DƏRS 2

Danışıq üslubu

2 Korinflilərə 2:17

İCMAL: Təbii və səmimi danış.

Dua et və ciddi hazırlaş. Fikrini özünə yox, mövzuya cəmləmək üçün dua et. Dinləyicilərə çatdırmaq istədiyin əsas fikirləri müəyyən et. Fikirləri öz sözlərinlə ifadə et, nəşrdə yazıldığı kimi sözbəsöz söyləmə.

Əgər Müqəddəs Kitabdan və ya başqa nəşrdən parça oxuyacaqsansa, materialı yaxşı mənimsə ki, səlis oxuyasan. Sitatları canlı oxu, amma rola girmə.
Ürəkdən danış. Mövzunun dinləyicilər üçün nəyə görə vacib olduğu barədə düşün. Diqqətini dinləyicilərə cəmlə. Onda duruşundan, jestlərindən, üzündən səmimiyyət və mehribanlıq duyulacaq.

Təbiilik həddən artıq sərbəst olmaq demək deyil. Aydın və savadlı danış ki, sözlərin dəyərini itirməsin.
Dinləyicilərə bax. Əgər ədəbsizlik sayılmırsa, dinləyicilərlə göz təması yarat. Çıxış edərkən auditoriyaya ümumi göz gəzdirməkdənsə, çıxış boyu müxtəlif insanlarla göz təması qur.