Буҝүнкү фәлакәтләрә ҹәсарәтлә синә ҝәр

«Аллаһ бизә сығынаҹагдыр, гүввәтдир, дар ҝүндә чох көмәк едир» (МӘЗ. 46:1).

ҸАВАБ ВЕРӘ БИЛӘРСӘН?

Бәдбәхт һадисәләрлә үзләшәндә руһдан дүшмәмәјә бизә нә көмәк едәҹәк?

Ҹәсарәтли олмағымыз үчүн һансы сәбәбләримиз вар?

Бәдбәхтликләрин өһдәсиндән ҝәлмәјимиз үчүн Јеһова бизә һансы үсулларла көмәк едир?

1, 2. Чохлары һансы бәдбәхтликләрлә үзләширләр, анҹаг Аллаһын хидмәтчиләри нә етмәк истәјирләр?

БИЗ чәтин зәманәдә јашајырыг. Тәбии фәлакәтләр дүнјаны өз ағушуна алыб. Зәлзәлә, сунами, дашгын, вулкан пүскүрмәси, торнадо, тајфун, шиддәтли фыртына вә мешә јанғынлары бәшәријјәтә бөјүк зијан вурур. Диҝәр тәрәфдән исә, аиләдәки чәтинликләр вә шәхси проблемләр инсанларын ҹанына горху салыр вә кәдәрә гәрг едир. Һәгигәтән дә, бу кими һадисәләр гәфилдән инсанларын башларынын үстүнү алыр! (Ваиз 9:12).

² Јашадығымыз зәманәнин чәтин олмасына бахмајараг, Аллаһын халгы Она севинҹлә хидмәт етмәјә давам едир. Бу систем өз сонуна јахынлашдыгҹа истәнилән проблемләрлә үзләшә биләрик. Һәр биримиз бу чәтинликләрә һазыр олмаг истәјирик. Руһдан дүшмәдән онларын өһдәсиндән неҹә ҝәлмәк олар? Бизә буҝүнкү фәлакәтләрә ҹәсарәтлә синә ҝәрмәјә нә көмәк едәҹәк?

ҺӘЈАТЛАРЫНЫ ҸӘСАРӘТЛӘ ЈАШАЈАНЛАРДАН НҮМУНӘ ҜӨТҮР

3. Ромалылара 15:4 ајәсинә әсасән, ҹидди проблемләрлә үзләшәндә бизә нә тәсәлли верә биләр?

³ Әввәлки дөврләрлә мүгајисәдә чәтин шәраитләр инди даһа чох инсана тәсир ҝөстәрсә дә, фәлакәтә сәбәб олан проблемләр бәшәријјәт үчүн јени дејил. Ҝәлин чәтин вәзијјәтләрә ҹәсарәтлә вә мүвәффәгијјәтлә синә ҝәрән Аллаһын кечмишдәки бәзи хидмәтчиләринин нүмунәсинә бахаг вә ҝөрәк онлардан нә өјрәнә биләрик (Ром. 15:4).

4. Давуд һансы бәдбәхтликләрә синә ҝәрмишди вә она нә көмәк етмишди?

⁴ Ҝөтүрәк Давуду. О, падшаһын гәзәбинә туш ҝәлирди, дүшмәнләрин һүҹумуна мәруз галырды, бир дәфә ишғалчылар онун ики арвадыны әсир апармышды, јахынлары она хәјанәт етмишди вә емосионал ҝәрҝинлик кечирирди. Лакин бу, онун чәкдији әзабларын һәлә һамысы дејилди (1 Шам. 18:8, 9; 30:1—5; 2 Шам. 17:1—3; 24:15, 17; Мәз. 38:4—8). Давуд барәдә Мүгәддәс Китабда гәләмә алынан һадисәләр бу бәдбәхтликләрин она нә дәрәҹәдә әзаб вердијини ајдын шәкилдә ҝөстәрир. Анҹаг бүтүн бунлар ону руһани ҹәһәтдән мәһв етмәди. Мөһкәм иманла о деди: «Рәбдир өмрүмүн галасы, мән кимдән ваһимәләним?» (Мәз. 27:1; Мәзмур 27:5, 10 ајәләрини оху).

5. Һәјатын чәтинликләринин өһдәсиндән ҝәлмәјә Ибраһим вә Сараја нә көмәк етмишди?

⁵ Ибраһим вә Сара өмүрләринин чох һиссәсини гәриб өлкәдә чадырларда јашајараг кечирмишдиләр. Һәјат онлар үчүн һәмишә асан олмајыб. Үстәлик, Ибраһимлә Сара аҹлыға вә әтрафдакы халгларын јаратдығы тәһлүкәләрә дә әзмлә таб ҝәтирирдиләр (Јар. 12:10; 14:14—16). Онлар нәјин сајәсиндә бу проблемләрин өһдәсиндән ҝәлә билдиләр? Аллаһын Кәламында дејилир ки, Ибраһим «мемары вә иншаатчысы Аллаһ олан, мөһкәм бүнөврә үзәриндә тикилмиш шәһәри ҝөзләјирди» (Ибр. 11:8—10). Ибраһим вә Сара диггәтләрини ҝәләҹәкдә Аллаһын јеринә јетәҹәк вәдләринә ҹәмләмишдиләр вә јол вермирдиләр ки, әтрафда баш верәнләр онлары руһдан салсын.

6. Биз Әјјубу неҹә тәглид едә биләрик?

⁶ Әјјуб шиддәтли сынаглара мәруз галмышды. Она елә ҝәлирди ки, һәјаты алт-үст олуб. Тәсәввүр едирсиниз, о, өзүнү неҹә һисс едирди?! (Әјј. 3:3, 11). Ән дәһшәтлиси исә о иди ки, Әјјуб башына ҝәлән бүтүн бәдбәхтликләрин сәбәбини билмирди. Анҹаг о тәслим олмады. О, Аллаһ гаршысында нөгсансызлығыны вә иманыны горуду. (Әјјуб 27:5 ајәсини оху.) Әјјуб бизим үчүн неҹә дә ҝөзәл нүмунәдир!

7. Павел Аллаһа хидмәти заманы нәләрлә үзләшмишди вә хидмәтини давам етдирмәк үчүн ҹәсарәти һарадан алмышды?

⁷ Инди исә ҝәлин һәвари Павелин нүмунәсинә бахаг. О, шәһәрдә, чөллүкдә, дәниздә тәһлүкәләрлә үзләшмишди. Павел дәфәләрлә јемәјә чөрәк тапмајыб аҹ-сусуз вә сојугда чылпаг галдығыны јазыр. О һәмчинин бир ҝүн бир ҝеҹә дәнизин ағушунда олдуғуну хатырлајыр вә еһтимал ки, о, уғрадығы ҝәми гәзаларындан бирини нәзәрдә тутурду (2 Кор. 11:23—27). Ҝөрүн бир дәфә өлүмлә үз-үзә ҝәләркән о, нә демишди: «Бу она ҝөрә баш верди ки, биз өзүмүзә јох, өлүләри дирилдән Аллаһа бел бағлајаг. О, бизи нә аз, нә чох, өлүмдән гуртарды вә бундан сонра да гуртараҹаг» (2 Кор. 1:8—10). Павелин башына ҝәлән бәлаларла үзләшән чох аз адам тапылар. Бунунла белә, чохларымыз онун һиссләрини баша дүшүрүк вә онун ҹәсарәт нүмунәси бизә тәсәлли верир.

ГОЈМА ПРОБЛЕМЛӘР ГӘДДИНИ ӘЈСИН

8. Буҝүнкү проблемләр бизә неҹә тәсир едә биләр? Нүмунә чәк.

⁸ Дүнјаны өз ағушуна алан тәбии фәлакәтләр, чәтинликләр вә тәзјигләр уҹбатындан чохлары руһ дүшкүнлүјүнә гапылырлар. Һәтта бәзи мәсиһчиләр дә бу ҹүр һиссләр олур. Әри илә бирҝә Австралијада таммүддәтли хидмәтдә иштирак едән Ланиa адлы баҹы дејир ки, она дөш хәрчәнҝи диагнозу гојуланда о сарсынты кечирди, санки, ону илдырым вурду. О дејир: «Мүалиҹәдән сонра јаман әлдән дүшдүм вә мәндә өзүмә гаршы һөрмәт һисси галмамышды». Һәлә бу, аз имиш кими, баҹы онурға сүтунундан әмәлијјат олунан әринә бахмалы иди. Әҝәр сән белә вәзијјәтдә олсајдын, нә едәрдин?

9, 10. а) Шејтанын бизә нә етмәсинә јол вермәмәлијик? б) Һәвариләрин ишләри 14:22 ајәсиндә јазылан ҝерчәкликлә биз неҹә гаршы-гаршыја дура биләрик?

⁹ Биз јадда сахламалыјыг ки, Шејтан үзләшдијимиз чәтинликләр васитәсилә иманымызы сарсытмаға чалышыр. Лакин биз она бу јолла севинҹимизи әлимиздән алмасына имкан вермәмәлијик. Сүлејманын мәсәлләри 24:10 ајәсиндә дејилир: «Дар ҝүндә тагәтдән дүшсән, неҹә дә зәиф адамсан!» Јухарыдакы абзасларда мүзакирә етдијимиз вә диҝәр Мүгәддәс Китаб нүмунәләри үзәриндә дүшүнмәк бизә фәлакәтләр гаршысында ҹәсарәтли олмаға көмәк едәҹәк.

¹⁰ Һәмчинин јахшы оларды ки, бүтүн проблемләри арадан галдырмаг игтидарында олмадығымызы да јадда сахлајаг. Демәк олар ки, онлар гачылмаздыр (2 Тим. 3:12). Һәвариләрин ишләри 14:22 ајәсиндә дејилир: «Биз чохлу әзаб-әзијјәтдән кечиб Аллаһын падшаһлығына ҝирмәлијик». Мәјус олмаг әвәзинә, нәјә ҝөрә бу чәтинликләрә Аллаһын бизә көмәк етмәк габилијјәтинә әсасланан имандан доған ҹәсарәт ҝөстәрмәк имканы кими бахмајаг?!

11. Бәдбәхтликләр уҹбатындан руһ дүшкүнлүјүнә гапылмамаг үчүн нә етмәлијик?

¹¹ Биз диггәтимизи мүсбәт шејләрә ҹәмләмәлијик. Аллаһын Кәламында дејилир: «Гәлбин севинҹи үзү хош едәр, үрәјин кәдәри көнлү сындырар» (Сүл. мәс. 15:13). Нечә вахтдыр ки, тибб саһәсиндә арашдырмалар едәнләр мүсбәт дүшүнҹә тәрзинин мүалиҹәви тәсирә малик олдуғуну гејд едирләр. Шәкәрдән һазырланмыш һәбләр (пласебо) верилән бир чох хәстәләр садәҹә вәзијјәтләринин јахшылашдығыны дүшүндүкләри үчүн онларын хәстәликләринин симптомлары зәифләјирди. Бу вәзијјәтин әкси олан «носебо еффекти» адландырылан вәзијјәтин дә тәсири нүмајиш етдирилмишди. Садәҹә олараг дәрманын онлара мәнфи тәсир ҝөстәрәҹәјини дедикләри үчүн хәстәләрин һалы писләширди. Дәјишә билмәјәҹәјимиз вәзијјәтләрин үзәриндә даима дүшүнсәк, әлимизә һеч нә кечән дејил, әксинә, даһа чох руһ дүшкүнлүјүнә гапылаҹағыг. Хошбәхтликдән, Јеһованын бизә ҝөстәрдији көмәк реалдыр, шәкәрдән һазырланмыш һәбләр кими дејил. Һәтта фәлакәт заманы Јеһова Кәламы васитәсилә бизи руһландырыр, баҹы-гардашлардан истифадә едәрәк дајаг олур вә мүгәддәс руһу илә мөһкәмләндирир. Диггәтимизи бунлара јөнәлтмәк бизи дирчәлдир. Пис һадисәләр барәдә дүшүнмәк әвәзинә, фикрини һәр бир проблемин өһдәсиндән неҹә ҝәләҹәјинә вә һәјатында баш верән мүсбәт һадисәләрә ҹәмлә (Сүл. мәс. 17:22).

12, 13. а) Аллаһын хидмәтчиләринә тәбии фәлакәтләр заманы дөзмәјә нә көмәк едир? Нүмунә чәк. б) Фәлакәтләр заманы һәјатымызда нәјин даһа ваҹиб олдуғу неҹә үзә чыха биләр?

¹² Бу јахынларда бәзи өлкәләрдә шиддәтли тәбии фәлакәтләр баш вермишди. Гејд етмәк лазымдыр ки, орада јашајан баҹы-гардашларымыз бөјүк дөзүм ҝөстәрмишләр. Лакин бу һеч дә асан дејилди. 2010-ҹу илин әввәлиндә Чилидә баш верән ҝүҹлү зәлзәлә вә сунами нәтиҹәсиндә бир чох гардашларымыз евләрини, әмлакларыны, бәзиләри исә иш јерләрини итирмишдиләр. Буна бахмајараг, онлар руһән фәал галмышдылар. Еви јерлә јексан олан Самуел дејир: «Һәтта белә чәтин вәзијјәтдә белә нә јолдашым, нә дә мән тәблиғдән вә јығынҹаглардан галмадыг. Әминәм ки, мәһз бунлар бизә ајагда галмағымыза көмәк етди». Бир чох башга һәмиманлыларымыз кими, онлар да тәбии фәлакәти архада гојуб Јеһоваја хидмәтдә ирәлиләмәјә давам етдиләр.

¹³ Филиппинин пајтахты Маниланын 80 фаиздән чох әразиси 2009-ҹу илин сентјабр ајында јаған арамсыз лејсан јағышлары нәтиҹәсиндә сујун алтында галмышды. Вар-дөвләтинин бөјүк гисмини итирән бир варлы киши демишди: «Дашгын һәм варлыларын, һәм дә касыбларын башларына бәла ачараг араларындакы сәрһәди арадан ҝөтүрдү». Бу, бизә Исанын вердији мүдрик мәсләһәти хатырладыр: «Хәзинәнизи ҝөјдә топлајын. Орада ону нә ҝүвә јејир, нә пас хараб едир, нә дә оғрулар ҝириб оғурлајыр» (Мат. 6:20). Мадди әшјалар бир ҝөз гырпымында јоха чыха биләр. Һәјатымызы онларын әтрафында гурмаг чох вахт мәјуслугла нәтиҹәләнир. Һәјатымызы әтрафда баш верән һадисәләрдән асылы олмајараг һеч вахт мәһв олмајан Јеһова илә мүнасибәтләр әсасында гурмаг неҹә дә мүдрик һәрәкәтдир! (Ибраниләрә 13:5, 6 ајәләрини оху.)

ҸӘСАРӘТЛИ ОЛМАҒЫМЫЗ ҮЧҮН СӘБӘБЛӘР

14. Ҹәсарәтли олмағымыз үчүн бизим һансы сәбәбләримиз вар?

¹⁴ Иса иштиракы заманы проблемләрин олаҹағыны гејд етсә дә: «Дәһшәтә ҝәлмәјин», — демишди (Лука 21:9). Падшаһымыз Иса вә каинатын Јараданы Јеһова бизә дәстәк олурлар, буна ҝөрә дә ҹәсарәтли олмағымыз үчүн тутарлы сәбәбләримиз вар. Павел: «Аллаһ бизә горхаглыг руһу јох, ҝүҹ, мәһәббәт вә сағлам дүшүнҹә руһу вериб», — сөзләри илә Тимотеји үрәкләндирирди (2 Тим. 1:7).

15. Аллаһын бәзи хидмәтчиләри Она ҝүвәндикләрини неҹә ҝөстәрмишләр вә биз онлар кими неҹә ҹәсарәтли ола биләрик?

¹⁵ Ҝөрәк Аллаһын бәзи хидмәтчиләри Она там ҝүвәндикләрини неҹә ифадә етмишдиләр. Давуд демишди: «Рәбб галам, сипәримдир! Гәлбим Она ҝүвәнәндә көмәјимә чатыр. Севинҹдән гәлбим ҹуша ҝәлир» (Мәз. 28:7). Павел Аллаһа олан сарсылмаз етибарыны белә ифадә етмишди: «Бизи севәнин сајәсиндә биз һәр шејә галиб ҝәлирик» (Ром. 8:37). Иса тезликлә бөјүк тәһлүкә илә гаршылашаҹағыны биләндә дедији: «Мән тәк галмајаҹағам, чүнки Атам мәнимләдир», — сөзләри динләјиҹиләриндә онун Аллаһла мүнасибәтинин мөһкәм олдуғуна даир һеч бир шүбһә гојмады (Јәһ. 16:32). Аллаһын садиг хидмәтчиләринин бу сөзләри нәји ҝөстәрир? Јеһоваја етибарларынын сарсылмаз олдуғуну. Әҝәр биз дә Аллаһа бу ҹүр етибар инкишаф етдирсәк, үзләшдијимиз бәдбәхтликләрә ҹәсарәтлә синә ҝәрәҹәјик. (Мәзмур 46:1—3 ајәләрини оху.)

АЛЛАҺЫН КӨМӘЈИНДӘН ЈАРАРЛАН

16. Нәјә ҝөрә Аллаһын Кәламыны өјрәнмәк чох ваҹибдир?

¹⁶ Мәсиһчи ҹәсарәти өз ҝүҹүнә архаланмаг демәк дејил. Әксинә, бу, Аллаһы танымағын вә Она етибар етмәјин бәһрәсидир. Бунун үчүн биз Онун Кәламы олан Мүгәддәс Китабы арашдырмалыјыг. Депрессијадан әзијјәт чәкән бир баҹы она нәјин көмәк етдијини белә изаһ едир: «Мәни сакитләшдирән Мүгәддәс Китаб ајәләрини тәкрар-тәкрар охујурам». Мүнтәзәм шәкилдә аиләви ибадәт кечирмәјә даир верилән ҝөстәришә әмәл едирикми? Бунлары етмәк бизә мәзмурчунун дүшүнҹә тәрзинә јијәләнмәјә көмәк едәҹәк. О дејирди: «Ганунуну нә гәдәр севирәм! Һәмишә онун үзәриндә дәриндән дүшүнүрәм» (Мәз. 119:97).

17. а) Аллаһын тәгдим етдији һансы көмәк сајәсиндә биз ҹәсарәтли ола биләрик? б) Нәшрләримиздә охудуғун һансы һәјат һекајәсинин сәнә фајдасы олуб?

¹⁷ Бизим Јеһоваја етибарымызы мөһкәмләндирәҹәк мәлуматларла зәнҝин Мүгәддәс Китаба әсасланан нәшрләримиз дә вар. Журналларымызда дәрҹ олунан һәјат һекајәләринин бир чох һәмиманлыларымыза хүсуси фајдасы олуб. Асијада јашајан бир баҹы депрессијанын диҝәр нөвү олан биполјар позунтудан әзијјәт чәкир. О, ејни хәстәлији олан вә кечмишдә хүсуси тәјинатлы мүждәчи кими хидмәт едән гардашын һәјат һекајәсини охујанда чох руһланмышды. Баҹы јазыр: «Бу, проблемими баша дүшмәјә көмәк етди вә мәндә үмид јаратды».

18. Нәјә ҝөрә биз мүмкүн гәдәр тез-тез дуа етмәлијик?

¹⁸ Дуа истәнилән вәзијјәтдә дадымыза чата биләр. Һәвари Павелин нөвбәти сөзләри дуанын нә гәдәр дәјәрли олдуғуну ҝөстәрир: «Һеч нәјә ҝөрә нараһат олмајын. Һәр диләјинизи дуа, јалварыш вә шүкранла Аллаһа билдирин. Аллаһын вердији гәлб раһатлығы бүтүн инсан фикирләрини үстәләјир; о, үрәјинизи вә зеһнинизи Мәсиһ Иса васитәсилә горујаҹаг» (Филип. 4:6, 7). Бәдбәхтликләр бизи өз ағушуна аланда ҝүҹ әлдә етмәк үчүн Аллаһын бу көмәјиндән там јарарланырыгмы? Узун мүддәт депрессијадан әзијјәт чәкән Алекс адлы британијалы бир гардаш дејир: «Дуада Јеһова илә сөһбәт етмәк вә Кәламы васитәсилә Ону ешитмәк, санки, учурума јыхылмамаг үчүн јапышдығым бир будагдыр».

19. Мәсиһчи ҝөрүшләриндә иштирак етмәк нә дәрәҹәдә ваҹибдир?

¹⁹ Аллаһын тәгдим етдији һәјати ваҹиб көмәкләрдән диҝәри јығынҹаг ҝөрүшләридир. Мәзмурчу јазырды: «Гәлбим Рәббин һәјәтинин һәсрәтиндәдир» (Мәз. 84:2). Биз дә белә һиссләр кечиририкми? Јухарыда ады чәкилән Лани мәсиһчи ҝөрүшләри һагда дүшүнҹәләрини белә дилә ҝәтирир: «Јығынҹаг ҝөрүшләринә ҝедиб-ҝетмәмәк сечим мәсәләси дејилди. Мән баша дүшүрдүм ки, әҝәр Јеһованын мәнә көмәк етмәсини истәјирәмсә, орада олмалыјам».

20. Тәблиғ ишиндә иштирак етмәк бизә неҹә көмәк едир?

²⁰ Бәдбәхтликләрә ҹәсарәтлә синә ҝәрмәк үчүн Јеһованын тәгдим етдији башга көмәк исә Падшаһлығын тәблиғ ишиндә фәаллығы горујуб сахламагдыр (1 Тим. 4:16). Һәјатда чохлу проблемләри олан Австралијада јашајан бир баҹы дејир: «Етмәк истәдијим ән ахырынҹы иш тәблиғ иди. Анҹаг ағсаггал мәни хидмәтә дәвәт едәндә разылашдым. Ҝөрүнүр, бу, Јеһованын көмәји иди; һәр дәфә хидмәтә чыханда өзүмү чох хошбәхт һисс едирдим» (Сүл. мәс. 16:20). Чохлары фикир вермишләр ки, инсанларын Јеһоваја иман етмәләринә көмәк едәндә онларын өз иманы мөһкәмләнир. Бунун сајәсиндә онларын фикирләри проблемләриндән јајыныр вә диггәтләрини даһа ваҹиб шејләрә ҹәмләјирләр (Филип. 1:10, 11).

21. Чәтинликләрлә үзләшәндә нәјә әмин ола биләрик?

²¹ Јеһова буҝүнкү бәдбәхтликләрә ҹәсарәтлә синә ҝәрмәјимиз үчүн бизә хејли көмәк тәгдим едир. Әҝәр бунларын һамысындан јарарлансаг, еләҹә дә Аллаһын кечмишдә јашајан хидмәтчиләринин нүмунәләри үзәриндә дүшүнсәк вә онлары тәглид етсәк, әмин ола биләрик ки, чәтинликләрин өһдәсиндән мүвәффәгијјәтлә ҝәләҹәјик. Өз сонуна јахынлашан бу дүнјада башымыза чох шеј ҝәлә биләр, бунунла белә, биз Павелин әһвал-руһијјәсини әкс етдирә биләрик: «Бизи јыхырлар, амма мәһв едилмәмишик... Биз руһдан дүшмүрүк» (2 Кор. 4:9, 16). Јеһованын көмәји сајәсиндә буҝүнкү фәлакәтләрин өһдәсиндән ҹәсарәтлә ҝәләҹәјик. (2 Коринфлиләрә 4:17, 18 ајәләрини оху.)

[Һашијә]

[10–ҹу сәһифәдәки шәкил]

Бәдбәхтлик баш верәндә Јеһованын көмәјиндән јарарлан