Kaat Korintô iba
8 Ndi, a lôk kéé, di nsômbôl yis bé jam inyu konangoo i mbuma ñañ i Nyambe makoda ma Makédônia ma bi kôhna.+ 2 I ngéda i lôk kéé ini i bé kôhna njiiha inyule ba bé boma manoodana makeñi, ngandak yap maséé lôñni liyep jap likeñi bi bi boñ le lingwañ li likap jap li bôl.* 3 Inyule me mbok mbôgi le ba bi ti inoñnaga ni bigwel moo gwap,+ ñ, ba bi ti yaga iloo bigwel moo gwap,+ 4 hala kiki ñem wap womede won u bi tinde bo i yemhe bés ibabé waa inyu bana bisai i ti likébla ni loñgeñem, ni i yoñ ngaba i nson mahôla inyu bapubhaga.+ 5 Ba bi boñ yak iloo kiki di bé hoñol, inyule ni njel sômbôl i Nyambe, ba bi bôk ba ti bomede ni ñem wap wonsôna i gwel nson Nwet, ba hôla ki bés. 6 Jon di bi ti Titô+ makénd le, kiki nyen a bi bôdôl unu nson i kot makébla ni bi ti ni loñgeñem nyoo i bééni, wee a mélhak wo. 7 Ndi kiki ni yé mingwañ ikété mam momasôna, ikété hémle, ni ngap i pot,* ni yi, ikété makénd momasôna, ni ikété gwéha yés inyu nan, wee ni ba ki mingwañ ikété lem i kap ni loñgeñem.+
8 Me mpot bé hala inyu ti bé oda, ndi inyu yis bé ngandak makénd bôt bape ba gwé, ni inyu wan too gwéha nan i yé bañga. 9 Inyule ni nyi konangoo i mbuma ñañ i Nwet wés Yésu Kristô, le to hala kiki a bé ngwañ, a bi yila liyep inyu nan,+ inyu boñ le ni yila mingwañ ni njel liyep jé.
10 Me nti mahoñol mem munu jam lini:+ li yé inyu loñge nan, hala kiki bé bon ni bi bôdôl nson unu hala a yé ngim nwii len. Ni bi bôdôl ndik bé wo, ndi ni bi unda ki le ni gwé ngôñ i boñ wo. 11 Jon nano, mélhana i jam ni bi bôdôl, le ngôñ nan i boñ i yon inoñnaga ni bigwel moo ni gwé. 12 Inyule ibale mut a gwé yaga ngôñ i ti, wee likébla jé li ga lémél toi Nyambe, ibale a nti inoñnaga ni mam a gwé,+ handugi ma a gwé bé. 13 Inyule me gwé bé ngôñ i tômbôs mam inyu bôt bape, ndi me lédés mo inyu nan; 14 ndi me ngwés le mam ma kolna, i ngandak gwom ni gwé nano i hô i ndék gwom ba gwé, kayéle yak ngandak yap i hô i ndék ni nla bana, inyu boñ le mam ma kolna. 15 Ndik kiki i yé ntilga le: “I mut a bééna ngandak a bi bana bé ngandak iloo hihéga, yak i mut a bééna ndék a bi bana bé ndék iloo hihéga.”+
16 Ndi Nyambe a kôhna mayéga hala kiki a bi ti Titô ñem u u ntinde nye i tôñ bé ngandak kiki bés,+ 17 inyule a bi nôgôl yaga bés i ngéda di bi lédés nye ñem, ndi kiki ñem u mpabla nye i lo i bééni, nyemede a nyoñ makidik i lo nyoo. 18 Ndi di yé i ep nye ni mankéé nu a bi kôhna lipém ikété makoda momasôna inyu nson a mboñ inyu ñañ nlam. 19 Handugi hala, makoda ma bi téé ki nye le nyen a yéga bés munu maké més kiki di nkap i likébla lini ni nti ni loñgeñem, inyu boñ le Nwet a kôhna lipém, ni inyu unda le di gwé toi ngôñ i hôla. 20 Hala nyen di nkeñgle le bôt ba ôm bés nsohi inyu likébla likeñi lini di yé i kap.+ 21 Inyule di ‘mboñ mam momasôna ni maliga, ha i mis ma Yéhôva* nyetama bé, ndi yak i mis ma bôt ba binam.’+
22 Handugi hala, di yé i om mankéé wés numpe lôñni bo, nu di bi wan ngandak ngélé, di léba le a yé mut a nligip ikété ngandak mam. Bôô ni ngélé yañen ni nano? Ngo a ga kônde ligip inyule a mbôdôl bé ñem ngandak. 23 Ndi ibale ni gwé mbadga yo ki yo inyu Titô, a yé solôñ wem,* a yé ki so ngwelnson wem inyu loñge nan; tole ibale ni gwé mambadga inyu lôk kéé yés, ba yé baôma ba makoda ni lipém li Kristô. 24 Jon undnana bo le gwéha nan i yé toi bañga,+ ni unda ki makoda inyuki di nkônôl bé maséé.*