Kaat Korintô iba

9 Ndi inyu nson unu inyu bapubhaga,+ i ta yaga bé nseñ le me tilna bé, 2 inyule kiki me nyi ngôñ nan i hôla, jon me mpot i bisu bi bôt ba Makédônia le me nkônôl bé maséé,* le hala a yé ngim nwii nano le lôk kéé i Akaya i yé bebee i hôla, yak ngôñ nan ikeñi i nti libim ikété yap makénd. 3 Ndi me yé i ep lôk kéé kayéle kadba yés inyu nan i ba bañ yañga munu jam lini, le ndi ni ba toi nkôôbaga kiki me bi kal le n’a ba nkôôbaga. 4 Ibale hala bé, ki i ngéda bôt ba Makédônia b’a lo lôñni me, ba koba le ni ta bé nkôôbaga, bés (ibabé i sima bé) d’a wo nyuu inyu bôdôl di mbôdôl bé ñem. 5 Jon me bi tehe nseñ i ti lôk kéé makénd le ba loo i bééni i bisu bi ngéda inyu boñ le ba koba likébla likeñi linan nkôôbaga i bisu bi ngéda, kayéle li ba yaga kiki likébla ni nkôôba ni loñgeñem, ha kiki yom bé le ba nkadal nkadlak.

6 Ndi munu jam lini, nu ni nu a nwes ndék mbôô a ga bumbul ndik ndék, ndi nu ni nu a nwes ngandak mbôô a ga bumbul ki ngandak.+ 7 Hiki mut a boñ kiki a nkit ikété ñem wé, ha ni hiun bé* tole wengoñle ba nyégsa nye,+ inyule Nyambe a ngwés i mut a nti ni ñem maséé.+

8 Handugi hala, Nyambe a nla boñ le konangoo yé i mbuma ñañ yosôna i bôl i ngii nan, le ndi ngéda yosôna ni bana mam momasôna i nya i kôli, ni bôl ki ni mam ma mbéda inyu boñ hiki nson nlam.+ 9 (Ndik kiki i yé ntilga le: “A bi kap ngandak;* a kébél diyeyeba. Telepsép yé i nom i mba ni mba.”+ 10 Ndi Nu a nti nsalnwom ngandak mbôô ni koga i je, a’ ti yak bé mbôô inyu nwes, a bulus ki yo kayéle libumbul li telepsép linan li ba ngandak.) 11 Ikété manjel momasôna ni bi ngwañap, kayéle yak bé ni nla kap ikété manjel momasôna, hala a ntinde bôt i ti Nyambe mayéga ni njel yés; 12 inyule i nson unu ni ngwel inyu loñge i bôt bape, u ta ndik bé inyu ti bapubhaga mam momasôna ma yé bo nseñ,+ ndi u yé ki inyu ti Nyambe mayéga ngandak. 13 Ni njel mam i nson mahôla unu u ñunda, bôt ba nti Nyambe lipém inyule ni nsuhus bébomede isi mam ni ñañal i mbamba inyu ñañ nlam u Kristô, ni inyule ni nti bo ngandak makébla, ni boñ ki nlélém inyu bôt bobasôna.+ 14 Yak ni njel minyemhe inyu nan, ba ñunda bé gwéha inyule sôkbôk konangoo i mbuma ñañ i Nyambe i yé i ngii nan.

15 Nyambe a kôhna mayéga inyu likébla jé li mbuma ñañ a nti yañga.