Əməldə görünən məhəbbət

YOMARA bacı və qardaşları Marselo ilə İver Qvatemalada balaca bir kənddə yaşayır. Yomara Yehovanın Şahidləri ilə Müqəddəs Kitabı araşdırmağa başladı, daha sonra qardaşları da ona qoşuldu. Amma bir problem var idi. Onların üçünün də görmə qabiliyyəti tam məhduddur və Brayl əlifbası ilə oxumağı bilmirdilər. Buna görə də onlara Müqəddəs Kitab dərsi keçən qardaş abzasları və ayələri onlar üçün oxuyurdu.

Yığıncaq görüşlərinə getmək də onlar üçün çətin idi. Ən yaxın ibadət evi Yomaragildən 40 dəqiqə uzaqlıqda idi. Ona görə də onlar təkbaşına ora gedə bilmirdilər. Amma yığıncaqdakı bacı-qardaşlar bütün görüşlərdə iştirak edə bilmələri üçün onları aparıb-gətirirdi. Yomara və qardaşları həftəiçi görüşlərdə şagird tapşırıqları almağa başlayanda isə bacı-qardaşlar onlara tapşırıqlarını əzbərləməyə kömək edirdi.

2019-cu ilin may ayında Yomaragilin kəndində yığıncaq görüşləri keçirilməyə başladı. O vaxt bir öncül ər-arvad onların kəndinə köçdü. Bu ər-arvad Yomaragilə Brayl əlifbasını öyrətməyi ürəkdən istəyirdi, baxmayaraq ki, özləri də bu əlifbanı bilmirdi. Buna görə də onlar kitabxanaya gedirdi və başqalarına Brayl əlifbasını necə öyrədə biləcəklərinə dair kitablar oxuyurdular.

Yomaragil bir neçə ayın içində Brayl əlifbasını yaxşıca öyrəndilər. Bu onların Yehova ilə münasibətini daha da möhkəmləndirdi. İndi onların üçü də öncül kimi xidmət edir. Marselo həm də yığıncaq xidmətçisidir. Onlar bütün həftə boyu ruhani işlərlə məşğul olurlar. Bu bacı-qardaşların şövqü hamıya sirayət edir.

Yomara, Marselo və İver yığıncağın onlara göstərdiyi məhəbbətə, dəstəyə görə çox minnətdardır. Yomara deyir: «Elə ilk tanışlığımızdan Yehovanın Şahidləri bizə əsl məsihi məhəbbəti göstərdilər». Marselo əlavə edir: «Bizim yığıncaqda çox yaxşı dostlarımız var. Biz bir-birinə məhəbbət telləri ilə bağlı olan beynəlxalq qardaşlığın bir hissəsiyik». Yomara və qardaşları yer üzünün Cənnətə çevriləcəyini öz gözləri ilə görəcəkləri vaxtı həsrətlə gözləyirlər (Zəb. 37:10, 11; Əşy. 35:5).