Bol xeyir-dua biçmək üçün, yaxşı vərdişlər becərin
1 Sən təzəcə məsihçi olan zaman, yəqin ki, ruhani fəaliyyətini qaydaya salmağa, yə’ni Müqəddəs Kitabı öyrənməyə, məsihçi görüşlərinə, təbliğə və dua etməyə lazımi diqqət yetirmək üçün çox çalışmalı olmusan. Yehova sənin sə’ylərinə xeyir-dua vermiş və sən ruhani cəhətdən inkişaf etmisən. Ola bilər vəftiz olduğun gündən xeyli vaxt keçmişdir. Sən öz məsihçilik yolunun başlanğıcında olduğu kimi, indi də ruhani işlərə kifayət qədər vaxt ayırırsanmı?
2 Özünü yoxla. Sənin hər gün Müqəddəs Kitabı oxumaq vərdişin varmı? Bu bol xeyir-dua gətirir (Yeşua 1:8; Məz. 1:2, 3). Qədim İsraildə hər bir padşah, Qanundan bir surət köçürüb «ömür boyu hər gün» oxumalı idi. Nə üçün? Bunun sayəsində padşahın ürəyi itaətkar olur və Yehovadan qorxmağı öyrənirdi ki, Onun əmrlərindən yayınmasın (Qanun. t. 17:18-20). Müqəddəs Kitabı hər gün oxumaq indi də bu pis və pozğun dünyada nöqsansız və saf qalmaqda, həmçinin təbliğ işinə tam hazır olmaqda bizə kömək edir (Filip. 2:15; 2 Tim. 3:17).
3 İsa öz adəti üzrə sinaqoqa gedirdi. Orada Müqəddəs Yazılar müzakirə edilirdi (Luka 4:16). Şübhəsiz bu onu sınaqlar və əzablar qarşısında möhkəmləndirdi. Yığıncaq görüşlərində biz ruhani tə’lim alır və ‘müştərək təşviq olunmaqla’ çox möhkəmlənirik (Rom. 1:12). Yığıncaqdakı qardaşlarımızla birlikdə olmaq, bu axır günlərin çətinliklərinə tab gətirməyə qüvvə verir (İbr. 10:24, 25). Yığıncağın bütün görüşlərində əvvəlki kimi iştirak etmək vərdişin varmı?
4 Müqəddəs Yazılarda deyilir ki, həvarilər «hər gün mə’bəddə və evdən–evə» birgə müjdəni bəyan edirdilər (Həv. iş. 5:42). Əgər bizim hər gün təbliğ etmək imkanımız yoxdursa, onda hər həftə xidmətə çıxmağa vərdiş edə bilərikmi? Beləliklə biz Allahın Kəlamından daha məharətlə istifadə edəcəyik. Müqəddəs Kitab həqiqətini insanlarla bölüşəndə maraqlı, ürəkaçan hadisələrə rast gələcəyik.
5 Daniel peyğəmbər Yehovaya bütün ömrü boyu ‘daim qulluq etdiyi’ üçün çoxlu xeyir-dualar aldı. Məsələn, onun müntəzəm dua etmək vərdişi var idi (Dan. 6:10, 16, 20). Biz də müntəzəm olaraq Yehovaya ürəkdən dua etsək, O, bizə müqəddəs ruhunu verəcək (Luka 11:9-13). Bundan əlavə, Yehova bizə yaxınlaşacaq və biz Onunla sıx münasibətlər yarada biləcəyik (Məz. 25:14; Yaq. 4:8). Bundan dəyərli nə ola bilər! Ona görə də, gəlin faydalı ruhani vərdişləri sə’ylə inkişaf etdirək, onda biz Yehovanın bol xeyir-dualarını biçəcəyik.
[Öyrənilmə üçün olan suallar]
1. Nə üçün öz ruhani işlərinin qrafikinə diqqət yetirmək lazımdır?
2. Müqəddəs Kitabı gündəlik oxumaq bizə nədə kömək edir?
3. Yığıncaq görüşlərində müntəzəm iştirak edəndə hansı bəhrələri biçirik?
4. Hər həftə təbliğ etmək bizə hansı faydanı gətirəcək?
5. Nə üçün Yehovaya müntəzəm dua etmək vacibdir?