Fəsil 32

Şənbə günü hansı işləri görmək olar?

BAŞQA bir şənbə günü İsa Məsih Qalileya gölünün yaxınlığında bir sinaqoqa gəlir. Orada əli qurumuş bir adam var. Din xadimləri olan mirzələr və fəriseylər İsanın bu adamı sağaldıb sağaltmayacağını görmək üçün İsanı gözdən qoymurlar. Nəhayət onlar soruşurlar: «Qanuna görə şənbə günü adam sağaltmaq olar?»

Yəhudi din rəhbərləri belə hesab edirlər ki, şənbə günü yalnız insanın həyatı təhlükə altında olanda onu müalicə etmək olar. Misal üçün, onlar öyrədirlər ki, şənbə günü çıxmış sümüyü yerinə salmaq, yaxud burxulmuş yeri sarımaq qanuna ziddir. Buna görə də mirzələrlə fəriseylər İsanı təqsirləndirməyə bəhanə tapmaq üçün bu sualı verirlər.

İsa onların fikrini bilir. İsa bunu da yaxşı bilir ki, onların şənbə günü əmrinə dair baxışları ifratdır və Müqəddəs Yazılara əsaslanmır. Bu səbəbdən İsa onların yanlış mövqelərinə qarşı çıxır və həmin kişiyə: «Dur, ortaya keç», — deyir.

İsa mirzələrə və fəriseylərə müraciət edir: «Aranızda elə adam varmı ki, bircə qoyunu olsa və həmin qoyun şənbə günü çalaya düşsə, onu oradan çıxarmasın?» Sahibi qoyundan mənfəət götürdüyündən heyvanı səhərə kimi çalada saxlamaz. Çünki qoyun xəstələnsə, sahibi zərər çəkə bilər. Üstəlik, Müqəddəs Yazılarda belə deyilir: «Saleh insan hətta heyvanlarının ehtiyacını duyar».

Sonra İsa müqayisə edərək deyir: «Belə isə, görün insan qoyundan nə qədər qiymətlidir! Bəli, qanuna görə şənbə günü yaxşı iş görmək olar». Din rəhbərləri bu cür məntiqli və mərhəmət dolu dəlilin qarşısında aciz qalıb susurlar.

İsa onların bu qədər daşürəkli olduqlarından bərk kədərlənir. O, qəzəblə onları süzüb şikəst adama deyir: «Əlini uzat». Həmin adam əlini uzadır və əli dərhal sağalır.

Fəriseylər, şikəst adamın əlinin sağaldığına sevinmək əvəzinə, çölə çıxıb İsanı öldürmək üçün Hirodun ardıcılları ilə birgə plan qururlar. Hirodçular siyasi qrupdur, bu qrupa din xadimləri olan sadukeylər də daxildir. Bu qrup fəriseylərlə açıq-aşkar düşmənçilik edir, lakin İsa Məsihə qarşı çıxmaq üçün onlar birləşirlər. Matta 12:9—14; Mark 3:1—6; Luka 6:6—11; Süleymanın məsəlləri 12:10; Çıxış 20:8—10.

▪ İsa Məsihlə yəhudi din rəhbərləri arasında qarşıdurma necə başlayır?

▪ Yəhudi din rəhbərləri şənbə günündə xəstə adamı sağaltmağa necə baxırlar?

▪ İsa Məsih yanlış fikirləri ifşa etmək üçün hansı məsəli çəkir?