Јеһова сәнин «сағ-саламат» олмағыны истәјир

БӘШӘР тарихиндә ән тәһлүкәли һадисә баш верәндә Гадир Аллаһ Онун рәғбәтини газанан бүтүн инсанларын ‘гуртулушунун’ гајғысына галаҹаг (Јоел 2:32). Әслиндә, Јеһова һәмишә инсанлары зәрәрдән горумаг истәјиб. «Һәјат мәнбәји» Онда олдуғундан О, бүтүн инсанлары гијмәтли вә мүдафиә олунмаға лајиг һесаб едир (Мәз. 36:9).

Аллаһын гәдим хидмәтчиләри Онун һәјата бахышларына шәрик идиләр. Јарадылыш 33:18 ајәсинә әсасән, Јагуб аиләси илә бирликдә чох тәһлүкәли бир сәјаһәти «сағ-саламат» баша вурду. Јагуб Јеһованын мүдафиәсинә архаланырды, бунунла белә, јанындакы адамларын һамысыны горумаг үчүн практики аддымлар атды (Јар. 32:7, 8; 33:14, 15). Мүгәддәс Китаб принсипләрини тәтбиг етмәклә сән һәм өзүнүн, һәм дә башгаларынын тәһлүкәсизлијини даһа јахшы тәмин едә биләҹәксән. Ҝәлин ҝөрәк, буну Падшаһлыг Залларынын тикинтисиндә иштирак едәнләрә вә бу кими диҝәр ишләрлә мәшғул оланлара, еләҹә дә бәдбәхтлик заманы көмәклик ҝөстәрәнләрә неҹә тәтбиг етмәк олар.

Мусанын Гануну вә тәһлүкәсизлик

Мусанын Гануну исраиллиләрдән тәһлүкәсизлик гајдаларына риајәт етмәји тәләб едирди. Мәсәлән, ев тикән исраилли евинин дамынын кәнарларына алчаг һасар вә ја сүраһи чәкмәли иди. Инсанлар јасты дамлара тез-тез галхыб-дүшдүкләри үчүн сүраһи онлары јыхылмагдан горујурду (1 Сам. 9:26; Мат. 24:17). Әҝәр ев саһибинин бу гануна етинасызлыг ҝөстәрмәси уҹбатындан бәдбәхт һадисә баш верирдисә, Јеһова ону мәсулијјәтә ҹәлб едирди (Ганун. т. 22:8).

Ганунун тәһлүкәсизлик һагда тәләби ев һејванларынын вурдуғу зәрәрә дә тәтбиг едилирди. Әҝәр һејван инсаны вурардыса, онун саһиби башгаларынын тәһлүкәсизлијини тәмин етмәк үчүн ону өлдүрмәли иди. Һәмин һејванын әтини јемәјә вә ја сатмаға иҹазә верилмәдијиндән бу, онун үчүн бөјүк итки иди. Амма зәнн едәк ки, һејван инсана хәтәр јетирдикдән сонра саһиби ону нәзарәт алтында сахламыр. Бәс сонра? Әҝәр һәмин һејван бундан сонра кимисә өлдүрсәјди, һәм һејван, һәм дә саһиби өлдүрүлмәли иди. Бу ганун мал-гарасына сәһләнкарлыг ҝөстәрән һәр кәси һәрәкәтләринин нәтиҹәси барәдә дүшүнмәјә вадар едирди (Чых. 21:28, 29).

Ганун һәм дә исраиллиләри аләтләрдән дүзҝүн истифадә етмәјә тәшвиг едирди. Мәсәлән, бир чох исраиллиләр балта илә одун доғрајырдылар. Әҝәр балтанын дәмири сапындан чыхыб тәсадүфән одунчунун јанындакы адама дәјиб ону өлдүрсәјди, о, сығынаҹаг шәһәрләриндән биринә гачмалы иди. О, бурада баш каһинин өлүмүнәдәк галмалы иди. Демәли, билмәдән киминсә өлүмүнә баис олан инсан узун илләр аиләсинин вә евинин үзүнә һәсрәт гала биләрди. Бу гурулуш исраиллиләрә Јеһованын ҝөзүндә һәјатын мүгәддәс олдуғуну өјрәдирди. Һәјата даир Аллаһын нөгтеји-нәзәринә шәрик олан инсан аләтләрини јахшы вәзијјәтдә сахлајыр вә иш ҝөрәркән онларла еһтијатлы давранырды (Сај. 35:25; Ганун. т. 19:4—6).

Јеһова бу ганунлары вермәклә ајдын ҝөстәрди ки, О, халгынын һәм евдә, һәм дә чөлдә тәһлүкәсизлик гајдаларына риајәт етмәсини истәјир. Тәсадүфән дә олса, кимисә өлдүрән вә ја кимәсә хәсарәт јетирән адам Онун гаршысында ҹаваб вермәли иди. Јеһованын тәһлүкәсизлијә даир нөгтеји-нәзәри дәјишмәјиб (Мал. 3:6). О, бу ҝүн дә истәјир ки, инсанлар өзләринә вә башгаларына хәтәр јетирмәсинләр. Тәһлүкәсизлик гајдаларына хүсусилә дә һәгиги ибадәтдә истифадә олунан биналарын тикинтиси вә хидмәти заманы риајәт етмәк ваҹибдир.

Тикинтидә тәһлүкәсизлик

Падшаһлыг вә Конгрес Залларынын, һәмчинин филиалларын тикинтисиндә иштирак етмәји вә онлара хидмәт ҝөстәрмәји өзүмүзә шәрәф билирик. Ејни шеји тәбии фәлакәтләр баш верән заман иҹра етдијимиз иш һаггында да демәк олар. Биз һәр заман өз ишимизи мәһарәтлә јеринә јетирмәк истәјирик, чүнки ән хырда ишдә белә сәриштәсизлик бизә вә башгаларына хәсарәт јетирә биләр (Ваиз 10:9). Һәгигәтән дә, әҝәр ишләјәркән тәһлүкәсизлик гајдаларына әмәл етмәк вәрдишимиз оларса, зәрәрдән гачына биләрик.

Мүгәддәс Китабда дејилир: «Ҝәнҹләри гүввәти шәрәфләндирәр, ағ сачлар гоҹалара зинәт верәр» (Сүл. мәс. 20:29). Ағыр иш ҝөрмәк үчүн голу гүввәтли ҝәнҹләр ҝәрәкдир. Сачларына дән дүшән, тикинти ишиндә бөјүк тәҹрүбәси олан ишчиләр исә сон тамамлама ишләрини ҝөрүрләр. Анҹаг онлар да вахтилә ҝәнҹ оланда ағыр ишләр ҝөрмүшләр. Әҝәр сән көнүллүләрин сырасына тәзәҹә дахил олмусанса, сәриштәли ишчиләрин ишләмәк тәрзинә фикир вер вә онларын ҝөстәришләринә әмәл ет. Әҝәр өјрәнмәк истәјин варса, тикинти ишиндә тәҹрүбәси олан гардашлар сәнә чох шеј өјрәдә биләрләр. Бураја тәһлүкәли маддәләрдән тәһлүкәсиз истифадә гајдалары вә ағыр јүкләрин галдырылмасы дахилдир. Онда сәнин ишин сәмәрәли вә тәһлүкәсиз олаҹаг вә сәнә севинҹ ҝәтирәҹәк.

Тикинтидә ишләјәнләр һәмишә еһтијатлы олмалыдырлар. Шәраит бир ҝөз гырпымында дәјишә биләр. Дүмдүз јердә инди гују ола биләр. Бригададан кимсә нәрдиванын, көрпүнүн (ајагалты тахта) вә ја боја гутусунун јерини дәјишә биләр. Фикрин јајынса, асанлыгла хәсарәт ала биләрсән. Тәһлүкәсизлик гајдаларына ҝөрә, тикинти мејданчасында ишләјәнләрдән фәрди мүһафизә васитәләриндән истифадә етмәк тәләб олунур. Горујуҹу ејнәк, каска вә мүнасиб ајаггабылар сәни тикинти мејданчасында бир чох тәһлүкәләрдән горуја биләр. Амма бунун үчүн онлары јахшы вәзијјәтдә сахламаг вә истифадә етмәк лазымдыр.

Бир чох аләтләрдән истифадә етмәк асан ҝөрүнсә дә, онлардан мәһарәтлә вә тәһлүкәсиз шәкилдә истифадә етмәк үчүн тәлим вә тәҹрүбә тәләб олунур. Әҝәр ишиндә лазым олан аләтдән истифадә етмәк тәҹрүбән јохдурса, бу һагда ишә нәзарәт едән гардаша хәбәр вер. О гајғы ҝөстәрәҹәк ки, сән лазыми тәлим кечәсән. Бу һалда тәвазөкарлыг, јәни өз имканларынын мәһдуд олдуғуну дәрк етмәк чох ваҹибдир. Әслиндә, бу тәләб олунур ки, тикинтидә нә сән, нә дә башгалары хәсарәт алсын (Сүл. мәс. 11:2).

Тикинтидә инсанларын хәсарәт алмаларынын әсас сәбәбләриндән бири јыхылмагдыр. Нәрдивана галхмаздан вә ја тахтабәндә ајағыны гојмаздан өнҹә әмин ол ки, о, там тәһлүкәсиз вә јахшы вәзијјәтдәдир. Тахтабәнддә вә ја дамда иш ҝөрәнләрдән тәләб олуна биләр ки, хиласедиҹи кәмәрдән истифадә етсинләр вә ја орада сүраһи олсун. Һүндүрлүкдә ишләмәјә даир суалларын варса, нәзарәтчинә мүраҹиәт етa.

Бүтүн дүнјада Јеһованын хидмәтчиләринин сајы артдыгҹа һәгиги ибадәтин ирәлиләмәсиндә бөјүк ролу олан Падшаһлыг Залларына вә диҝәр тикилиләрә дә тәләбат артыр. Падшаһлыг Залынын тикинтисинә вә бу кими башга лајиһәләрә нәзарәт едәнләр онларын рәһбәрлији алтында чалышан Јеһованын дәјәрли хидмәтчиләрини тәһлүкәләрдән горумаг мәсулијјәти дашыјырлар (Јешаја 32:1, 2). Әҝәр сәнә тикинтидә баҹы-гардашлара нәзарәт етмәк һәвалә олунубса, тәһлүкәсизлик гајдаларынын ваҹиблијини һеч вахт јаддан чыхарма. Әмин ол ки, тикинти мејданчасы тәмиздир вә әл-ајаға долашан һеч нә јохдур. Лазым ҝәләндә хејирхаһҹасына, анҹаг гәти шәкилдә тәһлүкәсизлик гајдаларыны хатырлат. Ҝәнҹ вә тәҹрүбәсиз ишчиләрин һәддән артыг тәһлүкәли әразиләрә дахил олмаларына иҹазә вермә. Бригаданын үзләшә биләҹәји тәһлүкәләри габагҹадан ҝөрмәјә чалыш вә онларын тәһлүкәсиз ишләмәји өјрәнмәләринин гајғысына гал. Унутма ки, бизим мәгсәдимиз иши хәсарәтсиз баша чатдырмагдыр!

Мәһәббәтин ролу

Һәгиги ибадәтдә истифадә олунан Падшаһлыг Залларынын вә диҝәр тикилиләрин иншаасы мүәјјән тәһлүкәләрлә бағлыдыр. Буна ҝөрә дә бу кими лајиһәләрдә иштирак едәнләр еһтијатлы олмалыдырлар. Мүгәддәс Китаб принсипләринә вә ишлә бағлы гајдалара риајәт етмәклә вә сағламдүшүнҹәлилик тәзаһүр етдирмәклә сән һәм өзүнү, һәм дә сәнинлә чијин-чијинә чалышанлары хәсарәтләрдән горујаҹагсан.

Бизи тәһлүкәсизлијә бу гәдәр дәгиг риајәт етмәјә тәшвиг едән әсас сәбәб нәдир? Мәһәббәт. Бәли, Јеһованы севдијимиз үчүн биз дә инсан һәјатына гијмәт гојуруг. Үстәлик, инсанлара мәһәббәт һәр һансы иши онларын хәсарәт алмасына сәбәб олаҹаг тәрздә, јәни башдансовду ҝөрмәкдән чәкиндирәҹәк (Мат. 22:37—39). Буна ҝөрә дә ҝәлин иштирак етдијимиз тикинти лајиһәсини «сағ-саламат» баша чатдырмаг үчүн әлимиздән ҝәләни едәк.

[Һашијә]

[30-ҹу сәһифәдәки чәрчивә]

Нәрдивандан тәһлүкәсиз истифадә гајдалары

Сон ил әрзиндә АБШ-да 160 000-дән чох ишчи нәрдивандан јыхылараг мүхтәлиф хәсарәтләр алмышдыр. Үстәлик, бунун нәтиҹәсиндә тәхминән 150 нәфәр һәјатыны итирмишдир. Һарада јашамағындан вә ја ишләмәјиндән асылы олмајараг, нөвбәти гајдалара әмәл етмәјин сајәсиндә сән бу кими һаллардан гачынаҹагсан.

◇ Лахлајан, јахуд сыныг нәрдивандан истифадә етмәк вә ја ону јенидән тәмир етмәк лазым дејил. Әксинә, сындырыб тулламаг лазымдыр.

◇ Һәр бир нәрдиван мүәјјән чәки үчүн нәзәрдә тутулуб. Нәрдивана дырмашанда әмин ол ки, сәнин чәкинлә аләтләрин вә материалларын чәкиси бирликдә бу һәдди ашмыр.

◇ Нәрдиваны дүз вә мөһкәм сәтһ үзәриндә гурашдыр. Ону һеч вахт тахтабәнд, јешик вә ја гуту кими мөһкәм олмајан шејләрин үстүнә гојма.

◇ Галхыб-дүшәндә үзүн һәмишә нәрдивана тәрәф олсун.

◇ Һеч бир нәрдиванын јухарыдакы сон ики пилләсинин үстүндә отурмаг вә ја дајанмаг олмаз.

◇ Нәрдиванын һүндүрлүјү галхмаг истәдијин јердән ән азы 1 метр һүндүр олмалыдыр. Нәрдиванын ајаглары сүрүшмәсин дејә ону бир јерә бәркит вә ја габағына бир тахта парчасы вур. Әҝәр буну етмәк мүмкүн дејилсә, кимдәнсә хаһиш ет ки, иш ҝөрдүјүн мүддәтдә нәрдиваны тутсун. Нәрдиванын о јана-бу јана тәрпәнмәмәси үчүн јухарыдан ону һараса бәркит.

◇ Нәрдиванын пилләләринә тахта дајајыб үстүнә чыхма.

◇ Нәрдиванын башында ишләјәркән әлчатмајан јерләрә әлини вә ја ајағыны узатма, әкс тәгдирдә, нәрдиван аша биләр. Бу кими тәһлүкәли һәрәкәтләрдән гачын. Лазым ҝәлдикдә нәрдиванын јерини дәјиш.

◇ Әҝәр сән гапы архасына нәрдиван гојуб ишләмәли олурсанса, онда гапыдан ишарә ас вә ону ачарла бағла. Әҝәр гапыны бағламаг мүмкүн дејилсә, кимдәнсә хаһиш ет ки, гапынын ағзында дајаныб ҝәлиб-ҝедәнләри хәбәрдар етсин.

◇ Әҝәр нәрдиван јалныз бир нәфәр үчүн нәзәрдә тутулубса, икинҹи адам ора галха билмәзb.

[Һашијә]

[29-ҹу сәһифәдәки шәкил]

Мусанын Ганунуна ҝөрә, дамын гырағына сүраһи чәкмәк тәләб олунурду