Јеһованын сәнин пајын олмасына јол верирсән?
«Падшаһлығы вә Аллаһын салеһлијини һәјатынызда һәмишә биринҹи јерә гојун, онда бүтүн бунлар да сизә вериләҹәк» (МАТ. 6:33).
1, 2. а) Галатијалылар 6:16 ајәсиндәки Аллаһын Исраили ифадәси кимләрә аиддир? б) Матта 19:28 ајәсиндәки «Исраилин он ики гәбиләси» кими тәмсил едир?
МҮГӘДДӘС КИТАБДА Исраил адына раст ҝәләндә илк олараг јадына нә дүшүр? Јәгин, сән Исһагын оғлу Јагуба верилән Исраил адыны, јахуд онун нәсли олан гәдим Исраил халгыны хатырлајырсан. Мүгәддәс Китабда һәмчинин руһани Исраил, јәни «Аллаһын Исраили» барәдә дә данышылыр. Исраил сөзү мәҹази мәнада истифадә едилдикдә ҝөјдә падшаһ вә каһинләр кими хидмәт едәҹәк мүгәддәс руһла мәсһ олунмуш 144 000 нәфәрә аиддир (Галат. 6:16; Вәһј 7:4; 21:12). Амма Матта 19:28 ајәсиндә Исраилин 12 гәбиләси ифадәси башга мәна дашыјыр. Ҝәлин ҝөрәк сөһбәт нәдән ҝедир.
2 Иса демишди: «Јени дөвр ҝәләндә вә инсан Оғлу өз шанлы тахтына отуранда, мәним ардымҹа ҝәлән сизләр дә он ики тахтда отуруб Исраилин он ики гәбиләси үзәриндә һакимлик едәҹәксиниз». Бу ајәдә истифадә олунан «Исраилин он ики гәбиләси» ифадәси алтында Исанын мәсһ олунмуш шаҝирдләринин идарә едәҹәји вә јер үзүндә бәрпа олунмуш Ҹәннәтдә әбәди һәјата говушаҹаг инсанлар нәзәрдә тутулур. Онлар каһин кими фәалијјәт ҝөстәрәҹәк 144 000 мәсһ олунмушун хидмәтиндән јарарланаҹаглар.
3, 4. Мәсһ олунмушлар башга мәсиһчиләр үчүн һансы нүмунәни гојурлар?
3 Гәдимдә јашамыш каһинләр вә левилиләр кими, бу мәсһ олунмуш мәсиһчиләр иҹра етдикләри хидмәти өзләринә шәрәф билирләр (Сај. 18:20). Мәсһ олунмуш мәсиһчиләр јер үзүндә мүлк вә ја торпаг саһәси алаҹагларыны ҝөзләмирләр. Әксинә, онлар бөјүк сәбирсизликлә ҝөјдә Иса Мәсиһлә бирликдә падшаһ вә каһин кими хидмәт едәҹәкләри вахты ҝөзләјирләр. Вәһј 4:10, 11 ајәләриндә ҝөстәрилдији кими, онлар бу тәјинатла Јеһоваја ҝөјдә хидмәти давам етдирәҹәкләр (Јез. 44:28).
4 Јер үзүндә јашајаркән мәсһ олунмуш мәсиһчиләр онларын пајынын Јеһова олдуғуну өз һәјат тәрзләри илә ҝөстәрирләр. Аллаһ гаршысында иҹра етдикләри шәрәфли хидмәт онлар үчүн һәр шејдән ваҹибдир. Мәсһ олунмуш мәсиһчиләр Мәсиһин фидјә гурбанлығына иман ҝәтирир вә даима онун ардынҹа ҝедирләр, белә етмәклә онлар алдыглары дәвәтә вә Аллаһ тәрәфиндән сечилдикләринә лајиг шәкилдә јашајырлар (2 Пет. 1:10). Онларын габилијјәт вә шәраитләри бир-бириндән фәрглидир. Бунунла белә, онлар имканларынын мәһдуд олдуғуну бәһанә етмәклә Аллаһа аз хидмәт етмәјә чалышмырлар. Әксинә, онлар әлләриндән ҝәләни етмәклә Аллаһа хидмәти һәјатларында биринҹи јерә гојурлар. Бунунла да мәсһ олунмушлар јер үзүндә әбәди јашамаг үмидинә малик оланлар үчүн ҝөзәл нүмунә верирләр.
5. Јеһова онларын пајы олсун дејә бүтүн мәсиһчиләр нә етмәлидирләр вә нәјә ҝөрә бу, бәзән чәтин ола биләр?
5 Ҝөј вә ја јерүзү үмидинә малик олмағымыздан асылы олмајараг, биз өзүмүзү инкар етмәли, ишҝәнҹә дирәјимизи ҝөтүрүб даима Мәсиһин ардынҹа ҝетмәлијик (Мат. 16:24). Ҹәннәт һәјатыны һәсрәтлә ҝөзләјән милјонларла инсанлар мәһз бу ҹүр Аллаһа хидмәт едәрәк Мәсиһин ардынҹа ҝедирләр. Имканлары Аллаһа даһа чох хидмәт етмәјә јол вердији тәгдирдә, онлар аз хидмәт етмәклә кифајәтләнмирләр. Чохлары көнүллү олараг һәјатларыны садәләшдириб пионер олмушлар. Диҝәрләринин шәраити јалныз илдә бир нечә ај пионер олмаға имкан верир. Башгалары исә пионер кими хидмәт едә билмәсәләр дә, хидмәтдә әлләриндән ҝәләни әсирҝәмирләр. Бу инсанлары Исанын башына әтирли јағ төкән садиг Мәрјәмлә мүгајисә етмәк олар. О, буну етдикдән сонра Иса деди: «О, мәнә јахшылыг етди... Бу гадын ҝүҹү чатаны етди» (Марк 14:6—8). Биз Шејтанын һеҝемонлуг етдији дүнјада јашадығымыз үчүн бәзән шәраитимизин јол вердији гәдәр Аллаһа хидмәт етмәк асан олмаја биләр. Буна бахмајараг, биз сәјлә чалышыр вә үмидимизи Јеһоваја бағлајырыг. Ҝәлин дөрд конкрет вәзијјәти нәзәрдән кечирәк вә ҝөрәк буну неҹә етмәк олар.
Аллаһын Падшаһлығыны һәјатында һәмишә биринҹи јерә гој
6. а) Чохлары бу һәјатын онларын нәсиби олдуғуну неҹә ҝөстәрирләр? б) Нәјә ҝөрә Давудун нүмунәсини изләмәк даһа јахшыдыр?
6 Иса өз шаҝирдләрини Аллаһын Падшаһлығыны вә онун салеһлијини һәјатларында һәмишә биринҹи јерә гојмағы өјрәдирди. Бу дүнјанын инсанлары илк өнҹә өз мараглары барәдә фикирләширләр, чүнки онлар «бу дүнјадан пај [алырлар]». (Мәзмур 17:1, 13—15 ајәләрини охуa.) Чохлары онлары јарадан Аллаһа гаршы сајмазјана мүнасибәт ҝөстәрәрәк өзләрини раһат һәјат гурмаға, евләниб өвлад бөјүтмәјә вә өзләриндән сонра ушагларына мирас гојмаг үчүн вар-дөвләт топламаға һәср едирләр. Онларын нәсиби јалныз бу һәјатдыр. Белә инсанлардан фәргли олараг, Давуд Аллаһ гаршысында «јахшы ад» газанмаға ҹан атырды. Онун оғлу Сүлејман да бүтүн инсанлара белә јашамағы мәсләһәт ҝөрүрдү (Ваиз 7:1). Асәф кими, Давуд үчүн дә Јеһова илә достлуг мүнасибәтләри өз мәнфәәтини ҝүдмәкдән даһа јахшы иди. О, Аллаһла бирҝә јеримәкдән севинҹ дујурду. Бизим ҝүнләрдә бир чох мәсиһчиләр руһани мәшғулијјәтләри биринҹи јерә гојараг онлары дүнјәви ишләриндән үстүн тутулар.
7. Бир гардаш Аллаһын Падшаһлығыны биринҹи јерә гојдуғу үчүн Јеһова ону неҹә хејир-дуаландырды?
7 Мәркәзи Африка Республикасында јашајан вә јығынҹагда ағсаггал кими хидмәт едән Жан-Клод адында бир гардашын нүмунәсинә нәзәр салаг. Бу гардаш евлидир вә онун үч ушағы вар. Онларын јашадығы өлкәдә иш тапмаг мүшкүл мәсәләдир вә әксәр инсанлар иш јерләрини итирмәмәк үчүн һәр шејләриндән кечмәјә һазырдырлар. Бир ҝүн истеһсал шөбәсинин мүдири Жан-Клода билдирди ки, бундан сонра о, саат 18:30-дан башлајараг һәфтәнин једди ҝүнү ҝеҹә нөвбәсиндә ишләмәли олаҹаг. Жан-Клод мүдирә изаһ етди ки, о, јалныз аиләсинин мадди јох, руһани тәләбатларынын да гајғысына галмалыдыр. Гардаш јығынҹагда мәсулијјәтләринин олдуғуну да сөјләди. Мүдир ҹаваб верди: «Бәхтин ҝәтириб ки, иш тапмысан. Мәсләһәтим будур ки, галан һәр шеји — арвад-ушагларыны, проблемләрини унудасан. Сән өз һәјатыны јалныз вә јалныз ишә һәср етмәлисән. Сечим сәниндир: ја ишин, ја да динин». Бу гардашын јериндә олсајдын, нә едәрдин? Жан-Клод дәрк едирди ки, ишини итирсә дә, Аллаһ ону тәрк етмәјәҹәк. О, Јеһоваја хидмәт едә биләҹәк, Јеһова исә бунун мүгабилиндә аиләсинин мадди тәләбатларынын гајғысына галмагда она көмәк едәҹәк. Белә бир әминликлә о, һәфтәарасы кечирилән јығынҹаг ҝөрүшүнә ҝетди. Сонра ишдән говулуб-говулмадығыны дәгиг билмәјәрәк ишә ҝетмәјә һазырлашырды ки, она зәнҝ ҝәлди. Һәмин мүдир ишдән чыхарылмыш, гардашымыз исә өз ишиндә галмышды.
8, 9. Каһин вә левилиләрдән нүмунә ҝөтүрәрәк Јеһованын бизим пајымыз олдуғуну неҹә ҝөстәрә биләрик?
8 Ишләрини итирмәк тәһлүкәси илә үзләшәнләри белә бир суал нараһат едә биләр: «Ишими итирсәм, аиләми неҹә доландыраҹағам?» (1 Тим. 5:8). Бәлкә, сән һеч вахт белә вәзијјәтлә үзләшмәмисән. Лакин буна бахмајараг, јәгин, шәхси тәҹрүбәндән ҝөрмүсән ки, Аллаһы өзләринә пај сечәнләрин вә Она хидмәт етмәк шәрәфини јүксәк гијмәтләндирәнләрин үмидләри һеч вахт боша чыхмыр. Иса шаҝирдләринә Аллаһын Падшаһлығыны «һәмишә биринҹи јерә» гојмағы дејәндә онлары әмин етди ки, галан шејләр, јәни јемәк, ичмәк вә палтар онлара «вериләҹәк» (Мат. 6:33).
9 Торпаг пајы алмајан левилиләри бир даһа јадымыза салаг. Онларын әсас вәзифәси һәгиги ибадәтин гајғысына галмаг иди. Буна ҝөрә дә онлар: «Сәнин пајын... Мәнәм», — дејән Јеһова Аллаһа ҝүвәнмәли идиләр вә шүбһә етмәмәли идиләр ки, О, онларын мадди тәләбатларыны өдәјәҹәк (Сај. 18:20). Биз левилиләр вә каһинләр кими мәбәддә хидмәт етмәсәк дә, Јеһованын бизим дә гајғымыза галаҹағына ејни әминлик тәзаһүр етдирмәклә онларын әһвал-руһијјәсини тәглид едә биләрик. Сүрәтлә өз сонуна јахынлашан бир дүнјада Аллаһын бизим гејдимизә галмаг гүввәсинә малик олдуғуна етибар етмәк ҝетдикҹә даһа зәрури олур (Вәһј 13:17).
Аллаһын салеһлијини һәјатында һәмишә биринҹи јерә гој
10, 11. Бәзиләри ишлә бағлы мәсәләдә Јеһоваја ҝүвәндикләрини неҹә ҝөстәрибләр? Нүмунә чәк.
10 Иса һәмчинин шаҝирдләрини Аллаһын салеһлијини һәјатларында һәмишә биринҹи јерә гојмаға чағырырды (Мат. 6:33). Бу, хејирлә шәрә даир инсанларын јох, Јеһованын нөгтеји-нәзәринә шәрик олмаг демәкдир. (Јешаја 55:8, 9 ајәләрини оху.) Бир чох инсанлар мәсиһчи олмаздан өнҹә сигарет чәкир вә ја түтүн мәһсуллары сатырдылар, диҝәрләри исә башгаларына һәрби тәлим кечирдиләр, еләҹә дә силаһ истеһсалы вә сатышы илә мәшғул олурдулар. Һәгигәт һаггында билијә јијәләндикдән сонра чохлары иш јерләрини дәјишмиш вә вәфтиз олмушлар (Јешаја 2:4; 2 Кор. 7:1; Галат. 5:14).
11 Белә инсанлардан бири дә Ендрју гардашдыр. О вә һәјат јолдашы Јеһова һаггында өјрәндикдән сонра гәти шәкилдә гәрара ҝәлдиләр ки, Она хидмәт етсинләр. О, өз ишини чох севмәсинә бахмајараг, ишдән чыхды. Нәјә ҝөрә? Сәбәб онун һәрбичи олмасы иди. Анҹаг гардаш Аллаһын салеһлијини биринҹи јерә гојмаг гәрарында гәти иди. Ендрју ишдән чыханда онун ики ушағы вар иди, үстәлик, онун һеч бир ҝәлир мәнбәји јох иди вә өзләрини доландырмаг үчүн ҹәми бир нечә ајлыг пуллары галмышды. Инсан нөгтеји-нәзәриндән онун һеч бир ирси олмадығы ҝөрүнә биләр. О, Јеһоваја ҝүвәнәрәк иш ахтармаға башлады. Өтән илләри хатырлајараг Ендрју вә аиләси тәсдигләјә биләрләр ки, Јеһованын әли гыса дејил (Јешаја 59:1). Садә һәјат сүрмәләри сајәсиндә Ендрју вә онун һәјат јолдашына һәтта таммүддәтли хидмәтчи олмаг шәрәфи дә нәсиб олмушду. Гардаш дејир: «Бәзән мадди чәтинликләр, ев, сәһһәт вә јашымызын артмасы илә әлагәдар нараһатчылыгларымыз олуб. Лакин буна бахмајараг, Јеһова һәмишә бизим јанымызда иди... Биз там әминликлә дејә биләрик ки, Јеһоваја хидмәт инсан үчүн ән шәрәфли вә ән мүкафатландырыҹы ишдир»b (Ваиз 12:13).
12. Аллаһын нормаларыны үстүн тутмаг үчүн бизә һансы хүсусијјәт ҝәрәкдир? Јерли баҹы-гардашлардан нүмунәләр чәк.
12 Иса шаҝирдләринә демишди: «Әмин олун ки, иманыныз хардал тохуму бојда олса, бу даға: “Бурадан о тәрәфә чәкил”, — дејәҹәксиниз, о да чәкиләҹәк. Сизин үчүн гејри-мүмкүн шеј олмајаҹаг» (Мат. 17:20). Чәтин олса белә, Аллаһын нормаларыны үстүн тута биләҹәксәнми? Әҝәр әмин дејилсәнсә, јығынҹағын диҝәр үзвләри илә дә сөһбәт ет. Шүбһә јохдур ки, башгаларынын нүмунәсини ешитмәк сәни руһани ҹәһәтдән тәравәтләндирәҹәк.
Јеһованын руһани әнамларыны гијмәтләндир
13. Әҝәр биз Јеһоваја ҹанла-башла хидмәт едириксә, руһани тәләбатларымызла әлагәдар нәјә әмин ола биләрик?
13 Әҝәр Јеһоваја хидмәт етмәк шәрәфини гијмәтләндирирсәнсә, әмин ол ки, О, левилиләрин гајғысына галдығы кими, сәнин дә мадди вә руһани тәләбатларыны тәмин едәҹәк. Давуд барәдә фикирләш. О, мағарада ҝизләнмәли олса да, шүбһә етмирди ки, Јеһова онун еһтијаҹларыны өдәјәҹәк. Бизим дә вәзијјәтимиз чыхылмаз ҝөрүнәндә Јеһоваја там ҝүвәнә биләрик. Мәзмурчу Асәф дә јалныз «Аллаһын мүгәддәс мәканына [ҝирәндән]» сонра ону нараһат едән суала ҹаваб тапмышды (Мәз. 73:17). Биз дә руһани гида мәнбәјимиз олан Јеһоваја үз тутмалыјыг. Онда вәзијјәтимиздән асылы олмајараг, Аллаһа хидмәт етмәк шәрәфини гијмәтләндирдијимизи, еләҹә дә Јеһованын бизим пајымыз олдуғуну ҝөстәрәҹәјик.
14, 15. Мүгәддәс Китаб ајәләринин баша дүшүлмәсиндә дәјишиклик едиләндә бизим буна мүнасибәтимиз неҹә олмалыдыр вә нәјә ҝөрә?
14 Бизи руһән маарифләндирән Јеһова Мүгәддәс Китабдакы «Аллаһын һикмәтинин дәринликләрини» ачыглајанда буна неҹә јанашырыг? (1 Кор. 2:10—13). Бир дәфә Иса динләјиҹиләринә: «Әҝәр инсан Оғлунун бәдәнини јемәсәниз вә ганыны ичмәсәниз, һәјата говушмајаҹагсыныз», — дејәндә Петерин буна неҹә мүнасибәт ҝөстәрмәси бизим үчүн бөјүк нүмунәдир. Исанын бу сөзләрини һәрфи мәнада баша дүшән шаҝирдләрдән бир чоху деди: «Бу нә данышыр?! Бу сөзләрә гулаг асмаг мүмкүн дејил!» Бундан сонра онлар «өз көһнә мәшғулијјәтләринә гајытды»лар. Лакин Петер деди: «Аға, кимин јанына ҝедәк? Әбәди һәјатын сөзләри сәндәдир» (Јәһ. 6:53, 60, 66, 68).
15 Петер Исанын сөзләринин мәнасыны там баша дүшмәсә дә, о, инанырды ки, Јеһова инсанлара һәгигәтләри чатдырмаг үчүн Исадан истифадә едир. Һансыса һәгигәтин баша дүшүлмәсиндә дәјишиклик едиләндә сән бунун сәбәбләрини анламаға чалышырсанмы? (Сүл. мәс. 4:18). Биринҹи әсрдә јашајан веријалылар «Аллаһын сөзүнү бөјүк һәвәслә гәбул етдиләр. Онлар ешитдикләринин доғру олуб-олмадығыны јохламаг үчүн Мүгәддәс Јазылары һәр ҝүн диггәтлә арашдырырдылар» (Һәв. иш. 17:11). Әҝәр онларын нүмунәсини изләсән, Аллаһа хидмәт етмәк шәрәфини даһа чох гијмәтләндирәҹәксән вә Јеһованын сәнин пајын олдуғуна ҝөрә Она үрәкдән миннәтдар олаҹагсан.
Јалныз «Ағамызын хидмәтчиси олсун»
16. Субај мәсиһчиләр, 1 Коринфлиләрә 7:39 ајәсинә әсасән, Аллаһын онларын пајы олдуғуну неҹә ҝөстәрә биләрләр?
16 Мәсиһчиләр башга бир саһәдә дә Аллаһын нијјәтини мөһкәм јадда сахламалыдырлар. Сөһбәт аилә гураркән Мүгәддәс Китабын «о адам Ағамызын хидмәтчиси олсун» ҝөстәришинә әмәл етмәкдән ҝедир (1 Кор. 7:39). Чохлары Аллаһын бу ҝөстәришинә һөрмәтсизлик ҝөстәрмәкдәнсә, субај галмаға үстүнлүк верибләр. Аллаһ хејирхаһҹасына белә инсанларын гејдинә галыр. Давуд өзүнү тәнһа вә чарәсиз һисс едәндә нә едирди? О дејир: «Һүзуруна шикајәтими төкүрәм, гаршысында әзијјәтими сөјләјирәм. Руһдан дүшәндә һансы јолда олдуғуму билдин» (Мәз. 142:1—3). Субај галараг онилликләр әрзиндә Аллаһа сәдагәтлә хидмәт едән Јеремја пејғәмбәрдә дә ејни һиссләр баш галдырмышды. Онун нүмунәси барәдә «Аллаһын Јеремја васитәсилә бизә чатдырдығы хәбәр» (рус.) китабынын 8-ҹи фәслиндә охуја биләрсән.
17. Бир субај баҹы вахташыры гәлбиндә баш галдыран тәнһалыг һиссинин өһдәсиндән неҹә ҝәлир?
17 АБШ-да јашајан бир баҹы дејир: «Мәним һеч вахт субај галмаг фикрим олмајыб. Үрәјимә јатан инсан олса, аилә гурарам. Иманыма шәрик олмајан анам исә кимә ҝәлди әрә ҝетмәјим үчүн дәридән-габыгдан чыхырды. Мән ондан сорушанда ки, ишдир, никаһым уғурсуз оларса, о, бунун мәсулијјәтини дашымаға һазырдыр? Бир гәдәр сонра сабит ишимин олдуғуну, өзүмә бахдығымы вә өзүмү хошбәхт һисс етдијими ҝөрәндә даһа мәнә тәзјиг ҝөстәрмәјә чалышмырды». Бәзән бу баҹы өзүнү тәнһа һисс едир. О, сөзүнә давам едир: «Мән Јеһоваја ҝүвәнмәјә чалышырам. О, һеч вахт мәни тәрк етмир». Бу баҹыја Јеһоваја ҝүвәнмәјә нә көмәк едир? Баҹы дејир: «Дуа мәнә Аллаһын реал шәхсијјәт олдуғуну вә һеч вахт тәк олмадығымы һисс етмәјә көмәк едир. Уҹсуз-буҹагсыз Каинатын Саһиби мәни ешитдији һалда, мәҝәр өзүмү кәдәрли вә лазымсыз һисс едә биләрәм?» Вермәјин алмагдан даһа чох хошбәхтлик ҝәтирдијинә шүбһә етмәјән бу баҹы дејир: «Мән тәмәннасыз олараг башгаларына көмәк етмәјә чалышырам. Һансыса бир инсан үчүн нә едә биләҹәјим барәдә фикирләшәндә үрәјим фәрәһлә долур» (Һәв. иш. 20:35). Бәли, бу баҹы Јеһованы өзүнә пај сечиб вә Аллаһа хидмәт етмәк шәрәфи она бөјүк севинҹ ҝәтирир.
18. Һансы мәнада сән Јеһованын пајы ола биләрсән?
18 Вәзијјәтиндән асылы олмајараг, сән јол верә биләрсән ки, Аллаһ сәнин дә пајын олсун. Белә олан һалда сән дә Онун хошбәхт халгынын үзвү олаҹагсан (2 Кор. 6:16, 17). Онда сән, гәдимдә јашајан бир чох инсанлар кими, Јеһованын пајы олаҹагсан. (Ганунун тәкрары 32:9, 10 ајәләрини оху.) Бир чох халглар арасында исраиллиләр Аллаһын пајы олдуғу кими, О да сәни Өзүнә пај һесаб едәҹәк вә мәһәббәтлә сәнин гајғына галаҹаг (Мәз. 17:8).
[Һашијәләр]
a Мәзмур 17:1, 13—15 (ЈД): «Еј Јеһова, һагг ишими динлә, јалварышымы ешит, дуама гулаг ас, дилимдә һијлә јохдур... Галх, еј Јеһова, онларла үз-үзә дур, онларын гәддини әј, гылынҹынла ҹанымы писләрдән гуртар. Еј Јеһова, Өз әлинлә гуртар мәни, бу дүнјадан пај алан, гарынларыны наз-немәтлә долдурдуғун адамлардан, чохлу оғул-ушаг саһиби олан, јығдыгларыны өвладларына гојан адамлардан. Мән исә салеһлијимлә үзүнә бахаҹағам, ојананда ҹалалыны ҝөрүб шад олаҹағам».
b «Ојанын!» журналынын 2009-ҹу ил нојабр сајынын 12—14 сәһифәләринә (рус.) бах.
Неҹә ҹаваб верәрдиниз?
Јеһованын сәнин пајын олдуғуну неҹә ҝөстәрә биләрсән...
• Аллаһын Падшаһлығыны вә онун салеһлијини һәјатында биринҹи јерә гојмагла?
• Руһани гидаја ҝөрә миннәтдарлығыны ҝөстәрмәклә?
• Јалныз Аллаһа хидмәт едән инсанла аилә гурмаг ҝөстәришинә әмәл етмәклә?
[13-ҹү сәһифәдәки јазы]
Јеһоваја хидмәти һәјатымызда биринҹи јерә гојанда О, бизим пајымыз олур
[15-ҹи сәһифәдәки шәкил]
Јеремјанын нүмунәси чох руһландырыҹыдыр