Gözlərini sağlam saxla
1. Sağlam gözə malik olmaq nə deməkdir və bu nə üçün vacibdir?
1 İsa Dağüstü təbliğində ruhani və ya məcazi gözün bizim bütün həyat tərzimizə göstərə biləcəyi böyük tə’sirə diqqət yönəltmişdir. O demişdir: “Beləliklə, gözün sağlam olsa, bütün bədənin işıqlı olacaqdır. Fəqət gözün şikəst olarsa, bütün bədənin qaranlıq olar” (Mat. 6:22, 23). Sağlam göz yalnız bir məqsədə — Allahın iradəsini yerinə yetirməyə mərkəzləşdirilir və o maddi əşyalar üçün həddindən artıq narahatçılığa yayınmır (Mat. 6:19-21, 24-33). Gözü sağlam saxlamaqda bizə nə kömək ola bilər?
2. Maddi əşyalara dair Allahın Kəlamı hansı tarazlı nöqteyi-nəzərə təşviq edir?
2 Kifayətlənmək qabiliyyətini inkişaf etdir. Ailə üzvlərinin maddi ehtiyaclarını tə’min etmək Müqəddəs Kitabın üzərimizə qoyduğu məs’uliyyətdir (1 Tim. 5:8). Amma bu o demək deyil ki, biz daima ən yaxşı və ən yeni şeyllərin dalınca qaçmalıyıq (Sül. məs. 27:20; 30:8, 9). Əksinə, Müqəddəs Yazılar bizi təşviq edir ki, yemək və paltarla kifayətlənək (1 Tim. 6:8; İbr. 13:5, 6). Bu məsləhətə diqqət yetirməyimiz gözümüzün düzgün istiqamətdə olmasına kömək edə bilər.
3. Özümüzü əbəs yerə yükləməkdən qaçınmaqda bizə nə kömək edə bilər?
3 Özümüzü əbəs yerə borclarla və əmlakla yükləməli və ya çox vaxt və güc tələb edən işlərlə məşğul olmalı deyilik (1 Tim. 6:9, 10). Bunda bizə nə kömək edə bilər? Bir şey etməzdən əvvəl duada hər şeyi götür-qoy et və: “Bu mənim ruhani məqsədlərə nail olmağıma mane olacaqmı?” sualına vicdanla cavab ver. Ruhani işləri həyatında birinci yerə qoymağa qəti qərarlı ol (Filip. 1:10; 4:6, 7).
4. Həyat tərzimizi sadələşdirməyin yollarını axtarmaq nəyə görə lazımdır?
4 Həyat tərzini sadələşdir. Əgər həyat tərzimizi sadələşdirsək, var-dövlət hərisliyinə müqavimət göstərmək asan olacaqdır. Ailəsinin az maddi şeylərlə kifayətlənə biləcəyini görən bir qardaş belə demişdi: “İndi yığıncaqda qardaşlarıma xidmət etmək üçün daha çox şey edə bilirəm. Mən əminəm ki, Yehova həqiqi ibadəti şəxsi maraqlarından üstün tutan bütün xidmətçilərini xeyir-dualandırır”. Həyat tərzini sadələşdirməklə sən daha çox xeyir-dualar qazana bilərsənmi?
5. Gözlərimizi sağlam saxlamaq üçün nəyə görə daima güc sərf etmək lazımdır?
5 Şeytanın tə’sirinə, onun var-dövlətə hərislik meyli oyadan dünyasına və öz qeyri-kamilliyimizə müqavimət göstərmək üçün daima güc sərf etmək lazımdır. Gözlərimizin yayınmasına yol vermək əvəzinə, gəlin onları Allahın iradəsini yerinə yetirməyə və qiymətli əbədi həyat ümidimizə cəmləşdirək (Sül. məs. 4:25; 2 Kor. 4:18).