37-СЕ ДӘРЕС

Изге Яҙмала эш һәм аҡса тураһында нимә әйтелә?

Баҫтырылған формат

Һин ҡасан да булһа эш йәки аҡса тураһында борсолғаның бармы? Ҡайһы саҡта беҙгә аҡса эшләү ҙә, шул уҡ ваҡытта Йәһүәгә ғибәҙәт ҡылыу ҙа ауыр булырға мөмкин. Изге Яҙмалағы кәңәштәр беҙгә был яҡтан ярҙам итә ала.

1. Изге Яҙмала эш тураһында нимә әйтелә?

Йәһүә эштең беҙгә ҡәнәғәтлек килтереүен теләй. Изге Яҙмала: «Кеше өсөн... тырыш хеҙмәте менән йәненә рәхәтлек килтереүҙән яҡшыраҡ нәмә юҡ», — тип әйтелә (Вәғәзсе 2:24). Йәһүә арымай-талмай тырышып эшләй. Әгәр ҙә беҙ унан өлгө алып тырышып эшләһәк, эшебеҙҙән ҡәнәғәтлек тә алырбыҙ, уның йөрәген дә һөйөндөрөрбөҙ.

Эш — мөһим нәмә, әммә ул Йәһүәгә ғибәҙәт ҡылыуҙан мөһимерәк булып китергә тейеш түгел (Яхъя 6:27). Алланы беренсе урынға ҡуйһаҡ, ул беҙгә тормош өсөн кәрәк булғандың барыһын бирергә вәғәҙә итә.

2. Аҡсаға дөрөҫ ҡараш үҙ эсенә нимәне ала?

Изге Яҙмала: «Аҡса... яҡлау бирә», — тиелә, әммә унда, аҡса беҙҙе бәхетле итә алмай, тип тә әйтелә (Вәғәзсе 7:12). Шуға күрә ул беҙҙе аҡсаны яратыуҙан киҫәтә һәм «бары менән ҡәнәғәт йәшәгеҙ» тип өндәй. (Еврейҙарға 13:5-те уҡы.) Булғанына ҡәнәғәт булһаҡ, шул кәрәк, был кәрәк, тип ҡайғырып ултырмаҫбыҙ. Һөҙөмтәлә беҙ кәрәкмәгән борсолоуҙарҙан һәм бурыстарҙан азат булырбыҙ (Ғибрәтле һүҙҙәр 22:7). Шулай уҡ үҙебеҙҙе ҡомарлы уйындар һәм анһат ҡына аҡса эшләү ысулдары менән бәйле ҡурҡыныстарҙан яҡларбыҙ.

3. Аҡсаны башҡаларға ярҙам итер өсөн нисек ҡулланырға?

Йәһүә — ул йомарт Алла. Йомарт булып һәм үҙебеҙҙә «булғанды башҡалар менән бүлешергә әҙер тор[оп]», беҙ унан өлгө алабыҙ (1 Тимофейға 6:18). Беҙ аҡсабыҙҙы йыйылышҡа булышлыҡ итер өсөн һәм мохтаждарға, айырыуса ҡәрҙәштәребеҙгә, ярҙам итер өсөн ҡуллана алабыҙ. Йәһүә өсөн күпме биргәнебеҙ түгел, ә быны ниндәй теләк менән эшләгәнебеҙ мөһим. Йомарт булһаҡ һәм ысын күңелдән бирһәк, беҙ бәхетле булырбыҙ һәм Йәһүәне һөйөндөрөрбөҙ. (Ғәмәлдәр 20:35-те уҡы.)

КҮБЕРӘК БЕЛ

Эшкә дөрөҫ ҡараш һаҡлау һәм булғанына ҡәнәғәт булыу ниндәй файҙа килтергәнен бел.

4. Эшең Йәһүәгә дан килтерһен

Йәһүә менән дуҫлығыбыҙ эшкә ҡарата ҡарашыбыҙға тәьҫир итергә тейеш. ВИДЕОЯҘМАНЫ ҡара һәм һорауҙарға яуап бир:

ВИДЕОЯҘМА: «Йәһүә өсөн ысын күңелдән эшләгеҙ» (4:39)

Джейсондың эшкә ҡарашы һәм эштәге тәртибе һиңә нимәһе менән оҡшаны?
Тормошонда эше тейешле урында булһын өсөн, ул нимә эшләне?

Колосстарға 3:23, 24-те уҡы һәм яуап бир:

Ни өсөн тырышып эшләү мөһим?

Рәсемдәрҙә: кеше үҙ эшен тормошта беренсе урынға ҡуя. 1. Ул көнө буйы эшләй. 2. Эштән һуң ҡалып эшләй. 3. Хеҙмәттәштәре өйгә ҡайтып киткәс тә, ул эштә ҡала. 4. Өйгә ҡайтып, киске ашты бер үҙе ашай.

Эш — мөһим нәмә, әммә ул бер ҡасан да Йәһүәгә ғибәҙәт ҡылыуҙан мөһимерәк булып китергә тейеш түгел

Рәсемдәрҙә: шул уҡ кеше мөһимерәк эштәргә ваҡыт бүлә. 1. Ул көнө буйы эшләй. 2. Эштән һуң өйгә ҡайта. 3. Йыйылыш осрашыуында ҡулын күтәрә. 4. Киске ашты ҡатыны һәм ике балаһы менән ашай.

5. Булғанына ҡәнәғәт булыу — беҙҙең өсөн яҡлау

Күптәр мөмкин тиклем күберәк аҡса эшләргә тырыша. Әммә Изге Яҙма бөтөнләй башҡаса эш итергә өндәй. 1 Тимофейға 6:6—8-ҙе уҡы һәм һорауға яуап бир:

Изге Яҙма беҙҙе нимәгә дәртләндерә?

Бай булмаһаҡ та, беҙ бәхетле була алабыҙ. ВИДЕОЯҘМАНЫ ҡара һәм һорауға яуап бир.

ВИДЕОЯҘМА: «Булғанына ҡәнәғәт булығыҙ» (3:20)

Ярлылыҡҡа ҡарамаҫтан, ни өсөн был ғаиләләр бәхетле?

Етеш йәшәп тә булғанына ҡәнәғәт булмаһаҡ, нимә эшләргә? Ғайса, бер хикәйә һөйләп, ундай ҡараштың нимәһе менән ҡурҡыныс булғанын аңлатҡан. Лука 12:15—21-ҙе уҡы һәм яуап бир:

Ғайсаның хикәйәһенән ниндәй һабаҡ алып була? (15-се аятты ҡара.)

Ғибрәтле һүҙҙәр 10:22 һәм 1 Тимофейға 6:10-ды уҡы һәм сағыштыр. Шунан ошо һорауҙарға яуап бир:

Һинеңсә, нимә мөһимерәк: Йәһүә менән дуҫлыҡмы йәиһә күп аҡсамы? Ни өсөн?
Аҡса артынан ҡыуыу ниндәй ауырлыҡтар тыуҙыра?

6. Йәһүә ихтыяждарыбыҙ хаҡында ҡайғыртыр

Эш һәм аҡса менән бәйле проблемалар иманыбыҙҙы һынарға мөмкин. ВИДЕОЯҘМАНЫ ҡарап, шундай иман һынауҙарын нисек еңеп сығып булғанын бел. Шунан һорауҙарға яуап бир.