Кечмишимизин дәјәрли инҹиләрини горујуб сахлајаг

ЈЕҺОВАНЫН халгы чох зәнҝин руһани ирсә маликдир. Биз бу мөһтәшәм ирсимиз барәдә јалныз китабларымыздан, журналларымыздан јох, һәмчинин шәкилләрдән, мәктублардан, һәмиманлыларымыздан, еләҹә дә ибадәтимизлә, тәблиғ фәалијјәтимизлә вә тарихимизлә бағлы олан әшјалардан өјрәнә биләрик. Белә материаллары горујуб сахламағын вә кечмишимизин сәһифәләрини вәрәгләмәјин һансы әһәмијјәти вар? Мәсәлән, өвладлары «үмидләрини Аллаһа бағласынлар» дејә гәдим Исраилдә аилә башчылары онлара Јеһованын ганунлары вә һејрәтамиз ишләри барәдә данышмалы идиләр (Мәз. 78:1—7).

Архивдә мәлуматлар ахтармаг һәлә гәдим дөврләрдә Аллаһын нијјәтинин јеринә јетмәсиндә ваҹиб рол ојнајырды. Мисал үчүн, дүшмәнләр Јерусәлимдәки мәбәдин тикинтисини дајандырмаға чалышанда Мидијанын пајтахты Екбатанадакы дәфтәрханадан падшаһ Кирин бу тикинтијә иҹазә верән сәрәнҹамы тапылмышды (Езра 6:1—4, 12). Беләликлә, Аллаһын ирадәсинә ујғун олараг мәбәд бәрпа олунду. «Һәр шеји лап башдан дәгигликлә [арашдыран]» Лука да өз мүждәсини јазаркән архивдәки мәлуматлардан јарарланмышды (Лука 1:1—4).

Рәһбәрлик Шурасы теократик тарихимизлә дәриндән марагланыр. Руһани ирсимизин горунуб сахланылмасы, сәнәдләшдирилмәси вә ҝәләҹәк нәслә өтүрүлмәсинин ваҹиблији барәдә Рәһбәрлик Шурасынын бир үзвү демишди: «Һара ҝетдијимизи билмәк үчүн һарадан ҝәлдијимизи билмәлијик». Буна ҝөрә дә Бруклиндә (Нју-Јорк) јерләшән баш идарәдә Јазы комитәсинин нәздиндә «Јазы комитәсинин тарихи архиви» јарадылмышды.

«АИЛӘМИЗӘ» МӘХСУС ШӘКИЛЛӘР ВӘ ӘШЈАЛАР

Вахт кечдикҹә чох шејләр унудулур, буна ҝөрә дә әксәријјәтимиз: «Каш ки, аиләмизә мәхсус олан шејләри горујуб сахлајардым!» — дејә тәәссүфләнирик. Јазы комитәсинин тарихи архивиндә зәнҝин вә ҝетдикҹә артан мирасымызын горунуб сахланылмасы вә сәнәдләшдирилмәси үчүн ҝәрҝин иш ҝедир. Архивимиздә бөјүк сәјлә горунуб сахланылан шәкилләрә «аилә албомумузун» бир парчасы кими бахмаг олар. Һәмчинин архивимизин инҹиләри арасында илк нәшрләримиз, һәмиманлыларымызын һансыса һадисәләр барәдә шәхси гејдләри вә бизим үчүн дәјәрли олан әшјалар да вар. Бүтүн бунлар бизә теократик тарихимиз барәдә өјрәнмәјә вә руһани аиләмизин ҝәләҹәјинә әминликлә бахмаға көмәк едир.

Биз сизи «Архивимиздән» адлы јени рубрика васитәсилә бу архивдәки әшјалара «бахмаға» дәвәт едирик. Бу рубрика вахташыры олараг «Ҝөзәтчи гүлләси»нин тәлим нәшриндә дәрҹ олунаҹаг. Мәсәлән, журналымызын нөвбәти сајында бу рубрика алтында чыхаҹаг шәкилли мәгаләдә ашағыдакы суаллара ҹаваб тапаҹағыг: «“Сәјјар шәфәг” нәдир? Ондан кимләр, нә заман вә һансы мәгсәдлә истифадә едирдиләр?»

Хатирәләри ҹанландыран аилә албому кими, архив коллексијамыз да бизә өзүмүз вә руһани сәләфләримиз барәдә чох шеј дејир. Биз онларын иманы вә ҹәсарәти, мәһәббәтли сәмави Атамыза хидмәтдән дујдуглары севинҹ вә үзләшдији чәтинликләр, еләҹә дә Аллаһын онлара неҹә рәһбәрлик вердији вә халгына һәмишә дајаг олдуғу барәдә өјрәнирик (Ганун. т. 33:27). Биз әминик ки, Јеһова тәшкилатымызын тарихини горумаг сәјләримизә хејир-дуа верәҹәк вә нијјәтини һәјата кечирә биләк дејә бизи, еләҹә дә арамызда һөкм сүрән бирлији мөһкәмләндирәҹәк.

[31–ҹи сәһифәдәки шәкил/чәрчивә]

Ишин ҝедишаты барәдә

Әдәбијјатларымызы, DVD-ләри вә Мүгәддәс Китаба әсасланан диҝәр материаллары һазырлајаркән јазычылар, рәссамлар, тәдгигатчылар вә бу ишдә иштирак едән башга адамлар архивимиздәки мәнбәләрдән истифадә едирләр. Буна ҝөрә дә Јазы комитәсинин архивиндә чалышан әмәкдашлар филиаллардан, Бет-Ел шөбәләриндән, јығынҹаглардан, ајры-ајры адамлардан вә мүәссисәләрдән тарихи әһәмијјәти олан мүхтәлиф әшјалары әлдә етмәк вә онлары горујуб сахламаг үчүн бөјүк иш ҝөрүрләр. Ҝәлин онларын ишинә јахындан нәзәр салаг.

Әлдә едилмәси вә тәһлили. Архивимизин коллексијасына даима надир әшјалар дахил олур. Бу әшјаларын бир чоху узун мүддәт Јеһоваја сәдагәтлә хидмәт едән аиләләр тәрәфиндән ја һәдијјә олунур, ја да мүвәггәти истифадә үчүн архивимизә тәгдим едилир. Бу материал вә әшјалары тәһлил вә мүгајисә етмәјимизин сајәсиндә тәшкилатымызын тарихини вә о вахтлар јашајан һәмиманлыларымыз барәдә өјрәнирик.

Каталога салынмасы. Тарихи архивимиздә минләрлә әшјалар вар ки, онларын бәзиләринин јашы јүз илдән чохдур. Архивә дахил олан әшјалар мүхтәлиф формада, өлчүдә вә форматда олур. Ҝәләҹәкдә онлары тапмаг вә истифадә етмәк асан олсун дејә каталога салмаг лазымдыр.

Бәрпа олунмасы вә горунмасы. Көһнә китаблар вә әшјалар пешәкарҹасына бәрпа олунур вә горунур. Сәнәдләр, фотошәкилләр, гәзетләрдән кәсилмиш парчалар, кино/фотолентләр вә валлар (пластинкалар) рәгәмли дашыјыҹылара көчүрүлүр ки, онлар електрон форматда әлчатан олсун. Бунун сајәсиндә тарихи әһәмијјәтә малик олан сәнәдләрин вә әшјаларын орижиналларына зәрәр дәјмәсинин гаршысыны алмаг мүмкүндүр.

Сахланылмасы вә ахтарышы. Архив материалларынын иткисинин, еләҹә дә ишыг вә рүтубәтдән корланмасынын гаршысыны алмаг үчүн онлар мүәјјән гајда вә шәраитдә сахланылыр. Үстәлик, һәмин сәнәд вә әшјаларын мәлумат базасы јарадылыр ки, бу да кечмишимизлә бағлы инҹиләрин ахтарышыны вә тәдгигатыны хејли асанлашдырыр.

[32–ҹи сәһифәдәки шәкилләр]

1) «Јарадылыш фотодрамы»нын афишасы. 2) Нәшрләримизә абунә оланларын сијаһысы. 3) Сәсҝүҹләндириҹи апаратура илә тәҹһиз олунмуш машын. 4) «Ҝөзәтчи гүлләси» журналынын 1912-ҹи ил 15 апрел сајынын үз габығы. 5) Ҹ. Рутерфордун һәбсхана гејдијјат кағызы. 6) WBBR радиостансијасында истифадә олунан микрофон. 7) Фонограф. 8) Китаблары дашымаг үчүн чамадан. 9) Шәхси гејдләр. 10) Ҹ. Рутерфорда телеграм.