«Müharibə səsləri, müharibə xəbərləri» eşitdiyimiz bir zəmanədə göstərilən yardım işləri

Eşitdiyimiz «müharibə səsləri, müharibə xəbərləri» bizi təəccübləndirmir, çünki biz axırzamanda yaşayırıq (Mətta 24:6). Bu müharibələr ucbatından bacı-qardaşlarımız da problemlərlə üzləşir. Amma onlara lazımi kömək göstərilir. Rəhbərlik Şurasının 2022-ci il üçün olan 3-cü müraciətində Şərqi Avropada Ukraynadakı müharibədən zərərçəkənlərə göstərilən kömək barədə danışılırdı. Yaxınlıqda müharibə gedə-gedə qardaşlar bunu necə edir? Göstərilən yardım işi Ukraynadakı dindaşlarımıza necə təsir edir?

Nəyə ehtiyac var və bu necə çatdırılır?

24 fevral 2022-ci il tarixində Ukraynada müharibənin başladığı gün Koordinatorlar komitəsi Ukraynadakı bacı-qardaşlara kömək etmək üçün müəyyən büdcə ayrılmasını təsdiqlədi. Ukrayna filialı dərhal yardım ləvazimatları alaraq bacı-qardaşlara payladı. Filial bunu 27 Zərərçəkənlərə yardım komitəsi vasitəsilə etdi.

Bundan əlavə, Yehovanın Şahidlərinin baş idarəsində xidmət edən qardaşlar dərhal Ukrayna filialına necə kömək edə biləcəklərini düşünməyə başladı. Koordinatorlar və Nəşriyyat komitəsi ehtiyacı müəyyən etmək və bir iş planı tərtib etmək üçün Ümumdünya Təchizat şöbəsindən Ukrayna və Polşa filiallarının təmsilçiləri ilə əməkdaşlıq etməsini xahiş etdi. Təchizat, Çatdırılma və Hüquq şöbələri, Ukrayna filialının komitə üzvü və Ümumdünya Təchizat şöbəsinin üzvləri lazımi işlərin görülməsi üçün hər gün görüş keçirdilər.

Ümumdünya Təchizat şöbəsinin əməkdaşı Cey Sviney deyir: «Biz ilk öncə müəyyən etməli idik ki, bacı-qardaşlarımız nəyə ehtiyac duyur. Biz onları tez-tez istifadə etdikləri qida və gigiyenik vasitələrlə təmin etmək istəyirdik. Həqiqətən nəyə ehtiyac olduğunu müəyyən etmək problemin yalnız bir hissəsi idi. Həmçinin müəyyən etməli idik ki, bütün bu yardım vasitələri müharibə vaxtı Ukraynaya mümkün olan ən təhlükəsiz və sürətli yolla necə çatdırıla bilər».

9 mart 2022-ci il tarixində Ukraynadakı bacı-qardaşların nələrə ehtiyac duyduğu müəyyən olundu. İçərisində əsas qida ehtiyacları olan konservləşdirilmiş ət və balıq, taxıl, düyü, lobya, həmçinin sabun və tualet kağızı kimi əsas gigiyenik vasitələrin olduğu qutular hazırlanacaqdı. Bir insanın dörd həftəlik ehtiyacını qarşılamaq üçün nəzərdə tutulan bu qutuların qiymətinin 65 dollar olacağı təxmin edilirdi. Minlərlə dindaşımızın bu yardıma ehtiyacı olduğunu nəzərə alaraq Koordinatorlar komitəsi bu iş üçün külli-miqdarda məbləğin ayrılmasını təsdiq etdi. Bəs bu yardım ləvazimatları qardaşların həyatını təhlükəyə atmadan lazımi yerlərə necə çatdırılacaqdı?

Martın 13-ü Polşadan iki qardaş Polşa filialından Lvov (Ukrayna) yaxınlığındakı anbara test üçün çatdırılma etdi. Test üçün çatdırılmadan öncə Polşa və Ukrayna filiallarında xidmət edən qardaşlar iki könüllüyə bu iş üçün hazırlıq görməyə kömək etdi. Filial sərhədi keçib yardım ləvazimatlarını çatdırmaq üçün lazımi sənədləri hazırladı və tədbir gördü ki, qardaşların istifadə edəcəkləri maşının üzərində yardım ləvazimatları apardıqlarını göstərən aydın işarə olsun. Həmçinin Ukraynadakı yerli qardaşlarla əməkdaşlıq edərək müəyyən etdilər ki, sərhədi keçdikdən sonra ən tez hansı yol ilə gedə bilərlər. Bu cür yaxşı hazırlığın və Yehovanın köməyi sayəsində yardım ləvazimatları Lvova çatdı və 24 saat içində Zərərçəkənlərə yardım komitələrinə göndərildi. Sonra isə qardaşlarımız sağ-salamat Polşaya geri qayıtdılar.

İlk çatdırılma uğurlu olsa da, qardaşlar bir tondan daha az yardım ləvazimatı apara bilmişdi. Hələ də təxminən 220 ton yardım ləvazimatına ehtiyac var idi. Bu qədər çox ləvazimatı daşıyıb mümkün qədər tez bir vaxtda necə paylaya bilərdik?

«Xalqın hazır duracaq»

Ukraynada baş verən hadisələrin dindaşlarımıza necə təsir etdiyi barədə jw.org saytındakı xəbərləri oxuyandan sonra dünyanın müxtəlif yerlərindən insanlar onlara kömək etmək istədiklərini bildirib. Uzaqda yaşayanlar Yehovanın Şahidlərinin ümumdünya işinə ianə etməklə maddi yardım göstəriblər, çünki bilirdilər ki, bu ianələr ən yaxşı şəkildə istifadə olunacaq. Qonşu ölkələrdə yaşayanlar isə zərərçəkənlərə vaxt, güc və şəxsi vəsaitlərindən istifadə etməklə dəstək oldu. Gəlin bir neçə nümunəyə baxaq.

Polşada könüllülər on minlərlə humanitar yardım qutuları, uşaqlar isə öz əlləri ilə açıqcalar hazırladı. Polşa filialındakı Təchizat şöbəsinin əməkdaşı Bartoş Koşçelniyak bölüşür: «Zəbur 110:3 ayəsini dəfələrlə oxudum. Orada deyilir ki, Yehovanın xalqı hazır duracaq. Ancaq öz gözlərimlə yüzlərlə könüllünün dərhal kömək çağırışına hay verdiyini və işə başladığını görəndə bu sözlərin doğruluğuna şəxsən əmin oldum».

Beynəlxalq yükdaşıma şirkəti olan bir qardaşımız kömək üçün öz yük maşınlarını təklif etdi və onları lazımi qədər yanacaqla təmin etdi. Qardaş bölüşür: «Bu, bacı-qardaşlara və Yehovaya məhəbbətimi göstərmək üçün bir fürsət idi. Çox şadam ki, bu işdə mən də nə isə edə bildim». Təxminən 7700 litrdən çox yanacaq ianə olundu. Qardaşlar öz vaxtlarını və enerjilərini istifadə edərək haradasa 48000 kilometr yol qət etdilər.

Böyük həvəs və məhəbbətlə çalışan bacı-qardaşlarımızın sayəsində 28 martda, yəni test üçün çatdırılmadan cəmi 15 gün sonra 110 ton qida, gigiyenik və tibbi yardım vasitələri Ukraynaya çatdırıldı. Həmçinin dindaşlarımızın və tədarükçülərin səxavətli ianələri sayəsində yardım işi üçün ayrılan məbləğə xeyli qənaət edildi. Bu günə qədər Yehovanın Şahidləri Ukraynaya 209 tondan çox yardım göndərib. Bu yardım vasitələrinin bacı-qardaşlarımıza hansı köməyi dəydi?

«Qutu və açıqcalardan məhəbbətinizi duyduq»

Bu qutular Lvova çatan kimi, Ukraynadakı Zərərçəkənlərə yardım komitələri onları ehtiyacı olan kəslərə payladı. Yardım qutuları bir çox şəhərlərə göndərildi. Bu şəhərlərdən bəziləri Lvovdan 1300 km aralıda yerləşirdi. Qardaşlar operativ və sürətli işləsə də, yardımın çatdırılmasına xeyli vaxt lazım gəldi.a

Ukraynanın filial komitəsinin üzvü olan Markus Raynhart deyir: «Yaşanan bu hadisələr zamanı, bir çox dindaşımız Yehovanın sevgisini bilavasitə gördü. Həmçinin onlar başa düşdülər ki, hələ fəlakət baş verməmiş təşkilatdan gələn göstərişlərə dərhal əməl etmək nə qədər vacibdir. Məsələn, göstəriş verilmişdi ki, evdə bir neçə həftəlik qida və su ehtiyatı saxlasınlar. Kiyevdə ağsaqqal kimi xidmət edən Anton adlı qardaş bu göstərişlə bağlı belə deyir: “Təşkilat bizi bu çətin günlərə qabaqcadan hazırlamışdı, buna görə qardaşlara minnətdarlığımızı bildiririk. Qida, su və radiomuzun olması sözün əsl mənasında həyatımızı xilas etdi”. Bacı-qardaşlara minnətdarıq ki, təşkilatdan gələn göstərişlərə əməl etdilər. Bunun sayəsində həm özləri sağ qala bildilər, həm də təşkilata yardım işlərini təşkil edə bilmək üçün vaxt qazandırdılar».

Kömək gəlib çatanda bacı-qardaşlar nə hisslər keçirtdi? Xarkovda yaşayan Mikola və Zinayda hisslərini bölüşür: «Qayğınız, məhəbbətiniz ürəyimizi isindirdi. Ərzaq və tibbi vasitələrə görə çox minnətdarıq. Bu işdə Yehovanın əli açıq-aydın görünür». Eyni ərazidə yaşayan Valentina deyir: «Müharibə başlayandan mağazaların qarşısında uzun növbələr olurdu. Bəzən ən vacib olan şeyləri belə almaq mümkün deyildi. Amma Yehova bu problemi görürdü. O, yardım qutularını evlərə çatdırmaq üçün qardaşlar təyin etdi və bu qutularda bizə nə lazım idisə, məhz həmin şeylər var idi. Bu cür çətin anlarda, vəziyyət çıxılmaz görünəndə, Yehovanın və onun təşkilatının qayğısını xüsusilə hiss edirsən... Lazım olan anda ehtiyac duyduğun qayğını və dəstəyi görmək necə də gözəldir».

Mariupoldan qaçan Yevhen və İrina deyir: «Ailəmizə göstərdiyiniz qayğı və dəstək üçün çox minnətdarıq. Həqiqətən, bu kömək düz vaxtında gəldi. Qutuları açanda orada ancaq ərzaqları görəcəyimizi düşünürdük, amma sonra açıqcaları da gördük. Bu qutu və açıqcalardan məhəbbətinizi duyduq.

Şübhə yoxdur ki, «müharibə səsləri, müharibə xəbərləri» eşitdiyimiz bir dövrdə aparılan yardım işlərində Yehovanın ruhunu və rəhbərliyini aydın görürük. Bu işdə donate.jw.org saytı vasitəsilə etdiyiniz ianələr xüsusilə vacib rol oynayır. Səxavətlə etdiyiniz ianələrə görə sizə çox minnətdarıq.

Mümkün qədər tez və təhlükəsiz şəkildə göstərilən yardım işləri

1. 

   24 fevral 2022-ci il: Koordinatorlar komitəsi Ukrayna filialının yardım ləvazimatlarını paylaması üçün lazım olan məbləği təsdiq etdi.

2. 

   24 fevral-8 mart 2022-ci il: Ukrayna filialı bəzi yardım ləvazimatları aldı və Zərərçəkənlərə yardım komitələri vasitəsi ilə paylamağa başladı. Filial həmçinin Polşadan yardım ləvazimatları qəbul edib paylamaq üçün işlər görməyə başladı.

3. 

   9 mart 2022-ci il: Koordinatorlar komitəsi Ukraynaya humanitar yardım göstərilməsinə razılıq verdi.

4. 

   10-12 mart 2022-ci il: Qardaşlar Polşadan Lvova (Ukrayna) humanitar yardım daşımaq üçün test məqsədilə çatdırılma planlaşdırdı.

5. 

   13 mart 2022-ci il: Polşadan Lvova (Ukrayna) test üçün yardım ləvazimatları çatdırıldı.

6. 

   14-16 mart 2022-ci il: Yerli layihə-inşaat şöbəsinin könüllüləri ərzaq və gigiyenik vasitələrdən ibarət yardım qutularını hazırlamaq üçün Poznan (Polşa) yaxınlığındakı toplantı zalında hazırlıqlar gördü.

7. 

   17 mart 2022-ci il: İlk yardım ləvazimatlarının test üçün çatdırılmasından 4 gün sonra, qardaşlar 14 tonluq yardım qutularını Ukraynaya aparmağa başladılar.

8. 

   21-27 mart 2022-ci il: Yardım qutularının qalan hissəsi eyni üsulla Polşada hazırlanıb Ukraynaya göndərildi və 24 saat içində ehtiyac olan yerlərə çatdırıldı.

9. 

   28 mart 2022-ci il: Qardaşların razılıq verməsindən 20 gün keçməmiş Ukraynaya 110 ton ərzaq, gigiyenik və tibbi yardım vasitələri göndərildi.

İndiyədək Yehovanın Şahidləri Ukraynaya 209 tondan çox humanitar yardım göndərib.