ФӘСИЛ 24

Ҹинси әлагә мүнасибәтләримизи мөһкәмләндирәҹәкми?

Ајнур Замиглә ҹәми ики ајдыр танышдыр, амма она елә ҝәлир, санки, илләрдир ону таныјыр. Онлар дурмадан месажлашыр, саатларла телефонда данышыр, һәтта бир-бирләринин фикирләрини тамамлајырлар. Анҹаг инди онлар ај ишығы алтында баш-баша машында отураркән Замиг садәҹә сөһбәт етмәк јох, даһа чох шеј истәјир.

Бу ики ај әрзиндә онлар садәҹә әл-әлә тутуб вә өтәри өпүшүбләр. Ајнур артыг һәрәкәтләрә јол вермәк истәмир, амма Замиги итирмәк дә истәмир. О, өзүнү јалныз онун јанында белә ҝөзәл вә арзуолунан һисс едир. «Үстәлик, бир-биримизи севирик», — дејә о фикирләшир.

ЈӘГИН, сән бундан сонра нәләр баш верәҹәјини тәхмин едирсән. Анҹаг, ола билсин, ҹинси әлагәнин Ајнурла Замигин һәјатыны неҹә дәјишә биләҹәји һеч ағлына белә ҝәлмир. Бу дәјишиклик онларын һәјатыны алт-үст едәҹәк. Ҝәл бир аз дүшүнәк.

Әҝәр сән физики ганунлары, мисал үчүн, ҹазибә ганунуну нәзәрә алмасан, мүтләг зәрәрини ҝөрәҹәксән. Ејни шеји әхлаг ганунлары һагда да демәк олар. Мәсәлән, Мүгәддәс Китаб ҹинси әхлагсызлыгдан узаг дурмағы әмр едир (1 Салоникилиләрә 4:3). Бу әмрә табе олмамағын нәтиҹәси неҹә олаҹаг? Мүгәддәс Китабда дејилир: «Ҹинси әхлагсызлыгла мәшғул олан өз бәдәнинә гаршы ҝүнаһ ишләјир» (1 Коринфлиләрә 6:18). Һансы мәнада? Ашағыда никаһдан габаг ҹинси әлагәдә олмағын ҝәтирә биләҹәји фәсадлары јаз.

1 ․․․․․

2 ․․․․․

3 ․․․․․

Инди јаздығын фикирләрә диггәт јетир. Сән ҹинси јолла өтүрүлән хәстәликләри, арзуолунмаз һамиләлији вә Аллаһын илтифатыны итирмәји гејд етмисәнми? Аллаһын ҹинси әхлагсызлыға даир әмрини позан шәхс белә кәдәрли агибәтлә үзләшә биләр.

Бунунла белә евләнмәмишдән габаг ҹинси әлагәдә олмаг ширникдириҹи ола биләр. Бәлкә дә, дүшүнүрсән ки: «Мәнә һеч нә олмаз». Ја да белә фикирләшә биләрсән: «Онсуз да һамы бунунла мәшғул олур». Ола билсин, мәктәб јолдашларын өз ешг маҹәралары илә өјүнүр вә һеч дә зәрәр чәкәнә охшамырлар. Бәлкә, сән дә Ајнур кими, ҹинси әлагәдә олмағын мүнасибәтләринизи мөһкәмләндирәҹәјини дүшүнүрсән. Ахы ким истәјәр ки, бакирәлијинә ҝөрә ону әлә салсынлар? Онда ону горумағын нә мәнасы вар?

Белә дүшүнмәјә тәләсмә! Биринҹиси, демәк олмаз ки, буну һамы едир. Дүздүр, статистикаја әсасән, бир чох ҝәнҹләр никаһдан әввәл ҹинси әлагәдә олмушлар. Мәсәлән, Бирләшмиш Штатларда апарылан бир тәдгигата әсасән, мәктәби битирмәк үзрә олан һәр үч ҝәнҹдән икиси ҹинси әлагәдә олур. Бу исә о демәкдир ки, үчүндән бири, јәни бир чохлары буну етмир. Бәс буну едәнләр һаггында нә демәк олар? Мүтәхәссисләрин арашдырмаларына ҝөрә, бу ҝәнҹләрин әксәријјәти һәрәкәтләринин аҹы нәтиҹәләрини дадмышлар.

НӘТИҸӘ 1 ПЕШМАНЧЫЛЫГ. Никаһдан әввәл ҹинси әлагәдә олан ҝәнҹләрин бир чоху етираф едирләр ки, буна ҝөрә сонрадан чох пешман олмушлар.

НӘТИҸӘ 2 ЕТИБАРСЫЗЛЫГ. Сонрадан һәр ики тәрәф дә фикирләшмәјә башлајыр: «Ҝөрәсән, о, даһа киминлә бирликдә олуб?»

НӘТИҸӘ 3 МӘЈУСЛУГ. Әслиндә, һәр бир гыз ондан әшја кими истифадә едән јох, онун гајғысына галан бир инсанын јанында олмаг истәјир. Бир чох оғланлар исә фикир вермишләр ки, өзләрини онлара тәслим едән гызлар сонрадан ҝөзләриндән дүшүр.

Үстәлик, оғланларын әксәријјәти дејир ки, бирликдә олдуглары гызла һеч вахт аилә гурмазлар. Нәјә ҝөрә? Чүнки онлар евләнмәк үчүн даһа намуслу вә исмәтли гызлара үстүнлүк верирләр!

Ҝәнҹ бир гыз кими, бу, сәни тәәҹҹүбләндирә вә һәтта гәзәбләндирә биләр. Онда бир шеји јадында сахла: никаһдан әввәл ҹинси әлагәдә олмаг филмләрдә вә сериалларда ҝөстәриләнләрдән тамамилә фәрглидир. Әјләнҹә саһәси јенијетмәләрин ҹинси әлагәдә олмасыны зәрәрсиз әјләнҹә, һәтта әсил мәһәббәт кими тәгдим едәрәк она романтик дон ҝејиндирир. Бу гәдәр саф олма! Сәни ҹинси әлагәјә ҹәлб етмәјә чалышан кәс јалныз өзүнү дүшүнүр (1 Коринфлиләрә 13:4, 5). Мәҝәр сәни, һәгигәтән, севән инсан сәнин физики вә емосионал сағламлығыны тәһлүкә алтына атар? (Сүлејманын мәсәлләри 5:3, 4). Бәс һәгигәтән дә, сәнин гајғына галан бири Аллаһла мүнасибәтләринә зәрәр вураҹаг шејләрә тәһрик едәрми? (Ибраниләрә 13:4).

Оғланлар исә бу фәсилдә дејиләнләри нәзәрә алараг мүнасибәтләрини ҝөтүр-гој етмәли вә өзләриндән сорушмалыдырлар: «Ҝөрүшдүјүм гызын һиссләринә, һәгигәтән дә, өнәм верирәмми?» Әҝәр ҹавабын мүсбәтдирсә, онда буну ән јахшы тәрздә неҹә ҝөстәрә биләрсән? Аллаһын ганунларына бағлы галмаг үчүн ҝүҹлү, ширникдириҹи вәзијјәтләрдән гачмаг үчүн мүдрик ол, јалныз өз мәнфәәтини ҝүдмәмәк үчүн исә мәһәббәт тәзаһүр етдир. Әҝәр бу хүсусијјәтләр сәндә варса, онда ҝөрүшдүјүн гыз Шулам гызынын кечирдији һиссләри јашајаҹаг. О дејирди: «Севҝилим мәнимдир, мән дә онунам» (Нәғмәләр нәғмәси 2:16). Беләҹә, сән онун үрәјини фәтһ едәҹәксән!

Һәм гызлар, һәм дә оғланлар билмәлидирләр ки, никаһдан өнҹә ҹинси әлагәдә олмагла саһиб олдуглары чох дәјәрли бир шеји итирәҹәк вә өз мәнликләрини алчалдаҹаглар (Ромалылара 1:24). Буна ҝөрә дә тәәҹҹүблү дејил ки, нәтиҹәдә бир чохлары өзләриндә дахили бошлуг һисс едир вә лазымсыз олдугларыны дүшүнүрләр, санки, онлардан бир парча гопарылыб. Һеч вахт белә сәһвә јол вермә. Әҝәр кимсә ҹинси әлагәдә олмаг үчүн сәнә: «Мәни севирсәнсә, разылашарсан» — дејәрсә, гәти шәкилдә белә де: «Әҝәр сән мәни севсәјдин, белә шеји һеч дилинә ҝәтирмәздин!»

Сәнин бәдәнин чох гијмәтлидир, ону һәдәр јерә сәрф етмә. Аллаһын «ҹинси әхлагсызлыгдан гачын» әмринә риајәт етмәклә ҝүҹлү вә әгидәли инсан олдуғуну ҝөстәр. Ҝәләҹәкдә бир ҝүн аилә гуранда буна һаггын чатаҹаг. О заман нә нараһатчылыг, нә пешманчылыг, нә дә хәҹаләт һисси сәни севинҹиндән мәһрум етмәјәҹәк (Сүлејманын мәсәлләри 7:22, 23; 1 Коринфлиләрә 7:3).

ӘЛАВӘ МӘЛУМАТЫ 2-ҸИ ҸИЛДИН 4-ҸҮ ВӘ 5-ҸИ ФӘСИЛЛӘРИНДӘН ОХУ

АЧАР АЈӘ

“Ҹинси әхлагсызлыгдан гачын... Ҹинси әхлагсызлыгла мәшғул олан өз бәдәнинә гаршы ҝүнаһ ишләјир” 1 Коринфлиләрә 6:18

МӘСЛӘҺӘТ

Әкс ҹинслә неҹә давранмаға даир ҝөзәл бир гајда вар: әҝәр һансыса һәрәкәтә валидејнләринин јанында јол вермәзсәнсә, онда буну етмә.

БИЛИРСӘН... ?

Ҹинси әлагәдә олдугдан сонра, чох еһтимал ки, оғлан һәмин гызы атыб башгасыны ахтараҹаг.

ҺӘРӘКӘТ ПЛАНЫ!

Әкс ҹинслә вахт кечирәркән гачынмалы олдуғум һәрәкәтләр: ․․․․․

Әҝәр әкс ҹинсдән олан кимсә мәнимлә тәклијә чәкилмәк истәјәрсә, она белә дејәҹәјәм: ․․․․․

Бу мөвзу илә бағлы валидејнләримә вермәк истәдијим суаллар: ․․․․․

НЕҸӘ ДҮШҮНҮРСӘН?

● Никаһдан өнҹә ҹинси әлагәдә олмаг ҹәлбедиҹи ҝөрүнсә дә, буну етмәк нәјә ҝөрә дүзҝүн дејил?

● Әҝәр кимсә сәнә ҹинси әлагәдә олмағы тәклиф едәрсә, сән нә едәҹәксән?

[176–ҹы сәһифәдәки јазы]

“Аллаһын хидмәтчиси кими, сәндә башгаларыны ҹәлб едән кејфијјәтләр вар. Буна ҝөрә дә диггәтли ол, сәни һансыса әхлагсыз бир һәрәкәтә тәһрик едәндә орадан узаглаш. Өзүнә һөрмәт ет. Ләјагәтини сатма!” Фуад

[176 вә 177–ҹи сәһифәләрдәки шәкил]

Никаһдан габаг ҹинси әлагәдә олмаг ҝөзәл бир рәсм әсәринә ајаг силмәк кими бир шејдир