İsa və’d edilmiş Məsihdir

YEHOVA Allah insanların Məsihi tanıya bilmələri üçün qayğı göstərmişdir. Müqəddəs Kitabda adları çəkilən peyğəmbərlərin bir çoxu və’d edilmiş Xilaskarın doğulmasını, xidmətini və ölümünü ətraflı surətdə təsvir etmişdir. Bu peyğəmbərliklərin hamısı İsa Məsihin üzərində yerinə yetdi. Onlar hərtərəfli və tam dəqiqliyi ilə təsvir olunmuşdur. Buna əmin olmaq üçün gəlin, Məsihin doğulmasına və həyatının körpəlik çağına dair bə’zi peyğəmbərlikləri nəzərdən keçirək.

Yeşaya peyğəmbər Məsihin Davud padşahın nəslindən gələcəyini əvvəlcədən xəbər vermişdi (Yeşaya 9:7). Mə’lum olduğu kimi, İsa Davudun nəslindən idi (Matta 1:1, 6-17).

Allahın başqa bir peyğəmbəri olan Mikeya, bu körpənin ‘Bet-Lexem Efratada’ doğulacağını və sonradan hökmdar olacağını əvvəlcədən bildirmişdi (Mikeya 5:2). İsa doğulan zaman İsraildə iki Bet-Lexem var idi. Onlardan biri ölkənin şimalında, Nazaretin yaxınlığında yerləşirdi. Digəri isə Yəhudeyada, Yerusəlimin yaxınlığında yerləşirdi və əvvəllər Efrata adlanırdı. İsa məhz bu şəhərdə anadan oldu. Bununla da Mikeyanın peyğəmbərliyi yerinə yetdi (Matta 2:1).

Həmçinin əvvəlcədən deyilmişdi ki, Allah Öz Oğlunu ‘Misirdən çağıracaq’. Valideynləri İsa ilə birlikdə Misirə getmişdilər. Hirodun ölümündən sonra, onlar geri qayıtdılar və beləcə peyğəmbərlik yerinə yetdi (Huşə 11:1; Matta 2:15).

200-cü səhifədəki cədvəlin ikinci sütununda Məsih haqqındakı peyğəmbərlikləri göstərən ayələr gətirilir. Zəhmət olmasa, bu ayələri peyğəmbərliklərin yerinə yetdiyini göstərən üçüncü sütundakı ayələrlə müqayisə edin. Bu, imanınızı daha da möhkəmləndirəcək və Allahın Kəlamının e’tibara layiq olduğuna sizi əmin edəcək.

Nəzərə almaq lazımdır ki, bu peyğəmbərliklər İsanın doğulmasından yüz illər əvvəl yazılmışdır. İsanın özü bu haqda belə demişdir: «Mənim haqqımda Musanın Qanununda, peyğəmbərlərin yazılarında və Məzmurlarda yazılmış bütün şeylərin yerinə yetirilməsi lazımdır» (Luka 24:44). Müqəddəs Kitabı tədqiq etdikcə görəcəksiniz ki, bütün bu peyğəmbərliklər ən xırda təfsilatlarına kimi yerinə yetmişdir.