Avtomobil sürməyi dayandırım?

Tanış vəziyyətdir? Bəs necə müəyyən edə bilərsiniz ki, avtomobil sürməyi dayandırmalısınız, ya yox?

Bəzi ölkələrdə sürücülər müəyyən yaşa çatandan sonra sürücülük vəsiqəsini yeniləmək üçün həkim müayinəsindən keçməlidirlər. Bu ölkələrdə yaşayan məsihilər dövlətin qanununa və verilən qərara tabe olurlar (Rom. 13:1). Ola bilsin, sizin ölkədə bu cür qanunlar yoxdur. Bununla belə, avtomobili təhlükəsiz sürüb-sürmədiyinizi müəyyən etmək üçün bir neçə yol var.

ÖZÜNÜZÜ YOXLAYIN

ABŞ-nin Yaşlanma üzrə Milli İnstitutunun rəsmi veb-saytında yaşlı insanların növbəti suallar üzərində düşünməsi tövsiyə olunur:

• Yol işarələrini oxumaq və ya gecələr görmək mənə çətin olur?

• Güzgülərə baxmaq, ya da avtomobilin kor nöqtəsini görmək üçün boynumu döndərməyə çətinlik çəkirəm?

• Cəld reaksiya verməyə, məsələn, ayağımı qaz pedalından çəkib, əyləc pedalına qoymağa gecikirəm?

• Nəqliyyat axınına mane olacaq dərəcədə asta sürürəm?

• Son vaxtlar tez-tez qəza vəziyyəti yaratmışam, yaxud hərəkətsiz obyektlərə dəydiyim üçün avtomobilimdə cızıqlar və dəliklər var?

• Yolda məni polis saxlayıb?

• Sükan arxasında nə vaxtsa mürgüləmişəm?

• Sürücülük qabiliyyətimə təsir edən dərman içirəm?

• Ailə üzvlərim və dostlarım avtomobil sürməyimlə bağlı narahatlıqlarını bildirirlər?

Əgər bu suallardan birinə və ya ikisinə “hə” deyə cavab verdinizsə, bəlkə də, müəyyən dəyişikliklər etməyiniz yaxşı olar. Məsələn, avtomobil sürmək müddətinizə məhdudiyyət qoya bilərsiniz, əsas da gecə saatlarında. Necə sürdüyünüzü tez-tez nəzərdən keçirin. Bununla bağlı ailə üzvünüzün və ya dostunuzun fikrini soruşa bilərsiniz. Təhlükəsiz sürücülük bacarığına yiyələnmək üçün kurslara gedə bilərsiniz. Lakin bayaqkı sualların çoxuna “hə” deyə cavab verdinizsə, sükan arxasına ümumiyyətlə əyləşməməyiniz məsləhətdira.

MÜQƏDDƏS KİTAB PRİNSİPLƏRİNİ NƏZƏRƏ ALIN

Sürücülük bacarığınızın zəiflədiyini siz özünüz hiss etməyə bilərsiniz. Bəlkə də, daha avtomobil sürə bilməyəcəyiniz haqda heç düşünmək belə istəmirsiniz. Bəs vəziyyətinizə hərtərəfli baxmağa və hikmətli qərar verməyə Müqəddəs Kitab necə kömək edə bilər? Gəlin iki prinsipə nəzər salaq.

Təvazökar olun (Məs. 11:2). Yaşa dolduqca görmə və eşitmə qabiliyyətimiz, əzələlərimiz və reaksiyamız zəifləyir. Məsələn, çox adam müəyyən bir yaşdan sonra bəzi idman növləri ilə məşğul olmur, çünki başa düşür ki, yaşlandıqca zədələnmək riski artır. Eyni şeyi avtomobil sürməyə də aid etmək olar. Təvazökar insan başa düşür ki, artıq onun üçün sükan arxasına əyləşmək təhlükəlidir (Məs. 22:3). Həmçinin o başqalarının bununla bağlı narahatlığını nəzərə alır. (2 İşmuil 21:15—17 ayələri ilə əlaqələndirin.)

Heç kimin qanına bais olmayın (Qan. 22:8). Avtomobil təhlükəsiz idarə olunmazsa, silaha çevrilə bilər. Sürücülük bacarığının zəifləməsinə baxmayaraq, sükan arxasına əyləşən insan həm özünün, həm də başqalarının həyatını təhlükəyə atır. Onun ucbatından ölümlə nəticələnən qəza baş versə, kiminsə qanı onun boynunda qalacaq.

Düşünməyin ki, daha avtomobil sürməsəniz, ətrafınızdakı insanların gözündən düşərsiniz. Yehova sizi sevir. O, sizin təvazökarlığınızı, başqalarını düşündüyünüzü, eləcə də digər gözəl xüsusiyyətlərinizi görür və dəyərləndirir. Yehova sizə dayaq olacağına və təsəlli verəcəyinə söz verir (Əşy. 46:4). O, heç vaxt sizi atmayacaq. Buna görə də avtomobil sürüb-sürməməklə bağlı qərar verərkən Ondan xahiş edin ki, sizə hikmət versin və Müqəddəs Kitab prinsiplərini nəzərə almağınıza kömək etsin.