Yésaya

39 Ha ngéda i nyen kiñe Babilôn le Mérôdak-Baladan, man Baladan, a bi éble Hézékia+ bikaat ni likébla, inyule a bi nok le Hézékia a bé kon, ndi a yik mbôôp.+ 2 Hézékia a leege bo ni maséé, a unda ki bo homa a bé téédana tik yé gwom,+ hala wee: silba, gôl, môô ma bie bi numb loñge,* biloñge bi môô bipe, bijôl gwé bi gwét gwobisôna, ni gwom gwobisôna bi bé mu matéédana mé ma nkus. Yom yo ki yo i bi yégle bé le Hézékia a bi unda bé bo mu ndap* yé, to mu nkoñ wonsôna a bé ane.

3 I mbus ha, mpôdôl Yésaya a bat Kiñe Hézékia le: “Kii i bôt ba, ba nkal we? Ba nlôl hee?” Hézékia a timbhe nye le: “Ba nlôl i loñ i yé haa ngandak, i Babilôn.”+ 4 Yésaya a bat ki nye le: “Kii ba ntehe mu ndap* yoñ?” Hézékia a timbhe nye le: “Ba ntehe gwom gwobisôna bi yé mu ndap yem. Yom yo ki yo i nyégle bé le me ñunda bé bo mu matéédana mem ma nkus.”

5 Ha nyen Yésaya a kal Hézékia le: “Emble ni i jam Yéhôva nu mintôñ mi gwét a mpot: 6 ‘Ngéda y’a lo le ba ga yoñ i gwom gwobisôna bi yé mu ndap* yoñ, gwom gwobisôna basôgôlsôgôl boñ ba bi tééda letee ni len, ba kena gwo i Babilôn. Yom to yada i ga yégle bé,’+ hala nyen Yéhôva+ a nkal. 7 ‘B’a kena ngim bôt ikété mbôda yoñ i minkôm, b’a yila bôt ba ngomin i ndap kiñe Babilôn.’”+

8 Hézékia a timbhe Yésaya le: “I jam Yéhôva a mpot li yé loñge.” A kal ki le: “Inyule loñ y’a ba ikété nsañ ni nwee* dilo di niñ yem tjodisôna.”*+