Yérémia

41 I sôñ i nyônôs isaambok, Ismael,+ man Nétania, man Élisama, a bé mu lihaa li kiñe,* a bak ki ikété mintôô mi bôt mi kiñe, a bi lo ni jôm li bôt yak Gédalia man Ahikam i Mizpa.+ Kiki ba bé je ntôñ i Mizpa, 2 ha nyen Ismael man Nétania, ni jôm li bôt li bé lôñni nye ba nol Gédalia man Ahikam, man Safan ni pansoñ. Hala nyen, ba bi nol i mut nu kiñe Babilôn a bi téé le a ane loñ. 3 Ismael a nol ki bôt ba Lôk Yuda ba ba bé ni Gédalia i Mizpa, yak bisônda bi Kaldéa bi bi bé ha, a nol bo.

4 I hilo hi bé noñ nyemb Gédalia, ilole mut nye ki nye a nyi i jam li, 5 i bôt ba bé lôl i Sikem,+ i Silô+ ni i Samaria+ ba bé 80. Mayéé map ma bé nhombok, ba ma pat mambot map, ba ma kek manyuu map,+ ba bak ki ba gwé makébla ma bijek ni binunumba+ i moo inyu kena gwo i ndap Yéhôva. 6 Ismael, man Nétania, a bi nyodi i Mizpa inyu boma bo, a kenek, a eek. I ngéda a bi boma bo, a kal bo le: “Di kengana yak Gédalia, man Ahikam.” 7 Ndi i ngéda ba bi bol i tison, Ismael man Nétania lôñni bôt bé, ba nol bo, ba leñ bo i bee.

8 Ndi jôm li bôt ikété yap li kal Ismael le: “U nol bañ bés, inyule di gwé blé, kôn,* môô ni wéi le di nsôô i bikai.” Ha nyen Ismael a bi nol ha bé bo lôñni lôkisañ yap. 9 Ismael a bi leñ mim mi bôt bobasôna a bi nol ikété bee ikeñi, i bee Kiñe Asa a bi tém i ngéda Baasa kiñe Israel+ a bé han nye. I bee i yon Ismael, man Nétania, a bi yônôs ni mim.

10 Ismael a bi gwel bôt bobasôna ba bi yégle i Mizpa,+ yak bingond bi kiñe ni bôt bobasôna ba bi yégle i Mizpa; i bôt Nébusaradan, ñane batat kiñe, a bi yék isi ane i Gédalia,+ man Ahikam. Ismael man Nétania a bi gwel i bôt ba, a kena bo i Lôk Amôn.+

11 I ngéda Yôhanan,+ man Karéa, lôñni baane ba mintôñ mi gwét ba ba bé ni nye ba bi nok i mam mabe momasôna Ismael, man Nétania, a bi boñ, 12 ba yoñ bôt ba gwét bobasôna, ba ke i jôs Ismael man Nétania, ba koba nye i homa a gwé ngandak malép,* i Gibéôn.

13 I bôt bobasôna Ismael a bi gwel ba bi kon maséé i ngéda ba bi tehe Yôhanan, man Karéa, ni baane ba mintôñ mi gwét bobasôna ba bé ni nye. 14 Ha nyen i bôt bobasôna Ismael a bi gwel i Mizpa+ ba bi hielba, ba ke yak Yôhanan, man Karéa. 15 Ndi Ismael man Nétania, ni bôt juem ba ba bé ni nye, ba kon Yôhanan woñi, ba ke ngwéé i Lôk Amôn.

16 Yôhanan man Karéa ni baane ba mintôñ mi gwét bobasôna ba ba bé ni nye, ba yoñ bôt ba ba bi yégle i Mizpa, hala wee i bôt ba bi sôñ i moo ma Ismael man Nétania, nu a bi nol Gédalia+ man Ahikam. Ba nyodna bo i Gibéôn; bôlôm, bôt ba gwét, bôda, boñge ni bôt ba ngomin ba ndap kiñe. 17 Ba ke ba yén i ndap bakén i Kimham, bebee ni Bétléhém,+ ba bééna ngôñ i ke i Égiptô+ 18 inyule ba bé kon bôt ba Kaldéa woñi. Ba bé kon bo woñi inyule Ismael man Nétania a bi nol Gédalia man Ahikam, nu kiñe Babilôn i bi téé le a ane loñ.+