DOLANMAQ ÜÇÜN NƏ EDƏK?
Pulunuzu ağılla xərcləyin
Qiymətlərin qalxması hər birimiz üçün çətinlik yaradır. Amma özünüzü çarəsiz hiss etməyin. Vəziyyəti düzəltmək üçün nələrsə edə bilərsiniz.
NƏYƏ GÖRƏ VACİBDİR?
Əgər pulunuzu idarə etməyi öyrənməsəniz, xərcləriniz başınızdan aşacaq və narahatlığınız birə-beş artacaq. Hətta pulunuz az olsa da, xərclərinizi idarə etmək üçün nələrsə edə bilərsiniz.
NƏ EDƏ BİLƏRSİNİZ?
Qazandığınızdan artıq xərcləməyin. Belə etsəniz, özünüzü daha rahat hiss edəcəksiniz və gözlənilməz vəziyyətlə üzləşəndə qıraqda pulunuz olacaq.
Qazandığınızdan artıq xərcləməmək üçün büdcə tərtib edin, yəni gəlirinizi və xərclərinizi bir yerə yazın. Büdcənizə nəzər salanda zəruri xərclərinizi diqqətlə müəyyənləşdirin. Tərtib etdiyiniz büdcəyə bağlı qalmaq üçün əlinizdən gələni edin. Gəliriniz və ya qiymətlər dəyişəndə, büdcənizə də dəyişiklik edin. Evlisinizsə, bütün qərarlarınızda həyat yoldaşınızı da nəzərə alın.
Məsləhət. Mümkündürsə, nəyi isə kart və ya rəqəmsal ödəniş üsulları ilə almaqdansa, nağd alın. Belə etməklə bəzi insanlar büdcələrini daha yaxşı idarə edirlər və hətta borca girmirlər. Həmçinin vaxt ayırıb bank əməliyyatlarınızı nəzərdən keçirin və ya gündəlik və aylıq xərclərinizi qeyd edin. Pulunuzun nə qədər olduğunu bilsəniz, daha az stres keçirəcəksiniz.
Əlinizdə olanla dolanmaq çətin ola bilər. Amma yaxşı tərtib olunmuş büdcənin sizə böyük köməyi dəyər. Həmçinin siz pula görə daha az narahat olarsınız.
İşinizi itirməməyə çalışın. Bunun üçün nə edə bilərsiniz? Məsələn, işə gecikməyin, işi həvəslə görün, yardımsevər və zəhmətkeş olun, hörmətcil davranın, işdəki qaydalara əməl edin və bacarıqlarınızı püxtələşdirin.
Pulunuzu israf etməyin. Düşünün: «Bahalı və ya lazımsız şeylərə tez-tez pul xərcləyirəm?» Məsələn, bir çoxları dişi-dırnağı ilə qazandığı pulu narkotikə, qumara, siqaretə və ya həddindən çox spirtli içkiyə sərf edir. Həmçinin bu pis vərdişlər belə insanların sağlamlığı və işləri bahasına başa gələ bilər.
Dar gün üçün qırağa pul qoyun. İmkan düşəndə gözlənilməz vəziyyətlər və ya hadisələr üçün qırağa bir az pul qoyun. Belə etsəniz, özünüzün və ya ailə üzvünüzdən kiminsə səhhəti qəflətən pisləşsə, işini itirsə, yaxud digər gözlənilməz vəziyyət yaransa, tədbirli olacaqsınız.