Masoola Yôhanes a bi kôhna
5 Ndi me tehe nhôôk kaat u u yé ntilga bipes gwo biba* i woo walôm u Nu a yii i yééne ane,+ u bak mbandak loñge ni bibéndél bisaambok. 2 Me tehe ki mpémba añgel u nlegel ni kiñ ikeñi le: “Njee a kôli yibil nhôôk kaat, ni bandal bibéndél gwé?” 3 Ndi mut to wada i ngii, to hana ’isi, to ikété hisi, a bi la bé yibil nhôôk kaat, to béñge mukété. 4 Me bi ee ngandak inyule mut to wada a bi nene bé le a kôli yibil nhôôk kaat, to béñge mukété. 5 Ndi wada ikété mimañ a kal me le: “U ee ha bañ. Nun-ki! Mbondo njéé i litén li Yuda,+ nkañ+ u David,+ nyen a mal yémbél+ kayéle a nla yibil nhôôk kaat ni bibéndél gwé bisaambok.”
6 Ndi i ñemkété* u yééne ane ni u bihégél bi niñ bina, ni i ñemkété u mimañ,+ me tehe man ntômba+ a téé, a nen-ge wengoñle ba bi nol nye,+ a ban-ga bitoñ bisaambok ni mis masaambok; mis ma yé mimbuu mi Nyambe minsaambok+ mi mi bi ôma i hisi hiosôna. 7 Kunda yada a lo, a yoñ wo i woo walôm u Nu a bé a yii i yééne ane.+ 8 I ngéda a bi yoñ nhôôk kaat, bihégél bi niñ bina ni 24 mimañ+ ba ôôp i bisu bi Man ntômba, hiki mañ u ban-ga hiluñ, u ban-ga ki biséya bi gôl bi bi bé nyonok ni binjinjiñ. (Binjinjiñ bi yé masoohe ma bapubhaga.)+ 9 Ndi ba ntôp hiémbi hi mondo,+ ba kalak le: “U kôli yoñ nhôôk kaat ni yibil bibéndél gwé, inyule ba bi nol we, ndi u sômbôl ki Nyambe+ bôt lôñni matjél moñ ikété hiki lihaa, hiki hilémb,* hiki litén, hiki loñ,+ 10 u boñ ki bo le ba ba ngim ane+ ni biprisi inyu Nyambe wés,+ b’a ane+ ki hisi.”
11 Me tehe, me nok ki kiñ i ngandak biañgel i i nkéña yééne ane ni bihégél bi niñ lôñni mimañ, nsoñgi wap u bé didun di didun* ni dikôô di dikôô,+ 12 ba kalak ni kiñ ikeñi le: “Man ntômba ba bi nol+ a kôli kôhna lipémba, ni lingwañ, ni pék, ni ngui, ni lipém, ni bikeñi, ni bisai.”+
13 Me nok ki hiki hégél nyoo i ngii, ni hana ’isi,+ ni ikété hisi, lôñni ikété tuye, yak ni gwom gwobisôna ikété yap bi nkal le: “Bisai, ni lipém,+ ni bikeñi, ni ngui i boga ni boga,+ bi ba ni Nu a yii i yééne ane,+ bi ba ki ni Man ntômba.”+ 14 Bihégél bi niñ bina bi bé kal le: “Amen!” Yak mimañ mi ôôp, mi bégés Nyambe.