İman və cəsarətə təşviq edən hekayət. Yehovanın Şahidləri Ukraynada
BİRİNCİ əsrin məsihçiləri kimi, Allahın xalqı bu gün də tə’qiblərə mə’ruz qalır (Matta 10:22; Yəhya 15:20). Padşahlıq haqqında təbliğ işinin 52 il ərzində qadağa altında olduğu Ukrayna ilə müqayisədə tə’qiblər yalnız bə’zi yerlərdə daha uzunsürən və ya amansız olmuşdur.
2002-ci il üçün “Yehovanın Şahidlərinin illik məcmuəsi”ndə bu ölkədə Allahın xalqının başına gələn hadisələr haqqında danışılır. Bu hadisələr ağır şəraitlərdə göstərilən iman, cəsarət və qüvvə haqqındadır. Aşağıda Yehovanın Şahidlərinin Ukraynadakı filialına gələn səmimi məktublardan sitatlar gətirilir.
“Mən 2002-ci ilin “İllik məcmuə”sini oxuyub qurtarmışam. Sizin Ukraynada göstərdiyiniz fəaliyyət haqqında oxuyanda göz yaşlarımı saxlaya bilmədim. İstərdim ki, sizin sə’yinizin və möhkəm imanınızın məni çox ruhlandırdığını biləsiniz. Sizinlə bir ruhani ailədə olmaq mənim üçün şərəfdir. Sizə ürəkdən təşəkkür edirəm!” (Andre, Fransa).
“2002-ci ilin “İllik məcmuə”sinə görə sizə və Yehovaya minnətdarlığımı sözlərlə ifadə etmək mümkün deyil. Həyatlarının ən yaxşı illərini həbsxanalarda və həbs düşərgələrində keçirən qardaşların çoxsaylı nümunələrini göz yaşları ilə oxudum. Onlar təəccüb doğuran cəsarət əks etdirmişlər. Yehovaya artıq 27 ildir ki, xidmət etməyimə baxmayaraq, həmin qardaş və bacılardan öyrənəcəyim çox şey var. Onların nümunəsi səmavi Atamız Yehovaya olan imanımı möhkəmləndirdi” (Vera, keçmiş Yuqoslaviya).
“Bu məktubu yazmaq mənə çox xoşdur, çünki siz bütün müqavimət illəri ərzində dözüm və sadiqliyə dair yaxşı nümunə vermisiniz. Sizin Yehovaya tam əminliyinizi və imanınızı qoruyub saxlamaq qətiyyətiniz sizə şərəf gətirir. Bununla yanaşı, sınaqlar zamanı göstərdiyiniz həlimliyiniz məni bir daha əmin edir ki, Yehova Öz xalqını tərk etmir. Sizin göstərdiyiniz cəsarət və sarsılmazlıq nümunəsi sayəsində biz qarşılaşdığımız xırda çətinliklərə daha sakit yanaşa bilirik” (Tyuteriya, Fransa Polineziyası).
“İllik məcmuə”ni oxuduqdan sonra sizə yazmaya bilməzdim. Orada təsvir olunan gözəl hadisələr mənə dərin tə’sir bağışladı. Çətin anlarda bizi möhkəmləndirən məhəbbətli və qayğıkeş Atanın idarə etdiyi belə sadiq, birləşmiş təşkilatın üzvü olmaq mənim üçün şərəfdir. Çox təəssüflənirəm ki, Yehovanın belə cəsarətli və sadiq xidmətçilərinin çoxu bu qədər acılara qatlaşmış və hətta həyatlarından məhrum olmuşlar. Lakin şadam ki, onların cəsarəti və qeyrəti sayəsində çoxlu insanlar həqiqəti dərk etmiş və bizim məhəbbətli Atamızı tanımışlar” (Kolett, Niderland).
“Həyat yoldaşımla mən “İllik məcmuə”dən Ukraynada baş verən hadisələr haqqında oxuduqlarımızın ürəyimizə dərin tə’sir bağışladığını sizə deməyə bilməzdik. Siz, sadiq qardaşlar, uzun və amansız sınaqlar zamanı dözümlüyün gözəl nümunəsini göstərmisiniz. Süleymanın məsəlləri 27:11 ayəsindəki sözlərə əsasən, Yehova yəqin necə də şaddır ki, Ukraynadan olan bu qədər sadiq qardaşlar İblisin qəddar hücumlarına tab gətirərək, sarsılmazlığı qoruyub saxlamışlar” (Alan, Avstraliya).
“Mən Ukraynadakı qardaşlar haqqında oxuyanda gözlərim yaşardı. Onlar çox şeylərə mə’ruz qalmışlar: illərlə həbsxanalarda olmuş, işgəncələrə, sıxıntılara və doğmalarıyla ayrılığa tab gətirməli olmuşlar. İndiyədək sizin yığıncaqlarda xidmət edən həmin qardaşlara mənim səmimi məhəbbətimi və ehtiramımı çatdırın. Məni onların cəsarət və möhkəmliyi valeh edir. Bilirəm ki, onların güc mənbəyi Yehovanın ruhu olmuşdur. Yehova bizim yanımızdadır və bizə kömək etmək istəyir” (Sergey, Rusiya).
“Mən 2002-ci ilin “İllik məcmuə”sini oxuyur və ağlayırdım. Yığıncağımızda bir çox bacı və qardaşlar sizin barənizdə danışırlar. Siz doğrudan da çox qiymətlisiniz. Mən belə böyük ruhani ailəyə məxsus olmağıma çox şadam” (Yunxi, Cənubi Koreya).
“Sizin imanınız, təhəmmülünüz, Yehovaya və Onun Padşahlığına olan sönməz məhəbbətiniz mənə dərin tə’sir bağışladı. Hərdən elə olur ki, biz azadlığı və Yehovadan olan bol ruhani qidanı qiymətləndirməyi unuduruq. Lakin bunu sizin haqqınızda demək olmaz. Sizin iman nümunəniz bizə dərk etməyə kömək edir ki, əgər Allahımızla yaxın münasibətimiz varsa, O, bizə istənilən sınaqların öhdəsindən gəlməyə güc verəcək” (Paulu, Braziliya).
“Sizinlə bağlı hadisələr haqqında 2002-ci ilin “İllik məcmuə”sindən oxudum. Oxuduqlarım, xüsusən də Lidiya Kurdas bacının başına gələnlər mənə çox dərin tə’sir bağışladı. Məndə bu bacıya qarşı dərin məhəbbət yarandı” (Nidiya, Kosta-Rika).
“Bu gün mən 2002-ci il üçün olan “İllik məcmuə”ni oxuyub qurtardım. O, mənim Yehovaya olan imanımı möhkəmləndirdi. Mən bir şeyi — üzərlərinə rəhbərlik götürən qardaşlara qarşı bə’zilərinin şübhə toxumu səpməyə cəhd etdiklərini heç vaxt unutmayacam. Mən dərk etdim ki, məs’uliyyətli qardaşlara heç vaxt şübhə ilə yanaşmaq olmaz. Çox sağ olun! Bu ruhani qida bizi ruhlandırır və imanımızın sınana biləcəyi bir vaxta hazırlayır” (Letişiya, Birləşmiş Ştatlar).
“Gözəl “İllik məcmuə”yə görə sağ olun. Təbliğçilərin çoxunun Ukraynadakı həmimanlılarının fəaliyyəti haqqında oxumağa ilk dəfə imkanları oldu. Bu, yerli qardaşları ruhlandırdı. Çoxları, xüsusən də gənclər, xidmətdə daha fəal oldular. Bə’ziləri pioner və ya köməkçi pioner xidmətinə başladılar. Yehovaya qadağa altında xidmət edən qardaş və bacıların hadisələri hamını ruhlandırdı” (yığıncağın xidməti komitəsi, Ukrayna).
Ukraynadakı qardaşlarımızın sadiqliyi, həqiqətən də bütün dünyada Yehovanın xalqı üçün ruhlandırıcı bir mənbə oldu. Hər “İllik məcmuə”dən müntəzəm oxunulan təravətləndirici hadisələr — bu əlamətdar dövrdə imanımızı və sarsılmazlığımızı möhkəmləndirməyin yaxşı üsuludur (İbranilərə 12:1).