Ҝәлин Бөјүк Давуд вә Сүлејман олан Исаны гијмәтләндирәк
«Сүлејмандан даһа бөјүјү бурададыр» (МАТ. 12:42).
1, 2. Нәјә ҝөрә Шамуелин Давуду падшаһ кими мәсһ етмәси инсан нөгтеји-нәзәриндән гәрибә ҝөрүнә биләрди?
БУ ИНСАН заһирән падшаһа бәнзәмирди. О, Шамуел пејғәмбәрин ҝөзүндә ади ҝәнҹ чобан иди. Бундан әлавә, онун јашадығы Бет-Лехем шәһәри о гәдәр дә мәшһур дејилди. Мүгәддәс Китабда бу шәһәр «Јәһуда нәсилләринин кичији» адландырылырды (Мик. 5:2). Буна бахмајараг, Шамуел кичик бир шәһәрдән олан бу садә ҝәнҹи Исраилин падшаһы кими мәсһ етмәјә һазырлашырды.
2 Ҝәнҹ Давуд атасы Јессејин мәсһ едилмәк үчүн Шамуелин јанына ҝәтирдији илк оғлу дејилди; о нә икинҹиси, нә дә ки үчүнҹүсү иди. Һәтта Шамуел садиг Јессејин евинә онун оғулларындан бирини халг үзәринә нөвбәти падшаһ кими мәсһ етмәјә ҝәләндә онун сәккиз оғлундан ән кичији олан Давуд евдә јох иди. Лакин Јеһова Давуду сечмишди, ән ваҹиби дә елә бу иди (1 Шам. 16:1-10).
3. а) Јеһованын инсанда диггәт јетирдији ән ваҹиб шеј нәдир? б) Давуд мәсһ едилдикдән сонра нә баш верди?
3 Јеһова Шамуелин ҝөрә билмәдијини ҝөрүрдү. О, Давудун үрәјинин вәзијјәтинин нә јердә олдуғуну билирди вә ондан разы иди. Аллаһ үчүн әһәмијјәт кәсб едән инсанын заһири ҝөрүнүшү јох, дахилән неҹә олмасыдыр. (1 Шамуел 16:7 ајәсини оху.) Шамуел Јессејин једди оғлундан һеч биринин сечилмәдијини баша дүшәндә хаһиш етди ки, чөлдән онун ән кичик оғлуну чағырсынлар. Мүгәддәс Китабда охујуруг: «Јессеј адам ҝөндәриб ону [Давуду] ичәри ҝәтиртди. Оғлан алјанаг, ҝөзләри ҝөзәл, үзү ҝөјчәк иди. Рәбб Шамуелә деди: “Дур, ону мәсһ ет, чүнки сечилмиш будур”. Шамуел јағ бујнузуну ҝөтүрүб гардашлары арасында ону мәсһ етди вә о ҝүндән башлајараг Давудун үзәринә Рәббин Руһу гүввә илә енди» (1 Шам. 16:12, 13).
Давуд Мәсиһин сәләфи олмушдур
4, 5. а) Иса илә Давуд арасында олан бәзи охшарлыглары садалајын. б) Нәјә ҝөрә Исаны Бөјүк Давуд адландырмаг олар?
4 Давуддан тәхминән 1 100 ил сонра Иса да Бет-Лехемдә анадан олмушду. Бир чохларынын ҝөзүндә о да падшаһа охшамырды. Јәни о, бир чох исраиллиләрин ҝөзләдији падшаһ дејилди. Лакин Давуд кими, о да Јеһованын сечилмиши вә севимлиси идиa (Лука 3:22). Исанын да ‘үзәринә Рәббин Руһу гүввә илә енмишди’.
5 Лакин онлар арасында охшарлыглар бунунла битмир. Мәсәлән, Давуда мәсләһәтчиси Ахитофел, Исаја исә һәвариси Јәһуда Искарјот тәрәфиндән хәјанәт едилмишди (Мәз. 41:9; Јәһ. 13:18). Һәм Давуд, һәм дә Иса Јеһоваја ибадәт едилән јерә гејрәтлә јанашырды (Мәз. 27:4; 69:9; Јәһ. 2:17). Иса һәмчинин Давудун вариси иди. Исанын доғулмасындан әввәл мәләк онун анасына демишди: «Рәбб Аллаһ Она атасы Давудун тахтыны верәҹәкдир» (Лука 1:32; Мат. 1:1). Мәсиһ һаггында бүтүн пејғәмбәрликләр инсанларын узун мүддәт јолуну ҝөзләдикләри Исанын, јәни мәсһ олунмуш Падшаһын үзәриндә јеринә јетмәли олдуғу үчүн о, Давуддан гат-гат бөјүк иди (Јәһ. 7:42).
Чобанымыз олан Падшаһын ардынҹа ҝедин
6. Нәјә ҝөрә демәк олар ки, Давуд јахшы чобан иди?
6 Иса һәм дә чобандыр. Јахшы чобаны фәргләндирән хүсусијјәтләр һансылардыр? О, сәдагәтлә вә ҹәсарәтлә өз сүрүсүнүн гајғысына галыр, ону отарыр вә мүдафиә едир (Мәз. 23:2-4). Ҹаванлыгда Давуд чобанлыг едирди вә атасынын гојунларынын гајғысына чох јахшы галырды. Сүрү тәһлүкәјә дүшәндә о, һүнәр ҝөстәрәрәк һәјатыны тәһлүкәјә атыр, гојунлары асланын вә ајынын пәнҹәсиндән гуртарырды (1 Шам. 17:34, 35).
7. а) Давуд нәјин сајәсиндә падшаһ вәзифәсинә һазыр иди? б) Иса Јахшы Чобан олдуғуну неҹә ҝөстәрди?
7 Чөлләрдә вә тәпәләрдә гојунлары отардығы илләр Давуду Исраил халгынын гајғысына галмаг кими ҹидди вәзифәјә вә мәсулијјәтә һазырладыb. (Мәз. 78:70, 71). Иса да өз ишләри илә нүмунәви чобан олдуғуну ҝөстәрди. О, ‘кичик сүрүсүнүн’ вә ‘башга гојунларынын’ гајғысына галмаг үчүн лазым олан ҝүҹү вә рәһбәрлији Јеһовадан алыр (Лука 12:32; Јәһ. 10:16). Буна ҝөрә дә Иса Јахшы Чобандыр. О, өз гојунларыны о дәрәҹәдә јахшы таныјыр ки, һәр бирини ады илә чағырыр. Иса гојунларыны елә чох севир ки, јер үзүндә оланда онларын уғрунда ҹаныны белә әсирҝәмәди (Јәһ. 10:3, 11, 14, 15). Јахшы Чобан кими, Иса Давудун һеч вахт едә билмәјәҹәји иши һәјата кечирир. Онун фидијә гурбанлығы бәшәријјәтә өлүмдән азад олмаг үчүн јол ачыб. Исанын өз ‘кичик сүрүсүнә’ ҝөјләрдә өлмәз һәјат, ‘башга гојунларына’ исә ҹанаварабәнзәр јыртыҹылардан азад олан вә салеһлијин өмүр сүрдүјү јени дүнјада әбәди һәјаты вермәсинә һеч нә мане ола билмәз. (Јәһја 10:27-29 ајәләрини оху.)
Фатеһ Падшаһын ардынҹа ҝедин
8. Давуд нәјин сајәсиндә фатеһ падшаһ олду?
8 Давуд падшаһ Аллаһын халгынын торпагларыны дүшмәнләрдән горујан иҝид ҹәнҝавәр иди вә Јеһова «Давуда ҝетдији һәр јердә зәфәр газандырды». Давуд Исраилин сәрһәдләрини Мисир чајындан Фәрат чајынадәк ҝенишләндирди (2 Шам. 8:1-14). Јеһованын вердији гүввә сајәсиндә о ән әзәмәтли һөкмдар олду. Мүгәддәс Китабда дејилир: «Давудун шөһрәти бүтүн өлкәләрә јајылды вә Рәбб онун горхусуну бүтүн милләтләрин үрәјинә салды» (1 Салн. 14:17).
9. Изаһ един: тәјин олунмуш Падшаһ кими Иса неҹә галиб олду?
9 Давуд падшаһ кими, Иса да јер үзүндәки хидмәти заманы ҹәсур олдуғуну ҝөстәрмишди. Иса тәјин олунмуш Падшаһ кими ҹинләрә тутулмуш инсанлары онларын пәнҹәсиндән азад едәрәк ҹинләрин үзәриндә һакимијјәтә малик олдуғуну нүмајиш етдирди (Марк 5:2, 6-13; Лука 4:36). Һәтта баш дүшмән Шејтан Иблисин онун үзәриндә һеч бир һакимијјәти јохдур. Јеһованын көмәји илә Иса Шејтанын һакимијјәти алтында олан дүнјаја галиб ҝәлди (Јәһ. 14:30; 16:33; 1 Јәһ. 5:19).
10, 11. Исанын ҝөјләрдәки Ҹәнҝавәр Падшаһ ролу нәдән ибарәтдир?
10 Иса өлүб ҝөјләр һәјатына дирилдилдикдән тәхминән 60 ил сонра һәвари Јәһја Исанын ҝөјләрдәки Ҹәнҝавәр Падшаһ ролуна даир пејғәмбәрлик ҝөрүнтүсү алды. Јәһја јазыр: «Бахыб ҝөрдүм ки, бир ағ ат дуруб, белиндәки атлынын да әлиндә јај вар. Она бир таҹ верилди вә о, фатеһ кими јола чыхды ки, фәтһ етсин» (Вәһј 6:2). Ағ атын белиндәки атлы Исадыр. «Таҹ» она 1914-ҹү илдә сәмави Падшаһлыгда Падшаһ кими тахта отуранда верилди. Сонра «о, фатеһ кими јола чыхды». Бәли, Давуд кими, Иса да фәтһ едән падшаһдыр. Аллаһын Падшаһлығынын Падшаһы кими тахта чыхдыгдан гыса мүддәт сонра о, Шејтана галиб ҝәлди вә ону ҹинләри илә бирликдә јерә атды (Вәһј 12:7-9 ). Онун зәфәрлә ат чапмасы тамамилә «фәтһ» едәнәдәк, јәни Шејтанын пис системини јерлә јексан едәнәдәк давам едәҹәк. (Вәһј 19:11, 19-21 ајәләрини оху.)
11 Лакин, Давуд кими, Иса да шәфгәтли падшаһдыр вә о, Һар-Меҝидонда ‘бөјүк издиһамы’ хилас едәҹәк (Вәһј 7:9, 14). Үстәлик, Исанын вә онун дирилән 144 000 һәмварисинин рәһбәрлији алтында «һәм салеһ, һәм дә салеһ олмајан өлүләрин дирилмәси олаҹагдыр» (Һәв. иш. 24:15). Јер үзүндә јашамаг үчүн дирилдиләнләрин әбәди јашамаг имканлары олаҹаг. Онлары неҹә дә ҝөзәл һәјат ҝөзләјир! Ҝәлин һамымыз даим ‘јахшылыг етмәјә’ гәти гәрарлы олаг ки, бүтүн јер күрәси Бөјүк Давудун салеһ вә хошбәхт тәбәәләри илә доланда биз дә онларын сырасында олаг (Мәз. 37:27-29).
Сүлејман һикмәт үчүн етдији дуасына ҹаваб алыр
12. Сүлејман нә һагда дуа етмишди?
12 Давудун оғлу Сүлејман да Исаны тәмсил едирдиc. Сүлејман падшаһ оланда Јеһова јухуда она ҝөрүнәрәк истәдији һәр шеји верәҹәјини сөјләди. Сүлејман даһа чох вар-дөвләт, һакимијјәт вә узун өмүр истәјә биләрди. Лакин о, шәхси мәнфәәт ҝүдмәдән Јеһоваја деди: «Инди мәнә һикмәт вә билик вер ки, бу халга нә едиб-етмәјәҹәјими билим, чүнки бу гәдәр бөјүк олан бу халгына ким һөкм едә биләр?» (2 Салн. 1:7-10). Јеһова Сүлејманын дуасыны ҹавабсыз гојмады. (2 Салнамәләр 1:11, 12 ајәләрини оху.)
13. Нәјә ҝөрә демәк олар ки, мүасирләри арасында Сүлејман кими һикмәтлиси јох иди вә онда олан һикмәт кимдән иди?
13 Сүлејман Јеһоваја садиг олдуғу мүддәтдә өз мүасирләри арасында ән мүдрик шәхс сајылырды. «О, үч мин мәсәл сөјләмишди» (1 Пад. 4:30, 32, 34). Онларын бир чоху гәләмә алыныб вә һикмәт сорағында оланлар тәрәфиндән индијәдәк јүксәк гијмәтләндирилир. Сәба мәләкәси Сүлејманын һикмәтини јохламаг вә ону ‘тапмаҹаларла сынамаг’ үчүн тәхминән 2 400 километр мәсафә гәт етмишди. Сүлејманын дедикләрини ешидәндә вә падшаһлығынын фираванлығыны ҝөрәндә ону һејрәт бүрүдү (1 Пад. 10:1-9). Мүгәддәс Китаб Сүлејманын мүдриклијинин кимдән олдуғуну ачыглајараг дејир: «Сүлејманын үрәјинә Аллаһын гојдуғу һикмәти ешитмәк үчүн һамы онун үзүнү ҝөрмәк истәјирди» (1 Пад. 10:24).
Һикмәтли Падшаһын ардынҹа ҝедин
14. Иса һансы мәнада ‘Сүлејмандан даһа бөјүкдүр’?
14 Јалныз бир нәфәрин мүдриклији Сүлејманын мүдриклијиндән үстүн иди. Бу, өзүнү ‘Сүлејмандан даһа бөјүк’ адландыран Иса Мәсиһ иди (Мат. 12:42). Иса ‘әбәди һәјатын сөзләрини’ сөјләјирди (Јәһ. 6:68). Мисал үчүн, Исанын Дағүстү тәблиғиндә сөјләдији сөзләр Сүлејманын мәсәлләриндәки принсипләрә даһа чох ајдынлыг ҝәтирир. Сүлејман Јеһованын хидмәтчиләринә хошбәхтлик ҝәтирән бир сыра шејләри садаламышдыр (Сүл. мәс. 3:13; 8:32, 33; 14:21; 16:20). Иса исә гејд етмишдир ки, һәгиги хошбәхтлик Јеһоваја ибадәтлә бағлы шејләрдән вә Аллаһын Өз вәдләрини јеринә јетирмәсиндән ирәли ҝәлир. О демишди: «Руһән јохсуллар нә бәхтијардырлар! Чүнки Сәмави Сәлтәнәт онларындыр» (Мат. 5:3). Исанын тәлимләриндәки принсипләрә әмәл едәнләр «һәјат мәнбәји» олан Јеһоваја даһа јахын олурлар (Мәз. 36:9; Сүл. мәс. 22:11; Мат. 5:8). Мәсиһ «Аллаһын мүдриклији»нин тәҹәссүмүдүр (1 Кор. 1:24, 30). Аллаһын Падшаһлығынын Падшаһы кими, Иса Мәсиһ ‘анлајыш руһуна’ маликдир (Јешаја 11:2).
15. Аллаһын мүдриклијиндән неҹә фајдалана биләрик?
15 Бөјүк Сүлејманын давамчылары олан бизләр ондакы илаһи һикмәтдән неҹә фајдалана биләрик? Мүгәддәс Китаб Аллаһын һикмәт хәзинәси олдуғу үчүн биз ону, хүсусилә дә Исанын дедији кәлмәләри диггәтлә өјрәнмәк вә үзәриндә дүшүнмәк үчүн сәј ҝөстәрмәлијик (Сүл. мәс. 2:1-5). Үстәлик, тәкидлә Аллаһдан мүдриклик диләмәлијик. Аллаһын Кәламы бизи әмин едир ки, көмәк үчүн етдијимиз сәмими дуалар ҹавабсыз галмајаҹагдыр (Јаг. 1:5). Мүгәддәс руһун көмәји илә биз Аллаһын Кәламында олан мүдриклик мирвариләрини тапаҹағыг. Бу мүдриклик бизә чәтинликләрин өһдәсиндән ҝәлмәјә вә мүдрик гәрарлар гәбул етмәјә көмәк едә биләр (Лука 11:13). Сүлејман һәмчинин ‘халга билик өјрәдән’ «ваиз» вә ја орижинал мәтнә әсасән, «јығынҹаг тәшкил едән» адланырды (Ваиз 12:9, 10). Мәсиһчи јығынҹағынын Башы олан Иса да өз халгыны бир јерә топлајыр (Јәһ. 10:16; Колос. 1:18). Буна ҝөрә дә биз мүнтәзәм шәкилдә тәлим алдығымыз јығынҹаг ҝөрүшләриндә иштирак етмәлијик.
16. Сүлејман вә Иса арасында һансы охшарлыг вар?
16 Сүлејман падшаһ өз һөкмранлығы дөврүндә чох ишләр ҝөрмүшдүр. О, бүтүн өлкәдә тикинти ишләри апарырды: онун нәзарәти алтында сарајлар тикилир, јоллар салыныр, су кәмәрләри чәкилир, анбар шәһәрләри, дөјүш арабаларынын вә сүвариләрин олдуғу шәһәрләр тикилирди (1 Пад. 9:17-19). Падшаһын ҝөрдүјү бу ишләрдән бүтүн өлкә јарарланырды. Иса да мемардыр. О, өз јығынҹағыны «дашын үзәриндә» гуруб (Мат. 16:18). Иса һәм дә јени дүнјада апарылаҹаг тикинти ишләринә нәзарәт едәҹәк (Јешаја 65:21, 22).
Сүлһ Падшаһынын ардынҹа ҝедин
17. а) Сүлејманын һөкмранлығы нә илә јадда галды? б) О нәјә наил ола билмәзди?
17 Сүлејманын ады «сүлһ» мәнасы дашыјан сөздән әмәлә ҝәлир. О, өлкәни Јерусәлимдән (мәнасы «икили сүлһә малик олмаг» демәкдир) идарә едирди. Онун 40 иллик һөкмранлығы заманы бүтүн Исраилдә мисилсиз сүлһ һөкм сүрүрдү. Мүгәддәс Китабда һәмин илләр һаггында дејилир: «Онун [Сүлејманын] бүтүн өмрү боју Дандан Беер-Шеваја гәдәр Јәһуда вә Исраилдә һәр кәс өз үзүм мејнәсинин вә әнҹир ағаҹынын алтында динҹлик ичиндә јашајырды» (1 Пад. 4:25). Сүлејман нә гәдәр мүдрик олса да, өз тәбәәләрини хәстәлијин, ҝүнаһын вә өлүмүн гандалларындан азад едә билмәзди. Бөјүк Сүлејман исә өз тәбәәләрини бүтүн бунлардан гуртараҹаг. (Ромалылара 8:19-21 ајәләрини оху.)
18. Мәсиһчи јығынҹағы һансы хејир-дуаја маликдир?
18 Һәтта бу ҝүн дә мәсиһчи јығынҹағында сүлһ һөкм сүрүр. Биз әсил мәнада руһани ҹәннәтдә јашајырыг. Биз һәм Аллаһла, һәм дә инсанларла сүлһә маликик. Ҝөрүн, буҝүнкү вәзијјәтимиз һаггында Јешаја һансы пејғәмбәрлији сөјләмишди: «Онлар гылынҹларындан котан, низәләриндән исә дәрјаз дүзәлдәҹәк. Милләт милләтә гаршы гылынҹ галдырмајаҹаг, артыг дава етмәји өјрәнмәјәҹәк» (Јешаја 2:3, 4). Аллаһын мүгәддәс руһуна ујғун јашајараг биз руһани ҹәннәти даһа да ҝөзәлләшдиририк.
19, 20. Севинмәк үчүн һансы сәбәбләримиз вар?
19 Лакин ҝәләҹәк бундан да ҝөзәл олаҹагдыр. Исанын рәһбәрлији алтында мисли ҝөрүнмәмиш сүлһ ичиндә јашајаҹаг итаәткар инсанлар камиллијә чатанадәк тәдриҹән ‘чүрүклүјә олан көләликдән азад олунаҹаглар’ (Ром. 8:21). Миниллик Һөкмранлығын сонунда ахырынҹы имтаһандан кечәндән сонра онлар «өлкәни [«јери», ЈД] мүлк олараг алаҹаг, әмин-аманлығын боллуғундан зөвг тапаҹаг» (Мәз. 37:11; Вәһј 20:7-10). Мәсиһ Исанын һөкмранлығы Сүлејманын һөкмранлығындан тәсәввүредилмәз дәрәҹәдә ҝөзәл олаҹаг!
20 Исраиллиләр Мусанын, Давудун вә Сүлејманын һөкмранлығы алтында севиндији кими, биз дә Мәсиһин рәһбәрлији алтында даһа чох севинәҹәјик (1 Пад. 8:66). Биз Јеһоваја неҹә дә миннәтдарыг ки, О, ваһид Оғлуну — Бөјүк Муса, Давуд вә Сүлејман олан Исаны јер үзүнә ҝөндәрмишди!
[Һашијәләр]
a Еһтимал ки, Давудун адынын мәнасы «севимли» демәкдир. Иса вәфтиз олунанда вә ҝөркәмини дәјишәндә Јеһова ҝөјдән данышараг ону Өз ‘севимли Оғлу’ адландырды (Мат. 3:17; 17:5).
b Ејни заманда, Давуд өз чобанына етибар едән бир гузу иди. О, Бөјүк Чобан олан Јеһовадан мүдафиә вә рәһбәрлик ҝөзләјирди. Давуд там әминликлә демишди: «Рәбб мәним чобанымдыр, мөһтаҹ олмарам» (Мәз. 23:1). Вәфтизчи Јәһја Исаны «Аллаһ Гузусу» адландырмышдыр (Јәһ. 1:29).
c Мараглыдыр ки, Сүлејманын икинҹи ады «Јаһын севимлиси» мәнасыны дашыјан Једидјаһдыр (2 Шам. 12:24, 25).
Изаһ едә биләрсинизми?
• Һансы мәнада Иса Давуддан бөјүкдүр?
• Һансы мәнада Иса Сүлејмандан бөјүкдүр?
• Бөјүк Давуд вә Сүлејман олан Исада ән чох гијмәтләндирдијин нәдир?
[31-ҹи сәһифәдәки шәкил]
Сүлејманын Аллаһдан алдығы һикмәт Бөјүк Сүлејманын һикмәтини тәмсил едирди
[32-ҹи сәһифәдәки шәкил]
Исанын һөкмранлығы Сүлејманын вә Давудун һөкмранлығындан тәсәввүредилмәз дәрәҹәдә ҝөзәл олаҹаг!