Муса пејғәмбәр — мәһәббәт долу бир инсан

МӘҺӘББӘТ НӘДИР?

Мәһәббәт башгаларына дәрин бағлылыг һиссидир. Севән инсан нәји исә гурбан вермәк лазым ҝәлсә белә, сөзләри вә һәрәкәтләри илә гаршысындакы инсанын онун үчүн әзиз олдуғуну ҝөстәрир.

МУСА МӘҺӘББӘТИ НЕҸӘ ТӘЗАҺҮР ЕТДИРИРДИ?

Муса пејғәмбәр Аллаһы севдијини әмәлләри илә ҝөстәрирди. Неҹә? 1 Јәһја 5:3 ајәсиндә јазылан сөзләри хатырлајаг: «Аллаһы севмәк Онун әмрләринә риајәт етмәк демәкдир, Онун әмрләри исә ағыр дејил». Муса бу принсипә әсасән јашајырды. Фиронун һүзуруна ҝетмәк кими ағыр тапшырыгдан тутмуш Гырмызы дәнизи араламаг үчүн әсаны узатмаг кими садә тапшырығадәк Аллаһын бүтүн әмрләрини иҹра етди. Бу әмрләрин садә вә ја чәтин олмасындан асылы олмајараг, «Рәбб Мусаја неҹә әмр етмишдисә, о да бу ҹүр етди» (Чыхыш 40:16).

Муса сојдашларыны да севирди. Халг билирди ки, онлара рәһбәрлик етмәк үчүн Јеһова Мусаны тәјин едиб, буна ҝөрә дә дара дүшән кими онун јанына ҝедирдиләр. Аллаһын Кәламындан охујуруг: «Халг... сәһәрдән ахшамадәк Мусанын әтрафында дајанмышды» (Чыхыш 18:13—16). Исраиллиләр ҝәлиб бүтүн ҝүнү дәрдләрини Мусаја данышанда ҝүнүн сонунда онун неҹә јорулдуғуну бир тәсәввүр един! Нә гәдәр јорулса да, Муса севдији халгына ҹанла-башла көмәк едирди.

Муса пејғәмбәр јалныз онлары динләмирди, һәмчинин онлар үчүн дуа да едирди. О һәтта она гаршы пис давранан инсанлара ҝөрә дә дуа едирди! Мәсәлән, Мусанын баҹысы Мәрјәм Аллаһын сечилмишинә гаршы дејинәндә Аллаһ ону ҹүзамла ҹәзаландырды. Һәмин вәзијјәтдә Муса севинмәди, әксинә, баҹысы үчүн дәрһал Јеһова Аллаһа дуа етди: «Јалварырам, ај Аллаһ, она шәфа вер!» (Сајлар 12:13). Мусаны ҹаныјананлыгла дуа етмәјә мәһәббәтдән башга нә тәшвиг едә биләрди ки?

БИЗИМ ҮЧҮН ИБРӘТ ДӘРСИ.

Үрәјимиздә Аллаһа дәрин мәһәббәт инкишаф етдирмәклә биз Мусаны тәглид едә биләрик. Бу ҹүр мәһәббәт бизи Аллаһын әмрләринә «үрәкдән» итаәт етмәјә тәшвиг едир (Ромалылара 6:17). Биз бүтүн гәлбимизлә Аллаһа итаәт едәндә Ону севиндирмиш олуруг (Сүлејманын мәсәлләри 27:11). Бунун бизә дә хејри вар. Чүнки сәмими мәһәббәтдән ирәли ҝәләрәк ибадәт едәндә хејирхаһ ишләр ҝөрүрүк, үстәлик, бу, бизә зөвг верир (Мәзмур 100:2).

Инсанлары фәдакарҹасына севмәји өјрәнмәклә дә Мусаны тәглид едә биләрик. Достларымыз вә ја аилә үзвләримиз өз проблемләри илә бизә мүраҹиәт едәндә мәһәббәт бизи 1) онлара диггәтлә гулаг асмаға, 2) дәрдләринә шәрик олмаға, јәни онлары баша дүшмәјә, еләҹә дә 3) онлара гаршы лагејд олмадығымызы ҝөстәрмәјә тәшвиг едир.

Муса кими, биз дә доғмаларымыз үчүн дуа едә биләрик. Бәзән елә олур ки, онлар бизимлә дәрдләрини бөлүшәндә динләмәкдән башга һеч нә едә билмирик. Һәтта дејә биләрик: «Чох пис олдум, каш ки нәсә едә биләјдим, амма дуа етмәкдән башга әлимдән һеч нә ҝәлмир». Лакин унутмајын — «салеһин һәрарәтли дуасынын бөјүк гүввәси вар» (Јагуб 5:16). Һәтта үрәкдән етдијимиз дуаларымызын сајәсиндә Јеһова һәмин инсан үчүн етмәк фикриндә олмадығы шејләри едә биләр. Һәгигәтән дә, әзизләримиз үчүн едә биләҹәјимиз ән бөјүк хејирхаһлыг онлар үчүн дуа етмәкдир?a

Ҝөрдүјүмүз кими, Муса пејғәмбәрдән биз чох шеј өјрәнә биләрик. О, бизим кими ади инсан олса да, иман, тәвазөкарлыг вә мәһәббәтә даир ҝөзәл нүмунә гојуб. Онун нүмунәсини нә гәдәр јахшы изләсәк, һәм биз, һәм дә башгалары бунун хејрини ҝөрәҹәк (Ромалылара 15:4).