Yeni şagird hazırlamaqda yığıncağın bütün üzvləri iştirak edə bilər
1 Yeni şagird bir insanın zəhmətinin bəhrəsi deyil. Müqəddəs Kitabı öyrənən şəxsin ruhən böyüməsinə kömək etmək üçün Yehova Özünün bütün ‘əməkdaşlarını’ istifadə edə bilər (1 Kor. 3:6-9). Biz yeni gələnlərə yalnız məsihçi görüşlərində verdiyimiz səmimi şərhlərlə deyil, həmçinin Allahın ruhunun həyatımıza tə’sirinin aydın sübutu olan gözəl davranışımızla da kömək edirik (Yəh. 13:35; Qal. 5:22, 23; Efes. 4:22, 23). Yenilərə kömək etmək üçün daha nə edə bilərik?
2 Bütün yığıncaq. Hər birimiz yığıncağa yeni gələnləri səmimi salamlamaqla və görüşdən əvvəl və sonra ünsiyyət etməklə onlarla maraqlandığımızı göstərə bilərik. Yığıncağa ilk gəlişini xatırlayan bir kişi deyir: «Məni heç tanımayan bu qədər insanın mənə səmimi, mehriban münasibətini uşaqlıqdan ziyarət etdiyim kilsədə görməmişdim. Həqiqəti tapdığım tamamilə aydın idi». Bu kişi görüşə gəldiyi həmin gündən yeddi ay sonra vəftiz olundu.
3 Müqəddəs Kitabı öyrənən şəxs ruhən inkişaf edirsə, onu səmimiyyətlə tə’riflə. O, müqavimətə tab gətirirmi? Yığıncaq görüşlərinə müntəzəm gəlirmi? Şərh verməyi qərara alıbmı? Teokratik Xidmət Məktəbinə yazılıbmı, yaxud təbliğ etməyə başlayıbmı? Onu etdiyi nailiyyətlərə görə tə’riflə. Bu onu möhkəmləndirəcək və ruhlandıracaq (Sül. məs. 25:11).
4 Müqəddəs Kitab öyrənməsini keçirən təbliğçi. Bə’zi təbliğçilər digər bacı-qardaşları öyrənməyə də’vət etməklə, Müqəddəs Kitabı öyrətdikləri adamın yığıncağın ayrı-ayrı üzvləri ilə tanış olmasına kömək etmişlər. Öyrətdiyin adamı yığıncaq görüşlərinə mümkün qədər tez də’vət et. Görüşlərə gəldiyi ilk gündən onu yığıncağın üzvləri ilə tanış et. O, pis vərdişin, məsələn siqaret çəkməyin, öhdəsindən gəlmək üçün mübarizə aparırmı? Müqəddəs Kitabı öyrəndiyinə görə ailəsindən kim isə ona müqavimət göstərirmi? Əgər belədirsə, o, eyni problemlərlə qarşılaşmış və onlara üstün gəlmiş təbliğçilərlə söhbət etməkdən faydalana bilər (1 Pet. 5:9).
5 Yeni gələnlər yığıncağın ruhani dəstəyinə ehtiyac duyurlar. Yığıncağın hər bir üzvü yenilərə səmimiyyətlə maraq göstərərək onlara nailiyyətlər etməkdə kömək edə bilər.