DOLANMAQ ÜÇÜN NƏ EDƏK?
Səxavətli olun
Bahalaşma ucbatından zəruri şeyləri güc-bəla ilə alırsınızsa, bəlkə də düşünürsünüz ki, başqalarına əl tutmaq heç cür mümkün deyil. Ancaq əl tutmağın maddi çətinlikləri aşmaqda sizə xeyri dəyə bilər. Eyni anda həm qənaətcil, həm də səxavətli olmaq mümkündür.
NƏYƏ GÖRƏ VACİBDİR?
Səxavətli olmaq, hətta kiçik bir yaxşılıq etmək bizi xoşbəxt edir və özümüzə qarşı hörməti artırır. Araşdırmalar göstərir ki, kiməsə nəsə vermək insanın fiziki və psixoloji sağlamlığına müsbət təsir edə bilər. Məsələn, bu, qan təzyiqini stabilləşdirə, narahatlığı, stresi, hətta ağrıları azalda bilər. Həmçinin yuxunu da yaxşılaşdıra bilər.
Başqalarına pul və ya ehtiyac duyduğu digər şeyləri versək, ola bilsin, nəyəsə ehtiyacımız olanda uzadılan kömək əlini qəbul etmək bizə daha asan olacaq. İngiltərədə yaşayan Havard deyir: «Yoldaşımla mən başqalarına əl tutmaq, səxavət göstərmək üçün fürsətlər axtarırıq, beləcə, özümüzə də kömək lazım olanda onu qəbul etməyə çəkinmirik». Sözsüz, ürəkdən səxavət göstərən insanlar əvəzində nəsə gözləmirlər. Bununla belə, onlar bu əməlləri ilə ehtiyac anında köməyə hazır olan əsl dostlar qazana bilərlər.
NƏ EDƏ BİLƏRSİNİZ?
Əlinizdə olanı bölüşün. Bölüşəcək çox şeyiniz olmasa da, başqalarına nəsə verə bilərsiniz. Hətta bir tikə çörəyinizi belə bölüşə bilərsiniz. Dankan ailəsi ilə birgə Uqandada yaşayır. Onlar çox kasıbdırlar, buna baxmayaraq, verməyi, bölüşməyi sevirlər. Dankan deyir: «Hər bazar günü yoldaşımla birgə xudmani süfrə açıb kimisə dəvət edirik. Başqaları ilə vaxt keçirmək xoşumuza gəlir».
Sözsüz, başqalarına əl tutanda tarazlığı qorumaq lazımdır. Elə olmasın ki, ailəniz zəruri şeylərdən məhrum qalsın (Əyyub 17:5).
Məsləhət. Bir nəfərə yeməyə və ya içməyə nəsə təklif edin. Əgər bəzi əşyalar artıq sizə lazım deyilsə, ehtiyacı olan dost-tanışınıza verə bilərsiniz.
Başqa üsullarla verin. Ən dəyərli hədiyyələrdən bəzilərini pulla almaq lazım gəlmir. Məsələn, biz başqalarının qeydinə qalmaq üçün onlara vaxt və diqqət ayıra bilərik. Hətta bir neçə xoş söz belə onlar üçün hədiyyə ola bilər! Buna görə də insanlara onların sizin üçün nə qədər dəyərli olduğunu və ya onları sevdiyinizi deyin.
Məsləhət. İnsanlara ev, təmir və ya digər işlərdə kömək edin. Dostunuza minnətdarlığınızı bildirmək üçün açıqca yazın. Adicə onu düşündüyünüzü göstərmək üçün mesaj yaza bilərsiniz.
Səxavət göstərmək üçün yollar axtarsanız, daha xoşbəxt olacaqsınız.