Мүһарибә вә мүнагишәләр неҹә сона чатаҹаг?

АЛЛАҺ ИНСАН ҺӨКУМӘТЛӘРИНИ МӘҺВ ЕДӘҸӘК

Аллаһ Мүгәддәс Китабда ады чәкилән Армаҝеддонa мүһарибәсиндә инсан һөкумәтләринә сон гојаҹаг (Вәһј 16:16). Һәмин вахт «јер үзүнүн [падшаһлары]... Гадир Аллаһын бөјүк ҝүнүндә олаҹаг мүһарибәјә» топланаҹаглар (Вәһј 16:14). Армаҝеддон јер үзүндәки сон мүһарибә олаҹаг.

Аллаһ инсан һөкумәтләрини Өз Падшаһлығы, јәни һөкумәти илә әвәз едәҹәк. Бу Падшаһлыг ҝөјдән идарә едәҹәк вә һеч вахт дағылмајаҹаг (Дәнјал 2:44). Аллаһ Оғлу Иса Мәсиһи бу Падшаһлығын Падшаһы сечиб (Әшија 9:6, 7; Мәтта 28:18). Исанын давамчыларына һаггында дуа етмәләрини өјрәтдији Падшаһлыгb елә бу һөкумәтдир (Мәтта 6:9, 10). Бүтүн бәшәријјәт Исанын рәһбәрлик етдији јеҝанә үмумдүнја һөкумәтин рәһбәрлији алтында бирләшәҹәк.

Инсан рәһбәрләриндән фәргли олараг, Иса сәлаһијјәтиндән өз мараглары үчүн истифадә етмәјәҹәк. О, әдаләтли вә гәрәзсиз олдуғу үчүн һеч ким нараһат олмајаҹаг ки, миллијјәтинә, иргинә вә ја етник мәнсубијјәтинә ҝөрә она јухарыдан ашағы бахылаҹаг (Әшија 11:3, 4). Һәмчинин инсанлар һагларыны мүдафиә етмәк үчүн мүбаризә апармалы олмајаҹаглар. Чүнки Иса һәр кәсин рифаһыны дүшүнәҹәк. «О, имдад дејиб чағыран фағыры, мәзлуму, бичарәни хилас едәҹәк... Ҹанларыны зүлмдән, зоракылыгдан гуртараҹаг» (Зәбур 72:12—14).

Аллаһын Падшаһлығы јер үзүнү өлдүрүҹү силаһлардан тәмизләјәҹәк (Микә 4:3). Һәмчинин савашмагдан әл чәкмәјәнләри, јахуд инсанларын динҹлијини позанлары мәһв едәҹәк (Зәбур 37:9, 10). Дүнјанын истәнилән јериндә киши дә, гадын да, ушаг да өзләрини тәһлүкәсизликдә һисс едәҹәк (Һизгијал 34:28).

Аллаһын һөкумәти алтында инсанларын мүкәммәл һәјат шәраити олаҹаг. Јохсуллуг, аҹлыг вә евсизлик кими мүһарибәјә сәбәб олан проблемләр арадан галхаҹаг. Һәр кәсин дојунҹа сағлам гидасы, јашамаг үчүн раһат шәраити олаҹаг (Зәбур 72:16; Әшија 65:21—23).

Аллаһын Падшаһлығынын һакимијјәти алтында мүһарибәнин пис тәсири арадан галдырылаҹаг. Тәкҹә физики јаралар јох, һәм дә мүһарибәнин вурдуғу психоложи вә емосионал травмалар арадан галхаҹаг. Һәтта өлән инсанлар да дирилиб јер үзүндә јашајаҹаглар (Әшија 25:8; 26:19; 35:5, 6). Аиләләр јенидән говушаҹаг вә мүһарибәнин аҹы хатирәләри артыг кечмишдә галаҹаг (Вәһј 21:4).

АЛЛАҺ ҜҮНАҺЫ МӘҺВ ЕДӘҸӘК

Аллаһын Падшаһлығы бүтүн бәшәријјәти јеҝанә һәгиги Аллаһ олан Јеһовајаc, «мәһәббәт вә сүлһ Аллаһы»на ибадәтдә ҹәм едәҹәк (2 Коринфлиләрә 13:11). Инсанлар бирликдә сүлһ ичиндә јашамағы өјрәнәҹәкләр (Әшија 2:3, 4; 11:9). Өјрәндикләринә ујғун јашајанларын һамысы ҝүнаһдан азад олуб камил олаҹаглар (Ромалылара 8:20, 21).

АЛЛАҺ ШЕЈТАНЫ ВӘ ОНУН ҸИНЛӘРИНИ МӘҺВ ЕДӘҸӘК

Аллаһын Падшаһлығы инсанлары мүһарибәјә сөвг едән Шејтаны вә онун ҹинләрини мәһв едәҹәк (Вәһј 20:1—3, 10). Онларын пис тәсири олмајаҹаг, «һәр јанда сүлһ олаҹаг» (Зәбур 72:7).

Әмин ола биләрсиниз ки, Аллаһын мүһарибәләрә вә мүнагишәләрә сон гојмаг вәди ҝерчәкләшәҹәк. Мүгәддәс Китабда дејилир ки, О һәм мүһарибәләри арадан галдырмаг истәјир, һәм дә буна гадирдир.

• Мүһарибә вә зоракылыға сон гојмаг үчүн лазым олан һикмәт вә ҝүҹ Аллаһда вар (Әјјуб 9:4). Аллаһ үчүн һәр шеј мүмкүндүр (Әјјуб 42:2).

• Инсанларын әзаб чәкдијини ҝөрмәк Аллаһа үрәкағрысы верир (Әшија 63:9). Һәмчинин «О, зоракылығы севәнләрә нифрәт едир» (Зәбур 11:5).

• Аллаһ һәмишә сөзүнүн Ағасыдыр; Онда јалан јохдур (Әшија 55:10, 11; Титуса 1:2).