Һуғыштар нисек юҡ ителәсәк?

АЛЛА КЕШЕЛЕК ХӨКҮМӘТТӘРЕН ЮҠҠА СЫҒАРАСАҠ

Һармагеддонa тип аталған Алла һуғышы ваҡытында ер йөҙөндәге бөтә кешелек хөкүмәттәре юҡ ителер (Асылыш 16:16). Ул ваҡытта «бөтә донъя батшалары» бергәләп «сикһеҙ ҡөҙрәт Эйәһе Алланың бөйөк көнөндә һуғышҡа йыйы[лыр]» (Асылыш 16:14). Һармагеддон ер йөҙөндә булған һуғыштарҙың иң һуңғыһы булыр.

Алла кешелек хөкүмәттәре урынына күктән идара итәсәк Батшалыҡ, йәғни хөкүмәт урынлаштырыр. Был Батшалыҡ бер ҡасан да емерелмәҫ (Даниял 2:44). Батша итеп Алла үҙенең Улы Ғайса Мәсихте һайлаған (Ишағыя 9:6, 7; Матфай 28:18) Тап шул хөкүмәт, йәғни Батшалыҡb тураһында Ғайса үҙ шәкерттәрен доға ҡылырға өйрәткән дә (Матфай 6:9, 10). Алла Батшалығының идараһы аҫтында ер шарындағы бөтә кешеләр тыныслыҡта, берҙәмлектә йәшәр.

Әлеге идарасыларҙан айырмалы рәүештә, Ғайса үҙенә бирелгән хакимлыҡты үҙ файҙаһына бер ҡасан да ҡулланмаҫ. Ғайса ғәҙел булғанға һәм бөтә кешеләрҙе бер тигеҙ күргәнгә, бер кем дә расаһы, милләте, сығышы арҡаһында кәмһетелмәҫ (Ишағыя 11:3, 4). Бер кемгә лә үҙ хоҡуҡтары өсөн көрәшергә тура килмәҫ. Ни өсөн? Сөнки Ғайса һәр кешенең именлеге хаҡында ҡайғыртыр. Изге Яҙмала Ғайса Мәсих тураһында: «Ярҙам һорап саҡырған фәҡирҙе, таянысы булмаған ярлыны ҡотҡарыр. [...] Уларҙы йәбер-золомдан йолоп алыр», — тиелә (Зәбур 71:12—14).

Алла Батшалығының идараһы аҫтында кешелек, ниһайәт, һәләкәтле ҡоралдарҙан арыныр (Миҡай 4:3). Был Батшалыҡ шулай уҡ «яуызлыҡ эшләүселәр[ҙе]», йәғни һуғышыуҙан туҡтарға теләмәгән кешеләрҙе юҡ итер (Зәбур 36:9, 10). Ирҙәр, ҡатындар һәм балалар ер йөҙөнөң ниндәй генә төбәгендә йәшәһә лә, үҙҙәрен хәүефһеҙ тойор (Йәзәкил 34:28).

Алла Батшалығының идараһы аҫтында кешеләр камил шарттарҙа рәхәтләнеп йәшәр. Бөгөн төрлө проблемалар, мәҫәлән, ярлылыҡ, аслыҡ һәм торлаҡ булмауы кешеләрҙе көрәшергә этәрә. Әммә Алла Батшалығы бөтә был проблемаларҙы юҡҡа сығарыр. Һәр кешенең етерлек файҙалы ризығы, уңайлы йорто булыр (Зәбур 71:16; Ишағыя 65:21—23).

Алла Батшалығы һуғыштарҙың ҡот осҡос эҙемтәләрен бөтөрөр. Был үҙ эсенә физик яраларҙы ғына түгел, шулай уҡ психик һәм эмоциональ яраларҙы ла ала. Алла үлгән кешеләрҙе ерҙәге тормош өсөн терелтер (Ишағыя 25:8; 26:19; 35:5, 6). Беҙ ғәзиз яҡындарыбыҙ менән ҡабат осрашырбыҙ, ә инде һуғыш менән бәйле ҡурҡыныс хәтирәләр беҙҙе бүтән бер ҡасан да ғазапламаҫ (Асылыш 21:4).

АЛЛА ГОНАҺТЫ ЮҠ ИТӘСӘК

Алла Батшалығы бөтә кешеләрҙе берләштерер, һәм улар берҙән-бер хаҡ Аллаға, «мөхәббәт һәм именлек» Аллаһына, Йәһүәгәc, хеҙмәт итер (2 Кәринттәргә 13:11). Кешеләр татыулыҡта йәшәргә өйрәнер (Ишағыя 2:3, 4; 11:9). Аллаға тыңлаусан булғандарҙың барыһы ла гонаһтың эҙемтәләренән азат ителер (Римдарға 8:20, 21).

АЛЛА ШАЙТАНДЫ ҺӘМ ЕНДӘРҘЕ ЮҠ ИТӘСӘК

Алла Батшалығы һуғыштарға ҡотортҡан рухи заттарҙы — Шайтан менән ендәрҙе юҡ итер (Асылыш 20:1—3, 10). Кешелек уларҙың йоғонтоһонан азат ителгәс, бөтә ер йөҙөндә тыныслыҡ хөкөм һөрөр (Зәбур 71:7).

Бер ҙә шикләнмәгеҙ: Алланың һуғыштарҙы бөтөрөр тигән вәғәҙәһе үтәлмәй ҡалмаҫ. Быны эшләр өсөн уның теләге лә, мөмкинлектәре лә бар.

• Алла зирәклеккә лә, көс-ҡеүәткә лә эйә, шуға ул һуғыштарҙы бөтөрә ала (Әйүп 9:4). Уның өсөн булдыра алмаҫлыҡ бер нәмә лә юҡ (Әйүп 42:2).

• Кешеләрҙең ғазапланыуын күргәндә, Алланың йөрәге әрней (Ишағыя 63:9). Ул «яуызды, золом яратыусыны» нәфрәт итә (Зәбур 10:5).

• Алла һәр ваҡыт үҙ һүҙен тота, ул бер ҡасан да алдамай (Ишағыя 55:10, 11; Титҡа 1:2).