Yaradılış

16 İbramın arvadı Sarayın uşağı olmurdu.+ Onun Həcər+ adında misirli bir kənizi var idi. 2 Saray İbrama dedi: «Yehova məni övlad üzünə həsrət qoyub. Gəl sən mənim kənizimlə yaxınlıq et. Bəlkə, heç olmasa bu yolla uşağım olar».+ İbram Sarayla razılaşdı. 3 Beləcə, Saray kənizi misirli Həcəri İbrama verdi ki, ona arvad olsun. Bu hadisə baş verəndə İbram artıq on il idi ki, Kənan torpağında yaşayırdı. 4 İbram Həcərlə yaxınlıq etdi və o hamilə qaldı. Həcər hamilə olduğunu biləndə öz xanımına həqarətlə baxmağa başladı.

5 Saray İbrama dedi: «Gör mən nələr çəkirəm, hamısı da sənin üstündə. Öz əlimlə kənizimi sənin qoynuna verdim, o isə hamilə olduğunu bilib mənə həqarətlə baxır. Qoy Yehova səninlə mənim aramda hakim olsun, kimin haqq, kimin nahaq olduğunu Özü göstərsin». 6 Belə olanda İbram dedi: «Kənizin sənin ixtiyarındadır, necə bilirsən, elə də et». Onda Saray Həcərlə sərt davranmağa başladı, Həcər də evdən qaçdı.

7 Bir qədər sonra Yehovanın mələyi onu səhrada, Şur+ yolundakı bulağın başında tapdı. 8 Mələk onu çağırıb dedi: «Ey Həcər, Sarayın kənizi, haradan gəlib, hara gedirsən?» Həcər dedi: «Mən xanımım Sarayın əlindən qaçıram». 9 Onda Yehovanın mələyi ona dedi: «Qayıt xanımının yanına və ona tabe ol». 10 Sonra Yehovanın mələyi dedi: «Sənin övladlarını o qədər çoxaldacağam ki, sayıb qurtarmaq olmayacaq».+ 11 Yehovanın mələyi sözünə əlavə etdi: «Bax, sən hamiləsən. Bir oğlun olacaq. Adını İsmayıl* qoyarsan, çünki Yehova fəryadını eşitdi. 12 O, vəhşi eşşək kimi, ipə-sapa yatmayan adam olacaq. O, hamıya, hamı da ona qarşı olacaq. Bütün qardaşları ilə üzbəüz yaşayacaq*».

13 Həcər onunla danışan Yehovanın adını çağırıb dedi: «Sən hər şeyi görən Allahsan!»+ O, öz-özünə fikirləşirdi: «Doğrudanmı, məni Görəni görmüşəm?» 14 Buna görə də həmin bulağa Biir-Lahay-Roy* adı verildi. (O, Qədislə Bərəd arasında yerləşir.) 15 Bir müddət sonra Həcər İbrama oğul doğdu. İbram oğlunun adını İsmayıl qoydu.+ 16 Həcər İsmayılı dünyaya gətirəndə İbramın səksən altı yaşı var idi.