«Мәним кими... адам неҹә тәблиғ едә биләр?»
Бүтүн дүнјада ҹидди хәстәликләрдән әзијјәт чәкмәләринә бахмајараг, тәблиғдә фәал олан баҹы-гардашларымызын ҝөзәл нүмунәләри вар. Ҝәлин Литванын пајтахты Вилнүсдә јашајан Далианын нүмунәсинә нәзәр салаг.
30-дан чох јашы олан баҹымыз Далиа доғуланда бејнинә ган сызмышды вә о, бу ҝүнәдәк онун фәсадларындан әзијјәт чәкир. Бу хәстәлик ону ифлиҹ едиб вә нитгиндә ҹидди гүсурлар јарадыб. Далианын данышығыны јалныз аилә үзвләри баша дүшүрләр. Далиа онун гајғысына галан анасы Галина илә јашајыр. Һәјаты әзаб-әзијјәтләрлә вә чәтинликләрлә долу олса да, Далиа мүсбәт әһвал-руһијјәсини горујур. Ахы бу, неҹә мүмкүндүр?
Галина данышыр: «1999-ҹу илдә јахын гоһумумуз Аполонија бизә гонаг ҝәлди. Биз фикир вердик ки, Јеһованын Шаһиди олан Аполонија Мүгәддәс Китабы чох ҝөзәл билир вә Далиа ону суал атәшинә тутду. Тезликлә Далиа илә Мүгәддәс Китабы өјрәнмәјә башладылар. Вахташыры мән дә онлара гошулурдум вә Далианын дедикләрини “тәрҹүмә едирдим”. Ҝөрәндә ки, өјрәндикләри гызыма, һәгигәтән дә, фајда ҝәтирир, хаһиш етдим ки, мәнә дә Мүгәддәс Китабы өјрәтсинләр».
Далиа Мүгәддәс Китаб һәгигәтини баша дүшмәјә башлајанда бир суал ҝетдикҹә ону нараһат едирди. Бир ҝүн о, Аполонијадан сорушду: «Мәним кими ифлиҹ олан адам неҹә тәблиғ едә биләр?» (Мат. 28:19, 20). Аполонија Далиаја тәсәлли верәрәк деди: «Горхма, Јеһова сәнә көмәк едәҹәк». Һәгигәтән дә, Јеһова она көмәк әлини узатды.
Далиа неҹә тәблиғ едир? Бир нечә үсулла. Мәсиһчи баҹылар она хош хәбәри мәктублар васитәсилә тәблиғ етмәјә көмәк едирләр. Әввәлҹә Далиа өз фикирләрини сөјләјир, сонра исә баҹылар онлары мәктубда гејд едирләр. Далиа һәмчинин мобил телефонла СМС ҝөндәрмәклә дә шаһидлик верир. Һава јахшы оланда исә јығынҹаг үзвләри онунла бирҝә паркларда вә күчәләрдә тәблиғә чыхырлар.
Далиа вә онун анасы руһән инкишаф етдиләр вә өзләрини Јеһоваја һәср едиб 2004-ҹү илин нојабрында вәфтиз олундулар. 2008-ҹи илин сентјабр ајында Вилнүсдә полјак дилиндә данышанлар үчүн груп тәшкил олунду. Бу групда тәблиғчиләрә тәләбат бөјүк олдуғундан Далиа анасы илә бирҝә ора кечди. Далиа дејир: «Бәзи ајларда хидмәтә чыхмајанда чох пис олурам. Лакин бу барәдә Јеһоваја дуа етдикдән сонра кимсә мәнә јахынлашыб хидмәтә јазылыр». Әзиз баҹымыз Далиа вәзијјәтинә неҹә јанашыр? О дејир: «Хәстәлик бәдәними ифлиҹ етсә дә, зеһними ифлиҹ етмәјиб. Мән чох хошбәхтәм ки, башгаларына Јеһова барәдә даныша билирәм!»