Сән аддымбааддым Мәсиһин изләри илә ҝедирсәнми?
«Бу јолда ҝетдикҹә даһа чох тәрәгги един» (1 САЛОН. 4:1).
1, 2. а) Исанын ҝүнләриндә јашајан инсанларын бир чоху онун һансы мөһтәшәм ишләринин шаһиди олмушдулар? б) Нәјә ҝөрә демәк олар ки, биз дә ваҹиб дөврдә јашајырыг?
ҺЕЧ Иса јер үзүндә олан дөврдә јашамағын неҹә дә ҝөзәл олдуғу барәдә дүшүнмүсәнми? Ола билсин, сән Исанын шәфа вериб үзүҹү бир хәстәликдән азад етдији инсанларын арасында олдуғуну тәсәввүрүнә ҝәтирирсән. Јахуд Исаны ҝөрүб-ешитмәјин — ондан өјрәнмәјин вә мөҹүзәләринин шаһиди олмағын бөјүк севинҹ олдуғуну дүшүнүрсән (Марк 4:1, 2; Лука 5:3—9; 9:11). Һәгигәтән дә, Иса бүтүн бу мөһтәшәм ишләри һәјата кечирән заман јашамаг неҹә дә һејрәтамиз оларды! (Лука 19:37). Ондан сонра јашајан һеч бир нәсил бу кими һадисәләрин шаһиди олмајыб вә бәшәријјәти ҝүнаһ вә өлүмдән азад етмәк үчүн о артыг һеч вахт өзүнү ‘гурбан вермәјәҹәк’ (Ибр. 9:26; Јәһ. 14:19).
2 Анҹаг инди јашадығымыз дөвр дә чох ваҹиб дөврдүр. Нәјә ҝөрә? Мүгәддәс Јазыларда пејғәмбәрлик едилдији кими, биз ‘ахыр заманда’, јәни «ахыр ҝүнләрдә» јашајырыг (Дан. 12:1—4, 9; 2 Тим. 3:1). Бу дөврдә Шејтан ҝөјләрдән говулуб. Тезликлә исә зәнҹирләниб «дибсиз дәринликләрә» атылаҹаг (Вәһј 12:7—9, 12; 20:1—3). Мәһз бу дөврдә биз ‘Сәмави Сәлтәнәт һаггында олан Мүждәни’ бүтүн дүнјада бәјан едәрәк ҝәләҹәк Ҹәннәтә олан үмидимиз барәдә данышмаг кими шәрәфли иши һәјата кечиририк вә бу иш артыг һеч вахт тәкрарланмајаҹаг (Мат. 24:14).
3. Иса ҝөјә галхмаздан өнҹә давамчыларына һансы тапшырығы верди вә буна нә дахил иди?
3 Ҝөјә галхмаздан әввәл Иса давамчыларына демишди: «Јерусәлимдә, бүтүн Јәһудеја вә Самаријада, һәтта дүнјанын ән узаг јерләринә гәдәр Мәнә шаһид олаҹагсыныз» (Һәв. иш. 1:8). Бу тапшырыға үмумдүнја тәлим иши дә дахил иди. Бу иши һәјата кечирмәкдә мәгсәд сон ҝәлмәздән өнҹә шаҝирд, јәни Мәсиһ үчүн јени давамчылар һазырламаг иди (Мат. 28:19, 20). Мәсиһин тапшырығыны јеринә јетирә билмәк үчүн биз нә етмәлијик?
4. а) 2 Петер 3:11, 12 ајәләриндә нәјин ваҹиблији вурғуланыр? б) Биз өзүмүзү нәдән ҝөзләмәлијик?
4 Һәвари Петерин сөзләринә диггәт јетирәк: «Сиз неҹә инсанлар олмалысыныз? Аллаһын Ҝүнүнүн зүһуруну ҝөзләјиб, ону сүрәтләндирәрәк мүгәддәс вә Аллаһа ихласкар бир һәјат јашамалысыныз» (2 Пет. 3:11, 12). Бу сөзләрдән ҝөрүндүјү кими, һәјатымызын һәмишә Аллаһа мәгбул ишләр әтрафында дөвр етмәси үчүн биз бу сон ҝүнләрдә ајыг-сајыг галмалыјыг. Бу ишләрдән бири дә хош хәбәрин тәблиғидир. Буна ҝөрә дә бүтүн дүнјада гардашларымызын Мәсиһин тәблиғ етмәк тапшырығыны ҹанла-башла јеринә јетирдикләрини ҝөрмәк неҹә дә фәрәһләндириҹидир! Ејни заманда биз баша дүшүрүк ки, еһтијаты әлдән версәк, Шејтан дүнјасынын һәр ҝүн ҝөстәрдији тәзјигләр, о ҹүмләдән мирас алдығымыз ҹисмани зәифликләр Аллаһа хидмәтдә сәјимизи зәифләдә биләр. Буна ҝөрә дә ҝәлин ҝөрәк, Мәсиһин ардынҹа ҝедиб-ҝетмәдијимизә неҹә әмин ола биләрик.
Аллаһын һәвалә етдији мәсулијјәти севинҹлә гәбул ет
5, 6. а) Павел Јерусәлимдәки һәмиманлыларыны нәјә ҝөрә тәрифләди вә онлары нә һагда хәбәрдар етди? б) Нәјә ҝөрә Аллаһын бизә һәвалә етдији мәсулијјәтә башдансовду јанашмамалыјыг?
5 Һәвари Павел Јерусәлимдә јашајан мәсиһчиләрә јаздығы мәктубунда, тәгибләрә бахмајараг, кечмишдә садиг вә мәтанәтли галдыгларына ҝөрә онлары тәрифләди. О деди: «Әввәлки ҝүнләри јада салын; о заман сиз ајдынлашдыгдан сонра әләм долу бөјүк мүбаризәјә таб ҝәтирдиниз». Бәли, Јеһова онларын садиглијини унутмамышды (Ибр. 6:10; 10:32—34). Ҝөрүнүр, Павелин сәмими тәриф сөзләри ибрани мәсиһчиләрини чох руһландырмышды. Һәмчинин Павел һәмин мәктубунда контрол алтында сахланылмадығы тәгдирдә Аллаһа хидмәтдә инсанын сәјини зәифләдәҹәк бир мејил һагда да хәбәрдарлыг етди. О деди ки, мәсиһчиләр Аллаһын әмрләринә риајәт етмәји ‘рәдд етмәмәли’, јәни бәһанәләр ахтармамалыдырлар (Ибр. 12:25).
6 Павелин бу хәбәрдарлығы мүасир мәсиһчиләрә дә аиддир. Биз анлајырыг ки, мәсиһчи мәсулијјәтләримизә һеч вахт башдансовду јанашмамалы вә хидмәтдә сәјимизин зәифләмәсинә јол вермәмәлијик (Ибр. 10:39). Ахы мүгәддәс хидмәти иҹра етмәк өлүм-дирим мәсәләсидир (1 Тим. 4:16).
7, 8. а) Јеһоваја хидмәтдә сәјимизи горумагда бизә нә көмәк едәҹәк? б) Хидмәтдә әввәлки кими фәал олмадығымызы ашкар едәндә Јеһова вә Иса һагда нәји јадда сахламалыјыг?
7 Аллаһ гаршысында борҹумузу јеринә јетирмәмәк үчүн бәһанәләр ахтармаг мејилинин өһдәсиндән неҹә ҝәлә биләрик? Бу мејил илә мүбаризә апармағын ваҹиб үсулларындан бири һәср олунаркән вердијимиз андын үзәриндә мүнтәзәм дүшүнмәкдир. Маһијјәт етибарилә, биз Јеһоваја Онун ирадәсини һәјатымызда биринҹи јерә гојаҹағымызы вәд етмишдик вә биз сөзүмүзүн үстүндә дурмаг истәјирик. (Матта 16:24 ајәсини оху.) Буна ҝөрә дә бәзән ајаг сахлајыб өзүмүздән сорушмалыјыг: «Аллаһа һәср олунмағыма ујғун јашамаг әзмим вәфтиз олундуғум заман олдуғу кими мөһкәмдирми? Јохса илләр өтдүкдән сонра әввәлки сәјим зәифләјиб?»
8 Өзүмүзү виҹданла јохладыгдан сонра Јеһоваја хидмәтдә әввәлки кими фәал олмадығымызы ҝөрсәк, јахшы оларды ки, Сефанја пејғәмбәрин үрәкләндириҹи сөзләрини јадымыза салаг: «Гој әлләрин тагәтдән дүшмәсин! Аллаһын Рәбб, Гүввәтли Гуртарыҹын сәнинләдир! О сәнин үчүн севиниб шадланаҹаг!» (Сеф. 3:16, 17). Бу руһландырыҹы сөзләр, илк өнҹә, Бабил әсарәтиндән Јерусәлимә дөнән гәдим исраиллиләрә аид иди. Амма онлары Аллаһын мүасир халгына да тәтбиг етмәк олар. Һәјата кечирдијимиз иш Јеһованын ишидир, буна ҝөрә дә јадда сахламалыјыг ки, бизә һәвалә олунан бу иши јеринә јетирмәкдә бизә Јеһова вә Онун Оғлу дајаг олур вә бизи мөһкәмләндирир (Мат. 28:20; Филип. 4:13, И—93). Әҝәр Аллаһын ишини ҹанла-башла јеринә јетирмәјә давам етсәк, О, бизи хејир-дуаландыраҹаг вә руһани фираванлығымызын гајғысына галаҹаг.
Сәјлә «әввәлҹә Аллаһын Сәлтәнәтини... ахтарын»
9, 10. Исанын бөјүк ахшам зијафәти һагдакы мәсәлинин мәғзи нәдән ибарәтдир вә биз ондан өзүмүзә һансы ибрәт дәрсини ҝөтүрә биләрик?
9 Фәрисејләрин рәисинин евиндә јемәк јејәндә Иса бөјүк ахшам зијафәти һагда бир мәсәл сөјләди. Һәмин мәсәлдә о, сәмави Падшаһлыгла әлагәдар мүхтәлиф инсанлар гаршысында ачылан имкан барәдә данышды. О һәмчинин бәһанә ахтармағын нә демәк олдуғуну әјани шәкилдә ҝөстәрди. (Лука 14:16—21 ајәләрини оху.) Исанын мәсәлиндәки дәвәт олунмуш гонаглар зијафәтә ҝәлмәмәк үчүн бәһанәләр ҝәтирдиләр. Онлардан бири деди ки, тәзәҹә алдығы торпаг саһәсинә бахмалыдыр. Диҝәри беш ҹүт өкүз алдығыны вә онлары сынагдан чыхармаг истәдијини сөјләди. Үчүнҹүсү исә: «Мән евләнмишәм, буна ҝөрә дә ҝәлә билмәрәм»,— дејә дәвәти рәдд етди. Бунларын һамысы бәһанә иди. Адәтән, торпаг саһәси вә ја мал-гара аланда онлары габагҹадан јохлајырлар, буна ҝөрә дә буну сонра етмәк бир о гәдәр тәҹили дејил. Мәҝәр инсанын јениҹә аилә гурмасы ону бу гәдәр ваҹиб дәвәти гәбул етмәкдән чәкиндирмәлидир? Буна ҝөрә дә мәсәлдәки ев саһибинин гәзәбләнмәси һеч дә тәәҹҹүблү дејил!
10 Исанын чәкдији мәсәлдән Аллаһын халгынын һәр бир үзвү өзүнә дәрс ҝөтүрә биләр. Һансы дәрси? Биз һеч вахт јол вермәмәлијик ки, бу кими шәхси мәсәләләр бизим үчүн о гәдәр ваҹиб олсун ки, Аллаһа хидмәт арха плана кечсин. Әҝәр мәсиһчи һәјатында шәхси мәсәләләрә дүзҝүн јер ајырмаса, онда хидмәтдә тәдриҹән зәифләјәҹәк. (Лука 8:14 ајәсини оху.) Бунун баш вермәмәси үчүн биз Исанын «әввәлҹә Аллаһын Сәлтәнәтини вә Онун салеһлијини ахтарын» нәсиһәтинә ујғун јашајырыг (Мат. 6:33). Аллаһын һәм ҝәнҹ, һәм дә јашлы хидмәтчиләринин бу ваҹиб мәсләһәтә риајәт етдикләрини ҝөрмәк неҹә дә руһландырыҹыдыр! Хидмәтә даһа чох вахт ајырмаг үчүн чохлары һәјат тәрзләрини садәләшдирмишләр. Онлар сәјлә әввәлҹә Аллаһын Сәлтәнәтини ахтармағын әсил хошбәхтлик вә бөјүк мәмнунлуг ҝәтирдијини шәхси тәҹрүбәләриндән өјрәнмишләр.
11. Һансы Мүгәддәс Китаб һадисәси Аллаһа сәјлә вә үрәкдән хидмәт етмәјин ваҹиблијини ҝөстәрир?
11 Аллаһа хидмәтдә сәјли олмағын ваҹиблијини ҝөрмәк үчүн ҝәлин Исраил падшаһы Јоашын һәјатында баш верән бир һадисәјә нәзәр салаг. Исраилин суријалылар тәрәфиндән зәбт едиләҹәјиндән нараһат олан Јоаш ағлаја-ағлаја Елишанын јанына ҝәлди. Пејғәмбәр она пәнҹәрәдән Суријаја тәрәф ох атмасыны деди; бу, Јеһованын һәмин халг үзәриндә исраиллиләрә гәләбә газандыраҹағынын рәмзи иди. Бу, падшаһы мүтләг үрәкләндирмәли иди. Сонра Елиша Јоаша әлиндәки охлары јерә вурмағы тапшырды. Јоаш буну ҹәми үч дәфә етди. Бу, Елишанын гәзәбинә сәбәб олду, чүнки охлары беш-алты дәфә јерә вурсајды, ‘Арамлылары [суријалылары] ахыра гәдәр гыраҹагды’. Амма инди Јоаш ҹәми үч дәфә, гисмән гәләбә чалаҹагды. О, сәј ҝөстәрмәдији үчүн там мүвәффәгијјәт газанмајаҹагды (2 Пад. 13:14—19). Биз бу һадисәдән нә өјрәнирик? Јеһова јалныз Она үрәкдән вә сәјлә хидмәт етдијимиз тәгдирдә бизә бол хејир-дуа верир.
12. а) Һәјатда чәтинликләрлә гаршылашмағымыза бахмајараг, Аллаһа хидмәтдә сәјимизи горумаға нә көмәк едәҹәк? б) Хидмәтдә фәал иштирак етмәк сәнә һансы хејир-дуалары ҝәтириб?
12 Һәјатда гаршылашдығымыз чәтинликләр Аллаһа хидмәтдәки сәјимизи вә сәдагәтимизи сынаға чәкир. Бир чох баҹы вә гардашлар мадди чәтинликләрлә үзләширләр. Диҝәрләри исә ҹидди хәстәликләри уҹбатындан Јеһоваја истәдикләри гәдәр хидмәт едә билмәдикләриндән мәјуслуға гапылырлар. Анҹаг хидмәтдә сәјимизи горумаг вә там мәнада Мәсиһин ардынҹа ҝетмәк өз әлимиздәдир. «Мәсиһин ардынҹа ҝетмәкдә сәнә нә көмәк едәҹәк?» адлы чәрчивәдә ҝәтирилән ајә вә мәсләһәтләрә диггәт јетир. Онлары там шәкилдә неҹә тәтбиг едә биләҹәјинин үзәриндә дүшүн. Әҝәр белә етсән, һәгигәтән дә хејир-дуалар газанаҹагсан. Хидмәтдә фәал иштирак етмәк бизи мөһкәмләндирә, һәјатымызы зәнҝинләшдирә вә әсил гәлб раһатлығы вә хошбәхтлик ҝәтирә биләр (1 Кор. 15:58). Үстәлик, Аллаһа үрәкдән хидмәт етмәк бизә ‘Аллаһын Ҝүнүнүн зүһуруну сүрәтләндирмәјә’, јәни ону мөһкәм јадда сахламаға көмәк едәҹәк (2 Пет. 3:11).
Өз шәраитини виҹданла јохла
13. Үрәкдән хидмәт етмәјин шәхсән бизим үчүн нә демәк олдуғуну неҹә мүәјјән едә биләрик?
13 Лакин јадда сахламалыјыг ки, үрәкдән хидмәт етмәк хидмәтә аз вә ја чох вахт сәрф етмәк демәк дејил. Шәраитләр мүхтәлифдир. Сәһһәти хидмәтдә даһа чох етмәјә јол вермәдији үчүн ајда бир-ики саат тәблиғ едән инсан Јеһованы разы сала биләр. (Марк 12:41—44 ајәләри илә мүгајисә ет.) Аллаһа үрәкдән хидмәт етмәјин шәхсән бизим үчүн нә демәк олдуғуну мүәјјән етмәк үчүн исә биз габилијјәт вә шәраитимизи виҹданла нәзәрдән кечирмәлијик. Мәсиһин давамчылары кими, биз һәм дә дүшүнҹә тәрзимизи онун дүшүнҹә тәрзи илә ујғунлашдырмаг истәјирик. (Ромалылара 15:5 ајәсини оху; 1 Кор. 2:16.) Иса һәјатында биринҹи јерә нәји гојурду? О, Кефернаһумдан олан издиһам гаршысында демишди: «Аллаһ Сәлтәнәтинин мүждәсини Мән диҝәр шәһәрләрә дә јајмалыјам; чүнки Мән бунун үчүн ҝөндәрилмишәм» (Лука 4:43; Јәһ. 18:37). Исанын хидмәтдә неҹә сәј ҝөстәрдијини јадда сахлајараг, хидмәтини ҝенишләндирә билиб-билмәјәҹәјини мүәјјән етмәк үчүн өз вәзијјәтини ҝөтүр-гој ет (1 Кор. 11:1).
14. Хидмәтимизи ҝенишләндирмәјин үсулларындан бәзиләри һансылардыр?
14 Имканларымызы ҝөтүр-гој етдикдән сонра белә гәнаәтә ҝәлә биләрик ки, шәраитимиз хидмәтә даһа чох вахт сәрф етмәјә имкан верир (Мат. 9:37, 38). Мәсәлән, бу јахынларда мәктәби битирән минләрлә ҝәнҹләр хидмәтләрини ҝенишләндириб пионер хидмәтинә башламышлар вә бундан бөјүк севинҹ дујурлар. Сән дә бу севинҹи дадмаг истәрдинми? Бәзи баҹы-гардашлар шәраитләрини нәзәрдән кечирмиш вә гәрара ҝәлмишләр ки, Падшаһлығын тәблиғчиләринә даһа чох тәләбат олан башга әразијә, јахуд өлкәјә көчмәк имканлары вар. Диҝәрләри әҹнәбиләрә көмәк етмәк үчүн хариҹи дил өјрәнмишләр. Чәтин олмасына бахмајараг, хидмәти ҝенишләндирмәк бол хејир-дуалар ҝәтирир вә бир чох инсана ‘һәгигәти дәрк етмәјә’ көмәк едир (1 Тим. 2:3, 4; 2 Кор. 9:6).
Изләмәли олдуғумуз Мүгәддәс Китаб нүмунәләри
15, 16. Мәсиһин сәјли давамчылары олмаг үчүн кимләрин нүмунәсини тәглид едә биләрик?
15 Сонрадан Мәсиһин һәвариләри олан бәзиләри онун ардынҹа ҝетмәк дәвәтинә неҹә һај вердиләр? Матта һаггында Мүгәддәс Китабда дејилир: «О да һәр шеји атды, ајаға галхыб Онун ардынҹа ҝетди» (Лука 5:27, 28). Балыгчылыгла мәшғул олан Петер вә Андреј барәдә охујуруг: «Онлар да һәмин анда торлары атыб Онун ардынҹа ҝетдиләр». Сонра Иса аталары илә бирҝә торларыны тәмир едән Јагубла Јәһјаја раст ҝәлди. Бәс онлар Исанын дәвәтинә неҹә һај вердиләр? «Онлар дәрһал гајығы вә аталарыны гојуб Исанын далынҹа ҝетдиләр» (Мат. 4:18—22).
16 Диҝәр ҝөзәл нүмунә исә сонрадан һәвари Павел кими танынан Шаулдур. Башланғыҹда о, Мәсиһин давамчыларыны фанатикҹәсинә тәгиб етсә дә, сонрадан дәјишиб Мәсиһин адыны бәјан едән Аллаһын ‘сечдији аләт’ олду. «Шаул дәрһал синагогларда Иса һаггында тәблиғ етмәјә башлады. “О, Аллаһын Оғлудур”,— дејирди» (Һәв. иш. 9:3—22). Чохлу чәтинликләрлә вә тәгибләрлә гаршылашмасына бахмајараг, Павелин хидмәтдә ҝөстәрдији сәј һеч вахт зәифләмирди (2 Кор. 11:23—29; 12:15).
17. а) Сән Мәсиһи неҹә изләмәк истәјирсән? б) Бүтүн үрәкдән вә вар ҝүҹүмүзлә Јеһованын ирадәсини јеринә јетирсәк, һансы хејир-дуалары әлдә едәҹәјик?
17 Әлбәттә, биз һәмин шаҝирдләрин јахшы нүмунәсини тәглид етмәк вә Мәсиһин давамчысы олмаг дәвәтинә ҹанла-башла вә гејд-шәртсиз һај вермәк истәјирик (Ибр. 6:11, 12). Мәсиһи там шәкилдә вә сәјлә изләмәјә чалышмагла биз һансы хејир-дуалары алырыг? Јеһованын ирадәсини јеринә јетирмәкдән, еләҹә дә хидмәтдә вә јығынҹагда үзәримизә әлавә мәсулијјәтләр ҝөтүрмәкдән бөјүк севинҹ вә мәмнунлуг дујуруг. (Мәз. 40:8; 1 Салониклиләрә 4:1 ајәсини оху.) Бәли, вар ҝүҹүмүзлә Мәсиһи изләмәк бизә түкәнмәјән бол хејир-дуалар ҝәтирир: биз гәлб раһатлығы вә мәмнунлуг дујур, әбәди јашамаг үмиди әлдә едир вә Аллаһын рәғбәтини газанырыг (1 Тим. 4:10).
Јадыныздадырмы?
• Бизә һансы мәсулијјәтли иш һәвалә едилиб вә биз она неҹә јанашмалыјыг?
• Өзүмүзү һансы мејилдән ҝөзләмәлијик вә нәјә ҝөрә?
• Бизә нәји виҹданла нәзәрдән кечирмәк лазымдыр?
• Мәсиһи даим изләмәкдә бизә нә көмәк едәҹәк?
[27-ҹи сәһифәдәки чәрчивә]
Мәсиһин ардынҹа ҝетмәкдә сәнә нә көмәк едәҹәк?
▪ Аллаһын Кәламыны һәр ҝүн оху вә охудуғунун үзәриндә дүшүн (Мәз. 1:1—3; 1 Тим. 4:15).
▪ Дуада тез-тез Аллаһын руһунун көмәјини вә рәһбәрлијини дилә (Зәк. 4:6; Лука 11:9, 13).
▪ Хидмәтдә үрәкдән вә сәјлә иштирак едәнләрлә үнсијјәтдә ол (Сүл. мәс. 13:20; Ибр. 10:24, 25).
▪ Һансы зәманәдә јашадығымызы унутма (Ефес. 5:15, 16).
▪ Бәһанәләр ҝәтирмәјин аҹы нәтиҹәләри барәдә дүшүн (Лука 9:59—62).
▪ Аллаһа һәср олунаркән вердијин анд, о ҹүмләдән Јеһоваја хидмәт етмәјин вә сәмими-гәлбдән Мәсиһин ардынҹа ҝетмәјин ҝәтирдији бол хејир-дуаларын үзәриндә даима дүшүн (Мәз. 116:12—14; 133:3; Сүл. мәс. 10:22).