“Yeqova mənə qarşı çox mərhəmətlidir!”
BİR dəfə 1985-ci ilin mart gecələrindən birində Yeqovanın Şahidlərinin Nyu-Yorkdakı ümumdünya mərkəzi idarəsinin yazıçılar şö’bəsindən olan bacı-qardaşlar əlamətdar bir tarixi qeyd etmək üçün, gözəl bir mühitdə toplaşdılar: Karl Kleyn ömrünün 60 ilini tammüddətli xidmətdə keçirmişdir. Kleyn qardaş böyük ruh yüksəkliyi ilə “Yeqovanın ona qarşı çox mərhəmətli” olduğunu söylədi. O, Məzmur 37:4-cü ayəsinin onun ən sevimli Müqəddəs Kitab ayəsi olduğunu bildirdi. Sonra isə hamı böyük məmnuniyyətlə onun violonçeldə ifa etdiyi musiqini dinlədi.
Sonrakı 15 il ərzində Kleyn qardaş yazıçılar şö’bəsinin bir üzvü kimi işini davam edir və Yeqovanın Şahidlərinin Rəhbərlik şurasında xidmət edirdi. 2001-ci il yanvarın 3-də, Allahın sadiq xidmətçisi olan 95 yaşlı Karl Kleyn özünün yer üzündəki həyatını başa çatdırdı.
Karl Almaniyada anadan olmuşdur. Onun ailəsi Birləşmiş Ştatlara köçmüş, buna görə də Karl Çikaqoya yaxın olan qəsəbədə (İllinoys ştatında) böyümüşdür. Artıq uşaq vaxtlarından Karl və onun balaca qardaşı Ted, Müqəddəs Kitaba dərin maraq göstərməyə başlamışlar. Karl 1918-ci ildə vəftiz olundu, 1922-ci ildə isə Müqəddəs Kitabın Tədqiqatçılarının konqresindəki həyəcanlandırıcı mə’ruzələr onda təbliğ xidmətinə ömürlük məhəbbət atəşini alovlandırdı. O, təbliğsiz bir həftə də yaşaya bilməzdi, hətta həyatının son həftələrində belə təbliğ edirdi.
Karl 1925-ci ildə Yeqovanın Şahidlərinin mərkəzi idarəsinin üzvü oldu və ilk vaxtlar çapxanada işlədi. O, musiqini coşqun həvəslə sevirdi və musiqisi məsihçi radioverilişlərində səslənən orkestrin tərkibində bir neçə il violonçel çalmışdı. Sonra o, xidməti şö’bədə işləmiş və nəzarətçisi T. Sallivanla möhkəm dostluq etmişdi. Karlın qardaşı Ted evləndi və arvadı Dorislə birlikdə missioner kimi Puerto-Rikoya göndərildi.
Karl Kleyn tədqiqatlar aparmağı xoşladığına və Müqəddəs Kitabın biliyinə dərindən sahib olduğuna görə, yazıçılar şö’bəsində yarım əsr xidmət etmiş və bu şö’bənin işini zənginləşdirmişdir. 1963-cü ildə Karl, Boliviyada xidmət edən Almaniyalı Marqareta adlı missionerlə evləndi. Marqaretanın göstərdiyi məhəbbət və himayə, xüsusən də sağlamlığı pisləşən zaman, işləmək qabiliyyətini qoruyub saxlamaqda Karla kömək edirdi. O, hətta qocalıq dövründə də — insanların əksəriyyətinin təqaüdə çıxdıqları bir vaxtda — səmərəli işləyə bilirdi. O, təbii səmimiliyi və musiqiyə olan şövqü sayəsində toplantılarda və konqreslərdə unudulmaz mə’ruzələrlə çıxış edə bilirdi. Ölümündən bir az əvvəl Nyu-Yorkdakı Beyt-el ailəsində səhər ibadətini apararaq gündəlik ayəni araşdırırdı, bu isə hamıya böyük sevinc və fayda gətirirdi.
“Gözətçi Qülləsi” jurnalının daimi oxucularının çoxu, 1984-cü il, 1 oktyabr (ing.) buraxılışında çap olunmuş, Karl qardaşın açıq yazılmış tərcümeyi-halını xatırlayırlar. Onun yazılışından sonrakı 15 il ərzində Karl Kleynin Allaha sadiq bir məsihçi kimi xidmət etdiyini xatırlayaraq, bu həyati tarixi dəfələrlə məmnunluqla oxumaq olar.
Rəbbin məsh edilmişlərindən biri kimi, Kleyn qardaş göydə Məsihlə birlikdə rəhbərlik etməyi səmimi qəlbdən arzu edirdi. Onun, bu istəyinin Yeqova tərəfindən yerinə yetirildiyinə əmin olmaq üçün hər bir əsasımız vardır (Luka 22:28—30).
[31-ci səhifədəki şəkil]
Karl 1943-cü ildə T. Sallivan, Ted və Dorislə birlikdə.
[31-ci səhifədəki şəkil]
Karl və Marqareta, 2000-ci ilin oktyabr ayı.