Фәсил 12

Өзүнәинам һиссини неҹә артырмаг олар?

Бәли Хејр

Ҝүзҝүјә баханда өзүнү бәјәнирсән? □ □

Неҹә дүшүнүрсән, сәнин һансыса хүсуси баҹарығын вар? □ □

Һәмјашыдларынын тәзјигинә гаршы дура билирсән? □ □

Сағлам тәнгиди гәбул етмәји баҹарырсан? □ □

Башгалары сәндә һагсыз јерә нөг тутанда сакит реаксија ҝөстәрә билирсән? □ □

Севилдијини һисс едирсән? □ □

Сағламлығынын гајғысына галырсан? □ □

Башгаларынын мүвәффәгијјәтинә севинирсән? □ □

Үмуми ҝөтүрдүкдә, өзүнү уғурлу инсан һесаб едирсән? □ □

Әҝәр сән бу суаллардан бир нечәсинә «хејр» ҹавабыны вермисәнсә, ола билсин, сәндә өзүнәинам һисси ашағыдыр, буна ҝөрә дә өз ҝүҹлү ҹәһәтләрини ҝөрмүрсән. Бу фәсил сәнә онлары кәшф етмәјә көмәк едәҹәк.

БИР ЧОХ ҝәнҹ оғлан вә гызлар өзләрини башгалары илә мүгајисә етдикләри үчүн хариҹи ҝөрүнүшләринә вә баҹарыгларына ҝөрә нараһат олурлар. Бәс сән? Әҝәр сән дә бу ҹүр һиссләр кечирирсәнсә, тәк дејилсән.

«Чатышмајан ҹәһәтләрим уҹбатындан өзүмү чох пис һисс едирәм; ән бөјүк тәнгидчим елә өзүмәм» (Литисија).

«Нә гәдәр ҝөзәл вә јарашыглы олурсан ол, һәмишә сәндән ҝөзәлләри тапылаҹаг» (Һумај).

«Башгаларынын јанында өзүмү чох нараһат һисс едирәм. Мәнә уғурсуз бир инсан кими бахмаларындан горухурам» (Рәшидә).

Әҝәр бу һиссләр сәнә дә танышдырса, үмидсизлијә гапылма — һәр шејин бир әлаҹы вар. Ҝәл сәнин өзүнә мүсбәт тәрәфдән бахмағына вә әминлијини артырмағына көмәк едәҹәк үч мәсләһәти нәзәрдән кечирәк.

Башгалары һагда дүшүн

Мүгәддәс Китабдан ачар ајә: «Вермәк алмагдан даһа чох хошбәхтлик ҝәтирир» (Һәвариләрин ишләри 20:35).

Нә демәкдир? Сән башгаларына көмәк әли узаданда өзүнә көмәк етмиш олурсан. Неҹә? Мүгәддәс Китаб мәсәлиндә дејилир ки, «ҹомәрд боллуға јетишәр, су верәнә су вериләр» (Сүлејманын мәсәлләри 11:25). Бир шеј данылмаздыр: башгалары үчүн нә исә едәндә инсанын өзүнә инамы артырa.

«Башгаларына неҹә көмәк едә биләҹәјим барәдә дүшүнүрәм вә чалышырам ки, јығынҹағымызда еһтијаҹы олан баҹы-гардашлара көмәк едим. Инсанлара мәһәббәт вә диггәт ҝөстәрәндә өзүмү чох јахшы һисс едирәм» (Бану).

«Аллаһа хидмәт инсана мәмнунлуг ҝәтирир, чүнки сәни өзүн һаггында јох, башгалары һаггында дүшүнмәјә тәшвиг едир» (Ҹејһун).

Хәбәрдарлыг. Башгаларына мәнфәәт ҝүдмәдән көмәк ет (Матта 6:2—4). Әҝәр буну башга нијјәтлә етсән, сәнә һеч бир хејри олмајаҹаг. Ријакарлығы ҝизләтмәк мүмкүн дејил, инсанлар ону тез сезир (1 Салоникилиләрә 2:5, 6).

Сән нә едә биләрсән? Көмәк етдијин бир нәфәр һаггында дүшүн: һәмин адамын адыны вә онун үчүн нә етдијини јаз.

․․․․․

Көмәк етдикдән сонра өзүнү неҹә һисс едирдин?

․․․․․

Башга кимләрин сәнин көмәјинә еһтијаҹы олдуғу барәдә дүшүн вә неҹә көмәк едә биләҹәјини јаз.

․․․․․

Өзүнә достлар тап

Мүгәддәс Китабдан ачар ајә: «Әсил дост һәмишә севәр, о гардашдыр, дар ҝүн үчүн доғулуб» (Сүлејманын мәсәлләри 17:17, Јени Дүнја тәрҹүмәси).

Нә демәкдир? Јахшы дост һәјатын чәтин анларында етибарлы дајаг ола биләр (1 Шамуел 18:1; 19:2). Һәтта киминсә сәнин һаггында дүшүндүјүнү билмәјин өзү елә тәсәллидир (1 Коринфлиләрә 16:17, 18). Буна ҝөрә дә, сәнә мүсбәт тәсир ҝөстәрән инсанлара јахын ол.

«Әсил достлар сәни јыхылмаға гојмазлар» (Даниел).

«Киминсә сәмими-гәлбдән сәнин гајғына галдығыны билмәк олдугҹа ваҹибдир; инсан өзүнү дәјәрли һисс едир» (Сәма).

Хәбәрдарлыг. Сәни өзләринә ујғунлашдырмаға чалышан инсанларла јох, олдуғун кими гәбул едән инсанларла достлуг ет (Сүлејманын мәсәлләри 13:20; 18:24; 1 Коринфлиләрә 15:33). Башгаларына тәәссүрат бағышламаг хатиринә пис ишләрә баш гошсан, өзүнәһөрмәт һиссини итирәҹәксән (Ромалылара 6:21).

Сән нә етмәлисән? Сәнә әминлик һиссини лајигли тәрздә артырмаға көмәк едә биләҹәк достунун адыны јаз.

․․․․․

Нәјә ҝөрә јухарыда адыны чәкдијин инсанла даһа чох вахт кечирмәјәсән? Һәмин адамын сәнинлә јашыд олмасы шәрт дејил.

Тәслим олма

Мүгәддәс Китабдан ачар ајә: «Һамы ҝүнаһ ишләди вә Аллаһын шөһрәтини әкс етдирә билмәди» (Ромалылара 3:23).

Нә демәкдир? Бу бир һәгигәтдир: сән камил дејилсән. Буна ҝөрә дә бәзән сәһв данышыға вә һәрәкәтә јол верә биләрсән (Ромалылара 7:21—23; Јагуб 3:2). Сәһвләрдән гача билмәсән дә, онлара дүзҝүн јанашмағы өјрәнә биләрсән. Мүгәддәс Китабда дејилир: «Салеһ једди дәфә јыхылса белә, јенә галхар» (Сүлејманын мәсәлләри 24:16).

«Адәтән, инсанын өзүнә инамсызлығы зәиф ҹәһәтләрини башгаларынын ҝүҹлү ҹәһәтләри илә мүгајисә етмәси нәтиҹәсиндә јараныр» (Кевин).

«Һамынын пис вә јахшы ҹәһәтләри вар. Биз јахшы хүсусијјәтләримизи гијмәтләндирмәли, зәиф ҹәһәтләримизин үзәриндә ишләмәлијик» (Лорен).

Хәбәрдарлыг. Налајиг һәрәкәтләринә гејри-камилликлә бәраәт газандырма (Галатијалылара 5:13). Биләрәкдән ҝүнаһ ишләтмәклә сән ән ваҹиб шеји — Јеһова Аллаһла мүнасибәтини итирәҹәксән! (Ибраниләрә 10:26, 27).

Сән нә етмәлисән? Ашағыда һансы хүсусијјәтин үзәриндә ишләмәк истәдијини јаз.

․․․․․

Јанында буҝүнкү тарихи гејд ет. Бу хүсусијјәти јахшылашдырмағына көмәк едәҹәк әлавә мәлумат ахтар тап вә бир ајдан сонра нәјә наил олдуғуну јохла.

Сән дәјәрлисән!

Мүгәддәс Китабда дејилир ки, «Аллаһ үрәјимиздән бөјүкдүр» (1 Јәһја 3:20). Бу о демәкдир ки, Аллаһ сәндә өзүнүн ҝөрә билмәдијин дәјәрли инҹи дәнәсини ҝөрүр. Бәс онда нөгсанлар? Тәсәввүр ет ки, 100 манатын вар. Әҝәр бир аз уҹундан ҹырылыбса, сән ону атарсан? Әлбәттә, јох! Ахы ҹырыг олмасына бахмајараг, пул өз дәјәрини итирмир.

Ејнилә, сәнин гејри-камил олмағын Аллаһын ҝөзүндә дәјәрини азалтмыр. Сәнин үчүн нә гәдәр әһәмијјәтсиз ҝөрүнсә дә, Јеһова Ону разы салмаг үчүн ҝөстәрдијин бүтүн сәјләри ҝөрүр вә гијмәтләндирир. Мүгәддәс Китаб бизи әмин едир: «Ахы Аллаһ әдаләтсиз дејил ки, кечмишдә вә инди мүгәддәсләрә хидмәт едәрәк Онун адына бәсләдијиниз мәһәббәти вә чәкдијиниз зәһмәти унутсун» (Ибраниләрә 6:10).

[Һашијә]

АЧАР АЈӘ

“Гој һәр кәс өз ишини сынагдан кечирсин, онда өзүнү башгалары илә мүгајисә етмәдән өзүнә бахыб севинәҹәк” Галатијалылара 6:4

МӘСЛӘҺӘТ

Чалыш: «Һеч вахт һеч нәји дүз етмирәм» вә ја «Мәндә һеч нә алынан дејил», — кими ифадәләр ишләтмә. Бу ҹүр шиширдилмиш сөзләр садәҹә инсанын әл-голуну јанына салыр. Чатышмајан ҹәһәтләрини гәбул ет, анҹаг јахшы ҹәһәтләрини дә унутма.

БИЛИРСӘН... ?

Сәнин өзүнә неҹә јанашмағын башгаларынын сәнә олан мүнасибәтинә тәсир ҝөстәрә биләр.

ҺӘРӘКӘТ ПЛАНЫ!

Әҝәр һәмјашыдларым мәнә ҝүлсәләр, мән... ․․․․․

Әҝәр диггәтими зәифликләримә ҹәмләсәм, мән... ․․․․․

Бу мөвзу илә бағлы валидејнләримә вермәк истәдијим суаллар: ․․․․․

НЕҸӘ ДҮШҮНҮРСӘН?

● Нәјә ҝөрә хүсусилә ҝәнҹләрдә өзүнәһөрмәт һисси ашағы олур?

● Өзүнәһөрмәт мәсәләсиндә таразлы олмаг нәјә ҝөрә ваҹибдир?

[88–ҹи сәһифәдәки јазы]

“Инсан вар ки, ҝөзәлдир, анҹаг өзүнү чиркин һесаб едир. Елә адам да вар ки, һеч ҝөзәллији јохдур, амма елә билир дүнја ҝөзәлидир. Һәр шеј дүшүнҹә тәрзиндән асылыдыр” Нурај

[90–ҹы сәһифәдәки шәкил]

Ҹырыг пул өз дәјәрини итирмир. Ејнилә, гејри-камиллик дә Аллаһын ҝөзүндә сәни дәјәрдән салмыр