анда ҝөрә бүтүн Јәһудалылар севинди, чүнки бүтүн үрәкләри илә анд ичмишдиләр, бүтүн сәјләри илә Ону ахтармышдылар вә О да онлара Өзүнү ҝөстәрмишди. Рәбб онлара һәр тәрәфдән динҹлик вермишди» (2 Салн. 15:9-15). Әҝәр Јеһоваја үрәкдән хидмәт етсәк, әмин ола биләрик ки, О, бизи дә хејир-дуаландыраҹаг (Марк 12:30).

⁸ Тәәссүф ки, Аса ҝөрүҹү Хананидән мәсләһәт аланда инҹиди (2 Салн. 16:7-10). Бәс биз Јеһованын мәсиһчи ағсаггаллар васитәсилә вердији мәсләһәт вә рәһбәрлијә неҹә јанашырыг? Онларын Мүгәддәс Јазылар әсасында вердикләри мәсләһәтләрә дәрһал риајәт едәрәк инҹиклик тәләсиндән гачырыгмы?

9. Јеһошафат вә Јәһуда халгы һансы тәһлүкә илә үзләшди вә онлар нә етдиләр?

⁹ Јеһошафат б. е. ә. Х әсрдә Јәһудада падшаһлыг етмишдир. О, бүтүн Јәһуда халгы илә бирҝә аммонлулар, моавлылар вә Сеир дағлыг бөлҝәсинин сакинләринин бирләшмиш ордусунун һүҹумуна мәруз галмаг тәһлүкәси илә үзләшмишдиләр. Падшаһын ҝөзү горхса да, о нә етди? О вә бүтүн јәһудалылар арвад-ушаглары илә бирликдә дуа етмәк үчүн Јеһованын евинә топлашдылар. (2 Салнамәләр 20:3-6 ајәләрини оху.) Мәбәдин һәср олунмасы заманы Сүлејманын дедији сөзләрә мүвафиг олараг Јеһошафат Јеһоваја јалвармаға башлады: «Еј Аллаһымыз, онлара һөкм етмәјәҹәксәнми? Чүнки үзәримизә ҝәлән бу бөјүк гошуна гаршы ҝүҹүмүз јохдур вә биз нә едәҹәјимизи билмирик, анҹаг ҝөзләримиз Сәнин үзәриндәдир» (2 Салн. 20:12, 13). Јеһошафатын дуасындан сонра бурада, «ҹамаатын арасында», Јеһованын руһу левили Јахазиели халга әминлик һасил едән тәсәлли сөзләри демәјә тәшвиг етди. (2 Салнамәләр 20:14-17 ајәләрини оху.)

10. а) Јеһошафат вә Јәһуда халгы рәһбәрлији неҹә алмышды? б) Бу ҝүн биз Јеһованын вердији рәһбәрлијә ҝөрә миннәтдар олдуғумузу неҹә ҝөстәрә биләрик?

¹⁰ Бәли, о вахт Јеһошафат вә Јәһуда халгы Јеһовадан рәһбәрлији Јахазиел васитәсилә алдылар. Биз исә бу ҝүн рәһбәрлик вә тәсәллини садиг вә ағыллы гул синфи васитәсилә алырыг. Шүбһә јохдур ки, биз гајғымыза галан вә «садиг вә ағыллы гул»ун ҝөстәришләрини һәјата кечирән тәјин олунмуш ағсаггалларла даим әмәкдашлыг етмәк вә онлара һөрмәтлә јанашмаг истәјирик (Мат. 24:45; 1 Салон. 5:12, 13).

11, 12. Јеһошафатын вә Јәһуда халгынын башына ҝәләнләрдән нә өјрәнә биләрик?

¹¹ Јеһошафат вә онун халгы бир јерә топлашараг Јеһованын рәһбәрлијини ахтардығы кими, ҝәлин биз дә мүштәрәк јығынҹаг ҝөрүшләримизә мүнтәзәм ҝәлмәјә лагејд јанашмајаг. Дара дүшәндә вә нә едәҹәјимизи билмәјәндә ҝәлин Јеһошафат вә Јәһуда халгынын ҝөзәл нүмунәсини тәглид едәк вә там әминликлә дуада Јеһоваја үз тутаг (Сүл. мәс. 3:5, 6; Филип. 4:6, 7). Һәтта баҹы-гардашларымыздан ајры дүшсәк белә, Јеһоваја етдијимиз јалварышлар көмәк едәҹәк ки, өзүмүзү үмумдүнја гардашлығынын бир һиссәси кими һисс едәк (1 Пет. 5:9).

¹² Јеһошафат өз халгы илә бирликдә Аллаһын Јахазиел васитәсилә вердији рәһбәрлијә риајәт етди. Бунун нәтиҹәси нә олду? Онлар дөјүшдә галиб ҝәлдиләр, «севинҹлә» «чәнҝләр, лиралар вә кәрәнајлар чалараг... Рәббин мәбәдинә ҝәлдиләр» (2 Салн. 20:27, 28). Ејнилә биз дә Јеһованын Өз каналы васитәсилә вердији рәһбәрлијә һөрмәт едир вә һәмд етмәкдә Онун халгына гошулуруг.

Ҝәлин ҝөрүш јерләримизин гајғысына галаг

13. Һөкмранлығынын әввәлиндә Хизгија һансы ишләри ҝөрмәјә башлады?

¹³ Һөкмранлығынын биринҹи ајында Хизгија мәбәдин гапыларыны ачмагла вә ону тәмир етмәклә Јеһоваја ибадәтә сәјлә јанашдығыны ҝөстәрди. Онун ҝөстәришилә каһинләр вә левилиләр Аллаһын евини тәмизләдиләр. Иш 16 ҝүнә баша чатдырылды. (2 Салнамәләр 29:16-18 ајәләрини оху.) Бу, бизә ҝөрүш јерләримизи јахшы вәзијјәтдә сахламаға көмәк едән техники хидмәт вә тәмир ишләри барәдә хатырладыр. Чүнки ҝөрүш јерләримизин вәзијјәти бизим Јеһоваја ибадәтә нә дәрәҹәдә сәјлә јанашдығымызы ҝөстәрир. Мәҝәр сиз баҹы-гардашларымызын бу кими ишләрдә сәјлә иштирак етмәсинин башга инсанлара тәәссүрат бағышладығы һагда ешитмәмисинизми? Бәли, онларын сәјләри Јеһоваја чохлу иззәт ҝәтирир.

14, 15. Һансы иш бу ҝүн Јеһоваја чохлу иззәт ҝәтирир? Нүмунә чәкин.

¹⁴ Инҝилтәрәнин шималында јерләшән шәһәрләрин бириндә бир киши әмлакына битишик олан Падшаһлыг Залында тәмир ишләринин апарылмасына разы олмурду. Лакин јерли гардашлар онунла хејирхаһ вә мүлајим олмаға чалышырдылар. Залын вә гоншунун мүлкијјәти арасындакы диварын ҹидди тәмирә еһтијаҹы олдуғуну ҝөрән гардашлар ону пулсуз тәмир етмәји тәклиф етдиләр. Онлар ҹанла-башла чалышырдылар вә диварын әксәр һиссәсини, демәк олар ки, јенидән һөрдүләр. Гардашларын бу ҹүр давранышыны ҝөрән гоншу мүнасибәтини тамамилә дәјишди. Инди о, Падшаһлыг Залына ҝөз-гулаг олур.

¹⁵ Јеһованын халгы үмумдүнја тикинти ишиндә иштирак едир. Чалышган јерли көнүллүләр таммүддәтли бејнәлхалг програм хидмәтчиләриндән тәкҹә Падшаһлыг Залларынын тикинтисиндә дејил, һәм дә Конгрес Залларынын вә Бет-Ел биналарынын иншасында өз көмәкләрини әсирҝәмирләр. Мүһәндис олан Сем истилик, вентилјасија вә кондисионер системи үзрә мүтәхәссисдир. О, арвады Рут илә бирҝә тикинти лајиһәләриндә көмәк етмәк үчүн бир нечә Авропа вә Африка өлкәләриндә олмушдур. Һарада олмаларындан асылы олмајараг, онлар һәмишә јерли јығынҹагларла бирҝә тәблиғ ишиндә иштирак етмишләр. Бејнәлхалг тикинти лајиһәләриндә иштирак етмәјә ону тәшвиг едәнин нә олдуғу барәдә Сем дејир: «Мәни бу хидмәтә тәшвиг едән мүхтәлиф Бет-Елләрдә хидмәт едән гардашларын нүмунәси олду. Онларын сәјини вә севинҹини ҝөрмәк кифајәт иди ки, мәндә дә бу хидмәт нөвүнә истәк јарансын».

Аллаһын ҝөстәришләринә әмәл ет

16, 17. Аллаһын халгы һансы хүсуси ишдә сәјлә иштирак едиб вә онун нәтиҹәләри һагда нә демәк олар?

¹⁶ Хизгија мәбәди тәмир етмәклә јанашы, вахтилә Јеһованын тәсис етдији иллик Пасха бајрамыны да бәрпа етди. (2 Салнамәләр 30:1, 4, 5 ајәләрини оху.) Хизгија вә Јерусәлимин сакинләри бүтүн халгы — һәтта шимал падшаһлығынын сакинләрини дә — бу бајрамда иштирак етмәјә дәвәт етдиләр. Чапарлар дәвәт мәктубу илә бүтүн өлкәни долашыб ҝәздиләр (2 Салн. 30:6-9).

¹⁷ Сон бир нечә ил әрзиндә биз дә буна бәнзәр бир ишдә иштирак етмишик. Биз ҝөзәл тәртиб олунмуш дәвәтнамәләр пајлајараг әразимиздә јашајан инсанлары, Исанын әмринә ујғун олараг, бизимлә бирҝә Мәсиһин ахшам јемәјиндә иштирак етмәјә дәвәт етмишик (Лука 22:19, 20). Хидмәти ҝөрүшләрдә ҝөстәришләр алараг биз бу ишдә сәјлә иштирак едирдик. Јеһова бизим сәјимизи неҹә дә хејир-дуаландырды! Кечән ил бу дәвәтнамәләри пајлајанларын сајы тәхминән једди милјон, Хатирә Ҝеҹәсинә ҝәләнләрин сајы исә 17 790 631 нәфәр олмушдур!

18. Һәгиги ибадәт үчүн гејрәт ҝөстәрмәк сәнин үчүн нәјә ҝөрә ваҹибдир?

¹⁸ Хизгија һаггында дејилмишди: «[О,] Исраилин Аллаһы Рәббә ҝүвәнди. Өзүндән әввәл вә сонра олан бүтүн Јәһуда падшаһлары арасында онун кимиси олмады. О, Рәбдән јапышыб Онун јолундан дөнмәди вә Рәббин Мусаја вердији әмрләринә әмәл етди» (2 Пад. 18:5, 6). Ҝәлин биз дә онун кими давранаг. Аллаһын еви үчүн ҝөстәрдијимиз гејрәт әбәди һәјаты ҝөзләјәрәк ‘Рәбдән јапышмағымыза’ көмәк едәҹәк (Ганун. т. 30:16).

Рәһбәрлијә дәрһал һај вер

19. Хатирә Ҝеҹәси әрәфәсиндә һансы хүсуси сәјләр ҝөстәрилир?

¹⁹ Јошија падшаһ оланда о да Пасха бајрамынын гејд едилмәси үчүн бөјүк һазырлыг ишләри ҝөрмүшдү (2 Пад. 23:21-23; 2 Салн. 35:1-19). Биз дә вилајәт конгресләринә, рајон вә хүсуси бирҝүнлүк конгресләрә, һәмчинин Хатирә Ҝеҹәсинә хүсусилә һазырлыг ҝөрүрүк. Бәзи өлкәләрдә гардашлар Мәсиһин өлүмүнү гејд етмәк үчүн һәтта һәјатларыны белә тәһлүкәјә атырлар. Сәјли ағсаггаллар чалышырлар ки, јығынҹагда һеч ким нәзәрдән гачмасын. Јашлы вә хәстә оланларын бу мәрасимдә иштирак едә билмәләри үчүн онлара көмәк ҝөстәрилир.

20. а) Јошија падшаһын һөкмранлығы заманы нә баш верди вә о, буна неҹә реаксија ҝөстәрди? б) Биз нәјин үзәриндә ҹидди дүшүнмәлијик?

²⁰ Јошија падшаһын ҝөрдүјү бәрпа ишләри заманы баш каһин Хилгија «Муса васитәсилә верилән Рәббин Ганун китабыны тапды». Хилгија бу китабы сарај мирзәси Шафана верди, о да өз нөвбәсиндә китабы Јошијаја охуду. (2 Салнамәләр 34:14-18 ајәләрини оху.) Бу һансы нәтиҹәләри ҝәтирди? Падшаһ кәдәрдән дәрһал палтарыны ҹырды вә өз адамларына ҝедиб Јеһова илә мәсләһәтләшмәји тапшырды. Гадын пејғәмбәр Хулданын васитәсилә Аллаһ Јәһудада кечирилән бәзи дини ајинләри мүһакимә етдијини билдирди. Лакин Јошијанын бүтпәрәст ајинләри арадан галдырмаг үчүн ҝөстәрдији сәј Јеһованын нәзәриндән јајынмады вә бүтүн халгы фәлакәт ҝөзләдији һалда, о, Јеһованын лүтфүнү горујуб сахлады (2 Салн. 34:19-28). Биз бундан нә өјрәнә биләрик? Әлбәттә, биз дә Јошија кими давранмаг истәјирик. Биз Јеһованын рәһбәрлијинә дәрһал һај вермәк вә ибадәтимизә дөнүклүјүн вә сәдагәтсизлијин тәсир етмәсинә јол вердијимиз тәгдирдә нәләр баш верәҹәји үзәриндә ҹидди дүшүнмәк истәјирик. Әмин ола биләрик ки, Јошијанын һадисәсиндә олдуғу кими, Јеһова бизим дә һәгиги ибадәт үчүн ҝөстәрдијимиз гејрәти бәјәнәҹәк.

21, 22. а) Нәјә ҝөрә биз Јеһованын еви үчүн гејрәт ҝөстәрмәлијик? б) Нөвбәти мәгаләдә сөһбәт нәдән ҝедәҹәк?

²¹ Јәһуданын дөрд падшаһы — Аса, Јеһошафат, Хизгија вә Јошија Аллаһын еви вә ибадәт үчүн гејрәт ҝөстәрмәкдә бизим үчүн ҝөзәл нүмунә гојублар. Гејрәт һисси бизи дә Јеһоваја етибар етмәјә вә ибадәтдә әлимиздән ҝәләни етмәјә тәшвиг етмәлидир. Аллаһын рәһбәрлијинә риајәт етмәк, јығынҹаг вә ағсаггаллар тәрәфиндән ҝөстәрилән мәһәббәт долу гајғыја вә верилән мәсләһәтләрә һај вермәк мүдрикликдир вә хошбәхтлик ҝәтирир.

²² Нөвбәти мәгалә диггәтимизи тәблиғ хидмәтинә сәјлә јанашмалы олдуғумуза јөнәлдәҹәк вә ҝәнҹләри гајғыкеш Атамыза сәјлә хидмәт етмәјә тәшвиг едәҹәк. Биз һәмчинин Шејтанын ән позуҹу тәсирләриндән бириндән неҹә гача биләҹәјимизи дә нәзәрдән кечирәҹәјик. Әҝәр биз Јеһованын буна даир верилән бүтүн хатырлатмаларына диггәт јетирсәк, онда һаггында: «Евинин гејрәти мәни јандырыб-јахды» дејилән Јеһованын Оғлунун — Исанын нүмунәсини изләмиш олаҹағыг (Мәз. 69:9; 119:111, 129; 1 Пет. 2:21).

Јадыныздадырмы?

• Јеһова һансы хидмәтә хејир-дуа верир вә нә үчүн?

• Јеһоваја етибар етдијимизи неҹә ҝөстәрә биләрик?

• Гејрәт һисси бизи Аллаһын ҝөстәришләринә әмәл етмәјә неҹә тәшвиг едә биләр?

[9-ҹу сәһифәдәки шәкил]

Аса, Јеһошафат, Хизгија вә Јошија Јеһованын еви үчүн неҹә гејрәт ҝөстәрмишләр?