Sülh içində yeni dünya bir zaman gələcəkmi?
Bu traktat üzərindəki rəsmə baxarkən sizdə hansı hisslər yaranır? Ürəyiniz, təsvir edilmiş sülhün, xoşbəxtlik və əmin–amanlığın hökmranlıq etdiyi belə bir dünyada yaşamaq həsrətini çəkmirmi? Əlbəttə çəkir. Ancaq cansız kağız üzərində təsvir edilmiş həyatın, nə vaxtsa reallığa çevriləcəyinə inanmaq olarmı?
İnsanların əksəriyyəti bunun inanılmaz olduğunu düşünür. Çünki müharibələr, cinayətkarlıqlar, xəstəliklər, aclıq və qocalıq bugünkü gerçəkliyin yalnız bir hissəsidir. Amma ümid üçün əsas var. Müqəddəs Kitabda qabaqcadan bildirilmişdir ki, Allah “yeni göylər ilə yeni yer” yaradacaq və “əvvəlki şeylər anılmayacaq və fikrə gəlməyəcək” (İşaya 65:17).
Müqəddəs Yazılara əsasən bu “yeni göylər” və “yeni yer” — yeni maddi göylər ilə cismani yer deyil. Cismani yer və göylər mükəmməl yaradılmış və Müqəddəs Yazılara əsasən əbədiyyən duracaq (Məzmur 89:36, 37; 104:5). “Yeni yer” — yer üzündə yaşayacaq saleh insan cəmiyyətini, “yeni göylər” isə bu cəmiyyəti idarə edəcək mükəmməl göylər padşahlığını və ya rəhbərliyini nəzərdə tutur. Bəs “yeni yerin”, yə’ni gözəl yeni dünyanın olacağına inanmaq həqiqətə uyğundurmu?
Xatırlayaq ki, bu cür gözəl şərait, Allahın yerə aid olan ilk niyyətinə daxil idi. O, ilk insan cütünü Edendə — yer üzü Cənnətdə yerləşdirərək, onlara maraqlı iş tapşırdı: “Səmərəli olun və çoxalın və yer üzünü doldurun və ona sahib olun” (Təkvin 1:28). Bəli, Allahın niyyəti ondan ibarət idi ki, ilk insan cütü övladlara sahib olsun və tədricən yer üzünü Cənnətə çevirsin. Conradan ilk insanlar Allaha itaətsiz olmağı qərara alaraq, əbədi yaşamağa layiq olmadıqlarını sübut etsələr də, Allahın ilk niyyəti dəyişmədi. Bu niyyət yeni dünyada mütləq həyata keçəcəkdir! (İşaya 55:11).
Müqəddəs Yazılarda və’d edilmiş Məsih, Allahın tə’yin etdiyi padşah vəzifəsində xidmət edərək həmin yeni dünyaya rəhbərlik edəcək (Məzmur 2:2, 6–9; Daniel 7:13, 14). Məsih dünyanı bütün pisliklərdən azad edəcək və o zaman “Məzmurlar” kitabında yazılan “salehlər yeri miras alar və onda əbədiyyən yaşayarlar” sözləri yerinə yetəcək (Məzmur 37:29).
Allahın yeni dünyasındakı həyat
Məsihin rəhbərliyi, Allahın ilk niyyətinə əsasən yer üzündə Onun xalqının sevincinə səbəb olacaq əvəzedilməz xeyir–dualar gətirəcək. Nifrət və anlaşılmazlıqlar isə keçmişlə bağlı dumanlı xatirələrə çevriləcək, nəticədə bütün insanlar bir–birləri ilə əsl dost kimi davranacaqlar. Allah Müqəddəs Yazılarda və’d edir ki, “yerin ucuna qədər cəngləri” durduracaq, “millət millətə qarşı qılınc qaldırmayacaq və artıq döyüşə öyrənməyəcəklər” (Məzmur 46:9; İşaya 2:4).
Nəhayət yer üzü bağa bənzər gözəl Cənnət dünyasına çevriləcək. Müqəddəs Yazılarda deyilir: “Çöl və quraq yer şadlanacaq; və əhalisiz yer sevinəcək və nərgiz kimi çiçəklənəcək”, “çünki çöldə sular və səhrada sellər fışqıracaq” (İşaya 35:1, 6, 7).
İnsanların Cənnət dünyasında xoşbəxt olmaları üçün hər bir əsasları olacaqdır. Onlar qida çatışmazlığından bir daha aclıq çəkməyəcəklər. Müqəddəs Yazılarda deyilir ki, yer üzündə “buğda bolluğu” olacaq (Məzmur 67:6; 72:16). Hər kəs öz əllərinin bəhrəsindən istifadə edəcək, çünki Allah və’d edir: “Bağlar salacaqlar və meyvəsini yeyəcəklər”, “onlar əkib də başqası yeməyəcək” (İşaya 65:21, 22).
Yeni dünyada insanlar bir daha çoxmənzilli darısqal binalarda yaxud da acınacaqlı şəraiti olan daxmalarda yaşamayacaqlar, çünki Allah zəmanət verir ki, “evlər tikəcəklər və yaşayacaqlar”, “onlar tikib də başqası yaşamayacaq”. Müqəddəs Yazılarda belə bir və’d də verilir: “Boş yerə zəhmət çəkməyəcəklər” (İşaya 65:21–23).
Vaxtilə Allahın Padşahlığı, Eden bağında heyvanlar arasında və heyvanlarla insanlar arasında mövcud olan sülhü də bərpa edəcəkdir. Müqəddəs Yazılarda deyilir: “Qurd quzu ilə bərabər yaşayacaq və pələng oğlaqla bərabər yatacaq; və buzov və gənc aslan və öküz bir yerdə olacaq; və onları balaca bir uşaq otaracaq” (İşaya 11:6–9; Hoşea 2:18).
Bircə təsəvvür edin: Cənnət dünyasında insanlar xəstəlik və bədən zəifliklərindən azad olacaqlar! Allahın Kəlamı zəmanət verir ki, “orada yaşayan: “Xəstəyəm”, deməyəcək” (İşaya 33:24). Allahın Kəlamında, həmçinin deyilir ki, ölüm aradan qaldırılacaq və “Rəbb Yehova bütün üzlərdən göz yaşlarını siləcək” (İşaya 25:8).
Bu sizin üçün necə mümkündür
Yeni dünyaya olan ümid, sözsüz ki, gözəldir. Ona yalnız xəyal kimi baxmaq olmaz. Çünki Allah öz və’dlərini həmişə yerinə yetirir (İşaya 46:9, 10). Ancaq gələcək yer üzü Cənnətdə əbədi yaşamaq üçün, biz müəyyən tələblərə müvafiq tərzdə davranmalıyıq. Hansı tələblərə?
Bu tələblərin bə’ziləri “Tövrat” və “Zəbur”da (“Əhdi Ətiq”) yerləşir. Onlar həmçinin, Məsih haqqında ətraflı mə’lumat təqdim edən “Əhdi Cədid” kitabında da qeyd olunub. Sonradan tərtib edilmiş və insanların əksəriyyətinə “İncil” adı ilə mə’lum olan bu kitab da, “Tövrat” və “Zəbur” kimi Allahdan ilham almışdır. Bütün bu kəlamlar birlikdə Müqəddəs Yazılar və ya Müqəddəs Kitab adlanır. Bu kitabların tərkibinə daxil olan gözəl və’dlərdə deyilir ki: “Allah onların gözlərindən bütün yaşları siləcəkdir. Artıq ölüm mövcud olmayacaq; artıq nə kədər, nə fəryad, nə də ağrı olacaqdır, çünki əvvəlki şeylər keçib getdi” (Vəhy 21:4; həmçinin Hoşea 13:14–ə baxın).
Bu kitabçanı nəşr edən Yehovanın Şahidləri, Xristian kilsəsinə və Yəhudi dininə mənsub deyillər. Amma onlar, Allahın iradəsi haqqında tam bilik əldə etmək üçün, yeganə mənbə kimi Müqəddəs Yazılara əsaslanırlır. Yehovanın Şahidləri dünyanın hər bir hissəsində sə’ylə çalışaraq, insanları həqiqi Allah olan Yehova ilə tanış edirlər ki, həmin insanlar sülh içində yeni dünyada əbədiyyən yaşaya bilsinlər (Mika 4:1–4).