Онлар көнүллү олараг өзләрини тәгдим етдиләр. Бразилијада
ИНДИ 30 јашы олан Рубијә (1) Бразилијанын ҹәнубунда јерләшән кичик јығынҹагда пионер кими хидмәт едән рәфигәси Сандраҝилә (2) бир нечә ил бундан әввәл гонаг ҝетмишди. Һәмин вахт баш верән бир һадисә Рубијәјә елә ҝүҹлү тәсир бағышламышды ки, о, һәјатында дәјишиклик етди. Бу, һансы һадисә иди? Ҝәлин буну Рубијәнин өзүндән өјрәнәк.
«ГУЛАГЛАРЫМА ИНАНА БИЛМИРДИМ»
«Сандра мәни Мүгәддәс Китабы өјрәтдији бир гадынын јанына апарды. Сөһбәт әснасында бу гадын сөзҝәлиши деди: “Сандра, мәним иш јеримдә үч гыз Мүгәддәс Китабы өјрәнмәк истәјир, амма мән онлара дедим ки, онлар өз нөвбәләрини ҝөзләмәлидирләр. Мән билирәм ки, сән бу ил чох мәшғулсан”. Гулагларыма инана билмирдим. Јеһова һаггында өјрәнмәк истәјән инсанлар өз нөвбәләрини ҝөзләмәли идиләр! Мән исә доғма јығынҹағымда хидмәт едә-едә Мүгәддәс Китабы өјрәнмәк истәјән бир нәфәри ҝүҹ-бәла илә тапырам. Мәһз бу ан, һәмин гадынын евиндә үрәјимдән бу кичик шәһәрин сакинләринә көмәк етмәк үчүн ораја көчмәк арзусу кечди. Тезликлә јашадығым бөјүк шәһәрдән Сандранын пионер кими хидмәт етдији шәһәрә көчдүм».
Бундан сонра нә баш верди? Рубијә сөзүнә давам едәрәк дејир: «Ики ај иди ки бу шәһәрә көчмәјимә бахмајараг, мән 15 нәфәрә Мүгәддәс Китабы өјрәдирдим. Нә гәдәр инанылмаз сәсләнсә дә, тез бир заманда, Сандра кими, мәним дә әлимдә Мүгәддәс Китабы өјрәнмәк үчүн өз нөвбәләрини ҝөзләјән инсанларын сијаһысы вар иди!»
О, ХИДМӘТИНӘ НӘЗӘР САЛМАҒА ТӘШВИГ ОЛУНДУ
Јашы 20-дән чох олан Диего (3) Бразилијанын ҹәнубунда јерләшән Прудентополис адлы кичик бир шәһәрдә пионер кими хидмәт едән гардашлара баш чәкмишди. Бу сәјаһәтдән чох тәсирләнән гардаш хидмәтинә јенидән нәзәр салмаға тәшвиг олунду. О данышыр: «Мән садәҹә јығынҹаглара ҝедиб-ҝәлир вә ајда бир нечә саат тәблиғ едирдим. Лакин бу пионерләрә баш чәкәндә вә данышдыглары әһвалатлары ешидәндә онларын хошбәхт әһвал-руһијјәсини хидмәтә гаршы лагејд мүнасибәтимлә мүгајисә етмәјә билмәздим. Онларын севинҹини ҝөрәндә истәдим ки, мәним дә һәјатым онларынкы кими мәналы вә долғун олсун». Бу сәјаһәтдән сонра Диего пионер хидмәтинә башлады.
Ола билсин ки, сән дә Диего кими хош хәбәри тәблиғ едән вә јығынҹаг ҝөрүшләриндә иштирак едән бир ҝәнҹсән вә һисс едирсән ки, хидмәт сәнин үчүн дарыхдырыҹы олуб вә ондан һеч бир севинҹ дујмурсан. Әҝәр беләдирсә, һәјатында дәјишикликләр едә вә Падшаһлығын тәблиғчиләринә даһа чох еһтијаҹ олан әразиләрә көчәрәк хидмәтинә севинҹ гата биләрсәнми? Ајдындыр ки, раһат һәјатдан имтина етмәк фикри сәни горхуда биләр. Буна бахмајараг, бир чох ҝәнҹләр мәһз белә сечим едибләр. Јеһоваја даһа чох хидмәт етмәк үчүн онлар мәгсәд вә арзуларыны дәјишмәјә ҹүрәт етмишдиләр. Инди исә ҝәлин Брунонун нүмунәсинә нәзәр салаг.
ДИРИЖОР, ЈОХСА ХИДМӘТЧИ?
Инди 28 јашы олан Бруно (4) бир нечә ил әввәл мәшһур мусиги мәктәбиндә тәһсил алырды вә нијјәти дирижор олмаг иди. Гардаш о дәрәҹәдә пешәкар иди ки, бир нечә дәфә симфоник оркестрда дирижорлуг етмәк дәвәтини алмышды. О карјера гурмаға ҹан атырды. Бруно дејир: «Анҹаг һисс едирдим ки, һәјатымда нәсә чатышмыр. Өзүмү Јеһоваја һәср етсәм дә, дәрк едирдим ки, Она вар ҝүҹүмлә хидмәт етмирәм вә бу, мәни нараһат едирди. Һиссләрими дуада Јеһоваја ачдым, еләҹә дә јығынҹагдакы тәҹрүбәли гардашларла сөһбәт етдим. Бу мәсәләни ҹидди ҝөтүр-гој етдикдән сонра хидмәти мусигидән үстүн тутмағы гәрара алдым вә мусиги мәктәбиндән чыхараг тәблиғчиләрә еһтијаҹ олан әразијә көчдүм, һәрчәнд бу, мүәјјән чәтинликләрлә бағлы иди». Онун вердији гәрар нә дәрәҹәдә ишә јарады?
Бруно Сан-Паулу шәһәриндән тәхминән 260 километр узаглыгда јерләшән Гуапиараја (әһалиси тәхминән 7000 нәфәрдир) көчдү. Бу, бөјүк дәјишиклик иди. О данышыр: «Мән нә сојудуҹусу, нә телевизору, нә дә ки Интернети олан худмани бир евә көчдүм. Анҹаг орада мејвә бағы вә диррик варды. Әввәлләр јашадығым јердә бунларын һеч бири јох иди!» Бурадакы балаҹа јығынҹагда хидмәт етдији мүддәтдә Бруно һәфтәдә бир дәфә чантасыны әрзаг, су вә китаб-журналларла долдурараг мотосиклетлә кәндләрә тәблиғ етмәјә ҝедирди. Һәмин әразидә јашајан адамларын бир чоху өмүрләриндә һеч бир дәфә дә олсун хош хәбәри ешитмәмишди. О дејир: «Мән нә аз, нә чох 18 нәфәрә Мүгәддәс Китабы өјрәдирдим. Онларын һәјатларында дәјишикликләр етдијини ҝөрмәк мәнә бөјүк севинҹ бәхш едирди. Јалныз онда баша дүшдүм ки, сән демә, һәјатымда хидмәти биринҹи јерә гојмағын ҝәтирдији севинҹ чатышмырды. Әҝәр вар-дөвләтә ҹан атсајдым, бу севинҹи дујмаг мәнә нәсиб олмазды». Бәс Бруно Гуапиарада өзүнү неҹә доландырырды? О ҝүлүмсәјәрәк ҹаваб верир: «Ҝитарадан дәрс демәклә». О, мүәјјән мәнада «дирижор»луг едир.
«ГАЛМАГДАН БАШГА ЧАРӘМ ЈОХ ИДИ»
30-а јахын јашы олан Мариананын (5) вәзијјәти Брунонун вәзијјәтинә охшајырды. О, вәкил иди вә ҝәлирли ишдә ишләмәсинә бахмајараг, һәјатдан әсил мәмнунлуг дујмурду. О дејир: «Мәнә елә ҝәлирди ки, санки, күләк далынҹа гачырам» (Ваиз 1:17). Бәзи баҹы-гардашлар ону пионер хидмәти барәдә дүшүнмәјә тәшвиг едирдиләр. Бу тәклифи бир аз ҝөтүр-гој етдикдән сонра Мариана рәфигәләри Бианка (6), Каролина (7) вә Ҹулиана (8) илә бирликдә евләриндән минләрлә километр узаглыгда, Боливијанын јахынлығында јерләшән Барра-до-Бугрес шәһәриндәки бир јығынҹаға көмәк етмәк гәрарына ҝәлдиләр. Бәс сонра нә баш верди?
Мариана давам едир: «Мән бурада ҹәми үч ај галмағы планлашдырырдым. Анҹаг бу мүддәт баша чатанда Мүгәддәс Китабы өјрәтдијим инсанларын сајы 15 нәфәр иди! Әлбәттә ки, онларын һәгигәтдә инкишаф етмәләри үчүн даһа чох көмәјә еһтијаҹлары варды. Буна ҝөрә дә онлары гојуб ҝедәҹәјими демәк үчүн ҹәсарәтими топлаја билмәдим. Галмагдан башга чарәм јох иди». Баҹыларын дөрдү дә галмаг гәрарына ҝәлди. Бу гәрар Мариананын һәјатына мәна гатдымы? О дејир: «Инсанларын һәјатыны јахшылыға доғру дәјишмәк үчүн Јеһованын мәндән истифадә етмәси мәндә хош һиссләр ојадыр. Вахтымы вә ҝүҹүмү әсил дәјәри олан ишә сәрф етдијими билмәк мәним үчүн хејир-дуадыр». Каролина бу дөрд баҹынын һиссләрини белә ифадә едир: «Ахшам јатмаға ҝедәндә дәрин мәмнунлуг дујурам, чүнки Падшаһлығын мараглары үчүн әлимдән ҝәләни етмишәм. Һәјатым Мүгәддәс Китабы өјрәтдијим инсанларын әтрафында дөвр едир. Онларын неҹә инкишаф етдијини ҝөрмәк, һәгигәтән дә, һејрәтамиздир. Мән: “Дадын, ҝөрүн Рәбб нә гәдәр шириндир”, — сөзләринин һәгигәт олдуғуну өз тәҹрүбәмдән ҝөрдүм» (Мәз. 34:8).
Падшаһлыг һагда хош хәбәрин дүнјанын ән уҹгар јерләринәдәк чатмасы үчүн өзләрини көнүллү олараг тәгдим едән баҹы-гардашларын сајынын артмасыны ҝөрмәк Јеһованы неҹә дә севиндирир! (Мәз. 110:3; Сүл. мәс. 27:11). Јеһова Аллаһ Падшаһлыг ишинә ҹан јандыран бүтүн бу баҹы-гардашлардан Өз хејир-дуасыны әсирҝәмир! (Сүл. мәс. 10:22).
[5–ҹи сәһифәдәки чәрчивә/шәкил]
«Биз... һеч нәдән корлуг чәкмәмишик»
Хуан-Паулу вә онун һәјат јолдашы Ноеми тәблиғчиләрә еһтијаҹ олан әразиләрдә хидмәт етмәк истәсәләр дә, бәзиләри онлары фикирләриндән дашындырмаға чалышырдылар. Јығынҹағын бәзи үзвләри дејирдиләр: «Сиз кичик шәһәрә көчмәклә мадди ҹәһәтдән риск едирсиниз. Көчмәк нәјә лазымдыр ки? Бизим јығынҹагда да ҝөрүләси ишләр һәлә чохдур». Хуан-Паулу дејир: «Һәмиманлыларымызын јахшы нијјәтдән ирәли ҝәләрәк дедикләри сөзләрин бизи руһдан салмамасына јол вермәмәк чәтин иди». Буна бахмајараг, артыг нечә илләрдир ки, Ноеми вә Хуан-Паулу тәблиғчиләрә даһа чох еһтијаҹ олан әразидә хидмәт едирләр. Онлар хидмәтләрини ҝенишләндирмәк гәрарларында гәти олдугларына ҝөрә чох хошбәхтдирләр. Хуан-Паулу сөзүнә давам едир: «Биз бурада олдуғумуз узун мүддәт әрзиндә һеч нәдән корлуг чәкмәмишик. Әсил дәјәрә малик олан шејләрә ҝәлдикдә исә, бунлар биздә әввәлкиндән даһа чохдур». Онун сөзүнә гүввәт олараг Ноеми дејир: «Бунун үчүн сәј ҝөстәрмәјә дәјәрди».
Балаҹа шәһәрләрдә доланмаг чәтиндир. Узаг әразиләрә көчәнләр өзләрини неҹә тәмин едирләр? Онлар дүшүнҹә габилијјәтләрини ишә салырлар. Бәзиләри инҝилис вә диҝәр дилләри тәдрис едирләр, ушаглара ев тапшырыгларыны етмәкдә көмәк едирләр. Диҝәрләри исә палтар тикмәклә, евләр бојамагла вә онлара јарым ҝүн ишләмәјә имкан верән диҝәр ишләрлә мәшғул олурлар. Тәблиғчиләрә даһа чох еһтијаҹ олан әразиләрдә хидмәт едәнләр бир ағыздан дејирләр ки, хејир-дуалар бүтүн чәтинликләрин әвәзини өдәјир.
[6–ҹы сәһифәдәки чәрчивә/шәкил]
Ев һәсрәти
Тиаго дејир: «Јени јығынҹаға кечәндән сонра руһ дүшкүнлүјүнә гапылдым. Бурада тәблиғчиләрин сајы чох аз иди вә асудә вахтымы кечирмәк үчүн әјләнҹәләр, демәк олар ки, јох дәрәҹәсиндә иди. Ев үчүн дарыхмаға башладым. Дәрк едирдим ки, бош-бикар отурмагданса, вәзијјәти дүзәлтмәк үчүн нә исә етмәлијәм. Буна ҝөрә дә гаршыма јығынҹагдакы баҹы-гардашларла јахындан таныш олмаг мәгсәдини гојдум вә бу ишә јарады! Јени достлар газандым вә чох кечмәмиш артыг өзүмү евдәки кими хошбәхт һисс едирдим».
[3–ҹү сәһифәдәки шәкил]
Ноеми вә Хуан-Паулу, Аскурра, Санта-Катарина