Ətraflı şəhadət verin
1. Həvari Pavel xidmətlə bağlı hansı yaxşı nümunəni qoyub?
1 «Xidmətini tam yerinə yetir» (2 Tim. 4:5). Həvari Pavel Timoteyə bu məsləhəti verərkən vicdanı təmiz idi. Bizim eranın 47-ci ilindən 56-cı ilinə qədər xüsusi təyinatlı müjdəçi kimi Pavel üçüncü səyahətini başa vurmuşdu. «Həvarilərin işləri» kitabında Pavelin «ətraflı şəhadət» verməsi dəfələrlə xatırlanır (Həv. iş. 23:11; 28:23). Bəs biz bunu necə edə bilərik?
2. Evdən-evə təbliğ zamanı ətraflı şəhadət vermək üçün nə edə bilərik?
2 Evdən-evə. Evdə tapa bilmədiyimiz insanların yanına müxtəlif vaxtlarda gəlməliyik ki, onlara xoş xəbəri çatdıraq. Adətən, ailə başçıları axşamlar və ya həftəsonları evdə olurlar. Təkrar-təkrar gəlməklə hər evdə heç olmasa bir nəfərlə söhbət etməyə çalışmalıyıq. Bəs əgər bütün cəhdlərinə baxmayaraq evdə heç kimi tapa bilmirsənsə, onda necə? Belə olan halda məktub yazmağın və ya zəng etməyin köməyi dəyə bilər.
3. İnsanlar qarşısında və qeyri-rəsmi şahidlik vermək üçün hansı imkanlar var?
3 İnsanlar qarşısında və qeyri-rəsmi şahidlik. Bu gün Allahın xidmətçiləri onlara qulaq asan hər kəsə «hikmət»i bəyan edirlər. Bəzən buna «bayırda» və ya «meydanlarda» rast gəlmək olar (Sül. məs. 1:20, 21). Gündəlik işlərimizlə məşğul olarkən şahidlik etməli olduğumuzu yadda saxlayırıqmı? Demək olarmı ki, biz bütün vaxtımızı Allahın sözünü yaymağa həsr edirik? (Həv. iş. 18:5). Əgər belədirsə, deməli, ətraflı şəhadət vermək məsuliyyətimizi yerinə yetiririk (Həv. iş. 10:42; 17:17; 20:20, 21, 24).
4. Dua etməyin və düşünməyin sayəsində necə əsaslı şəhadət verə bilərik?
4 Ancaq bəzən şəxsi zəifliklərimiz və ya utancaqlığımız ucbatından şahidlik verməyə çəkinə bilərik. Şübhəsiz, Yehova qabiliyyətlərimizin məhdud olduğunu başa düşür (Məz. 103:14). Lakin belə vəziyyətlə üzləşəndə Yehovaya dua edə bilərik ki, danışmaq üçün bizə cəsarət versin (Həv. iş. 4:29, 31). Həmçinin şəxsi öyrənmə ilə məşğul olmaqla və Allahın Kəlamı üzərində düşünməklə biz misilsiz dəyərə malik olan xoş xəbəri daha dərindən anlaya bilərik (Filip. 3:8). Bu, bizi xoş xəbəri səylə bəyan etməyə təşviq edəcək!
5. Yoel peyğəmbərin sözlərinin yerinə yetməsində biz necə iştirak edə bilərik?
5 Yoel peyğəmbər qabaqcadan demişdi ki, Yehovanın böyük və dəhşətli günü gələnə qədər Allahın xalqı yoldan çıxmayacaq və təbliğ etmək işində heç nə onların qarşısını ala bilməyəcək (Yoel 2:2, 7—9). Gəlin heç vaxt təkrarlanmayacaq bu şahidlik işində tam iştirak etmək üçün əlimizdən gələni edək!